Magdiretso sa kaundan

Magdiretso sa listahan sang kaundan

Ang mga “Husto nga Nahuyog” Nagabaton

Ang mga “Husto nga Nahuyog” Nagabaton

 Ang mga “Husto nga Nahuyog” Nagabaton

“Ang tanan nga husto nga nahuyog para sa kabuhi nga walay katapusan nangin mga tumuluo.”—BINU. 13:48, NW.

1, 2. Paano nagtuman ang una nga mga Cristiano sa tagna ni Jesus nga ibantala ang maayong balita sa bug-os napuy-an nga duta?

GINTIPIGAN sang tulun-an sang Binuhatan sa Biblia ang makakulunyag nga kasaysayan kon paano nagtuman ang mga Cristiano sa tagna ni Jesus nga ibantala ang maayong balita sang Ginharian sa bug-os napuy-an nga duta. (Mat. 24:14) Ang makugihon nga mga manugbantala nagpahamtang sing maayo gid nga halimbawa sa tanan nga magasunod sa ila. Bangod sa mapisan nga pagpanaksi sang mga disipulo ni Jesus sa Jerusalem, linibo ka tawo, lakip “ang isa ka daku nga kadam-an sang mga saserdote,” ang nangin bahin sang unang-siglo nga kongregasyon.—Binu. 2:41; 4:4; 6:7.

2 Ang una nga mga misyonero madamo sing nabuligan nga magbaton sang Cristianismo. Halimbawa, si Felipe nagkadto sa Samaria, diin madamo ang nagtalupangod sa iya pagbantala. (Binu. 8:5-8) Pirme naglakbay si Pablo upod sa nanuhaytuhay nga mga Cristiano, nga nagbantala sang mensahe nahanungod kay Cristo sa Cipre, sa bahin sang Asia Minor, sa Macedonia, sa Gresya, kag sa Italya. Madamo katama nga Judiyo kag Griego ang nangin mga tumuluo sa mga siudad nga iya ginbantalaan. (Binu. 14:1; 16:5; 17:4) Si Tito nagministeryo sa Creta. (Tito 1:5) Si Pedro naman masako sa pagbantala sa Babilonia, kag sang ginsulat na niya ang iya nahaunang sulat sang mga 62-64 C.E., naglapnag na ang pagbantala sang mga Cristiano sa Ponto, Galacia, Capadocia, Asia, kag Bitinia. (1 Ped. 1:1; 5:13) Daw ano gid sadto ka makakulunyag nga mga tion! Tuman gid kakugi yadtong unang-siglo nga mga Cristiano amo nga ginsiling sang ila mga kaaway nga ‘gingamo nila ang napuy-an nga duta.’—Binu. 17:6, NW; 28:22.

3. Ano nga mga resulta ang natigayon karon gikan sa pagbantala sang mga manugbantala sang Ginharian, kag ano ang ginabatyag mo sa sini?

3 Sa sining moderno nga tion, ang Cristianong kongregasyon nakaeksperiensia man sing daku nga pag-uswag. Indi bala mapalig-on gid kita samtang ginabasa naton ang tuigan nga report sang mga Saksi ni Jehova kag makita ang mga resulta nga natigayon sa bug-os nga kalibutan? Indi bala makalilipay nga mahibaluan nga ang mga manugbantala sang Ginharian nagdumala sing kapin sa anom ka milyon ka pagtinuon sa Biblia sang 2007 nga tuig sang pag-alagad? Isa pa, ginapakita sang kadamuon sang nagtambong sa Memoryal sang kamatayon ni Jesucristo sang nagligad nga tuig nga mga napulo ka milyon nga indi pa mga Saksi ni Jehova ang interesado sa maayong balita amo nga nagtambong sila sa sining importante nga selebrasyon. Ginapakita sini nga daku pa ang hilikuton nga dapat himuon.

