Magdiretso sa kaundan

Magdiretso sa listahan sang kaundan

Lalaki kag Babayi—Ginhimo Para sa Isa kag Isa

Lalaki kag Babayi—Ginhimo Para sa Isa kag Isa

 Lalaki kag Babayi​—Ginhimo Para sa Isa kag Isa

HANDUM gid sang lalaki kag babayi nga mag-updanay. Ini nga handum naghalin sa Dios. Nakita ni Jehova nga indi maayo nga ang una nga lalaki, si Adan, magpadayon nga nagaisahanon lamang. Gani ginhimuan sang Dios ang lalaki sing “kabulig, subong katuwang niya.”

Ginpatulog ni Jehova si Adan sing mahamuok, kag nian ginkuha niya ang isa sang iya mga gusok kag “ginhimo . . . ang gusok . . . nga mangin isa ka babayi kag gindala sia sa lalaki.” Nalipay gid si Adan sang makita niya ining matahom nga tinuga ni Jehova amo nga nakasiling sia: “Ini karon ang tul-an sang akon katul-anan kag unod sang akon unod.” May mga kinaiya subong babayi, ang himpit nga babayi nga si Eva, hiligugmaon gid. Kag ang himpit naman nga si Adan takus gid nga tahuron bangod sang iya mga kinaiya subong lalaki. Ginhimo sila para sa isa kag isa. Ang Biblia nagsiling: “Amo sina kon ngaa bayaan sang lalaki ang iya amay kag ang iya iloy kag magahiusa sia sa iya asawa kag sila mangin isa ka unod.”—Genesis 2:18-24.

Apang, ang mga pamilya karon nagakabungkag, kag ang relasyon sa ulot sang lalaki kag babayi masami nga maabusuhon ukon maiyaiyahon. Ang espiritu sang pagpaindisanay sa ulot sang lalaki kag babayi amo ang isa ka rason sang di-paghangpanay kag pagbaisay. Ini tanan supak sa katuyuan sang Dios para sa lalaki kag babayi. Ang lalaki gindesinyo sa paghimo sang isa ka tumalagsahon nga papel sa duta. Ang babayi naman may yara pinasahi kag nagakaigo nga papel subong katuwang sang iya bana. Magabuligay sila. Kutob sa umpisa sang pagluntad sang tawo, matutom nga ginpanikasugan sang diosnon nga mga lalaki kag mga babayi nga tumanon ang mga papel nga gintuyo ni Jehova para sa ila, kag naghatag ini sa ila sing dugang nga kalipay kag kaayawan. Ano ini nga mga papel, kag paano naton ini matuman?

[Piktyur sa pahina 3]

Ang lalaki kag babayi gindesinyo sa paghimo sang dungganon nga mga papel sa kahimusan sang Dios