Magdiretso sa kaundan

Magdiretso sa listahan sang kaundan

“Ang Pulong sa Nagakaigo nga Tion O daw Ano Kaayo!”

“Ang Pulong sa Nagakaigo nga Tion O daw Ano Kaayo!”

 “Ang Pulong sa Nagakaigo nga Tion O daw Ano Kaayo!”

SA TION sang isa ka adlaw nga asambleya sang mga Saksi ni Jehova, gintinguhaan gid ni Kim nga makapamati sing maayo kag makakuha sing nota samtang ginapapahimunong niya ang iya duha-ka-tuig-kag-tunga nga bata nga babayi. Pagkatapos sang programa, ginpalapitan si Kim sang isa ka Cristianong utod nga babayi nga nagapungko sa amo man nga raya kag sinsero nga ginhatagan sia sing mainit nga komendasyon bangod sang paagi nila nga mag-asawa sa pag-atipan sa ila bata sa tion sang programa. Ginpabaloran gid ni Kim yadtong komendasyon nga bisan tubtob karon, pila ka tuig na ang nagligad, nagsiling sia: “Kon daw ginakapoy gid ako sa tion sang mga miting, ginapanumdom ko dayon ang ginsiling sa akon sadtong utod nga babayi. Ang iya mainayuhon nga mga tinaga nagapalig-on gihapon sa akon nga padayon nga hanason ang amon bata.” Sa pagkamatuod, ang mga tinaga sa nagakaigo nga tion makapahalipay sa isa. Ang Biblia nagasiling: “Ang pulong sa nagakaigo nga tion O daw ano kaayo!”​—⁠Hulubaton 15:23.

Apang, mahimo nabudlayan ang pila sa aton sa paghatag sing komendasyon sa iban. Ini bangod kon kaisa, nahibaluan naton nga may mga kakulangan man kita. Nagsiling ang isa ka Cristiano: “Para sa akon, daw kasubong ini sa pagtindog sa mahumok nga duog. Samtang ginatib-ong ko ang iban, labi naman ako nga nagasalop.” Ang pagkamahuluy-on, kakulang sing pagsalig sa kaugalingon, ukon ang kahangawa nga basi indi mahangpan amo ang pila ka kabangdanan kon ngaa nabudlayan ang iban sa paghatag sing komendasyon. Wala labot sina, kon haluson nga ginhatagan kita sing komendasyon sang bata pa kita, mahimo mabudlayan kita sa paghatag sing komendasyon sa iban.

Walay sapayan sini, bangod nahibaluan naton nga may maayo ini nga epekto sa nagahatag kag sa nagabaton, mapahulag kita nga himuon ang aton labing masarangan nga maghatag sing komendasyon sa nagakaigo nga tion. (Hulubaton 3:27) Ano, nian, ang positibo nga mga epekto sini? Binagbinagon naton sing malip-ot ang pila.

Positibo nga mga Epekto

Ang nagakaigo nga komendasyon makahatag sa isa sing kompiansa sa kaugalingon. “Kon ginahatagan ako sing komendasyon sang iban, nagabatyag ako nga may kompiansa sila sa akon,” siling sang isa ka Cristianong asawa nga si Elaine. Huo, ang paghatag sing komendasyon sa isa nga wala sing pagsalig sa kaugalingon makahatag sa iya sing kaisog nga atubangon ang mga problema kag, subong resulta, makasapo sia sing kalipay. Ang mga pamatan-on ilabi na nga nagabenepisyo sa nagakaigo nga komendasyon. Isa ka tin-edyer ang nag-ako nga naluyahan sing buot bangod sang iya negatibo nga mga panghunahuna ang nagsiling: “Ginahimo ko ang akon tanan nga masarangan agod pahamut-an si Jehova, apang nagabatyag ako kon kaisa nga bisan ano pa ang akon himuon, daw kulang ini gihapon. Apang kon may isa gani nga magdayaw sa akon, nalipay gid ako.” Matuod gid ang hulubaton sang Biblia: “Ang pulong nga napamulong sa husto nga tion kaangay sang mga mansanas nga bulawan sa pinuna nga pilak.”​—⁠Hulubaton 25:⁠11.

Ang komendasyon makapahulag kag makapalig-on sa isa. Ang isa ka bug-os tion nga ministro nagsiling, “Ang komendasyon nagapalig-on sa akon nga manikasog pa gid kag pauswagon ang kalidad sang akon ministeryo.” Naobserbahan sang isa ka iloy nga may duha ka bata nga kon dayawon sang mga kauturan sa kongregasyon ang iya mga bata kon magkomento sila sa mga miting, ginaganahan sila nga magkomento pa gid. Huo, magapahulag ini sa mga kabataan nga pauswagon ang ila Cristianong pagkabuhi. Ang matuod, kita tanan luyag apresyahon kag pabaloran. Ining kalibutan nga puno sing  kahuol nagapalapyo kag nagapaluya sa aton. Ang isa ka Cristianong gulang nagsiling, “Kon kaisa, kon maluyahan ako sing buot, ang komendasyon daw amo ang sabat sa akon mga pangamuyo.” Sing kaanggid, si Elaine nagsiling, “Kon kaisa daw subong nga ginapakita ni Jehova ang iya kahamuot sa akon paagi sa mga ginahatag nga komendasyon sang iban.”

