Magdiretso sa kaundan

Magdiretso sa listahan sang kaundan

Ang Pagpangita sing Husto nga mga Sabat

Ang Pagpangita sing Husto nga mga Sabat

 Ang Pagpangita sing Husto nga mga Sabat

Paano ko maamligan ang akon kapagros?

Ano ang himuon ko agod mangin mas malipayon ang akon pamilya?

Paano ko mahuptan ang isa ka trabaho?

NAPAMANGKOT mo na bala ang mga ini? Nakakita ka na bala sing praktikal nga mga sabat? Kada tuig, mga 2,000 ka nagkalainlain nga libro ang ginabalhag nga nagahatag sing laygay tuhoy sa sini kag sa iban pa nga importante nga mga butang. Sa Britanya lamang, ang mga bumalasa nagagasto sing mga 80 milyones ka pound (mga $150 milyones, U.S.) sa isa ka tuig sa mga libro nga nagahatag sing laygay kon paano atubangon ang mga problema sa kabuhi. Sa Estados Unidos, ang nabaligya nga mga libro tuhoy sa pagbulig sa kaugalingon nagalab-ot sa mga $600 milyones sa isa ka tuig. Indi lang ikaw ang nagapangita sing maayo nga laygay kon paano atubangon ang adlaw-adlaw nga kabuhi.

Tuhoy sa mga laygay sa sining madamo nga publikasyon, ang isa ka awtor nagsiling: “Ginasulit lamang sang madamong bag-o nga mga libro ang mga nasulat na.” Sa pagkamatuod, ginasulit lamang sang madamo nga laygay sa sining mga libro ang kaalam nga ginrekord sa isa sa pinakadumaan nga mga libro sa kalibutan. Ini nga libro amo ang pinakalapnag nga napanagtag nga publikasyon sa bug-os nga kalibutan. Ginbadbad ini sing bug-os ukon sing bahin sa mga 2,400 ka hambal. Sa kabilugan, kapin sa 4.6 bilyones ka kopya ang naimprinta na sa bug-os nga kalibutan. Ini walay liwan kundi ang Biblia.

Ang Biblia maathag nga nagasiling: “Ang bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagtadlong sa mga butang, sa pagdisiplina sa pagkamatarong.” (2 Timoteo 3:16) Matuod, ang Biblia wala ginsulat subong isa ka libro tuhoy sa pagbulig sa kaugalingon. Ang panguna nga katuyuan sini amo agod ipahayag ang kabubut-on sang Dios para sa katawhan. Apang, ang Biblia madamo man sing impormasyon tuhoy sa kon paano atubangon ang mga problema nga kinaandan sa aton tanan, kag nagasaad ini nga ang mga nagasunod sa mga panuytoy sini magatuon sa pagbenepisyo sa ila kaugalingon. (Isaias 48:17, 18) Kon sundon, ang laygay sini praktikal gid, bisan ano man ang rasa, kultura, ukon tinun-an sang isa ka tawo. Ngaa indi mo pagbinagbinagon ang masunod nga artikulo kag tan-awon kon bala ang ginasiling sang Biblia tuhoy sa kapagros, pamilya, kag trabaho praktikal?