Magdiretso sa kaundan

Magdiretso sa listahan sang kaundan

Indi gid Mag-untat sa Pagpalambo sang Inyo Apresasyon

Indi gid Mag-untat sa Pagpalambo sang Inyo Apresasyon

 Indi gid Mag-untat sa Pagpalambo sang Inyo Apresasyon

“Daw ano ka bilidhon sang imo mga panghunahuna! O Dios, daw ano kadaku sang bug-os nga kadamuon nila!”—SALMO 139:17.

1, 2. Ngaa dapat naton apresyahon ang Pulong sang Dios, kag paano ginpabutyag sang salmista ang iya apresasyon?

TALALUPANGDON gid yadto nga pagkatukib. Samtang ginakay-o ang templo ni Jehova sa Jerusalem, nakita sang Mataas nga Saserdote nga si Hilkias “ang tulun-an sang kasuguan ni Jehova nga ginsulat ni Moises,” walay duhaduha ang orihinal nga kopya nga ginsulat mga 800 ka tuig na ang nagligad! Mahanduraw mo bala kon ano ang nabatyagan sang mahinadlukon sa Dios nga si Hari Josias sang gindala sa iya ang tulun-an? Sa pagkamatuod, ginpakabahandi niya ini kag sa gilayon ginpabasa niya ini sing matunog sa sekretaryo nga si Safan.—2 Cronica 34:14-18.

2 Sa karon, ang Pulong sang Dios, sing bug-os ukon sing bahin, mahimo mabasa na sang binilyon. Apang, nagahimo bala ini sa Kasulatan nga indi tanto ka mapuslanon kag indi tanto ka importante? Wala! Ang matuod, nagaunod ini sang panghunahuna sang Labing Gamhanan, nga ginsulat para sa aton kaayuhan. (2 Timoteo 3:16) Nagapabutyag sang iya pagtamod tuhoy sa Pulong sang Dios, si salmista David nagsulat: “Para sa akon daw ano ka bilidhon sang imo panghunahuna! O Dios, daw ano kadaku sang bug-os nga kadamuon nila!”—Salmo 139:17.

3. Ano ang nagapakita nga si David isa ka tawo nga may madalom nga paghangop sa iya kaangtanan sa Dios?

3 Wala gid maglubad ang apresasyon ni David kay Jehova, sa iya Pulong, kag sa iya kahimusan para sa matuod nga pagsimba. Ang madamo nga matahom nga salmo nga ginkomposo ni David nagpabutyag sang iya nabatyagan. Halimbawa, sa Salmo 27:4, sia nagsulat: “Isa ka butang ang ginapangayo ko kay Jehova—ini ang pangitaon ko, nga makapuyo ako sa balay ni Jehova sa tanan nga adlaw sang akon kabuhi, agod makita ang pagkamakahalamuot ni Jehova kag magtulok nga may apresasyon sa iya templo.” Sa orihinal nga Hebreo, ang pinamulong nga “magtulok nga may apresasyon” nagakahulugan nga magdulog agod pamalandungan, agod usisaon, agod tan-awon nga may kalipay, kasadya kag pagdayaw. Maathag nga si David isa ka tawo nga may madalom nga paghangop sa iya kaangtanan sa Dios kag gin-apresyar gid niya ang espirituwal nga mga aman ni Jehova amo nga naluyagan niya ang tanan nga espirituwal nga kamatuoran nga ginpahayag sang Dios. Ang iya halimbawa sang pagpakita sing apresasyon takus gid nga ilugon.—Salmo 19:7-11.