Ang komendasyon nagapabatyag sa isa nga bahin sia sang isa ka grupo. Ang paghatag sing sinsero nga komendasyon nagapakita sing pag-ulikid kag nagapabatyag nga ang isa ginahigugma, may kasiguruhan, kag ginaapresyar. Isa man ini ka pamatuod nga ginahigugma kag ginapabaloran gid naton ang aton mga masigka-Cristiano. Ang isa ka iloy nga si Josie nagsiling: “Sang una, dapat manindugan ako sa kamatuoran sa isa ka nabahinbahin sa relihion nga panimalay. Sadto nga tion, ang komendasyon sang hamtong sa espirituwal nga mga kauturan amo ang nagpalig-on sa akon nga indi gid mag-untat.” Sa pagkamatuod, “mga bahin kita nga iya sang isa kag isa.”​—⁠Efeso 4:⁠25.

Ang kaluyag sa paghatag sing komendasyon nagabulig sa aton nga makita ang maayo sa iban. Ginatan-aw naton ang maayong mga kinaiya sang iban, indi ang ila mga kaluyahon. Ang isa ka Cristianong gulang nga si David nagsiling, “Kon mainapresyahon kita sa ginahimo sang iban, mas masunson kita nga magahatag sing komendasyon sa ila.” Kon pirme naton ginadumdom kon daw ano kaalwan si Jehova kag ang iya Anak sa paghatag sing komendasyon sa di-himpit nga mga tawo, magapahulag man ini sa aton nga pirme maghatag sing komendasyon.​—⁠Mateo 25:21-​23; 1 Corinto 4:5.

Mga Takus Dayawon

Bangod si Jehova nga Dios ang aton Manunuga, sia ang panguna gid nga takus naton dayawon. (Bugna 4:11) Bisan indi niya kita kinahanglan agod matigayon ang kompiansa sa kaugalingon  ukon agod mapahulag sia, kon ginadayaw naton si Jehova bangod sang iya pagkamakahalawhaw kag sang iya mahigugmaon nga kaayo, nagapakigsuod sia sa aton kag nagapalambo ini sang aton kaangtanan sa iya. Ang pagdayaw sa Dios nagabulig man sa aton nga tamdon sing maayo kag sing maugdang ang aton mga hinimuan kag ipatungod ang aton mga kadalag-an kay Jehova. (Jeremias 9:​23, 24) Ginahatag ni Jehova ang paglaum nga kabuhi nga walay katapusan sa tanan nga takus sa sini, kag amo ini ang dugang pa nga rason nga nagapahulag sa aton nga dayawon sia. (Bugna 21:​3, 4) Nalangkag si Hari David sang una nga ‘dayawon ang ngalan sang Dios’ kag ‘pakadakuon sia nga may pagpasalamat.’ (Salmo 69:30) Kabay nga amo man sini ang aton handum.

Ang aton mga masigkatumuluo takus sang nagakaigo nga komendasyon. Kon ginahimo naton ini, nagapanghikot kita nahisuno sa sugo sang Dios nga “binagbinagon naton ang isa kag isa agod pukawon sa gugma kag sa maayong mga buhat.” (Hebreo 10:24) Ang isa ka maayo gid nga halimbawa sa sini amo si apostol Pablo. Nagsulat sia sa kongregasyon sa Roma: “Una sa tanan, nagapasalamat ako sa akon Dios paagi kay Jesucristo nahanungod sa inyo tanan, bangod ang inyo pagtuo ginahambalan sa bug-os nga kalibutan.” (Roma 1:8) Sing kaanggid, ginkilala ni apostol Juan ang maayo gid nga halimbawa sang iya masigka-Cristiano nga si Gayo tungod sang ‘paglakat niya sa kamatuoran.’​—⁠3 Juan 1-4.

Sa karon, kon ang isa ka masigka-Cristiano nagapakita sing dalayawon gid nga kinaiya kaangay kay Cristo, nagahatag sing nahandaan sing maayo nga bahin sa miting, ukon nagakomento sing tinagipusuon sa miting, may maayo gid kita nga kahigayunan nga pasalamatan sia. Ukon kon ang isa ka bata nagatinguha gid sa pagpangita sang teksto sa tion sang mga miting sang kongregasyon, mahimo naton dayawon sia. Si Elaine nga ginsambit kaina, nagsiling: “May lainlain kita nga mga hiyas. Paagi sa pagtalupangod sa ginahimo sang isa, ginapakita naton ang aton apresasyon sa nagkalainlain nga hiyas sang katawhan sang Dios.”

