Magdiretso sa kaundan

Magdiretso sa listahan sang kaundan

Handa Ka Na Bala Para sa Kaluwasan?

Handa Ka Na Bala Para sa Kaluwasan?

 Handa Ka Na Bala Para sa Kaluwasan?

“Sulod ka kag ang bug-os mo nga panimalay sa arka, bangod ikaw ang nakita ko nga matarong sa akon atubangan sa tunga sining kaliwatan.”​—GENESIS 7:1.

1. Anong kahimusan para sa kaluwasan ang ginhimo ni Jehova sang panahon ni Noe?

“GIN-ANAW [ni Jehova] ang kalibutan sang di-diosnon nga mga tawo” sang panahon ni Noe, apang naghimo man Sia sing kahimusan para sa kaluwasan. (2 Pedro 2:5) Ginhatagan sang matuod nga Dios sing detalyado nga instruksion ang matarong nga si Noe kon paano himuon ang arka agod matipigan ang kabuhi sa pag-abot sang bug-os globo nga baha. (Genesis 6:​14-​16) Subong paabuton naton sa matutom nga mga alagad ni Jehova, “ginhimo ni Noe ang tanan suno sa ginsugo sang Dios sa iya.” Sa pagkamatuod, “amo gid ang ginhimo niya.” Ang pagkamatinumanon ni Noe isa ka rason kon ngaa buhi kita karon.—Genesis 6:22.

2, 3. (a) Ano ang reaksion sang mga kadungan ni Noe sa iya hilikuton? (b) Ano ang pagsalig ni Noe sang nagsulod sia sa arka?

2 Indi mahapos ang paghimo sing arka. Sigurado nga nagdayaw gid ang mga tawo sa ginahimo ni Noe kag sang iya pamilya. Apang, indi ini bastante agod makumbinsi sila nga ang ila kaluwasan nasandig sa pagsulod nila sa arka. Sang ulihi, naubos ang pasensia sang Dios sa sadtong malaut nga kalibutan.​—Genesis 6:3; 1 Pedro 3:​20.

3 Pagkatapos sang dinekada nga lakas nga pagpangabudlay ni Noe kag sang iya pamilya, ginsilingan ni Jehova si Noe: “Sulod ka kag ang bug-os mo nga panimalay sa arka, bangod ikaw ang nakita ko nga matarong sa akon atubangan sa tunga sining kaliwatan.” Bangod sang iya pagtuo kag pagsalig sa pulong ni Jehova, “nagsulod si Noe sa arka, kag kaupod niya ang iya mga anak kag ang iya asawa kag ang mga asawa sang iya mga anak.” Ginsiraduhan ni Jehova ang puertahan agod maamligan ang iya mga sumilimba. Sang nag-abot ang Anaw sa duta, ang arka nangin isa ka masaligan nga aman sang Dios para sa kaluwasan.​—Genesis 7:​1, 7, 10, 16.

Mga Kaanggid sang Panahon ni Noe sa Karon

4, 5. (a) Sa ano ginpaanggid ni Jesus ang tion sang iya presensia? (b) Ano ang mga pagkaanggid sang panahon ni Noe kag sang aton panahon?

4 “Subong sang mga adlaw ni Noe, amo man ang presensia sang Anak sang tawo.” (Mateo 24:37) Paagi sa sining mga pinamulong, ginpakita ni Jesus nga ang panahon sang iya di-kitaon nga presensia mangin kaanggid sang panahon ni Noe, kag nangin matuod gid ini. Ilabi na sugod sang 1919, isa ka nagapaandam nga mensahe kaangay sang ginhatag ni Noe ang ginapahayag sa mga tawo sang tanan nga pungsod. Sa kabilugan, ang ila reaksion kaanggid sa reaksion sang mga tawo sang panahon ni Noe.