4. Sin-o ang mga nagabaton sang mensahe sang Ginharian?

4 Sa karon, kaangay man sang unang siglo, “ang tanan nga  husto nga nahuyog para sa kabuhi nga walay katapusan” nagabaton sang mensahe sang kamatuoran. (Binu. 13:48, NW) Ginabuyok ni Jehova ining mga tawo sa iya organisasyon. (Basaha ang Hageo 2:7.) Ano nga panimuot sa Cristianong ministeryo ang dapat naton huptan agod makapakigbahin kita sing bug-os sa sining pagtipon nga hilikuton?

Indi Magpasulabi Kon Nagabantala

5. Ano nga sahi sang mga tawo ang ginakahamut-an ni Jehova?

5 Nahangpan sang unang siglo nga mga Cristiano nga “ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” (Binu. 10:34, 35, NW) Ang maayong kaangtanan sang isa ka tawo kay Jehova nagadepende sa iya pagpakita sing pagtuo sa halad-gawad ni Jesus. (Juan 3:16, 36) Kag kabubut-on ni Jehova nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.”—1 Tim. 2:3, 4.

6. Ano dapat ang halungan sang mga manugbantala sang Ginharian, kag ngaa?

6 Dapat maghalong ang mga manugbantala sang maayong balita nga indi nila hukman ang mga tawo base sa rasa, estado sa katilingban, dagway, relihion, ukon iban pa nga mga kinaiya. Binagbinaga ini sing makadali: Wala ka bala nagpasalamat nga wala ka anay ginhukman sang tawo nga una nga nagsugid sa imo sang kamatuoran sa Kasulatan? Busa, indi kita dapat maglikaw sa paghatag sing makaluwas-kabuhi nga mensahe sa bisan sin-o nga mahimo mamati sa sini.—Basaha ang Mateo 7:12.

7. Ngaa indi naton dapat hukman ang aton mga ginabantalaan?

7 Gintangdo ni Jehova si Jesus subong Hukom; busa, wala kita sing kinamatarong nga maghukom kay bisan sin-o. Nagakaigo lamang ina kay di-kaangay ni Jesus, makahukom lamang kita suno sa “panolok sang [aton] mga mata” ukon “pagpamati sang [aton] mga igdulungog,” apang si Jesus makabasa sang nasulod nga panghunahuna kag motibo sang isa ka tawo.—Isa. 11:1-5; 2 Tim. 4:1.

8, 9. (a) Ano anay nga sahi sang tawo si Saulo antes sia nangin Cristiano? (b) Ano nga leksion ang aton matun-an sa eksperiensia ni Pablo?

8 Lainlain ang ginhalinan sang mga tawo nga nangin mga alagad ni Jehova. Ang isa ka talalupangdon nga halimbawa sini amo si Saulo sang Tarso, nga nakilal-an sang ulihi subong si apostol Pablo. Si Saulo nga Fariseo isa anay ka mapintas nga manugpamatok sang mga Cristiano. Bangod sang iya sinsero nga pagpati nga indi sila matuod nga mga sumilimba ni Jehova, ginhingabot niya ang Cristianong kongregasyon. (Gal. 1:13) Kon sa tawhanon nga pagtamod, daw indi gid mapaabot nga mangin Cristiano pa ang tawo nga kaangay niya. Apang, may nakita si Jesus nga maayo sa tagipusuon ni Saulo kag ginpili Niya sia para sa isa ka pinasahi nga asaynment. Subong resulta, si Saulo nangin isa sa labing aktibo kag makugi nga katapo sang unang-siglo nga Cristianong kongregasyon.

9 Ano ang ginatudlo sa aton sang eksperiensia ni apostol Pablo? Mahimo makakita kita sa aton teritoryo sing mga tawo nga daw nagapamatok sa aton mensahe. Bisan pa daw mabudlay patihan nga ang isa sa ila mangin matuod nga Cristiano, indi kita dapat mag-untat sa pagbantala sa ila. Kon kaisa yadtong abi naton indi mamati, amo pa gali ang nagabaton sang aton mensahe sa ulihi. Ang aton asaynment amo ang pagpadayon sa pagbantala sa tanan “nga wala nagauntat.”—Basaha ang Binuhatan 5:42, NW.