Magpasalamat Tungod sa Pribilehiyo nga Mahibaluan ang Kamatuoran sa Biblia

4. Ngaa ‘nagkalipay gid si Jesus sa balaan nga espiritu’?

4 Ang pagtigayon sing paghangop sa Pulong sang Dios wala nasandig sa kinaalam ukon sa kalibutanon nga tinun-an, nga mahimo magpabugal. Sa baylo, nasandig ini sa di-bagay nga kaayo ni Jehova, nga ginapakita niya sa mga mapainubuson kag bunayag nga mga tawo nga mahunahunaon sa ila espirituwal nga mga kinahanglanon. (Mateo 5:3; 1 Juan 5:20) Sang ginpamalandungan ni Jesus ang kamatuoran nga ang ngalan sang iban nga di-himpit nga mga tawo nasulat sa langit, “nagkalipay gid sia sa balaan nga espiritu kag nagsiling: ‘Dayag ko ikaw nga ginadayaw, Amay, Ginuo sang langit kag duta, bangod gintago mo sing mahalungon ini nga mga butang gikan sa mga maalam kag mga intelihente, kag ginpahayag mo ini sa mga bata.’”—Lucas 10:17-21.

5. Ngaa indi dapat pagpasapayanan sang mga disipulo ni Jesus ang kamatuoran sang Ginharian nga ginpahayag sa ila?

5 Pagkatapos sang tinagipusuon nga pangamuyo, si Jesus nagliso sa iya mga disipulo kag nagsiling: “Malipayon ang mga mata nga makakita sing mga butang nga inyo makita. Kay nagasiling ako sa  inyo, Madamo nga manalagna kag mga hari ang naghandum nga makita ang mga butang nga inyo ginatan-aw apang wala makakita sini, kag mabatian ang mga butang nga inyo ginapamatian apang wala makabati sini.” Huo, ginpalig-on ni Jesus ang iya matutom nga mga sumulunod nga indi pagpasapayanan ang bilidhon nga kamatuoran sang Ginharian nga ginpahayag sa ila. Ining mga kamatuoran wala ginpahayag sa nauna nga mga kaliwatan sang mga alagad sang Dios, kag wala gid ini ginpahayag sa “maalam kag mga utukan” sang adlaw ni Jesus!—Lucas 10:23, 24.

6, 7. (a) Ano ang aton mga rason agod apresyahon ang kamatuoran sang Dios? (b) Ano nga kinatuhayan ang makita karon sa tunga sang matuod nga relihion kag sang butig nga relihion?

6 Sa karon, mas madamo pa gid ang aton rason agod mangin mainapresyahon sa kamatuoran sang Dios, bangod si Jehova, paagi sa “matutom kag mainandamon nga ulipon,” naghatag sa iya katawhan sing mas madalom pa nga paghangop sa iya Pulong. (Mateo 24:45; Daniel 12:10) Tuhoy sa tion sang katapusan, si manalagna Daniel nagsulat: “Madamo ang magadalagan pakadto-pakari, kag ang matuod nga ihibalo magabugana.” (Daniel 12:4) Wala ka bala nagaugyon nga ang ihibalo sang Dios karon ‘nagabugana’ kag ang mga alagad sang Dios ginapakaon sing bugana sa espirituwal?

7 Daku gid nga kinatuhayan ang makita naton sa tunga sang espirituwal nga kabuganaan sang katawhan sang Dios kag sang relihioso nga kagumon sang Babilonia nga Daku! Subong resulta, madamo sang nalugaw-an ukon nangil-ad sa butig nga relihion ang nagbuylog sa matuod nga pagsimba. Sila amo ang mga tulad-karnero nga ‘indi luyag mag-ambit sa mga sala’ sang Babilonia nga Daku ukon “magbaton sing bahin sang iya mga kalalat-an.” Tanan sila ginaagda ni Jehova kag sang iya mga alagad sa matuod nga Cristianong kongregasyon.—Bugna 18:2-4; 22:17.

Ang mga Mainapresyahon Nagadugok sa Dios

8, 9. Paano karon natuman ang ginasiling sang Hageo 2:7?

8 Tuhoy sa iya espirituwal nga balay sang pagsimba, si Jehova nagtagna: “Uyugon ko ang pungsod, kag ang kalahamut-an nga mga butang sang tanan nga pungsod pagapasudlon; kag pun-on ko ining balay sing himaya.” (Hageo 2:7) Ining matahom nga tagna natuman sang panahon ni Hageo sang ang ginpasag-uli nga nagkalabilin sang katawhan sang Dios nagpatindog liwat sang templo sa Jerusalem. Sa karon, ang mga pinamulong ni Hageo may katumanan man tuhoy sa daku nga espirituwal nga templo ni Jehova.