5 Paagi sa Anaw, ginlaglag ni Jehova yadtong kalibutan nga “napun-an sing kasingki.” (Genesis 6:13) Maathag gid nga nakita sang mga tawo nga wala nakigbahin si Noe kag ang iya pamilya sa kasingki sadtong tion, sa baylo, mahidaiton sila nga nagtukod sing arka. Sa sining paagi, makita man naton ang pagkaanggid sa aton panahon karon. “Makita [karon sang sinsero nga mga tawo] ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.” (Malaquias 3:18) Ang pagkabunayag, kaayo, pagkamahidaiton, kag kapisan sang mga Saksi ni Jehova ginadayaw sang walay ginapasulabi nga mga tagpanilag, kag ini nga mga kinaiya nagapakilala sa katawhan sang Dios nga tuhay gikan sa kalibutan sa kabilugan. Ang mga Saksi nagasikway sa tanan nga sahi sang kasingki kag nagapatuytoy sila sa espiritu ni Jehova. Amo sina kon  ngaa may paghidait sila kag kon ngaa padayon sila nga nagalakat sa matarong nga dalanon.​—Isaias 60:17.

6, 7. (a) Ano ang wala mahantop sang mga tawo sang panahon ni Noe, kag paano ini kaanggid karon? (b) Anong mga halimbawa ang nagapakita nga ang mga Saksi ni Jehova nakilal-an nga tuhay?

6 Wala mahantop sang mga kontemporaryo ni Noe nga ginasuportahan si Noe sang Dios kag nagapanghikot sia sa idalom sang panuytoy sang Dios. Amo kon ngaa wala nila ginserioso ang iya pagbantala kag wala sila namati sa iya mga paandam. Kamusta naman karon? Bisan pa madamo ang nagadayaw sa hilikuton kag paggawi sang mga Saksi ni Jehova, wala ginaserioso sang kalabanan ang maayong balita kag ang mga paandam sang Biblia. Ang mga kaingod, mga amo, ukon mga paryente mahimo magdayaw sa maayong mga kinaiya sang matuod nga mga Cristiano apang nagasiling sila dayon nga daw nanugon, “Kon indi lang sila kuntani mga Saksi ni Jehova!” Wala narealisar sining mga nagapanilag nga ginapadayag sang mga Saksi ang mga kinaiya subong sang gugma, paghidait, pagkamainayuhon, pagkaayo, kalulo, kag pagpugong sa kaugalingon bangod ginatuytuyan sila sang balaan nga espiritu sang Dios. (Galacia 5:22-25) Dapat magpahulag ini sa mga tawo nga pamatian sila.

7 Sa Rusya, halimbawa, ang mga Saksi ni Jehova nagapatindog anay sing Kingdom Hall. Ang tawo nga nagdulog kag nakigsugilanon sa isa sa mga manugpangabudlay nagsiling: “Pinasahi gid ini nga duog sang konstruksion—wala sing nagapanigarilyo, wala sing nagahambal sing malaw-ay nga mga pulong, kag wala sing hubog! Indi ayhan mga Saksi ni Jehova kamo?” Ginpamangkot sia sang manugpangabudlay, “Kon magsiling ako nga indi, mapati ka ayhan?” Nagsabat gilayon ang tawo, “Indi.” Sa isa pa ka siudad sa Rusya, nagdayaw gid ang meyor sang nakita niya kon paano gintukod sang mga Saksi ang ila bag-o nga Kingdom Hall. Nagsiling sia nga bisan pa palareho lang anay ang pagtamod niya sa tanan nga relihion, nagbag-o ini sang nakita niya ang sinsero nga pagkamasinakripisyuhon sang mga Saksi ni Jehova. Duha lamang ini ka halimbawa nga nagapakita nga tuhay ang mga alagad ni Jehova sa mga wala nagasunod sa mga talaksan sang Biblia.

8. Sa ano nasandig ang aton kaluwasan sa kalaglagan sining malaut nga kalibutan?

8 Si Noe isa ka matutom nga “manugbantala sang pagkamatarong” sa katapusan nga bahin sadtong “dumaan nga kalibutan” nga nalaglag sa Anaw. (2 Pedro 2:5) Sa katapusan nga mga adlaw sining karon nga sistema sang mga butang, ginapahibalo sang katawhan ni Jehova ang matarong nga mga talaksan sang Dios kag ginabantala nila ang maayong balita tuhoy sa posibilidad nga makalampuwas pasulod sa bag-ong kalibutan. (2 Pedro 3:​9-​13) Subong nga si Noe kag ang iya mahinadlukon sa Dios nga pamilya naluwas paagi sa arka, ang kaluwasan sang mga indibiduwal karon nagadepende sa ila pagtuo kag sa ila mainunungon nga pagpakig-upod sa dutan-on nga bahin  sang bug-os uniberso nga organisasyon ni Jehova.