Ginapakamaayo ang mga “Wala Nagauntat” sa Pagbantala

10. Ngaa indi kita dapat maglikaw sa pagbantala sa mga tawo nga daw makahaladlok? Magsaysay sang mga eksperiensia sa inyo lugar.

10 Ang pagbase sa panagway lamang masami makatiliplang. Halimbawa, si Ignacio, * nagsugod sa pagtuon upod sa mga Saksi ni Jehova samtang yara sia sa bilangguan sang isa ka pungsod sa Bagatnan nga Amerika. Ginakahadlukan sia bangod sa iya kasingki. Bangod sini, ang mga priso nga nagahimo sing mga kagamitan kag ginabaligya ini sa ila masigkabilanggo nagahimo kay Ignacio nga manugsukot sa mga nagapaganot sa pagbayad. Apang, samtang nagauswag si Ignacio sa espirituwal kag ginaaplikar ang iya natun-an, nagbuot ining hurong nga tawo. Wala na sia ginahimo nga manugsukot, apang malipayon si Ignacio nga ginbag-o sang mga kamatuoran sa Biblia kag sang espiritu sang Dios ang iya personalidad. Mapinasalamaton  man sia nga wala sia ginhukman sang mga manugbantala sang Ginharian nga nagtinguha nga tun-an sia.

11. Ngaa padayon kita nga nagaduaw sa mga tawo?

11 Ang isa ka rason kon ngaa padayon kita nga nagabalik sa mga tawo nga nasugilanon na naton tuhoy sa maayong balita amo nga mahimo magbag-o ang ila kahimtangan kag panimuot. Basi pagkatapos naton sila nasugilanon, ang pila sa ila mahimo nagbalatian sing malubha, nadulaan sing trabaho, ukon namatyan sing hinigugma. (Basaha ang Manugwali 9:11.) Ang iban mahimo maghunahuna sing serioso tuhoy sa palaabuton bangod sang nagakalatabo sa kalibutan. Bangod sining mga pagbag-o, ang mga tawo nga sang una wala nagasapak, ukon nagapamatok pa gani, magbaton na sing positibo. Busa, indi kita dapat mag-untat sa pagpaambit sing maayong balita sa mga tawo sa tanan nga nagakaigo nga tion.

12. Paano naton dapat tamdon ang mga tawo nga aton ginabantalaan, kag ngaa?

12 Ang tawo may huyog nga magpasulabi kag hukman ang iban. Apang, para kay Jehova ang mga tawo importante subong mga indibiduwal. Nakita niya ang potensial sang kada isa. (Basaha ang 1 Samuel 16:7.) Sa aton ministeryo, dapat amo man sina ang aton himuon. Ginapakita sang madamo nga eksperiensia nga maayo ang resulta kon positibo ang aton pagtamod sa aton mga ginabantalaan.

13, 14. (a) Ngaa negatibo ang reaksion sang isa ka payunir sa isa ka babayi nga iya nasalapuan sa ministeryo? (b) Ano ang aton matun-an sa sini nga eksperiensia?

13 Sang nagapamalaybalay ang payunir nga si Sandra sa isa ka isla sa Caribbean, nasapwan niya si Ruth, isa ka babayi nga mahilig gid sa pagsaulog sang pungsudnon nga mga piesta. Makaduha na nga ginkoronahan si Ruth subong reyna sa ila pungsudnon nga kapiestahan. Interesado gid sia sa ginsiling ni Sandra amo nga nasugdan nila ang isa ka pagtuon sa Biblia. Nadumduman pa ni Sandra: “Sang nagsulod ako sa ila sala, nagtampad sa akon ang daku nga retrato ni Ruth nga nakakostyum, subong man ang mga tropiyo nga iya nadag-an. Naghunahuna ako nga ining sahi sang tawo nga bantog kag mahuyugon sa pungsudnon nga kapiestahan indi gid mangin interesado sa kamatuoran. Busa, gin-untatan ko ang pagduaw sa iya.”