9 Minilyon na ang nagdugok sa malaragwayon nga templo agod magsimba sa Dios “sa espiritu kag kamatuoran,” kag kada tuig ginatos ka libo nga “kalahamut-an nga mga butang sang tanan nga pungsod” ang nagasulod. (Juan 4:23, 24) Halimbawa, ang bug-os kalibutan nga report sang 2006 nga tuig sang pag-alagad nagapakita nga 248,327 ang ginbawtismuhan bilang simbulo sang ila dedikasyon kay Jehova. Nagakahulugan ini sing promedyo nga 680 ka bag-uhan kada adlaw! Ang ila gugma sa kamatuoran kag ang ila handum nga mag-alagad kay Jehova subong mga manugbantala sang Ginharian nagapamatuod nga ginbuyok gid sila sang Dios.—Juan 6:44, 65.

10, 11. Isaysay ang isa ka eksperiensia nga nagapakita kon paano gin-apresyar sang mga tawo ang kamatuoran sa Biblia.

10 Madamo sining mga bunayag sing tagipusuon ang naganyat sa kamatuoran bangod nahantop nila “ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sa isa nga wala  nagaalagad sa iya.” (Malaquias 3:18) Binagbinaga ang eksperiensia nanday Wayne kag Virginia, isa ka mag-asawa nga katapo anay sang isa ka simbahan sang Protestante apang madamo sing wala nasabat nga mga pamangkot. Indi nila luyag ang inaway kag indi nila mahangpan kag nahanusbo sila kon makita nila nga ginabendisyunan sang mga klero ang mga soldado kag ang mga armas. Samtang nagatigulang ang mag-asawa, nabatyagan nila nga daw ginpabay-an na sila sang ila mga kaupod sa simbahan, bisan pa si Virginia nagtudlo anay sa Sunday school sa sulod sang madamo nga tinuig. “Wala sing may nagduaw sa amon ukon nagpangamusta sa amon espirituwal nga kahimtangan,” siling nila. “Ang ginalagas lang sang simbahan amo ang amon kuarta. Nalugaw-an gid kami.” Labi pa gid sila nga nalugaw-an sang ginkunsinti sang ila simbahan ang homoseksuwalidad.

11 Sadto man nga tion, ang apo nga babayi nanday Wayne kag Virginia kag nian ang ila bata nga babayi nangin Saksi ni Jehova. Bisan pa naakig sang primero sanday Wayne kag Virginia, nagbag-o sang ulihi ang ila pagtamod kag nagsugot nga magtuon sa Biblia. “Sa sulod sang tatlo lamang ka bulan,” siling ni Wayne, “mas madamo ang amon natun-an sa Biblia kon ikomparar sa amon natun-an sa sulod sang 70 ka tuig! Wala gid kami nakahibalo nga Jehova gali ang ngalan sang Dios, kag wala kami sing nahibaluan tuhoy sa Ginharian kag sa Paraiso nga duta.” Wala madugay, ining sinsero nga mag-asawa nagtambong sa Cristianong mga miting kag nagpakigbahin sa ministeryo. “Luyag namon isugid sa tanan ang tuhoy sa kamatuoran,” siling ni Virginia. Ginbawtismuhan sila nga duha sang 2005, sa edad nga otsentahon. “Nasalapuan namon ang amon matuod nga Cristianong puluy-an,” siling nila.

