Magdiretso sa kaundan

Magdiretso sa listahan sang kaundan

Mga Anghel—Kon Sin-o Sila

Mga Anghel—Kon Sin-o Sila

 Mga Anghel—Kon Sin-o Sila

ANG hari sang isa ka gamhanan nga emperyo indi makapati sa iya nakita. Ang tatlo ka lalaki nga gindap-ong sa isa ka nagadabadaba nga hurno ginluwas gikan sa katalagman sang kamatayon! Sin-o ang nagluwas sa ila? Ang hari mismo nagsiling sa tatlo ka lalaki nga ginluwas: “Pakamaayuhon ang [inyo Dios], nga nagpadala sang iya anghel kag nagluwas sa iya mga alagad nga nagsalig sa iya.” (Daniel 3:28) Kapin sa duha ka milenyo na ang nagligad, nasaksihan sining hari sang Babilonia ang pagluwas nga ginhimo sang isa ka anghel. Minilyon sang una ang nagapati sa mga anghel. Sa karon, madamo ang wala lamang nagapati nga may mga anghel kundi nagahunahuna man nga ang mga anghel nagaapektar sa ila kabuhi sa pila ka paagi. Sin-o ang mga anghel, kag diin sila naghalin?

Suno sa Biblia, ang mga anghel espiritu, subong nga ang Dios mismo isa ka Espiritu. (Salmo 104:⁠4; Juan 4:24) Minilyon ang kadamuon sang mga anghel. (Bugna 5:11) Kag tanan sila “gamhanan sa kusog.” (Salmo 103:20) Bisan pa ang mga anghel kaangay sa mga tawo bangod sila man may personalidad kag may kahilwayan sa pagpili, wala sila nagluntad sang primero subong mga tawo. Ang matuod, gintuga sang Dios ang mga anghel madugay pa antes magluntad ang mga tawo​—⁠antes pa gani sang pagtuga sang planeta nga Duta. Sang ‘ginpasad sang Dios ang duta,’ siling sang Biblia, “ang mga kabugwason [mga anghel] nagdungan sa paghugyaw sa kalipay, kag ang tanan nga anak sang Dios nagsinggit sa pagdayaw.” (Job 38:​4, 7) Sanglit ang mga anghel tinuga sang Dios, gintawag sila nga mga anak sang Dios.

Para sa ano nga katuyuan gintuga sang Dios ang mga anghel? Ano nga papel, kon may yara gid man, ang ginatungdan sang mga anghel sa kabuhi sang mga tawo? Nagaapektar bala sila sa aton kabuhi karon? Sanglit may kahilwayan sila sa pagpili, may mga anghel bala nga nagsunod kay Satanas nga Yawa kag naghimo sang ila kaugalingon nga mga kaaway sang Dios? Ang Biblia nagahatag sing maminatud-on nga mga sabat sa sining mga pamangkot.