Magdiretso sa kaundan

Magdiretso sa listahan sang kaundan

Ngaa Indi Mahapos nga Magpaubos?

Ngaa Indi Mahapos nga Magpaubos?

 Ngaa Indi Mahapos nga Magpaubos?

PARA sa madamo, daw walay pulos nga magpaubos sa karon. Ang ginahatagan sing igtalupangod kag ang daw madinalag-on gid amo ang mga nagahimo sang tanan agod labawan ang iban, ang mga nagapamilit sang ila gusto, kag ang mga bugalon. Naila ang kalabanan sa estilo sang pagkabuhi sang mga manggaranon kag sang mga bantog, kag indi sa iya sang mga mapainubuson kag mga mahagop. Sa masami, ginapahambog nila nga nagmadinalag-on sila bangod sa ila kaugalingon nga panikasog. Sa baylo nga magpaubos, ginapabugal nila ang ila kaugalingon nga kadalag-an.

Ginsambit sang isa ka manugpanalawsaw sa Canada ang “pagtuhaw sang maiyaiyahon nga panimuot” sa iya pungsod. Nagapati ang iban nga nagakabuhi kita sa isa ka katilingban diin ginakabig nga mas importante ang paglipaylipay sangsa pagkabuhi sing responsable kag natalupangdan nila nga ang mga tawo karon labi nga nangin maiyaiyahon. Sa sini nga kahimtangan, ang pagpaubos daw indi isa ka dalayawon nga kinaiya.

Siempre pa, madamo ang magaugyon nga maayo para sa iban ang magpaubos, kay mahapos pakigbagayan ang mga mapainubuson. Apang, sa kahimtangan karon nga pirme nagapaindisanay ang mga tawo, ang pila nahangawa nga basi tamdon sila sang iban nga maluya kon magpaubos sila.

Gintagna sa Pulong sang Dios, ang Biblia, nga ang mga tawo sa panahon naton mangin “bugalon, palabilabihon.” (2 Timoteo 3:1, 2) Indi bala nga nagakatuman na ini nga tagna? Sa banta mo, mapuslanon bala nga magpaubos? Ukon nagapati ka bala nga ang mapainubuson nga tawo pagatamdon nga maluya kag mahapos hingalitan sang iban?

Ang matuod, ginasambit sang Biblia ang maayo nga mga rason kon ngaa pabaloran kag palambuon naton ang pagkamapainubuson. Nagahatag ini sing balanse kag positibo nga pagtamod sa sini nga kinaiya. Ginapakita man sini nga ang matuod nga pagkamapainubuson indi tanda sang kaluyahon, kundi sang kabakod. Ipaathag sang masunod nga artikulo kon ngaa.

[Piktyur sa pahina 3]

Paano naton dapat tamdon ang aton mga katigayunan?