Magdiretso sa kaundan

Magdiretso sa listahan sang kaundan

Ginpahalipay Nila ang Tagipusuon sang Ila mga Ginikanan

Ginpahalipay Nila ang Tagipusuon sang Ila mga Ginikanan

 Ginpahalipay Nila ang Tagipusuon sang Ila mga Ginikanan

“ANAK ko, kon ang imo tagipusuon magmaalam, ang akon tagipusuon magakasadya.” (Hulubaton 23:15) Sa pagkamatuod, nagakasadya gid ang Cristianong mga ginikanan kon ang ila mga anak makatigayon sing diosnon nga kaalam. Sang Sabado, Septiembre 10, 2005, 6,859 ka tawo gikan sa nagkalainlain nga pungsod ang nagtambong sa gradwasyon sang ika-119 nga klase sang Watchtower Bible School of Gilead. Masadya gid ang tanan, ilabi na ang mga ginikanan sang 56 ka naggradwar.

Ginbuksan ni David Walker, isa ka dumaan na nga katapo sang pamilya Bethel sa Estados Unidos, ang programa paagi sa tinagipusuon nga pangamuyo. Nian ginsugdan sang tsirman, nga si David Splane sang Nagadumala nga Hubon sang mga Saksi ni Jehova, ang programa sang gradwasyon paagi sa pagsiling sa mga ginikanan: “Nagakabagay gid kamo nga hatagan sing mainit nga komendasyon. Ang mga kinaiya nga ginpalambo ninyo sa inyo mga anak nagpahulag sa ila nga magmisyonero.” Mahimo nga nagakabalaka ang mga ginikanan, kay ang ila mga anak ipadala pagkatapos sini sa malayo nga mga asaynment. Apang, ginpalig-on sila ni Utod Splane: “Indi kamo magkabalaka sa inyo mga anak. Atipanon sila ni Jehova sing mas maayo pa sangsa masarangan ninyo.” Nian nagsiling sia: “Hunahunaa ang maayo nga mga butang nga himuon sang inyo mga anak. Ang mga tawo nga nagaantos makatigayon sing matuod nga lugpay sa nahauna nga tion sa ila kabuhi.”

Kon Paano Padayon nga Mapahalipay ang Iban

Ginpakilala sang tsirman ang apat ka humalambal. Una, si Ralph Walls sang Komite Sang Sanga sa Estados Unidos nagpamulongpulong sa tema nga “Hupti nga Nagamuklat ang Inyo mga Mata.” Ginpadaku niya nga ang espirituwal nga pagkabulag mas malain sangsa pisikal nga pagkabulag. Ang kongregasyon sang Laodicea sadtong nahaunang siglo nangin bulag sa espirituwal. Ang mga Cristiano sa sadto nga kongregasyon nga nangin bulag sa espirituwal ginhatagan sing bulig, apang mas maayo gid pirme nga tapnaon ina nga pagkabulag paagi sa paghupot nga nagamuklat sang aton espirituwal nga mga mata. (Bugna 3:14-18) Ang humalambal nagsiling: “Muklata pirme ang inyo mga mata, kag tan-awa ang responsable nga mga lalaki subong sang pagtan-aw ni Jehova sa ila.” Ang mga naggradwar indi dapat nga magkabalaka gid kon may mga problema sa kongregasyon. Nahibaluan ini tanan ni Ginuong Jesucristo. Pat-uron niya nga ang mga problema malubad sa nagakaigo nga tion.

Masunod, ginsabat ni Samuel Herd sang Nagadumala nga Hubon ang pamangkot nga “Handa Bala Kamo?” Subong nga ang isa ka manlugayaw nagabalon sing kinahanglanon niya nga mga panapton, dapat nga panaptan man pirme sang mga naggradwar ang ila kaugalingon sing mga kinaiya sang bag-ong personalidad. Dapat may yara sila kaawa ni Jesus. Sang ang isa ka aruon nagsiling sa iya: “Kon luyag mo lang, matinluan mo ako,” si Jesus nagsiling: “Luyag ko. Magmatinlo ka.” (Marcos 1:40-42) Pagkatapos sini ang humalambal nagsiling: “Kon luyag gid ninyo nga buligan ang mga tawo, magapangita kamo sing paagi.” Ang Filipos 2:3 nagalaygay sa mga Cristiano nga tamdon ang ‘iban nga labaw.’ Si Utod Herd nagsiling: “Ang mangin mapainubuson sing tagipusuon mas importante sangsa pag-angkon sing  ihibalo. Magabenepisyo lamang ang mga tawo nga masugilanon ninyo sa ministeryo kag ang inyo mga kauturan sa kongregasyon gikan sa inyo ihibalo kon mapainubuson kamo.” Naghinakop sia paagi sa pagsiling nga kon padayon nga panaptan sang mga naggradwar ang ila kaugalingon sing Cristianong gugma, handa sila nga maglakbay padulong sa ila mga asaynment, kag pat-od gid nga magamadinalag-on sila.​—⁠Colosas 3:14.