Apresyahon nga “Nasangkapan sing Bug-os Para sa Tagsa ka Maayong Buhat”

12. Ano pirme ang ginaaman ni Jehova para sa iya mga alagad, kag ano ang dapat naton himuon agod makabenepisyo sa sini?

12 Ginabuligan pirme ni Jehova ang iya mga alagad sa paghimo sang iya kabubut-on. Halimbawa, si Noe nakabaton sing maathag kag espesipiko nga sugo kon paano tukuron ang arka—ang proyekto nga dapat himuon gid sing sibu! Kag nahimo gid ini sing sibu. Ngaa? Bangod “ginhimo ni Noe ang tanan suno sa ginsugo sang Dios sa iya. Amo gid ang ginhimo niya.” (Genesis 6:14-22) Sa karon man, ginasangkapan sing bug-os ni Jehova ang iya mga alagad sa paghimo sang iya kabubut-on. Sa pagkamatuod, ang aton panguna nga hilikuton amo ang pagbantala sang maayong balita tuhoy sa natukod na nga Ginharian sang Dios kag sa pagbulig sa mga takus nga mangin mga disipulo ni Jesucristo. Kag kaangay ni Noe, ang aton kadalag-an nasandig sa pagkamatinumanon. Dapat gid naton sundon sing matinumanon ang panuytoy nga ginahatag ni Jehova paagi sa iya Pulong kag sa iya organisasyon.—Mateo 24:14; 28:19, 20.

13. Sa ano nga mga paagi nagahatag si Jehova sing paghanas sa aton?

13 Agod matuman ini nga hilikuton, dapat naton tun-an nga ‘gamiton sing husto’ ang aton panguna nga galamiton—ang Pulong sang Dios—nga “mapuslanon sa pagpanudlo, sa pagsabdong, sa pagtadlong sa mga butang, sa pagdisiplina sa pagkamatarong, agod nga ang tawo sang Dios may ikasarang gid, kag nasangkapan sing bug-os para sa tagsa ka maayong buhat.” (2 Timoteo 2:15; 3:16, 17) Subong sang nahaunang siglo, nagahatag si Jehova sa aton sing mabuligon nga paghanas paagi sa Cristianong kongregasyon. Sa karon, sa 99,770 ka kongregasyon sa bug-os nga kalibutan, ang Teokratikong Eskwelahan Para sa Ministeryo kag Miting sa Serbisyo ginahiwat kada semana agod buligan kita sa aton ministeryo. Ginapakita mo bala ang imo apresasyon sa sining importante nga mga miting paagi sa regular nga pagtambong kag paagi sa pag-aplikar sang mga butang nga imo natun-an?—Hebreo 10:24, 25.

14. Paano ginapakita sang mga alagad ni Jehova ang ila apresasyon sa pribilehiyo nga maalagad ang Dios? (Komentuhi man ang tsart sa pahina 27-30.)

14 Ginapakita sang minilyon nga katawhan sang Dios sa bug-os nga kalibutan nga ginaapresyar nila ang paghanas nga ila nabaton paagi sa pagpangabudlay sing lakas sa ministeryo. Halimbawa, sang 2006 nga tuig sang pag-alagad, 6,741,444 ka manugbantala sang Ginharian ang naghinguyang sing kabug-usan nga 1,333,966,199 ka oras sa tanan nga bahin sang hilikuton, nga nagalakip sang pagdumala sing 6,286,618 ka pagtuon sa Biblia. Pila lamang ini sang makapalig-on nga mga detalye sa listahan sang bug-os kalibutan nga report. Palihug talupangda gid ini nga report kay mapalig-on  ka sa sini, subong nga ang aton unang siglo nga mga kauturan wala sing duhaduha nga napalig-on gid sang mga report tuhoy sa pag-uswag sang hilikuton nga pagbantala sang panahon nila.—Binuhatan 1:15; 2:5-11, 41, 47; 4:4; 6:7.

