Magdiretso sa kaundan

Magdiretso sa listahan sang kaundan

Paghambal sing Matuod—Sa Iban Lamang Bala Ginapaabot?

Paghambal sing Matuod—Sa Iban Lamang Bala Ginapaabot?

 Paghambal sing Matuod​—Sa Iban Lamang Bala Ginapaabot?

“INDI ko luyag ang binutig, kag indi ko luyag nga butigan!” siling sang isa ka 16-anyos nga dalagita. Amo man ini ang luyag sang kalabanan sa aton. Luyag naton nga ang impormasyon nga ginasugid sa aton—sa hambal man ukon sa sulat—matuod. Apang ang impormasyon bala nga ginasugid naton sa iban matuod man?

Sa isa ka surbe nga ginhimo sa Alemanya, ang kalabanan nga ginpamangkot nagsiling nga “ang pagbinutig sa magagmay nga mga butang agod protektahan ang kaugalingon ukon ang iban ginatugutan, huo, ginakinahanglan pa gani agod maayo ang pagtinamdanay sang mga tawo.” Kag ang isa ka dyurnalista nagsulat: “Ang paghambal sing matuod sa tanan nga tion makatalaka.”

Luyag bala naton nga sugiran kita sang iban sing matuod samtang kita naman daw may rason kon kaisa nga indi magsugid sing matuod? Importante gid bala nga maghambal kita sing matuod ukon indi? Ano ang resulta sang indi pagsugid sing matuod?

Ang Halit sang Indi Pagsugid sing Matuod

Binagbinaga ang halit ukon danyos sang indi pagsugid sing matuod. Ang pagbinutig nagapalambo sang di-pagsalig sa ulot sang mag-asawa kag sa tunga sang mga katapo sang pamilya. Ang wala sing basihan nga kutsokutso nagaguba sang reputasyon sang isa ka tawo. Ang pagpangdaya sang mga empleyado nagaresulta sa pagdaku sang gasto sang isa ka negosyo kag sa pagmahal sang mga produkto. Ang indi husto nga pagdeklarar sang buhis nagakawat sa gobierno sing kinahanglanon nga kita nga magamit sa pag-aman sing mga serbisyo publiko. Ang pagbinutig sang mga manugpanalawsaw nagaguba sang ila masanag sing palaabuton nga mga karera kag nagapierde sang reputasyon sang respetado nga mga institusyon. Ang di-bunayag nga mga padugi agod makakuarta dayon sa malip-ot lamang nga tion nagaubos sang bug-os kabuhi nga sinuptan sang madali madaya nga mga imbestor ukon nagaresulta sa malain pa gid. Indi katingalahan nga ang Biblia nagasiling nga lakip sa mga butang nga kalangil-aran kay Jehova nga Dios amo ang “butigon nga dila” kag ang “butigon nga saksi nga nagasugid sing kabutigan”!—Hulubaton 6:16-19.

Ang lapnag nga pagbinutig makahalalit lunsay sa mga indibiduwal kag sa katilingban subong kabilugan. Indi ini mapanghiwala sang halos bisan sin-o. Gani, ngaa ang mga tawo hungod nga wala nagahambal sing matuod? Ang tanan bala nga indi matuod kabutigan? Binagbinagon naton ang mga sabat sa sini kag sa iban pa nga mga pamangkot sa masunod nga artikulo.

[Piktyur sa pahina 3]

Ang pagbinutig nagapalambo sang di-pagsalig sa ulot sang mag-asawa