Ang Pagtuo Kinahanglan Para sa Kaluwasan

9, 10. Ngaa importante ang pagtuo kon luyag naton maluwas sa kalaglagan sang sistema sang mga butang ni Satanas?

9 Ano dapat ang himuon sang isa ka tawo agod maluwas sa nagapalapit nga kalaglagan sining kalibutan nga yara sa gahom ni Satanas? (1 Juan 5:​19) Una, dapat niya mahangpan nga kinahanglan ang proteksion. Nian dapat niya himuslan inang proteksion. Ang mga tawo sang panahon ni Noe nagpadayon sa paghimo sang ila matag-adlaw nga mga hilikuton kag wala nila nahantop nga nagakinahanglan sila sing proteksion sa manug-abot nga kalamidad. May yara kulang sa ila—pagtuo sa Dios.

10 Sa pihak nga bahin, nahangpan ni Noe kag sang iya pamilya nga nagakinahanglan sila sing proteksion kag kaluwasan. Nagpakita man sila sing pagtuo sa Bug-os Uniberso nga Soberano, si Jehova nga Dios. “Kon wala sing pagtuo imposible nga mapahamut-an [si Jehova] sing maayo,” sulat ni apostol Pablo, “kay sia nga nagapalapit sa Dios dapat magpati nga nagaluntad sia kag nga sia ang manugpadya sa mga hanuot nga nagapangita sa iya.” Nagsiling pa si Pablo: “Bangod sa pagtuo si Noe, pagkatapos ginhatagan sing paandam sang Dios nahanungod sa mga butang nga wala pa makita, nagpakita sing diosnon nga kahadlok kag nagtukod sing arka agod maluwas ang iya panimalay; kag paagi sini nga pagtuo gintagudilian niya ang kalibutan, kag nangin manunubli sia sang pagkamatarong nga suno sa pagtuo.”—Hebreo 11:6, 7.

11. Ano ang matun-an naton gikan sa paagi sang pag-aman ni Jehova sing proteksion sang una?

11 Agod maluwas sa kalaglagan sang malaut nga sistema sang mga butang karon, indi bastante nga magpati lamang kita nga malaglag ini. Dapat kita magtuo sa kahimusan sang Dios para sa kaluwasan kag himuslan sing bug-os inang mga kahimusan. Sa pagkamatuod, kinahanglan kita magtuo sa halad gawad sang Anak sang Dios nga si Jesucristo. (Juan 3:​16, 36) Apang, dapat naton dumdumon nga yadto lamang ang yara sa sulod sang arka ni Noe ang naluwas sa Anaw. Sing kaanggid, ang mga siudad nga dalangpan sa dumaan nga Israel naghatag lamang sing proteksion sa tawo nga di-hungod nga nakapatay kon una, nagsulod sia sa sini nga siudad kag dason, nagpabilin sa sulod tubtob mapatay ang mataas nga saserdote. (Numeros 35:11-​32) Sa ikapulo nga kalalat-an sa Egipto sang panahon ni Moises, napatay ang panganay sang mga Egiptohanon, apang naluwas ang panganay sang mga Israelinhon. Ngaa? Ginsugo ni Jehova si Moises: “Magkuha sila [ang mga Israelinhon] sing dugo [sang kordero sang Paskua] kag ipalhit ini sa duha ka bakalan sang ganhaan kag sa ibabaw nga bahin sang ganhaan sang mga balay nga kaunan nila sini. . . . Kag wala dapat bisan isa sa inyo ang maggua sa ganhaan sang iya  balay tubtob sa aga.” (Exodo 12:7, 22) May panganay pa ayhan sa Israel nga mangahas nga indi magtuman sining hatag-Dios nga sugo kag maggua sa balay nga namarkahan sing dugo nga napalhit sa duha ka bakalan kag sa ibabaw nga bahin sang ganhaan?