15. Ngaa wala sing dapat nga maluyahan sing buot tuhoy sa iya bug-os kalag nga pag-alagad kay Jehova?

15 Ang mabaskog nga singgit sang pagdayaw nga nagalab-ot sa Dios kada tuig nagapakita sang daku nga apresasyon sang mga alagad ni Jehova tungod sa pribilehiyo nga makilala si Jehova kag makapanaksi tuhoy sa iya. (Isaias 43:10) Matuod nga ang halad sang pagdayaw sang pila sang aton tigulang, masakiton, ukon may kasablagan nga mga kauturan mapaanggid sa diutay nga amot sang balo nga babayi. Apang indi naton dapat pagkalimtan nga si Jehova kag ang iya Anak nagaapresyar gid sa tanan nga nagaalagad sa Dios sing bug-os kalag, samtang ginahimo nila ang ila bug-os nga masarangan.—Lucas 21:1-4; Galacia 6:4.

16. Anong mga galamiton sa pagtudlo ang gin-aman sang Dios sining karon lang?

16 Magluwas sa paghanas sa aton sa ministeryo, si Jehova, paagi sa iya organisasyon, nagasangkap sa aton sing de-kalidad nga mga kagamitan sa pagtudlo. Sang nagligad nga mga dekada, naglakip ini sa mga libro nga Ang Kamatuoran nga Nagadul-ong sa Kabuhi nga Dayon, Mahimu Ka Mabuhi Sing Dayon sa Paraiso sa Duta kag, sining karon lang, sa Ano Gid ang Ginatudlo Sang Biblia? Ang mga nagaapresyar gid sa sining mga aman nagagamit sing maayo sini sa ministeryo.

Gamita sing Maayo ang Ginatudlo sang Biblia nga Libro

17, 18. (a) Ano nga mga kaundan sang Ginatudlo Sang Biblia ang luyag mo gamiton sa ministeryo? (b) Ano ang ginsiling sang isa ka manugtatap sang sirkito tuhoy sa Ginatudlo Sang Biblia nga libro?

17 Sa 19 ka kapitulo, detalyado nga apendise, kag maathag, simple nga mga tinaga sini, ang libro nga Ano Gid ang Ginatudlo Sang Biblia? isa gid ka pagpakamaayo sa ministeryo. Halimbawa, ang kapitulo 12 nagabinagbinag sang topiko nga “Pagkabuhi nga Nagapahamuot sa Dios.” Ining kapitulo nagapaathag sa estudyante kon paano sia mangin abyan sang Dios, isa ka butang nga mahimo wala gani mapensaran ukon mahunahuna sang madamo. (Santiago 2:23) Paano ginbaton ining bulig sa pagtuon sa Biblia?

18 Ang isa ka manugtatap sang sirkito sa Australia nagsiling nga ang Ginatudlo Sang Biblia nga  libro “nagaganyat gilayon sa mga tagbalay sa pagpakigsugilanon.” Nagsiling pa sia nga ang libro tuman kahapos gamiton amo nga “natigayon liwat sang mga manugbantala sang Ginharian ang kompiansa kag kalipay sa ministeryo. Indi katingalahan nga gintawag sang iban ang libro nga daw Bulawan!”

19-21. Isaysay ang pila sa eksperiensia nga nagapadaku sang kapuslanan sang Ginatudlo Sang Biblia nga libro.

19 “Mahimo nga ginpadala ka sang Dios,” siling sang isa ka babayi sa Guyana sa isa ka payunir sa iya ganhaan. Kasan-o lang sia kag ang iya duha ka diutay nga kabataan ginbayaan sang iya ginapuyopuyo. Ginbuksan sang payunir ang libro sa kapitulo 1 kag ginbasa sing matunog ang parapo 11, sa idalom sang subtitulo nga “Ano ang Ginabatyag Sang Dios sa mga Inhustisya nga Ginaatubang Naton?” “Natandog gid sia sang mga punto,” siling sang payunir. “Ang matuod, nagtindog gid sia, nagkadto sa likod sang iya puwesto, kag naghilibion.” Ginbaton sang babayi ang tanyag nga regular nga pagtuon sa Biblia upod sa isa ka utod nga babayi sa ila lugar kag padayon sia nga nagauswag.

