Magdiretso sa kaundan

Magdiretso sa listahan sang kaundan

Ang Iya Pagtuo Nagapalig-on sa Iban

Ang Iya Pagtuo Nagapalig-on sa Iban

 Ang Iya Pagtuo Nagapalig-on sa Iban

SANG matawo si Silvia sang Disiembre 1992, isa gid sia ka mapagros nga lapsag nga babayi kon tan-awon. Apang, sang magduha sia ka tuig, nasayasat nga may cystic fibrosis si Silvia, isa ka indi mabulong nga balatian nga ginabangdan sang nagalala nga problema sa baga kag tiyan. Agod makabato sa iya balatian, nagatomar si Silvia sing 36 ka tabletas adlaw-adlaw, nagagamit sing paaso, kag nagapa-physical therapy. Sanglit ang ikasarang sang iya mga baga 25 porsiento lamang kon ikumparar sa normal nga mga baga, dapat sia mag-oxygen, bisan pa may kadtuan sia.

“Apang, dalayawon gid kon paano ginaatubang ni Silvia ini nga balatian,” siling sang iya iloy nga si Teresa. “Bangod sang iya ihibalo sa Kasulatan, may mabakod sia nga pagtuo. Ini nga pagtuo nagabulig sa iya nga atubangon ang kasubo kag indi komportable nga kahimtangan. Pirme niya ginadumdom ang saad ni Jehova nga isa ka bag-ong kalibutan, diin ang tanan nga may balatian magaayo na.” (Bugna 21:4) Sa mga tion nga nagaluya ang buot sang iya pamilya, ang iya may pagsalig nga mga yuhum nagapapagsik sa ila. Ginasilingan niya ang iya mga ginikanan kag utod nga lalaki: “Bawion sang kabuhi sa bag-ong kalibutan ang tanan naton nga pag-antos karon.”

Regular nga ginapaambit ni Silvia sa iban ang maayong balita sang Pulong sang Dios, kag natalupangdan sang mga nasugilanon niya ang kalipay sa iya nawong. Ginaapresyar man sing daku sang mga katapo sang kongregasyon nga ginatambungan niya sa Canary Islands ang iya mga komento kag pagpakigbahin sa mga miting. Sa tapos sang tagsa ka miting, nagapabilin anay si Silvia agod makigsugilanon sa Cristianong mga kauturan. Bangod mainabyanon kag masinadyahon sia, palangga sia sang tanan sa kongregasyon.

“Ginatudluan kita ni Silvia sang isa ka importante gid nga leksion,” siling sang iya amay nga si Antonio. “Bisan pa may mga problema kita, ang kabuhi dulot halin sa Dios, kag dapat naton ini pasalamatan.” Kaangay ni Silvia, ang tanan nga alagad sang Dios—pamatan-on man ukon may edad—may kalangkag nga nagahulat sa tion nga “wala sing pumuluyo nga magasiling: ‘Nagamasakit ako.’”—Isaias 33:24.

[Retrato sa pahina 31]

Ginabasa ni Silvia ang isa ka bersikulo sa Biblia samtang ginauyatan sang iya iloy ang tangke sang oxygen