Magdiretso sa kaundan

Magdiretso sa listahan sang kaundan

Paglandas sa mga Hangkat sang Pagdul-ong sing Maayong Balita

Paglandas sa mga Hangkat sang Pagdul-ong sing Maayong Balita

 Paglandas sa mga Hangkat sang Pagdul-ong sing Maayong Balita

NAGAHINAMPOT ang amon trak sa isa ka checkpoint nga ginabantayan sang mga 60 ka armado nga lalaki, babayi, kag tin-edyer. Ang pila sa ila nakauniporme; ang iban naman nakasibilyan. Madamo ang nagauyat sing awtomatiko nga mga hinganiban. Daw ginahulat nila kami. May rebelyon sa sini nga duog.

Apat ka adlaw na kami nga nagalakbay kag napulo ka tonelada nga mga literatura sa Biblia ang dala namon. Indi kami sigurado kon paagihon nila kami. Mangayo bala sila sing kuarta? Daw ano ayhan kadugay namon sila mahaylo nga ang amon misyon mahidaiton?

Nagpalupok paibabaw ang isa ka lalaki sang iya riple agod ipahanumdom sa amon nga sia ang may pinakamataas nga ranggo. Nakita niya ang amon mga cellphone kag ginpangayo niya ini. Sang daw nag-alang-alang kami, nagkumpas sia nga patyon niya kami kon indi namon ini pag-ihatag. Gani, ginhatag namon ini sa iya.

Sa hinali lamang, ginkuha sang isa ka nakauniporme nga babayi ang iya pusil kag nagpalapit sa amon. Sia ang “sekretarya,” kag luyag niya nga may ihatag man kami sa iya. Mabudlay ang pangabuhi, kag luyag niya nga manginpulos sa amon diutay nga “regalo.” Nian ginbuksan sang isa pa ka soldado ang tangke sang amon gasolina kag ginbuta ang iya suludlan. Wala niya ginsapak ang amon pagpamatok kag nagsiling nga nagatuman lang sia sa sugo. Wala kami sing mahimo. Nangamuyo na lang kami nga wala na kuntani sing mag-ilog sa iya.

Sang ulihi, ginkuha nila ang lambay kag ginpaagi kami. Nakaginhawa kami sing halog sang akon kaupod. Makakululba gid ini, apang nanaad na kami sa sini nga mga checkpoint. Sa ulot sang Abril 2002 kag Enero 2004, 18 ka beses kami nga naglakbay halin sa pantalan sang Douala, Cameroon, pakadto sa Bangui, ang kapital sang Central African Republic. Ang 1,600-kilometros nga biyahe pirme puno sing katalagman kag sing wala ginapaabot nga mga hitabo. *

“Madamo kami sing natun-an sa sining mga biyahe,” siling nanday Joseph kag Emmanuel, ang masami nga mga drayber sa sini nga mga biyahe.  “Maalamon gid nga magpangamuyo sing mahipos kag nian magpabilin nga kalmado. ‘Sa Dios nagasalig ako nga walay kahadluk,’ sulat sang salmista. ‘Ano bala ang mahimo sa akon sang tawo?’ Gin-ilog namon ini nga panimuot. Sigurado kami nga nakahibalo gid si Jehova sang rason sang amon pagbiyahe kag ini amo ang pagdul-ong sa kinahanglanon gid nga mensahe sang paglaum.”—Salmo 56:11.

Bug-os Kalibutan nga Panikasog sa Pag-aman sing Espirituwal nga Pagkaon

Sa sini nga bahin sang Aprika, madamo ang luyag makabati sing maayong balita sang Ginharian sang Dios. Kag ginabusog sang amon dala nga mga literatura ang ila espirituwal nga kinahanglanon. (Mateo 5:3; 24:14) Ang sanga talatapan sang mga Saksi ni Jehova sa Douala, Cameroon regular nga nagapadala sing mga literatura sa kapin sa 30,000 ka manugbantala sang Ginharian kag mga interesado sa Cameroon kag sa apat ka kaingod nga mga pungsod.

Malawig na ang ginlakbay sini nga mga literatura. Ang kalabanan sini ginaimprinta sa Alemanya, Espanya, Finland, Inglaterra, kag Italya. Nian ginapadala ini paagi sa barko halin sa Pransia. Sa masami, ang isa ka container sang mga literatura sang Biblia nagaabot sa pantalan sang Douala kada duha ka semana.