14 Sang ulihi, nagkadto si Ruth sa Kingdom Hall, kag pagkatapos sang miting, ginpamangkot niya si Sandra, “Ngaa wala ka na nagbalik sa akon?” Nangayo sing pasaylo si Sandra kag ginpadayon nila liwat ang pagtuon. Madasig nga nag-uswag si Ruth, ginpangakas ang iya mga retrato tuhoy sa mga kapiestahan, nagsugod sa pagpakigbahin sa tanan nga hilikuton sang kongregasyon, kag gindedikar ang iya kabuhi kay Jehova. Huo, narealisar ni Sandra nga sayop ang iya una nga reaksion.

15, 16. (a) Ano ang resulta sang nagpanaksi ang isa ka manugbantala sa iya paryente? (b) Ngaa indi kita dapat magpangalag-ag sa pagpanaksi sa aton paryente bisan pa daw indi maayo ang ila reputasyon?

15 Ining positibo nga mga resulta naeksperiensiahan man sang mga nagpanaksi sa ila indi Saksi nga mga paryente, bisan pa nga daw indi gid sila magbaton. Binagbinaga ang halimbawa sang isa ka Cristianong utod nga babayi sa Estados Unidos nga si Joyce. Ang iya bayaw nga lalaki gua-sulod sa prisuhan halin pa sang tin-edyer. “Siling sang mga tawo wala na sing puturo ang iya kabuhi,” hambal ni Joyce, “kay nagabaligya ini sing droga,  nagapangawat, kag nagahimo sing madamo pa nga kalainan. Walay sapayan sini tanan, wala ako nag-untat sa pagpaambit sa iya sang mga kamatuoran sa Biblia sa sulod sang 37 ka tuig.” Ang iya wala untat nga panikasog nga buligan ang iya paryente ginpadyaan gid sang nagtuon ini sing Biblia upod sa mga Saksi ni Jehova kag naghimo sing daku nga mga pagbag-o sa iya kabuhi. Sa karon, sa edad nga 50 anyos, ang bayaw ni Joyce nabawtismuhan sa isa ka distrito nga kombension sa California, E.U.A. Si Joyce nagsiling: “Naghibi ako sa kalipay. Maayo lang kay wala ako nangampo sa iya!”

16 Mahimo mangalag-ag ka sa pagsugid sang mga kamatuoran sa Biblia sa pila nimo ka paryente bangod daw indi maayo ang ila reputasyon. Apang, wala sini ginpunggan si Joyce nga sugilanunon ang iya bayaw. Ti, sin-o bala sa aton ang makabasa sa tagipusuon sang tawo? Basi inang tawo sinsero gid nga nagapangita sang kamatuoran? Busa, indi naton dapat idingot sa iya ang kahigayunan nga masapwan ini.—Basaha ang Hulubaton 3:27.

Isa ka Epektibo nga Bulig sa Pagtuon sa Biblia

17, 18. (a) Ano ang ginapakita sang mga report gikan sa nanuhaytuhay nga bahin sang kalibutan tuhoy sa kapuslanan sang libro nga Ano Gid ang Ginatudlo Sang Biblia? (b) Ano ang imo positibo nga eksperiensia sa paggamit sini nga libro?

17 Ginapakita sang mga report gikan sa tanan nga bahin sang kalibutan nga madamo nga bunayag sing tagipusuon ang nagabaton bangod sa bulig sang libro nga Ano Gid ang Ginatudlo Sang Biblia? Si Penni, isa ka payunir nga utod nga babayi sa Estados Unidos, nakasugod sing madamo nga pagtuon gamit ining publikasyon. Ang duha sang iya ginatun-an mga tigulang nga debotado nga katapo sang ila mga simbahan. Indi sigurado si Penni kon ano ang ila mangin reaksion sa mga kamatuoran sa Kasulatan nga ginapresentar sa Ginatudlo Sang Biblia nga libro. Walay sapayan, nagsulat sia, “Bangod sa maathag, makatarunganon, kag direkta nga pagpresentar sini sang impormasyon, madali lang para sa ila nga magbaton sang ila ginatun-an nga mga kamatuoran, nga wala na sing binaisay ukon sungguranay.”

