Magdiretso sa kaundan

Magdiretso sa listahan sang kaundan

Ginpalig-on ang mga Naggradwar sa Gilead nga “Magsugod sa Pagpangutkot”

Ginpalig-on ang mga Naggradwar sa Gilead nga “Magsugod sa Pagpangutkot”

 Ika-123 nga Gradwasyon sang Gilead

Ginpalig-on ang mga Naggradwar sa Gilead nga “Magsugod sa Pagpangutkot”

SANG Sabado, Septiembre 8, 2007, nagtambong ang 6,352 ka tawo gikan sa 41 ka kadutaan sa gradwasyon sang ika-123 nga klase sang Watchtower Bible School of Gilead. Nagsugod ini sa alas 10:00 sang aga paagi sa pag-abiabi sa tumalambong ni Anthony Morris, nga katapo sang Nagadumala nga Hubon, nga amo ang tsirman sang programa. Pagkatapos sang iya nagabukas nga pinamulong, ginpakilala niya ang una nga humalambal, si Gary Breaux nga katapo sang Komite sang Sanga sa Estados Unidos.

Ginpasalig ni Utod Breaux ang mga estudyante nga walay sapayan sang ila mga panagway, ang mga nagahimo sang kabubut-on ni Jehova matahom sa Iya itululok. (Jer. 13:11) Ginpalig-on niya ang mga naggradwar nga huptan ina nga sahi sang katahom. Ginpadaku sang masunod nga humalambal, nga si Gerrit Lösch, katapo sang Nagadumala nga Hubon, nga nagakaigo nga magpaabot kita sing padya kon nagaalagad kita kay Jehova. (Heb. 11:6) Apang, dapat nga ang aton motibo sa pag-alagad amo ang gugma.

Si William Samuelson, ang manugtatap sang Theocratic Schools Department, amo ang masunod nga nagpalig-on sa mga naggradwar nga magpabilin sa ila dungganon nga asaynment sa pagpahibalo tuhoy sa nagagahom nga Hari kag sa pagpakita nga ginatahod nila ini paagi sa ila maayong paggawi. * Ang kabulig nga manugtatap sang Theocratic Schools Department nga si Sam Roberson, nagpalig-on sa ila nga tan-awon ang maayo nga kinaiya sang iban. Sa amo, ‘mahigugma pa gid [sang mga naggradwar] ang bug-os nga paghiliutod.’—1 Ped. 2:17.

Pagkatapos sining makapahulag nga mga pamulongpulong, gin-interbyu ni Mark Noumair, instruktor sang Gilead, ang pila ka naggradwar sa pagsaysay sang ila mga eksperiensia sa pag-alagad sa latagon sa tion sang klase. Nabatyagan gid sang mga tagpalamati nga ginahigugma nila ang ila ministeryo kag ang ila handum sa pagbulig sa iban. Nian gin-interbyu ni Kent Fischer, nga nagaalagad sa Patterson Bethel Office, ang mga katapo sang Komite sang Sanga gikan sa tatlo ka kadutaan nga may mga misyonero. Ang ginsiling sining hamtong nga mga utod nagpasalig sa mga tumalambong lakip na sa mga ginikanan sang mga naggradwar nga ginatatap gid ang bag-uhan nga mga misyonero sa ila teritoryo. Nian gin-interbyu ni Izak Marais, nagaalagad sa Translation Services Department ang pila sang madugay na nga mga misyonero, kag ang ila mga eksperiensia nagpalangkag sa mga naggradwar sa kalipay nga mahimo nila maeksperiensiahan.

Ang katapusan nga humalambal sa programa amo si Geoffrey Jackson, katapo sang Nagadumala nga Hubon, kag ang tig-ulo sang iya pamulongpulong amo, “Pagkatapos Sang Tanan Ninyo nga Nabatian—Ano ang Inyo Himuon?” Nag-alagad si Utod Jackson subong misyonero sing halos 25 ka tuig sa Bagatnan nga Pasipiko. Ginbinagbinag niya ang konklusion sang Sermon sa Bukid. Sa sina nga diskurso, nagpamulong si Jesus tuhoy sa duha ka tawo,  ang isa maalam kag ang isa buangbuang, nga nagtukod sing mga balay. Ginpatalupangod sang humalambal nga ini nga mga balay mahimo ginpatindog sa isa lang ka lokasyon. Apang, ang buangbuang nga tawo nagpatindog sa balas, samtang ang maalam nga tawo nagkutkot tubtob nga nakasapo sia sing igang nga amo ang nangin pundasyon sang iya balay. Sang nag-abot ang mabaskog nga bagyo, ang balay nga gintukod sa igang nakalampuwas, apang ang gintukod sa balas nawasak.—Mat. 7:24-27; Luc. 6:48.

Ginpaathag ni Jesus nga ang buangbuang nga tawo nagapatuhoy sa mga tawo nga namati lamang sa iya ginpamulong apang wala nag-aplikar sini. Ang maalam nga tawo amo yadtong nagpamati kag nag-aplikar sang ginpamulong ni Jesus. Ginsilingan ni Utod Jackson ang mga naggradwar, “Kon iaplikar ninyo sa inyo asaynment ang inyo natun-an sa inyo pagtuon sa Biblia, mangin kaangay kamo sang maalam nga tawo.” Gani sa iya konklusion, ginpalig-on niya ang mga naggradwar nga “magsugod sa pagpangutkot” sa ila mga asaynment.

Sa katapusan, ginhatag sa mga gradwado ang ila mga diploma kag ang ila mga asaynment, kag naghatag si Utod Morris sing hingapusan nga pagpalig-on. Ginpalig-on niya ang mga naggradwar nga pirme sundon si Jesus kag pirme gid magsalig kay Jehova para sa kusog. Nian natapos ang programa sang gradwasyon.

[Footnote]

^ par. 5 Ang Theocratic Schools Department, sa idalom sang pagdumalahan sang Komite sang Pagtudlo, amo ang nagadumala sang Gilead, sang eskwelahan para sa mga katapo sang Komite sang Sanga, kag sang eskwelahan para sa mga nagalakbay nga manugtatap.

[Kahon sa pahina 31]

ESTADISTIKA SANG KLASE

Kadamuon sang pungsod nga gintiglawas: 10

Kadamuon sang pungsod nga ginpadalhan: 24

Kadamuon sang estudyante: 56

Promedyo nga edad: 33.5

Promedyo nga tuig sa kamatuoran: 17.9

Promedyo nga tuig sa bug-os tion nga ministeryo: 13.8

[Piktyur sa pahina 32]

Ika-123 nga Naggradwar nga Klase sang Watchtower Bible School of Gilead

Sa listahan sa ubos, ang mga raya nanumeruhan halin sa atubangan pa likod, kag ang mga ngalan nalista halin sa wala pa tuo sa tagsa ka raya.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.