Ang container ginasaylo sang trak sa sanga talatapan. Ginapainpain sang mga nagatrabaho sa Shipping Department ang mga literatura sigun sa kon diin ini ipadala. Indi mahapos idul-ong ang mga publikasyon sa naligwin nga mga bahin sini nga mga pungsod. Apang bahin ini sang pagdul-ong sing maayong balita “tubtub sa ukbong sang duta.” (Binuhatan 1:8) Nagasandig ang sanga sa masinakripisyuhon nga mga boluntaryo nga malipayon nga nagahimo sining makatalagam nga mga biyahe. Amo kon ngaa ang minilyon ka tawo sa sentro nga bahin sang Aprika may yara regular nga suplay sang mga literatura sang Biblia.

Isa ka Kinaandan nga Biyahe

Ang mga literatura para sa Cameroon, Chad, Equatorial Guinea, Gabon, kag Central African Republic ginapadala paagi sa trak. Updan naton ang isa ka trak kag ang mga drayber sini. Handurawa nga nagapungko ka sa tupad sang mga drayber, kag  maghanda ka sa isa ka makatalagam nga biyahe nga magalawig sing napulo ukon kapin pa ka adlaw.

Anom ang bulosbulos nga magamaneho. Dapat mabaskog sila, sangkol, pasensioso, kag disente mamiste. Nagasuksok sila sing panapton sang mga Aprikano ukon nagakamisadentro kag nagakurbata. Nagsiling anay ang mga opisyales sang adwana: “Tan-awa ninyo kon daw ano katinlo ining trak kag kon daw ano kahipid ang mga drayber, kaangay sang makita ninyo sa mga retrato sa ila mga publikasyon.” Ang mas importante pa sa hitsura sang mga drayber amo ang ila kahanda sa pagkadto bisan diin agod alagaran ang iban.—Salmo 110:3.

Naghalin kami sa Douala sing mga alas seis sa aga, pagbutlak sang adlaw, agod malikawan ang sobra nga trapiko sa sining daku nga siudad. Sang makatabok na kami sa taytay malapit sa sanga talatapan kag makaagi sa masako nga siudad, nagpasidlangan kami padulong sa amon nahauna nga kaladtuan—Yaoundé, ang kapital sang Cameroon.

Sugiran kamo sang anom ka drayber kon daw ano kabudlay imaneho ang trak nga may karga nga napulo ka tonelada nga libro. Wala masyado sing problema sa nahaunang tatlo ka adlaw nga pagbiyahe sa sementado nga dalan, walay sapayan nga kinahanglan ang bug-os nga atension kag konsentrasyon. Nian, hinali lamang nga nag-ulan sing mabunok. Ang dalan halin diri indi sementado. Kinahanglan kami nga maghinayhinay bangod halos indi namon makita ang amon ginaagihan kag madanlog kag batsihon ang dalan. Kasisidmon na. Tion na para magdulog anay kami kag manihapon. Pagkatapos sini, nagtulog kami nga ang amon tiil yara sa dashboard. Amo ini ang kabuhi sa sining mga biyahe!

Kaagahon pa lang pagkadason nga adlaw, nagbiyahe liwat kami. Nagbulig ang isa sa mga drayber paagi sa pagtan-aw sa kondisyon sang dalan. Gilayon sia nga nagahatag sing paandam kon daw mahulog na kami sa kanal. Nakahibalo gid ang mga drayber nga kon mahulog sila sa kanal, mahimo nga inadlaw sila makahalin. Halos amo gihapon ang kondisyon sang dalan pagtabok namon sa dulunan padulong sa Central African Republic. Sa masunod nga 650 kilometros, naglabay kami sa matahom kag berde katama nga bulubakolod nga uma. Ang tanan nga bata, tigulang, kag iloy nga may ginaaba nga mga lapsag nagababay sang naglabay kami sa ila mga minuro. Bangod may inaway sibil, diutay lamang nga salakyan ang nagabiyahe, amo nga natingala ang mga tawo sang nakita nila kami.

Makalilipay nga mga Eksperiensia

Ginsugiran kami ni Janvier, isa sa amon mga drayber, nga walay sapayan sang ila masako nga iskedyul, masami sila nagadulog sa magagmay nga mga minuro agod magpahuwayhuway kag magpanagtag sing mga literatura sa Biblia. Nagsugilanon sia: “Sa Baboua, ginatinguhaan namon pirme nga masugilanon ang isa ka attendant sa ospital nga interesado gid sa mensahe sang Biblia, kag nagadumala kami sing malip-ot nga pagtuon sa Biblia sa iya. May tion pa gani nga ginpatan-aw namon sa ila pamilya  ang video tuhoy kay Noe. Nag-inabot ang ila mga abyan kag mga kaingod, kag wala dugaydugay, napuno ang ila balay sang makunyagon nga mga tumalan-aw. Nakabati na ang tanan tuhoy kay Noe, apang karon, matan-aw na nila ang iya sugilanon sa iskren sang telebisyon. Makatalandog gid nga makita ang ila apresasyon. Pagkatapos sini, naghanda sila sing espesyal nga panihapon bilang pasalamat, kag ginpilit nila kami nga magpaligad sing gab-i. Kinahanglan namon nga maglakat dayon kag padayunon ang amon malawig nga paglakbay, apang nalipay kami nga napaambit namon ang maayong balita sa sining mapainubuson nga mga tawo.”