12. Ano nga pamangkot ang dapat naton ipamangkot sa aton kaugalingon, kag ngaa?

12 Busa, makatarunganon lamang nga hunahunaon sing maayo ang aton personal nga sitwasyon. Yara gid bala kita sa sulod sang kahimusan ni Jehova para sa espirituwal nga proteksion? Kon mag-abot na ang dakung kapipit-an, ang mga luha sang kalipay kag pagpasalamat magatululagay sa nawong sang mga nagpangita sining proteksion. Apang para sa iban, luha lamang sang kasubo kag paghinulsol ang magatulo sa ila mga mata.

Ang Progresibo nga mga Pagbag-o Nagahanda sa Aton

13. (a) Ano ang nangin resulta sang mga pagbag-o sa organisasyon? (b) Ipaathag ang pila ka progresibo nga mga pagbag-o.

13 Si Jehova naghimo sing progresibo nga mga pagbag-o sa dutan-on nga bahin sang iya organisasyon. Nagpatahom, nagpabakod, kag nagpalig-on ini sang iya kahimusan para sa aton espirituwal nga proteksion. Sugod sang dekada 1870 tubtob 1932, ang mga gulang kag mga deakono ginaboto sang mga katapo sang kongregasyon. Sang 1932 ang ginboto nga mga gulang ginbuslan sang isa ka komite sa pag-alagad nga ginboto sang kongregasyon agod magbulig sa gintangdo nga direktor sa pag-alagad. Sang 1938, ang organisasyon ni Jehova naghimo sing kahimusan nga ang tanan nga alagad sang kongregasyon dapat itangdo sa teokratiko nga paagi. Sa idalom sang panuytoy sang Nagadumala nga Hubon sang mga Saksi ni Jehova, sugod sang 1972, ang mga rekomendasyon ginahimo kag kon maaprobahan ini ang mga kongregasyon nagabaton sing sulat nga nagatangdo sa mga manugtatap kag mga ministeryal nga alagad sa teokratiko nga paagi. Sa pagligad sang mga tinuig, nagdamo ang hilikuton sang Nagadumala nga Hubon kag ginhimo ang mga pagbag-o agod buligan sila sa ila hilikuton.

14. Anong programa sa paghanas ang nagsugod sang 1959?

14 Sang 1950, ang pagbinagbinag sing maayo sang Salmo 45:16 nagdul-ong sa nagapadayon nga programa sa paghanas. Ining teksto nagasiling: “Sa tal-us sang imo mga ginikanan amo ang imo mga anak, himuon mo sila nga mga prinsipe sa bug-os nga duta.” Ang mga gulang nga nagapanguna karon sa kongregasyon ginahanas para sa teokratiko nga mga asaynment karon kag pagkatapos sang Armagedon. (Bugna 16:14, 16) Ang Kingdom Ministry School nagsugod sang 1959. Sadto, ginhimos ang isa ka bulan nga kurso ilabi na para sa mga alagad sang kongregasyon, subong amo anay ang tawag sa mga nagadumala nga manugtatap. Ining eskwelahan ginpasangkad karon agod maghatag sing instruksion sa tanan nga manugtatap kag ministeryal nga alagad. Ini naman nga mga utod nga lalaki nagapanguna sa paghanas sa indibiduwal nga mga Saksi ni Jehova sa ila mga kongregasyon. Busa, ang tanan ginabuligan sa espirituwal agod mangin labi ka epektibo sa ila ministeryo subong mga manugbantala sang maayong balita sang Ginharian.​—Marcos 13:10.

15. Sa anong duha ka paagi ginaproteksionan ang kaputli sang Cristianong kongregasyon?

15 Ang mga indibiduwal nga luyag mangin bahin sang Cristianong kongregasyon dapat magtuman sang pila ka mga kinahanglanon. Sing makatarunganon, ang modernong-adlaw nga mga mayubiton wala ginatugutan nga mangin bahin sang Cristianong kongregasyon, subong  nga ining sahi sang mga tawo wala sadto gintugutan nga magsulod sa Arka ni Noe. (2 Pedro 3:​3-7) Ilabi na sugod sang 1952, mas nahangpan kag ginsakdag sang mga Saksi ni Jehova ang isa ka kahimusan nga nagabulig agod maproteksionan ang kongregasyon—buot silingon, ang pag-disfellowship sa di-mahinulsulon nga mga makasasala. Sa pagkamatuod, ang mga nakasala nga sinsero gid nga nagahinulsol mahigugmaon nga ginabuligan sa ‘pagtadlong sang ila mga banas para sa ila mga tiil.’—Hebreo 12:12, 13; Hulubaton 28:13; Galacia 6:1.

