Magdiretso sa kaundan

Magdiretso sa listahan sang kaundan

Nagkitaay si Saulo kag ang Iya mga Abyan kag mga Kaaway Anay

Nagkitaay si Saulo kag ang Iya mga Abyan kag mga Kaaway Anay

 Nagkitaay si Saulo kag ang Iya mga Abyan kag mga Kaaway Anay

MAHIMO gid nga ginakulbaan pa si Saulo, nga sang ulihi nakilala nga si apostol Pablo, sang magbalik sia sa Jerusalem sa una nga tion halin sang makumbertir sia sa Cristianismo. * Tatlo ka tuig antes sini, ginmanduan sia nga dakpon ang bisan sin-o nga disipulo ni Jesus nga makita niya sa Damasco. Naluyagan gid niya ini kay nagasilabo sia sa pagpahog kag sa pagpatay sa mga Cristiano sa Damasco.—Binuhatan 9:1, 2; Galacia 1:18.

Sang mangin Cristiano na si Saulo, maisugon nga ginpahayag niya ang iya pagtuo sa ginbanhaw nga Mesias. Amo kon ngaa, luyag sia patyon sang mga Judiyo sa Damasco. (Binuhatan 9:19-25) Batunon ayhan sia sang iya mga abyan anay nga mga Judiyo sa Jerusalem? Apang, ang mas importante kay Saulo amo nga makita niya ang mga sumulunod ni Cristo sa Jerusalem. Indi ina mahapos.

“Sang nag-abot sia sa Jerusalem nagtinguha sia nga magbuylog sa mga disipulo; apang sila tanan nahadlok sa iya, bangod indi sila magpati nga sia isa ka disipulo.” (Binuhatan 9:26) Indi ini katingalahan. Nahibaluan nila nga wala kaluoy nga ginhingabot anay ni Saulo ang mga sumulunod ni Jesus.  Mahimo nga ang pagsiling ni Saulo nga isa sia ka Cristiano isa lamang ka pakunokuno agod masulod niya ang kongregasyon. Gani, ginlikawan sia sang mga Cristiano sa Jerusalem.

Apang, may isa sa ila nga nagbulig sa iya. Ginasugid sang Biblia nga gindala ni Bernabe si Saulo nga isa anay ka manughingabot “sa mga apostoles,” mahimo gid sanday Pedro (Cefas) kag Santiago nga utod sang Ginuo, kag ginpahibalo niya sila nga si Saulo nakumbertir na kag nagbantala sa Damasco. (Binuhatan 9:27; Galacia 1:18, 19) Wala ginasugid sang Biblia kon ngaa nagsalig si Bernabe kay Saulo. Kilalahay bala sila nga duha, amo nga pagkatapos mausisa sing maayo si Saulo, nagtestigo si Bernabe nga sinsero gid si Saulo? May kilala bala si Bernabe nga pila ka Cristiano sa Damasco nga nakahibalo sang pagbag-o ni Saulo? Kon ano man, bangod sang ginhimo ni Bernabe, nadula ang suspetsa sang mga Cristiano kay Saulo. Gani, nagpabilin si Saulo upod kay apostol Pedro sing 15 ka adlaw.

Upod kay Pedro sing Kinse ka Adlaw

Subong sang ginsugid ni Saulo sa mga taga-Galacia, si Jesus mismo ang nagtangdo sa iya sa pagbantala. (Galacia 1:11, 12) Apang, mahimo gid nga narealisar ni Saulo nga dapat mahibaluan niya ang tuhoy sa ministeryo ni Jesus. Ang pag-upod kay Pedro magahatag kay Saulo sing daku nga kahigayunan nga mahibaluan niya ang tuhoy sa ministeryo ni Jesus. (Lucas 24:12; 1 Corinto 15:3-8) Madamo sing ipamangkot si Saulo kay Pedro kag kay Santiago, kag may ipamangkot man  sila kay Saulo tuhoy sa palanan-awon nga nabaton niya kag tuhoy sa hilikuton nga gintangdo sa iya.

Paano Ginluwas si Saulo Gikan sa Iya mga Abyan Anay?

Si Esteban ang gintawag nga una nga Cristiano nga martir. Ang mga lalaki nga nakigbais kay Esteban mga katapo sang “ginatawag Sinagoga sang Ginhilway nga mga Tawo, kag mga taga-Cirene kag mga taga-Alejandria kag mga taga-Cilicia kag mga taga-Asia.” Sini naman nga tion, maisog nga nagpanaksi si Saulo kag “nagpakigbais sa mga Judiyo nga nagahambal sing Griego,” ukon mga Hellenista. Ano ang ila reaksion? Luyag nila patyon si Saulo.—Binuhatan 6:9; 9:28, 29.

