Magdiretso sa kaundan

Magdiretso sa listahan sang kaundan

‘Si Jah Nangin Akon Kaluwasan’

‘Si Jah Nangin Akon Kaluwasan’

 “Dapat Namon Tumanon ang Dios Subong Manuggahom sa Baylo Sang mga Tawo”

‘Si Jah Nangin Akon Kaluwasan’

ANG katawhan ni Jehova kinahanglan magpili. Tumanon bala nila ang malaut nga manuggahom sang dumaan nga Egipto? Ukon tumanon bala nila si Jehova nga Dios, biyaan yadtong duog sang kahiulipnan, kag magpuyo sa Ginsaad nga Duta?

Bangod indi magpasugot ang batinggilan nga Paraon sang Egipto nga hilwayon ang katawhan ni Jehova, ginpadala sang Dios ang Napulo ka Kalalat-an sa sinang pungsod. Ginpasundayag gid sini ang iya gahom! Wala mapunggan sang mga diosdios sang mga Egiptohanon ining mga kalalat-an.

Sang ginsilingan si Paraon nga palakton ang katawhan sang Dios, sia nagsiling nga may pagyaguta: “Sin-o si Jehova, nga tumanon ko sia kag palakton ang Israel? Wala gid ako makakilala kay Jehova, kag, labot pa, indi ko pagpalakton ang Israel.” (Exodo 5:2) Bilang resulta, naeksperiensiahan sang Egipto ining mga kalalat-an: (1) ang tubig nangin dugo, (2) paka, (3) kuto, (4) langaw, (5) pagkapatay sang kahayupan, (6) hubag sa tawo kag sa sapat, (7) bato nga yelo, (8) apan, (9) kadudulman, kag (10) pagkapatay sang mga panganay sang Egiptohanon, lakip ang anak nga lalaki ni Paraon. Sang ulihi, ginpalakat ni Paraon ang mga Hebreo. Ginpilit pa gani niya sila sa paglakat!​—⁠Exodo 12:​31, 32.

Mga tatlo ka milyon​—⁠Israelinhon nga mga lalaki, mga babayi, kag mga kabataan subong man isa ka daku nga nagasalakot nga kadam-an​—⁠ang naghalin dayon. (Exodo 12:​37, 38) Apang, wala magdugay ginlagas sila ni Paraon upod sang iya daku nga hangaway. Daw nakibon ang mga Israelinhon sang Dagat nga Mapula, sang makatalagam nga desyerto, kag sang mga hangaway ni Paraon. Apang, ginsilingan ni Moises ang katawhan: “Dili kamo magkahadlok. Magtindog kamo sing malig-on kag tan-awa ang pagluwas ni Jehova.”​—⁠Exodo 14:8-14.

Milagruso nga ginpahawa ni Jehova ang Dagat nga Mapula para makapalagyo ang mga Israelinhon. Apang sang nagsunod ang mga Egiptohanon, ginpabalik sang Dios ang tubig. “Ang mga kangga ni Paraon kag ang iya kasuldadusan gintagbong [ni Jehova] sa dagat.” (Exodo 14:26-28; 15:4) Bangod wala ginpadunggan sang bugalon nga Paraon si Jehova nagresulta ini sa iya kalaglagan.

Sa Dagat nga Mapula, ginpamatud-an ni Jehova nga sia “isa ka isganan nga mangangaway.” (Exodo 15:3) “Nakita man sang Israel ang daku nga kamot nga ginpahikot ni Jehova batok sa mga Egiptohanon,” siling sang inspirado nga kasaysayan, “kag ang katawhan nagkahadlok kay Jehova kag nagtuo kay Jehova.” (Exodo 14:31; Salmo 136:10-15) Ginpabutyag nila ang ila tinagipusuon nga pagpasalamat sa Dios sang nagbuylog sila kay Moises sa isa ka ambahanon sang kadalag-an kag ang iya magulang nga si Miriam amo ang nagpanguna sa kababayin-an sa pagsaot.⁠ *