Si Mark Noumair, isa sa mga instruktor sa Gilead, nagpahawathawat sa titulo sang iya pamulongpulong, “Pirme Bala Ninyo Ini Ipakita?” Ang “ini” nagapatuhoy sa aton pagpasalamat para sa kaayo ni Jehova. Ang Salmo 103:2 nagasiling: “Pakamaayuha si Jehova, O kalag ko, kag indi pagkalimti ang tanan niya nga mga buhat.” Ang mga Israelinhon wala magpasalamat tungod sa manna nga nagahupot sa ila nga buhi, kag gintawag nila ini nga “talamayon nga tinapay.” (Numeros 21:5) Sa paglipas sang tion, ang balor sang manna wala magbag-o, apang ang ila apresasyon sa sini nag-ugdaw. Ang instruktor nagsiling: “Kon kalimtan ninyo ang mga ginahimo ni Jehova kag tugutan nga mangin kinaandan na lamang ang inyo pag-alagad sa mga pungsod sa luwas, makaapektar ina sa inyo pagtamod sa hilikuton nga ginhatag ni Jehova sa inyo.” Ang Salmo 103:4 nagasiling nga si Jehova “nagapurongpurong sa [inyo] sing mahigugmaon nga kaayo.” Maeksperiensiahan sang mga naggradwar ang mahigugmaon nga kaayo sang Dios sa ila bag-ong mga kongregasyon.

Isa pa ka instruktor sang Gilead, nga si Lawrence Bowen, ang nagpamulong sa topiko nga “Magalambot Bala sa Inyo ang mga Pagpakamaayo?” Nagsiling sia nga ang mga katapo sang ika-119 nga klase sang Gilead naghanas sing lakas agod mangin madinalag-on nga mga misyonero. Apang sa karon kinahanglan nga mangin mainunungon sila kay Jehova kag sa hilikuton nga ginhatag sa ila. Ang 144,000 ginalaragway sa Bugna 14:1-4 subong “padayon nga nagasunod sa Kordero bisan diin sia nagakadto.” Ang tanan sa sina nga grupo mainunungon kay Jehova kag sa iya Anak walay sapayan sang mga pagtilaw sa ila, kag ginalab-ot nila ang ila tulumuron. “Bisan ano pa ang matabo, mainunungon man kita nga magpabilin kay Jehova kag sa hilikuton nga ginhatag niya sa aton,” siling sang humalambal. Paagi sa paghimo sini, makita sang mga naggradwar nga ang mga pagpakamaayo ni Jehova ‘magalambot’ sa ila.​—⁠Deuteronomio 28:2.

Mga Bunga sang Ila Pag-alagad

Ang mga estudyante nagapakigbahin sa ministeryo sa latagon kada Sabado kag Domingo samtang nagatuon sila sa Gilead. Sa pagpakighambal sa ila sang rehistrador sang eskwelahan nga si Wallace Liverance sa tion sang programa, maathag gid nga nangin madinalag-on sila. Ginbantala nila ang maayong balita sa mga napulo ka lenguahe kag nakasugod sila sing madamong pagtuon sa Biblia. Ang isa ka mag-asawa sa klase nakasugod sing pagtuon sa Biblia sa isa ka Intsik nga lalaki. Paglipas sang duha ka pagduaw, ginpamangkot nila sia kon ano ang nabatyagan niya nga nakilala niya si Jehova. Ginbuksan niya ang iya Biblia kag ginpabasa sa ila ang Juan 17:3. Nabatyagan niya nga nagalakat sia sa dalan padulong sa kabuhi.