Natural lamang kuntani nga luyag ipaathag ni Saulo sa iya mga abyan anay kon ngaa nagbag-o sia kag kon sin-o ang Mesias. Apang, akig gid ining Judiyo nga mga Hellenista, kay para sa ila nagtraidor si Saulo.

Narealisar bala ni Saulo ang daku nga katalagman nga nagaatubang sa iya? Mabasa naton nga samtang nagapangamuyo sia sa templo, nakabaton sia sing palanan-awon kag nakita niya si Jesus nga nagsiling sa iya: “Dalidali ka kag maggua gilayon sa Jerusalem, bangod indi sila mag-ugyon sa imo pagpanaksi nahanungod sa akon.” Nagsabat si Saulo: “Ginuo, sila mismo nakahibalo gid nga ginbilanggo ko anay kag ginbunal sa mga sinagoga ang mga nagatuo sa imo; kag sang ginpaagay ang dugo sang imo saksi nga si Esteban, ako mismo nagatindog man didto kag nagaugyon.”—Binuhatan 22:17-20.

Ang iban nagasiling nga ang sabat ni Saulo nagapahangop nga nakahibalo sia nga yara sa katalagman ang iya kabuhi. Ang iban naman nagapati nga daw amo sini ang ginsiling ni Saulo: ‘Nakahibalo gid sila nga isa ako anay ka manughingabot kaangay nila. Pat-od nga nagapamensar sila kon ngaa nakumbertir ako. Basi mabuligan ko pa sila nga mahangpan ang kamatuoran.’ Apang, nahibaluan ni Jesus nga indi mamati ang mga Judiyo sa paathag sang isa ka “apostata.” Ginsilingan niya si Saulo: “Lakat ka, bangod ipadala ko ikaw sa mga pungsod sa malayo.”—Binuhatan 22:21, 22.

Sang mahibaluan sang mga disipulo nga yara sa katalagman ang kabuhi ni Saulo, dalidali nga gindul-ong nila si Saulo sa pantalan sang Cesaria agod makapauli sia sa siudad sang Tarso nga iya natawhan. Lima ka gatos ka kilometro ang ginlakbay ni Saulo. (Binuhatan 9:30) Mga tinuig pa antes nakabalik liwat si Saulo sa Jerusalem.

Mahimo nga ang hinali nga paglakat ni Saulo nangin isa ka proteksion para sa Cristiano nga kongregasyon sadto. Kay posible nga naggamo ang kahimtangan kon nagtener pa sia didto. Sang wala na si Saulo, “ang kongregasyon sa bug-os nga Judea kag Galilea kag Samaria nakaagom sang isa ka panag-on sang kalinong, nga napalig-on; kag samtang nagalakat ini sa kahadlok kay Jehova kag paagi sa lugpay sang balaan nga espiritu padayon ini nga nag-uswag.”—Binuhatan 9:31.

Kon Ngaa Dapat Kita Maghalong

Subong sang natabo sang nahauna nga siglo, mahimo mag-utwas man karon ang mga kahimtangan nga nagakinahanglan sang aton paghalong. Indi kita dapat mangin suspetsuso sa mga dumuluong. Apang, may mga higayon nga ginhingalitan sang malain nga mga tawo ang katawhan ni Jehova, para sa ila kaugalingon nga kaayuhan ukon sa tuyo nga halitan ang kongregasyon. Gani, dapat kita maghalong agod indi kita mabiktima sang mga impostor.—Hulubaton 3:27; 2 Timoteo 3:13.

Ang reaksion ni Saulo sang magbantala sia sa Jerusalem nagapakita man sang isa pa ka paagi kon paano maghalong ang mga Cristiano. Ang pagpanaksi sa pila ka duog ukon sa pila ka indibiduwal, lakip ang mga abyan anay, mahimo nga makatalagam—sa pisikal, sa espirituwal, ukon sa moral pa gani. Dapat kita maghalong kon diin kita magbantala kag kon ano oras.—Hulubaton 22:3; Mateo 10:16.

Makasalig kita nga mabantala ang maayong balita sang Ginharian sang Dios antes mag-abot ang katapusan sang malaut nga sistema karon. Maayo gid nga halimbawa ang ginpakita ni Saulo sa sini, “nga nagahambal sing maisugon sa ngalan sang Ginuo” bisan sa iya mga abyan kag mga kaaway anay!—Binuhatan 9:28.

[Footnote]

^ par. 2 Mas kilala karon si Saulo nga si apostol Pablo. Apang, sa kalabanan nga bersikulo sa Biblia sa sini nga artikulo, ginapatuhuyan sia sa iya Judiyo nga ngalan nga Saulo.—Binuhatan 13:9.

[Piktyur sa pahina 16]

Maisugon nga nagbantala si Saulo sa mga Judiyo nga nagahambal sing Griego sang mag-abot sia sa Jerusalem