18 Si Pat, isa ka manugbantala sa Britanya, nagsugod sa pagtuon sa Biblia sa isa ka babayi nga refugee gikan sa isa ka pungsod sang Asia. Napilitan sa pagpalagyo ang babayi sa iya pungsod sang ginkuha sang mga rebelde ang iya bana kag mga anak nga lalaki, kag wala na niya sila nakita liwat. Nabutang sa katalagman ang iya kabuhi, ginsunog ang iya balay, kag ginbulusbulusan sia lugos sang madamo nga lalaki. Bangod sini tanan, nagbatyag sia nga wala na sing pulos ang iya kabuhi, kag madamo nga beses sia nagbuko nga maghikog. Apang, bangod sa pagtuon sa Biblia, nakatigayon sia sing paglaum. “Bangod sa pagkasimple sang mga pagpaathag kag mga ilustrasyon sa Ginatudlo Sang Biblia nga libro, daku ang nangin epekto sini sa iya,” sulat ni Pat. Madasig sia nga nag-uswag, nangin kalipikado nga di-bawtismado nga manugbantala, kag nagahandum nga magpabawtismo sa  masunod nga asambleya. Daw ano gid nga kalipay nga mabuligan ang sinsero nga mga tawo nga mahangpan kag mapabaloran ang paglaum nga ginatanyag sang Kasulatan!

“Indi Kita Magpangampo sa Paghimo sing Maayo”

19. Ngaa hilingagawon gid ang aton pagbantala nga hilikuton?

19 Kada pagligad sang adlaw, labi nga nagadugang ang pagkahilingagawon sang aton asaynment nga magbantala kag maghimo-disipulo. Linibo ka tawo nga husto nga nahuyog ang nagabaton sang aton pagbantala kada tuig. Apang, “malapit na ang dakung adlaw sang GINOO,” buot silingon, yadtong yara sa espirituwal nga kadulom “palatyon” na.—Sof. 1:14; Hulu. 24:11.

20. Ano ang determinado nga himuon sang kada isa sa aton?

20 Sarang pa naton mabuligan ining mga tawo. Apang, agod mahimo naton ini, dapat ilugon naton ang mga Cristiano sang una nga siglo nga “padayon sila nga wala nagauntat sa pagpanudlo kag sa pagbantala sing maayong balita tuhoy sa Cristo, si Jesus.” (Binu. 5:42, NW) Sunda ang ila halimbawa paagi sa pagbatas sa mga kabudlayan, paagi sa pagpauswag sang imo “kalantip sa pagpanudlo,” kag paagi sa pagbantala nga walay pinasulabi! “Indi kita magpangampo sa paghimo sing maayo,” kay kon magbatas kita, magaani kita sing bugana nga mga pagpakamaayo kag kahamuot sang Dios.—2 Tim. 4:2, NW; basaha ang Galacia 6:9.

[Footnote]

^ par. 10 Ginbag-o ang pila ka ngalan.

Ano ang Imo Sabat?

• Sin-o ang mga nagabaton sang maayong balita?

• Ngaa indi naton dapat hukman ang aton mga ginabantalaan?

• Ano nga mga resulta ang aton natigayon tungod sa publikasyon nga Ano Gid ang Ginatudlo Sang Biblia?

[Mga Pamangkot sa Pagtinuon]

[Mga piktyur sa pahina 13]

Linibo ka bunayag sing tagipusuon ang nagabaton

[Mga piktyur sa pahina 15]

Ano ang matun-an naton sa pagbag-o ni apostol Pablo?

[Piktyur sa pahina 16]

Ang mga manugbantala sang maayong balita wala nagahukom sa mga tawo