Ginsaysay naman ni Israel, isa pa ka drayber, ang natabo sa isa anay nila nga pagbiyahe pakadto sa Bangui, ang amon kaladtuan. “Samtang nagahilapit kami sa Bangui,” saysay niya, “mas madamo nga checkpoint ang amon naagihan. Maayo lang kay mainabyanon ang madamo nga soldado kag natandaan nila ang amon trak bangod sang amon nagligad nga mga biyahe. Gin-agda nila kami sa paglingkod upod sa ila, kag malipayon nga ginbaton ang mga literatura sa Biblia. Ginapabaloran gid nila ang isa ka libro, amo nga ginasulatan nila ini sang ila ngalan kag nian sang petsa kag sang ngalan sang naghatag sa ila. Ang iban nga mga soldado may Saksi nga mga himata, kag isa pa ini ka rason kon ngaa mainabyanon sila.”

Si Joseph, ang labing eksperiensiado nga drayber, nagsaysay sang ginakabig niya nga ang labing makawiwili nga bahin sini nga mga biyahe—ang pag-abot sa kaladtuan. Amo sini ang ginsiling niya tuhoy sa isa ka partikular nga biyahe: “Mga pila na lang ka kilometro pakadto sa Bangui, ginteleponohan namon ang mga kauturan nga malapit na kami. Gin-updan nila kami sa siudad kag ginbuligan sa pag-areglo sang mga papeles. Pag-abot namon, ang tanan sa sanga talatapan nagginuwa agod tamyawon kami paagi sa mainit nga hakos. Nag-inabot ang mga manugbulig halin sa kaingod nga mga kongregasyon, kag sa sulod lamang sang pila ka oras, nadiskarga kag nahantal namon sa bodega ang ginatos ka karton sang Biblia, libro, bukleta kag magasin.”

“Kon kaisa,” siling pa ni Joseph, “ang amon karga nagalakip sang mga donasyon nga panapton, sapatos, kag mga butang nga pangbata para sa kaingod nga Democratic Republic of Congo. Makalilipay gid nga makita ang yuhum sang mapinasalamaton nga mga kauturan!”

Pagkatapos sang isa ka adlaw nga pahuway, naghanda kami para sa amon biyahe pauli. May mga problema nga nagahulat sa amon, apang ang bisan ano nga kabudlayan balewala kon ipaanggid sa amon makalilipay nga eksperiensia.

Ang kalayuon, mabunok nga ulan, tuman kalain nga mga dalan, paglupok sang goma, kag mga aberiya mahimo nga magpaluya sing buot. Ang mabangis nga mga soldado isa pirme ka hangkat. Apang, makalilipay gid para sa mga drayber ang magdul-ong sing maayong balita sang Ginharian sa naligwin nga mga bahin sang Aprika kag makita ang epekto sini sa kabuhi sang mga tawo nga makabaton sini.

Halimbawa, bangod sini nga pagdul-ong, mabasa na karon sang isa ka tagaminuro sa naligwin nga bahin sang Central African Republic malapit sa dulunan sang Sudan ang moderno nga badbad sang Biblia. Matun-an sang iya asawa ang bag-o nga mga kopya sang Ang Lalantawan, kag mapanginpuslan sang ila mga anak ang libro nga Magtuon sa Daku nga Manunudlo. * Sila kag ang madamo pa sa sining mga uma nagabaton sing espirituwal nga pagkaon, kaangay sang ila Cristianong mga kauturan sa dalagku nga mga siudad. Isa gid ini ka rason sa pagkalipay sing daku!

[Mga Footnote]

^ par. 6 Kutob sini nga tion, madamo na ang ginhimo agod pauswagon ang seguridad sa dalanon sa ulot sang Douala kag Bangui.

^ par. 25 Ginbalhag sang mga Saksi ni Jehova.

[Mga mapa/​Piktyur sa pahina 9]

(Para sa aktual nga pormat, tan-awa ang publikasyon)

CAMEROON

Douala

CENTRAL AFRICAN REPUBLIC

Bangui

[Piktyur sa pahina 9]

Si Joseph

[Piktyur sa pahina 9]

Si Emmanuel

[Piktyur sa pahina 10]

Sanga talatapan sa Central African Republic, sa Bangui

[Piktyur sa pahina 10]

Pagdiskarga sang trak sa Bangui