20 Si José, nga taga-Espanya, namatyan sang iya asawa bangod sa aksidente sa salakyan. Nagdroga sia agod malugpayan, kag nagpakonsulta man sia sa sikologo. Apang, indi masabat sang sikologo ang pamangkot nga nagatublag gid kay José: “Ngaa gintugutan sang Dios nga mapatay ang akon asawa?” Isa ka adlaw nasugilanon ni José si Francesc, nga katrabaho niya. Nagpanugyan si Francesc nga binagbinagon nila ang kapitulo 11 sang Ginatudlo Sang Biblia nga libro, nga may tig-ulo nga “Ngaa Ginatugutan Sang Dios ang Pag-antos?” Ang Makasulatanhon nga paathag kag ang ilustrasyon tuhoy sa isa ka manunudlo kag isa ka estudyante nakabulig agod mahangpan ni José ang punto. Nagtuon sia sing maayo, nagtambong sa sirkito nga asambleya, kag karon nagatambong sa mga miting sa Kingdom Hall sa ila lugar.

21 Si Roman, 40-anyos nga negosyante sa Poland, nagatahod gid sa Pulong sang Dios. Apang bangod sang iya kasakuon sa trabaho, diutay lamang ang iya pag-uswag sa pagtuon sa Biblia. Walay sapayan, nagtambong sia sa isa ka distrito nga kombension kag nakabaton sing isa ka kopya sang Ginatudlo Sang Biblia nga libro. Pagkatapos sini, daku ang iya pag-uswag. “Sa sini nga libro,” siling niya, “ang tanan nga sadsaran nga panudlo sang Biblia gintingob agod mahuman ang bug-os nga larawan, kaangay sang isa ka jigsaw puzzle.” Sa karon si Roman nagatuon sing regular sa Biblia kag nagauswag sing maayo.

Padayon nga Palambua ang Inyo Apresasyon

22, 23. Paano naton padayon nga mapakita ang aton apresasyon para sa paglaum nga ginpahamtang sa aton atubang?

22 Subong sang ginpaathag sa makalilipay nga “Malapit Na ang Kaluwasan!” nga Distrito nga Kombension, ginakalangkagan sang matuod nga mga Cristiano ang “dayon nga kaluwasan” nga ginsaad sang Dios kag ginpaposible paagi sa ginapaagay nga dugo ni Jesucristo. Wala na sing mas maayo pa nga paagi sa pagpakita sang aton apresasyon sa sining bilidhon nga paglaum sangsa padayon nga matinluan “gikan sa patay nga mga buhat agod makahimo kita sing sagrado nga pag-alagad sa buhi nga Dios.”—Hebreo 9:12, 14.

23 Huo, isa gid ka milagro nga walay sapayan sang tuman kabaskog nga pag-ipit nga magmaiyaiyahon, kapin sa anom ka milyon nga mga manugbantala sang Ginharian ang matutom nga nagabatas sa pag-alagad sa Dios. Pamatuod man ini nga ang mga alagad ni Jehova nagaapresyar gid sang pribilehiyo nga makaalagad sa Dios, nakahibalo nga ang ila “pagpangabudlay indi nga wala pulos sa Ginuo.” Kabay nga indi gid mag-untat sa paglambo sini nga apresasyon!—1 Corinto 15:58; Salmo 110:3.

Paano Mo Sabton?

• Ano ang gintudlo sa aton sang salmista tuhoy sa pag-apresyar sa Dios kag sa iya mga aman sa espirituwal?

• Paano natuman karon ang ginasiling sang Hageo 2:7?

• Paano ginasangkapan ni Jehova ang iya mga alagad karon agod maalagad Sia sing epektibo?

• Ano ang himuon mo agod ipakita ang imo apresasyon sa kaayo ni Jehova?

[Mga Pamangkot sa Pagtinuon]

 [Tsart sa pahina 27-30]

2006 SERVICE YEAR REPORT OF JEHOVAH’S WITNESSES WORLDWIDE

 (See bound volume)

[Mga Piktyur sa pahina 25]

Ginasangkapan kita sing bug-os ni Jehova sa paghimo sang iya kabubut-on