Magdiretso sa kaundan

Magdiretso sa listahan sang kaundan

Daw Ano ka Madinalag-on ang Inyo Komunikasyon?

Daw Ano ka Madinalag-on ang Inyo Komunikasyon?

 Daw Ano ka Madinalag-on ang Inyo Komunikasyon?

“SULAT Sang Gugma Sang 60-Anyos.” Amo ina ang tema sang sweepstakes nga paindisanay sang isa ka bangko sa Japan sang nagligad nga pila ka tuig. Ginhaylo sini ang singkwentahon kag sisentahon nga mga Hapones nga ipabutyag ang ila “matuod gid nga ginabatyag” sa ila tiayon. Ang isa ka manugpaindis-indis nagsulat sa iya asawa: “Mahimo makadlaw ka, apang mahinulsol gid ako kon indi ko ini pag-ihambal, gani, sa mabaskog nga tingog: Salamat nga nagpakasal ka sa akon.”

Sa nanuhaytuhay nga mga kultura, lakip ang pila sa Sidlangan, ang hilway nga pagpabutyag sang kaugalingon wala ginapalig-on. Apang, kapin sa 15,000 ang nag-entra sa sadtong paindisanay sa sulat sang gugma. Nangin popular gid ini amo nga nasundan pa ini, kag may mga libro nga ginbalhag base sa mga sulat nga ginpadala sa paindisanay. Nagapahangop ini nga sa alibutod sang tagipusuon, madamo ang nagakalangkag nga ipabutyag kon ano ang ginabatyag nila sa ila pinalangga nga tiayon. Apang, nagapangindi ang iban nga himuon ini. Ngaa? Ayhan nabudlayan sila kag indi makahibalo kon paano ipaalinton sa iban​—⁠subong sang tiayon​—⁠ang ila ginabatyag.

Si Hitoshi Kato, nga nagsulat sing isa ka libro tuhoy sa pagretiro, nagsiling nga sa tunga sang may edad na nga mga mag-asawa sa Japan, madamo nga asawa ang nagadiborsio sa ila bana bangod sang tudok nga mga hinakit nga nagsupot sa sulod sang mga tinuig. “Apang,” siling niya, “resulta man ini sang indi paghambalanay sang mag-asawa kon mag-utwas ang mga problema.”

Sa pagretiro sang bana, mahimo nga makibot sia kon dahuan sia sang iya asawa sing pahibalo nga bulagay na sila. Sa sulod sang madamo nga tinuig mahimo nga wala naghambalanay ang mag-asawa kon ano ang ila ginabatyag sa isa kag isa. Mahimo nga nagtinguha ang mag-asawa nga ipabutyag ang ila ginabatyag apang indi sila  makahambalanay sing maayo. Sa baylo nga palambuon ang suod nga kaangtanan, pirme lang sila nagakamog.

Paano maatubang sang mag-asawa ang ila mga indi paghangpanay sa isa ka malinong nga paagi kag ipaalinton ang ila mga ginabatyag sa maayo nga paagi? Ayhan interesado ka nga ang labing praktikal nga mga panugda masapwan, indi sa pinakabag-o nga libro sang isa ka manuglaygay tuhoy sa pag-asawahay, kundi sa isa ka dumaan nga libro nga ginaapresyar sa sulod sang mga siglo​—⁠ang Biblia.