Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Duha lamang bala ka tapitapi nga bato ang unod sang kaban sang katipan, ukon may iban pa?

Sang gindedikar ang templo ni Solomon sang 1026 B.⁠C.⁠E., “wala sing sulod ang kaban luwas sang duha ka tapitapi nga ginbutang ni Moises sa Horeb, sang nakigkatipan si Jehova sa mga anak ni Israel sang naggua sila gikan sa Egipto.” (2 Cronica 5:10) Apang, may iban pa ini anay nga unod.

“Sang ikatlo nga bulan sang paggua sang mga anak ni Israel gikan sa duta sang Egipto,” nag-abot sila sa kamingawan sang Sinai. (Exodo 19:​1, 2) Pagkatapos, nagtaklad si Moises sa Bukid Sinai kag ginkuha niya ang duha ka tapitapi nga bato sang Kasuguan. Sia nagsaysay: “Nian nagbalik ako kag nagdulhog sa bukid kag ginsulod ang mga tapitapi sa kaban nga akon ginhimo, agod magpabilin ini didto, suno sa ginsugo ni Jehova sa akon.” (Deuteronomio 10:5) Temporaryo ini nga kaban, ukon suludlan, nga ginpahimo ni Jehova kay Moises agod sudlan sang mga tapitapi sang Kasuguan. (Deuteronomio 10:1) Nahuman lamang ang kaban sang katipan sang mga talipuspusan sang 1513 B.⁠C.⁠E.

Wala madugay pagkatapos nga nakagua ang mga Israelinhon gikan sa Egipto, nagkumod sila nahanungod sa pagkaon. Gani gin-amanan sila ni Jehova sing manna. (Exodo 12:​17, 18; 16:​1-5) Sadto nga tion, ginsugo ni Moises si Aaron: “Kuha ka sing banga kag butangi sing isa ka omer nga manna kag ibutang ini sa atubangan ni Jehova agod tipigan ini sa inyo bug-os nga mga kaliwatan.” Ang rekord nagasiling: “Suno sa ginsugo ni Jehova kay Moises, ginbutang ini ni Aaron sa atubangan sang Pagpamatuod [isa ka talaguan agod matipigan ang importante nga mga dokumento] agod tipigan.” (Exodo 16:​33, 34) Bisan pa nagkuha si Aaron sing manna kag ginsulod yadto sa banga, wala niya anay ini ginbutang didto tubtob nga nahuman ni Moises ang Kaban kag ginsulod sa sini ang mga tapitapi.

Subong sang nahinambitan na, ang kaban sang katipan nahuman sang talipuspusan sang 1513 B.⁠C.⁠E. Sang ulihi ginsulod diri ang sungkod ni Aaron, pagkatapos nga nagrebelde si Kore kag ang iban pa. Ginhinambitan ni apostol Pablo “ang kaban sang katipan . . . , diin didto ang suludlan nga bulawan nga may manna kag ang sungkod ni Aaron nga nagpanalingsing kag ang mga tapitapi sang katipan.”​—⁠Hebreo 9:4.

Ang manna isa ka aman sang Dios para sa mga Israelinhon sa ila 40 ka tuig nga pagpanglakaton sa kahanayakan. Apang wala na ini gin-aman sa ila sang “nagkaon [na] sila sing patubas sang [ginsaad nga] duta.” (Josue 5:​11, 12) Ang sungkod ni Aaron ginbutang sa kaban sang katipan para sa isa ka katuyuan​—⁠agod mangin isa ini ka tanda ukon pamatuod batok sa malalison nga kaliwatan. Ginapakita sini nga ang sungkod nagpabilin sa atubangan sang Pagpamatuod sa di-magkubos sa bug-os nga pagpanglakaton nila sa kahanayakan. Gani, makatarunganon lamang ihinakop nga ginkuha ang sungkod ni Aaron kag ang suludlan nga bulawan sang manna gikan sa kaban sang katipan, wala magdugay pagkatapos nga nakasulod sila sa Ginsaad nga Duta kag antes madedikar ang templo ni Solomon.