 Paghatag sing Komendasyon sa Pamilya

Ano naman ang tuhoy sa paghatag sing komendasyon sa mga katapo sang aton pamilya? Daku nga tion, panikasog, kag mahigugmaon nga pag-atipan ang ginahinguyang sang bana kag asawa agod maaman ang espirituwal, emosyonal, kag materyal nga kinahanglanon sang ila pamilya. Takus gid sila nga makabaton sing komendasyon gikan sa isa kag isa kag gikan sa ila mga kabataan. (Efeso 5:33) Halimbawa, tuhoy sa isa ka sangkol nga asawa, ang Pulong sang Dios nagasiling: “Ang iya mga anak nagabangon kag nagatawag sa iya nga malipayon; ang nagapanag-iya sa iya nagabangon, kag sia nagadayaw sa iya.”​—⁠Hulubaton 31:​10, 28.

Ang mga kabataan takus man nga hatagan sing komendasyon. Makapasubo nga ang iban nga mga ginikanan maabtik sa pagsaway sa ila mga bata, apang talagsa lang nagahatag sing komendasyon sa pagpaninguha sang ila mga bata nga mangin matinahuron kag matinumanon. (Lucas 3:22) Kon ang bata pirme ginahatagan sing komendasyon samtang gamay pa, mangin mas malipayon sia kag magabatyag nga ginapalangga.

Matuod, kinahanglan ang panikasog sa paghatag sing komendasyon sa iban, apang magaani kita sing madamo nga pagpakamaayo sa paghimo sini. Sa pagkamatuod, kon palahatag kita sing komendasyon sa mga takus sa sini, mas labi ang aton kalipay.​—⁠Binuhatan 20:⁠35.

Magbaton kag Maghatag sing Komendasyon Upod ang Husto nga Panimuot

Apang, ang pagbaton sing komendasyon mahimo mangin isa ka pagtilaw para sa iban. (Hulubaton 27:21) Halimbawa, ang mga indibiduwal nga may huyog nga magpabugal mahimo magbatyag nga labaw sila sa iban. (Hulubaton 16:18) Gani, kinahanglan nga maghalong. Si apostol Pablo naghatag sining praktikal nga laygay: “Ginasugiran ko ang kada isa sa inyo dira nga indi maghunahuna sing labaw sa dapat niya hunahunaon sa iya kaugalingon; kundi maghunahuna agod mangin maligdong sa hunahuna, ang kada isa suno sa kadakuon sang pagtuo nga ginhatag sa iya sang Dios.” (Roma 12:3) Agod buligan ang iban nga indi masiod sa paghunahuna sing labaw sang ila kaugalingon, ayhan maalamon nga indi paghatagan sing pinasahi nga igtalupangod ang mga kinaiya subong sang kaalam ukon katahom. Sa baylo, dapat naton talupangdon ang iban bangod sang ila maayo nga mga hinimuan.

Makabenepisyo kita kon nagahatag kag nagabaton kita sing komendasyon upod ang husto nga panimuot. Mapahulag kita sa pagbaton nga utang naton kay Jehova ang tanan nga maayong butang nga nahimo naton. Ang komendasyon magapalig-on man sa aton nga padayon nga maggawi sing maayo.

Ang sinsero kag nagakaigo nga komendasyon isa ka dulot nga puede naton tanan ihatag. Kon maalwan naton ini nga ihatag sa iban, indi lang naton mahanduraw kon daw ano ang pagpasalamat sang nakabaton sini.

[Kahon/Retrato sa pahina 18]

Isa ka Sulat nga Nagtandog sa Iya Tagipusuon

Mapanganinaw pa sang isa ka nagalakbay nga manugtatap ang isa ka higayon nga nagpauli sila sang iya asawa sa ila dalayunan pagkatapos sang bug-os nga adlaw nga pagbantala nga tuman gid ka tugnaw. Sia nagsiling: “Ang akon asawa ginatugnawan kag ginaluyahan sing buot, kag ginsilingan niya ako nga daw mauntat na sia. ‘Mas maayo pa,’ siling niya, ‘nga magpayunir na lang upod sa isa ka kongregasyon, magtener sa isa ka lugar, kag magdumala sang aton kaugalingon nga mga pagtuon sa Biblia.’ Wala anay ako magdesisyon, kag nagsiling ako nga patapuson anay namon ang semana kag tan-awon kon ano ang iya mangin desisyon sa sina nga tion. Kon luyag gihapon niya mag-untat, ti pasugtan ko sia. Sina mismo nga adlaw, naghapit kami sa post office kag may sulat halin sa sanga talatapan nga para gid sa iya. Ang sulat nagahatag sing mainit nga komendasyon sa iya mga panikasog sa ministeryo sa latagon kag sa iya pagbatas, ginakilala kon daw ano kabudlay nga magtulog sa lainlain nga katre kada semana. Natandog gid sia sadtong komendasyon amo nga wala na gid sia nakamuno nga mag-untat sa nagalakbay nga hilikuton. Ang matuod, pila ka beses na nga ginpalig-on niya ako sang naghunahuna ako nga mag-untat.” Ining mag-asawa nakapadayon sing halos 40 ka tuig sa nagalakbay nga hilikuton.

[Retrato sa pahina 17]

Sin-o sa inyo kongregasyon ang takus sang komendasyon?

[Retrato sa pahina 19]

Nalipay ang mga kabataan sa mahigugmaon nga atension kag komendasyon