Nian gin-interbyu ni Anthony Morris sang Nagadumala nga Hubon ang tatlo ka utod nga nagaalagad sa mga Komite Sang Sanga sa Côte d’Ivoire, Dominican Republic, kag Ecuador. Ginpasalig sining mga utod ang mga naggradwar nga ang mga Komite Sang Sanga nagahulat sa ila pag-abot kag buligan nila sila nga makapasibu sa ila mga asaynment.

Masunod, si Leonard Pearson sang pamilya Bethel sa Estados Unidos nakighambal sa tatlo ka katapo sang mga Komite Sang Sanga gikan sa Democratic Republic of Congo, Papua New Guinea, kag Uganda. Ginpalig-on sining mga utod ang mga naggradwar nga mag-ukod sa ministeryo sa latagon. Isa ka misyonero nga mag-asawa nga naghinguyang sing kapin sa 21 ka tuig sa Congo ang nakabulig sa 60 ka tawo nga magdedikar kag magpabawtismo. Yadto nga mag-asawa nagadumala karon sing 30 ka pagtuon sa Biblia, kag 22 sang ila mga ginatun-an ang nagatambong sa mga miting sang kongregasyon. Bangod sining dakung espirituwal nga ani, karon na ang makalilipay nga tion sa pag-alagad subong misyonero.

Pagpanaksi Upod ang Pagkahilingagawon

Si Gerrit Lösch sang Nagadumala nga Hubon ang naghatag sang katapusan nga pamulongpulong. Ang iya tema amo ang “Pagpamulong Tuhoy sa Dios kag sa Pagpanaksi kay Jesus sa Adlaw Sang Ginuo.” Ang mga tinaga nga “saksi,” “mga saksi,” kag “pagpanaksi” mabasa sing 19 ka beses sa tulun-an sang Bugna. Gani, maathag nga ginapakita ni Jehova ang hilikuton nga luyag niya ipahimo sa iya katawhan. San-o naton himuon ini nga pagpanaksi? Sa “adlaw sang Ginuo.” (Bugna 1:​9, 10) Ina nga adlaw nagsugod sang 1914, nagapadayon sa panahon naton, kag  asta pa sa palaabuton. Suno sa Bugna 14:​6, 7, ang hilikuton sa pagpamulong tuhoy sa Dios ginasuportahan sang mga anghel. Ginapakita sang Bugna 22:17 nga ang responsibilidad tuhoy sa pagdumala sa hilikuton sang pagpanaksi kay Jesus gintugyan sa nagkalabilin sang hinaplas nga mga Cristiano. Apang dapat naton tanan himuslan ina nga pribilehiyo karon. Sa bersikulo 20, si Jesus nagasiling: “Magkari ako sing madali.” Ginlaygayan ni Utod Lösch ang tanan nga nagtambong: “Manawag kamo sa mga tawo, ‘Kari kamo, magkuha kamo sang tubig nga walay bayad.’ Si Jesus magakari sing madali. Handa na bala kita?”

Ginhinakpan ni Fred Rusk, nga nangin instruktor man sang Gilead School sa sulod sang 11 ka tuig, ang programa paagi sa pangamuyo sang pagpasalamat kay Jehova nga nagtandog sang tagipusuon sang tanan nga nagtalambong. Isa yadto ka nagakaigo nga pagtapos sa isa ka adlaw nga nangin isa ka okasyon sang daku nga kasadya.

[Kahon sa pahina 13]

ESTADISTIKA SANG KLASE

Kadamuon sang mga pungsod nga gintiglawas: 10

Kadamuon sang mga pungsod nga ginpadalhan: 25

Kadamuon sang mga estudyante: 56

Promedyo nga edad: 32.5

Promedyo nga tuig sa kamatuoran: 16.4

Promedyo nga tuig sa bug-os tion nga ministeryo: 12.1

[Retrato sa pahina 15]

Ika-119 nga Naggradwar nga Klase sang Watchtower Bible School of Gilead

Sa listahan sa ubos, ang mga raya ginanumeruhan halin sa atubangan pa likod, kag ang mga ngalan ginalista halin sa wala pa tuo sa kada raya.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.