Magdiretso sa kaundan

Magdiretso sa listahan sang kaundan

Tudok kag Daw Indi Madula nga Pagbakho

Tudok kag Daw Indi Madula nga Pagbakho

Tudok kag Daw Indi Madula nga Pagbakho

KASAN-O lang, luyag mahibaluan sang isa ka manugpanalawsaw kon ano ang epekto sang pagligad sang tion sa mga tawo nga nagalalaw sa pagkapatay sang ila mga hinigugma. Nagpadala sia sing mga pamangkot sa pila ka ginikanan nga namatyan sing mga anak sang nagligad nga pila ka tuig. Indi tanan nagsabat. Ang isa ka amay nga si Vladimir, nga namatyan sing anak nga lalaki sang nagligad nga lima ka tuig, nagpaathag nga nasubuan gihapon sia nga hambalan ang tuhoy sa iya anak. *

Ining daw indi madula nga kalisod kinaandan gid sa namatyan nga mga ginikanan. Sang nagligad nga napulo ka tuig, aksidente nga nalumos ang 18 anyos nga anak nga lalaki ni William. Nagsulat si William, “Nagabakho gihapon ako sa iya pagkapatay, kag indi na ini madula tubtob buhi ako.” Pagligad sang lima ka tuig sa tapos mapatay ang anak nga lalaki ni Lucy bangod sa isa ka hinali nga balatian, nagsulat sia: “Mga pila ka adlaw nga nagasiling ako sa akon kaugalingon, ‘Indi ini matuod.’ Pamatyagan ko isa lamang ini ka malain nga damgo nga madula lang pagmata ko. Pagligad sang pila ka tion narealisar ko nga matuod ini, nga indi na sia magpauli. Lima ka tuig na nga napatay ang akon anak, apang kon kaisa, kon isahanon lamang ako, ginahibian ko sia gihapon.”

Ngaa tudok gid kag daw indi madula ang pagbakho sang namatyan nga mga ginikanan subong nanday Vladimir, William, kag Lucy? Binagbinagon naton ang pila ka rason.

Ngaa Sobra Gid ang Pagkalisod?

Kon mabun-ag ang lapsag sa isa ka pamilya, wala sing katulad ang mabatyagan sang mga ginikanan. Ang pagkugos lamang sa iya, pagtan-aw sa iya nga nagakatulog, ukon ang iya pagyuhum nagahatag sa ila sing daku nga kalipay kag kaayawan. Ginaatipan sang mahigugmaon nga mga ginikanan ang ila mga anak. Ginahanas nila sila nga mangin mabuot kag matinahuron. (1 Tesalonica 2:7, 11) Samtang nagadaku kag nagasunod ang mga kabataan, ginapabugal sila sang ila mga ginikanan kag nagadaku ang ila paglaum tuhoy sa ila.

Nagapangabudlay sing lakas ang maatipanon nga mga ginikanan agod masustentuhan ang ila mga anak. Mahimo nga regular nga nagapain sila sing kuarta ukon materyal nga mga butang agod mabuligan ang ila mga anak sa pagtukod sang ila kaugalingon nga pamilya sa ulihi. (2 Corinto 12:14) Maathag nga ini nga paghinguyang sing daku nga emosyon, tiempo, panikasog, kag kuarta nagapamatuod sa isa ka butang—ginapadaku sang mga ginikanan ang ila mga anak agod mabuhi, indi mapatay. Kon mapatay ang bata, ang pagpadaku sa iya indi makompleto, kag maguba ang paglaum sang mga ginikanan tuhoy sa iya. Ang mainit nga paghigugma kag pagpalangga sang mga ginikanan sa anak ginautod sang kamatayon. Ang lugar sang ila anak nga lalaki ukon babayi sa ila tagipusuon wala na karon sing unod. Nagabatyag ang mga ginikanan sing daku nga kalisod nga indi madali madula.

Ginapamatud-an sang Biblia nga ang pagbakho sang namatyan nga mga ginikanan tudok kag daw indi madula. Sa paglaragway kon ano ang natabo sang mabalitaan sang patriarka nga si Jacob nga ang iya anak nga si Jose ginpatay, ang Biblia nagasiling: “Ginkusnit ni Jacob ang iya mga panapton kag gintampian ang iya mga balikawang sing tela nga sako kag naglalaw sa iya anak sa madamo nga adlaw. Kag nagtindog ang tanan niya nga anak nga lalaki kag ang tanan niya nga anak nga babayi sa paglugpay sa iya, apang nagdumili sia nga lugpayan kag nagasiling: ‘Magapanaug ako nga nagalalaw sa akon anak sa Sheol [ukon, sa lulubngan]!’” Pagligad sang mga tinuig, nagakalisod gihapon si Jacob tungod sa iya anak, nga pagdumdom niya patay na. (Genesis 37:34, 35; 42:36-38) Ang isa pa ka halimbawa sa Biblia amo ang matutom nga babayi nga si Noemi nga namatyan sing duha ka anak nga lalaki. Bangod sang daku nga kalisod, luyag niya islan ang iya ngalan nga Noemi, nga nagakahulugan “Akon Kalipay,” sing Mara, nga nagakahulugan “Mapait.”—Rut 1:3-5, 20, 21.

Apang, wala lamang nagasiling ang Biblia nga matuod gid nga ang namatyan nga mga ginikanan nagabatyag sing kalisod. Ginapakita man sini kon paano ginahatagan ni Jehova sing kusog ang mga nagalalaw. Sa masunod nga artikulo, binagbinagon naton ang pila ka paagi kon paano ang Dios nagalugpay sa mga nagalalaw.

[Footnote]

^ par. 2 Gin-islan ang iban nga mga ngalan.