Si Jehova Manluluwas Gihapon

Ang modernong-adlaw nga mga alagad ni Jehova may makuha nga makapalig-on sing pagtuo nga mga leksion gikan sa sinang talalupangdon nga buhat sang pagluwas sang Dios. Ang isa ka leksion amo nga si Jehova may gahom nga wala sing latid kag sarang makasakdag sing bug-os sa iya katawhan. Sa ila ambahanon sang kadalag-an, si Moises kag ang mga Israelinhon malipayon nga nag-amba: “Ang imo tuo nga kamot, O Jehova, gamhanan sing ikasarang, ang imo tuo nga kamot, O Jehova, makadugmok sang kaaway.”​—⁠Exodo 15:6.

Ang isa pa ka leksion amo nga ang Labing Gamhanan nagahandum gid nga amligan ang iya katawhan. Ang mga Israelinhon nag-amba: “Akon kusog kag akon gahom si Jah, kay sia nangin akon kaluwasan. Ini akon Dios, kag dayawon ko sia.” Ang isa pa gid ka leksion amo nga wala sing madinalag-on nga makapamatok sa kabubut-on ni Jehova nga Dios. Sa ila ambahanon sang kadalag-an, ang ginluwas nga katawhan sang Dios nag-amba: “Sin-o sa  mga dios ang kaangay mo, O Jehova? Sin-o ang kaangay mo, nga mahimayaon sa pagkabalaan? Ang Isa nga kahadlukan upod ang mga ambahanon sang pagdayaw, ang Isa nga nagahimo sing mga kalatingalahan.”​—⁠Exodo 15:​2, 11.

Kaangay ni Paraon sang dumaan nga Egipto, ang mga manuggahom sa kalibutan karon nagahingabot sa katawhan ni Jehova. Ang bugalon nga mga lider mahimo nga ‘magapamulong sing mga pulong batok sa Labing Mataas, kag padayon nga magatublag sa mga balaan sang Isa nga Supremo.’ (Daniel 7:25; 11:36) Apang ginpasalig ni Jehova ang iya katawhan: “Bisan ano nga hinganiban nga himuon batok sa imo indi magamadinalag-on, kag bisan ano nga dila nga magatindog batok sa imo sa paghukom pakamalauton mo. Ini amo ang palanublion sang mga alagad ni Jehova.”​—⁠Isaias 54:17.

Ang mga manugpamatok sang Dios mapaslawan, subong nga napaslawan si Paraon kag ang iya mga hangaway. Ang mga pagluwas ni Jehova, subong sang Exodo gikan sa Egipto, nagapamatuod nga dapat sundon ang prinsipio nga ginpamulong sang mga apostoles ni Jesus, nga nagsiling: “Dapat namon tumanon ang Dios subong manuggahom sa baylo sang mga tawo.”​—⁠Binuhatan 5:29.

[Nota]

^ par. 8 Tan-awa ang 2006 Calendar of Jehovah’s Witnesses, January/February.

[Kahon/Retrato sa pahina 9]

NAHIBALUAN MO BALA?

• Ginpabaskog ni Jehova ang hangin sa bug-os nga gab-i agod makatabok ang mga Israelinhon sa Dagat nga Mapula sa mamala nga duta.​—⁠Exodo 14:​21, 22.

• Kinahanglan ang alagyan may kalaparon nga isa ka kilometro kag tunga ukon kapin pa agod makatabok ang minilyon ka mga Israelinhon sa Dagat nga Mapula sa sinang malip-ot lamang nga tion.

[Retrato sa pahina 9]

Ang butig nga mga diosdios sang Egipto wala makapugong sa Napulo ka Kalalat-an gikan kay Jehova

[Credit Line]

All three figurines: Photograph taken by courtesy of the British Museum