16. Ano ang espirituwal nga kahimtangan sang katawhan ni Jehova?

16 Indi makapakibot ukon natabuan lamang ang espirituwal nga kabuganaan sang katawhan ni Jehova. Paagi kay manalagna Isaias, si Jehova nagsiling: “Yari karon! Ang akon mga alagad magakaon, apang gutumon kamo. Yari karon! Ang akon mga alagad magainom, apang uhawon kamo. Yari karon! Ang akon mga alagad magakasadya, apang mahuy-an kamo. Yari karon! Ang akon mga alagad magahugyaw sa kalipay bangod sa maayo nga kahimtangan sang tagipusuon, apang magatuaw kamo bangod sang masakit nga dughan kag magahaya kamo bangod sang buong nga espiritu.” (Isaias 65:13, 14) Si Jehova padayon nga nagaaman sa aton sing bugana nga suplay sang suno sa tion kag makapapagros sa espirituwal nga pagkaon nga nagabulig sa aton sa pagpabilin nga mabaskog sa espirituwal.​—Mateo 24:45.

Maghanda Para sa Kaluwasan

17. Ano ang magabulig sa aton agod makahanda sa kaluwasan?

17 Mas labi na gid karon nga kinahanglan “binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa.” (Hebreo 10:23-25) Ang pagpakig-upod sing suod kag pagpabilin nga aktibo upod sa isa sang kapin sa 98,000 ka kongregasyon sang mga Saksi ni Jehova magabulig sa aton sa paghanda para sa kaluwasan. Matigayon naton ang suporta sang aton masigkatumuluo samtang nagatinguha kita nga ipadayag ang “bag-o nga personalidad” kag nagapanikasog sing bug-os tagipusuon nga buligan ang iban nga makatuon sang aman ni Jehova para sa kaluwasan.—Efeso 4:22-24; Colosas 3:9, 10; 1 Timoteo 4:16.

18. Ngaa determinado ka nga magpabilin nga suod sa Cristianong kongregasyon?

18 Luyag gid ni Satanas kag sang iya malaut nga kalibutan nga masulay kita agod mapahilayo sa Cristianong kongregasyon. Apang, makapabilin kita nga bahin sini kag makalampuwas sa kalaglagan sining karon nga sistema sang mga butang. Kabay nga ang gugma kay Jehova kag ang pagkamapinasalamaton sa iya mahigugmaon nga mga aman magapahulag sa aton nga mangin labi ka determinado sa pagpamatok sa mga panikasog ni Satanas. Ang pagpamalandong sa mga benepisyo nga ginatigayon naton karon subong mga Cristiano makapabakod sang aton determinasyon. Ang pila sining mga pagpakamaayo pagabinagbinagon sa masunod nga artikulo.

Ano ang Imo mga Sabat?

• Paano magkaanggid ang aton panahon sa panahon ni Noe?

• Ano nga mga kinaiya ang importante para sa kaluwasan?

• Ano nga progresibo nga mga pagbag-o ang nagpabakod sang kahimusan ni Jehova para sa aton proteksion?

• Paano kita personal nga makahanda para sa kaluwasan?

[Mga Pamangkot sa Pagtinuon]

[Retrato sa pahina 22]

Si Noe wala gintamod sing serioso sang iya mga kontemporaryo

[Retrato sa pahina 23]

Dapat gid naton tamdon sing serioso ang nagapaandam nga mensahe sang Dios

[Retrato sa pahina 24]

Ano ang katuyuan sang Kingdom Ministry School?

[Retrato sa pahina 25]

Karon na ang tion nga labi kita nga magpabilin nga suod sa Cristianong kongregasyon