Magdiretso sa kaundan

Magdiretso sa listahan sang kaundan

Dignidad sang Tawo—Isa ka Kinamatarong nga Masami Ginatapakan

Dignidad sang Tawo—Isa ka Kinamatarong nga Masami Ginatapakan

 Dignidad sang Tawo—Isa ka Kinamatarong nga Masami Ginatapakan

“Ang tagsa ka detalye sang kabuhi sa kampo isa ka halintang panaug sa hagdanan padulong sa pagpakanubo kag paghublas sa dungog.”​—MAGDALENA KUSSEROW REUTER, NAKALAMPUWAS SA KAMPO KONSENTRASYON SANG MGA NAZI.

BISAN makasiligni, ang pagpamintas sa mga kampo konsentrasyon sang mga Nazi sadtong Bug-os Kalibutan nga Inaway II indi ang pamuno ukon ang katapusan sang pagtapak sa dignidad ukon dungog sang mga tawo. Kon usisaon naton ang nagligad ukon ang karon, maathag gid ang matukiban: Madamo na ang nagpanaug sa “hagdanan padulong sa pagpakanubo kag paghublas sa dungog” sa sulod sang malawig nga tion.

Apang, indi lamang sa mga pagpamintas nga nagmantsa sa maragtas sang tawo ginatapakan ang dignidad sang tawo. Masami ini ginatapakan sa mas malalangon nga mga paagi. Hunahunaa ang isa ka bata nga ginasunlog bangod sang iya hitsura. Ukon ang imigrante nga ginayaguta bangod sang pila ka di-naandan nga mga kustombre. Ukon ang indibiduwal nga ginaihig-ihig bangod sang iya duag sang panit ukon nasyonalidad. Ayhan lahuglahog lamang ini para sa mga nagahimo sini, apang para sa mga ginapakanubo ukon ginapakahuy-an, ang kasakit kag kahuluy-an nga ila ginbatyag indi gid lahuglahog.—Hulubaton 26:18, 19.

Ano ang Dignidad sang Tawo?

Isa ka diksionaryo ang nagahatag-kahulugan sa dignidad subong ‘ang kalidad ukon kahimtangan sang pagkatakus, pagpabalor, ukon pagtahod.’ Busa, ang dignidad sang tawo nagadepende sa aton pagtamod sa aton kaugalingon kag sa pagpakig-angot sang iban sa aton. Walay sapayan nga ang aton  pagtamod sa aton kaugalingon mahimo maapektuhan sang nagkalainlain nga mga butang, ang pagtamod ukon pagpakig-angot sang iban sa aton may daku gid nga epekto sa aton pagbatyag nga may yara kita kabilinggan sa adlaw-adlaw nga pagkabuhi.

Ang tagsa ka katilingban may isa ka bahin nga nagalakip sa mga imol, mga walay inugpangapin, kag mga mahuyang. Apang, kon ang isa ka tawo yara sa amo nga kahimtangan, indi buot silingon nga wala na sia sing dignidad. Ang panimuot kag reaksion sang iban amo ang nagapabatyag sa iya nga wala sia sing dignidad. Ang masubo nga kamatuoran amo nga ang dignidad sang mga makaluluoy ukon mga kabos-palad masami nga ginabale-wala ukon ginatapakan. Daw ano kasunson naton mabatian ang mga tinaga kaangay sang “walay pulos,” “indi takus,” kag “indi bagay” sa mga kaso may kaangtanan sa pag-abuso sa mga tigulang, mga imol, ukon sa mga may diperensia sa hunahuna ukon lawas!

Ngaa ginapakanubo sang mga tawo ang isa kag isa? Matabo gid ayhan nga ihatag sa tawo ang sadsaran nga kinamatarong sini sa dignidad? Ihatag sang masunod nga artikulo ang makalilipay nga sabat gikan sa Pulong sang Dios, ang Biblia.