Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Ngaa namangkot si Hari Saul kay David, “Kay sin-o ka bala anak, ikaw nga pamatan-on?” sang mapatay ni David si Goliat, kay antes sini, si Saul man ang nagpatawag kay David agod mangin alagad niya?—1 Samuel 16:22; 17:58.

Ang mahimo nga isabat dayon sa sini nga pamangkot amo nga nalipat si Saul kay David bangod malip-ot lang ang ila una nga pagkitaay. Apang, indi mahimo nga nalipatan sia ni Saul, kay suno sa 1 Samuel 16:18-23, si Hari Saul mismo ang nagpatawag kay David kag ginhigugma niya sia sing daku kag nangin manugdala niya sia sing hinganib. Gani, kilala gid ni Saul si David.

Ang iban nga mga iskolar sa Biblia nagapati nga ang 1 Samuel 17:12-31 kag 17:55–18:5 gindugang lang sang ulihi kay ini nga mga bersikulo wala sa pila ka kopya sang Griego nga Septuagint, ang isa ka badbad sang Hebreo nga Kasulatan nga natapos sang ikaduha nga siglo B.C.E. Apang, indi maalamon nga maghinakop sing subong sini bangod lamang sa sini nga mga kopya sang Septuagint, kay ini nga mga teksto yara sa masaligan nga mga manuskrito sang Hebreo nga Kasulatan. *

Si Abner ang una nga ginpamangkot ni Saul kag dason si David mismo, gani masiling nga indi lamang ang ngalan sang amay ni David ang luyag nga mahibaluan ni Saul. Bangod nakilala na ni Saul nga si David mabakod sing pagtuo kag maisog kay nalutos niya si Goliat, luyag mahibaluan ni Saul kon ano nga sahi sang tawo ang nagpadaku kay David. Mahimo nga ginpamensaran ni Saul nga kuhaon man nga hangaway ang amay ni David nga si Jesse, ukon ang iban pa nga katapo sang iya pamilya, kay basi maisog man sila pareho kay David.

Bisan pa mabasa naton sa 1 Samuel 17:58 ang malip-ot lamang nga sabat ni David nga, “ako anak sang imo alagad nga si Jesse nga taga-Bet-lehem,” ginapakita sang 1 Samuel 18:1 nga naglawig pa ang ila paghambalanay. Tuhoy sa sini, talupangda ang komento sang mga iskolar sa Biblia nga sanday C. F. Keil kag F. Delitzsch: “Maathag gid gikan sa ekspresyon nga ‘sang nakatapus sia sa pagpakighambal kay Saul’ sa [1 Samuel 18:1], naghambalanay pa sila ni Saul tuhoy sa iya pamilya, kay ginapakita sini nga ekspresyon ang malawig nga paghambalanay.”

Gani, makasiling kita nga sa iya pamangkot, “Kay sin-o ka bala anak, ikaw nga pamatan-on?” luyag mahibaluan ni Saul, indi kon sin-o si David, bangod kilala na niya ini, kundi luyag niya mahibaluan kon ano nga sahi sang pamilya ang gindak-an ni David.

[Footnote]

^ par. 4 Tuhoy sa pagkamaminatud-on sang mga teksto nga wala sa Septuagint, tan-awa ang Insight on the Scriptures, Tomo 2, pahina 855, nga ginbalhag sang mga Saksi ni Jehova.

[Piktyur sa pahina 31]

Ngaa ginpamangkot ni Saul si David kon kay sin-o sia anak?