Magdiretso sa kaundan

Magdiretso sa listahan sang kaundan

Siracusa—Duog nga Ginhapitan sang Nagpanakayon si Pablo

Siracusa—Duog nga Ginhapitan sang Nagpanakayon si Pablo

 Siracusa​—⁠Duog nga Ginhapitan sang Nagpanakayon si Pablo

SANG mga tuig 59 C.E., isa ka sakayan ang naglayag halin sa pulo sang Malta sa Mediteraneo padulong sa Italya. Makita sa dulong sang barko ang dibuho nga hitsura sang “Mga Anak ni Zeus,” [NW] ang mga diosdios nga ginapatihan nga nagaamlig sa mga marinero. Ang manunulat sang Biblia nga si Lucas nagsiling nga ang sakayan ‘nagdungka sa Siracusa’ sa bagatnan-sidlangan nga baybayon sang Sicily kag ‘nagpabilin didto sing tatlo ka adlaw.’ (Binuhatan 28:11, 12) Kaupod ni Lucas sa pagpanakayon si Aristarco kag si apostol Pablo, nga dalhon agod bistahon sa Roma.—Binuhatan 27:2.

Wala kita nakahibalo kon bala gintugutan si Pablo nga magpanaug sa Siracusa. Apang kon gintugutan sia ukon ang iya mga kaupod nga makapanaug, ano ayhan ang ila nakita?

Sang panahon sang mga Romano kag mga Griego, bantog ang Siracusa kaangay sang Atenas kag Roma. Gintukod kuno ini sang mga taga-Corinto sang 734 B.C.E. Ang Siracusa bantog anay kag diri natawo ang kilala nga mga tawo sang una, kaangay sang manunulat sang kaladlawan nga mga sarsuela nga si Epicharmus kag sang matematiko nga si Archimedes. Sang 212 B.C.E., gin-agaw sang mga Romano ang Siracusa.

Kon magduaw ka sa sini nga siudad karon, mahanduraw mo ang Siracusa sang panahon ni Pablo. Ang siudad natunga sa duha ka bahin—ang isa yara sa gamay nga pulo nga Ortygia, nga diri mahimo nagdungka ang sakayan nga ginsakyan ni Pablo, kag ang isa naman yara sa daku nga pulo.

Makita mo karon sa Sicily ang kagulub-an sang templo nga may pinakadumaan kag pinakasimple nga arkitektura sang mga Griego kag ini amo ang templo ni Apollo, nga gintukod sang ikan-um nga siglo B.C.E. May mga haligi man sang isa ka templo nga gindedikar kay Atena, nga gintukod sang ikalima nga siglo B.C.E., apang nangin bahin na ini sang katedral.

Ang sentro sang siudad yara sa daku nga pulo, diin makita mo ang arkeolohiko nga parke sang Neapolis. Malapit sa gawang sini ang Griego nga teatro. Isa ini sa pinakamatahom nga halimbawa sang Griego nga arkitektura. Bangod nagaatubang ini sa dagat, nagahatag ini sang dugang nga katahom sa mga pasundayag. Makita sa pinakabagatnan nga bahin sang parke ang Romano nga ampiteatro nga gintukod sang ikatlo nga siglo C.E. Ang korte sini pabilog, nga nagalaba sing 140 metros kag nagalapad sing 119 metros, kag ikatlo nga pinakadaku sa Italya.

Kon makaduaw ka sa Siracusa, magpungko ka sa mga pulungkuan nga nagaatubang sa baybay sa Ortygia. Nian, buksi ang imo Biblia sa Binuhatan 28:12, kag handurawa si apostol Pablo nga nagasakay sa sakayan nga manugdungka diri.

[Diagram/​Mapa sa pahina 30]

(Para sa aktual nga pormat, tan-awa ang publikasyon)

Malta

Sicily

Siracusa

ITALYA

Rhegium

Puteoli

Roma

[Piktyur sa pahina 30]

Kagulub-an sang Griego nga teatro sa Siracusa