Magdiretso sa kaundan

Magdiretso sa listahan sang kaundan

Ang Pagtamod sang Iban sa Aton—Importante Bala?

Ang Pagtamod sang Iban sa Aton—Importante Bala?

 Ang Pagtamod sang Iban sa Aton—Importante Bala?

HALOS tanan nanamian nga dayawon. Nalipay kita nga dayawon bangod nagapabatyag ini sa aton nga may hinimuan kita. Luyag pa gid naton nga pauswagon ang aton ginahimo kon ginaapresyar kita. Apang baliskad sa sini ang aton batyagon kon hikayan kita sang iban. Ang malas-ay ukon mamulayon nga komento makapaluya sang aton buot. Ang pagtamod sang iban sa aton may daku nga epekto sa kon paano naton ginatamod ang aton kaugalingon.

Sayop man nga indi pagsapakon ang pagtamod sang iban sa aton. Ang matuod, makabenepisyo kita kon pamatian naton ang masiling sang iban sa aton paggawi. Kon ang opinyon sang iban napasad sa mataas nga prinsipio sa moral, makabulig ini sa aton nga mangin matadlong. (1 Corinto 10:31-​33) Apang sa masami, indi makatarunganon ang opinyon sang kalabanan. Hunahunaa ang tiko nga pagtamod sang mga punong saserdote kag sang iban pa nga mga tawo kay Jesucristo sang “nagsinggit sila: ‘Ilansang! Ilansang sia!’” (Lucas 23:​13, 21-25) Ang mga pagtamod pasad sa sayop nga impormasyon ukon may kahisa ukon may pagpasulabi dapat isikway. Gani, kinahanglan tamdon naton sing mahinantupon kag rasonable ang mga opinyon sang iban sa aton.

Kay Sin-o Opinyon ang Importante?

Luyag naton nga mahamuot sa aton ang mga suod sa aton nga yara sa matuod nga pagsimba. Nagalakip ini sang aton mga pamilya nga masigkatumuluo kag sang aton Cristianong mga kauturan. (Roma 15:⁠2; Colosas 3:​18-​21) Ginapabaloran gid naton ang gugma kag pagtahod sang aton mga masigkatumuluo kag ang “pagbayluhanay sing pagpalig-on” sa ila. (Roma 1:​11, 12) Upod ang ‘mapainubuson nga hunahuna, ginakabig naton ang iban nga labaw sangsa aton.’ (Filipos 2:2-4) Dugang pa, ginatinguhaan kag ginapabaloran naton ang kahamuot sang “mga nagapanguna” sa aton​​—⁠ang mga gulang sa kongregasyon.​​—⁠Hebreo 13:17.

Halandumon man ang “maayo . . . nga testimonya gikan sa mga tawo sa gua.” (1 Timoteo 3:7) Daw ano kaayo kon ginatahod kita sang aton di-tumuluo nga mga paryente, mga kaupod sa trabaho, kag mga kaingod! Kag indi bala luyag naton magbilin sing maayo nga impresyon sa mga tawo nga aton ginabantalaan agod pamatian nila ang mensahe sang Ginharian? Kon kilala kita sa komunidad subong mga tawo nga may matinlo nga moral, may prinsipio, kag bunayag, magahatag ini sing himaya kay Jehova. (1 Pedro 2:12) Apang, wala naton ginakompromiso ang mga prinsipio sa Biblia agod kahamut-an sang iban; wala man kita nagapakunokuno agod dayawon nila. Dapat naton dumdumon nga imposible nga mapahamut-an naton ang tanan. Si Jesus nagsiling: “Kon kamo bahin sang kalibutan, kahamut-an sang kalibutan ang sa iya kaugalingon. Karon bangod kamo indi bahin sang kalibutan, kundi ginpili ko kamo gikan sa kalibutan, sa sining kabangdanan ang kalibutan nagadumot sa inyo.” (Juan 15:19) Ano ang himuon naton agod tahuron kita sang mga nagapamatok sa aton?

Pagtigayon sang Pagtahod sang mga Nagapamatok

“Dumtan kamo sang tanan nga tawo bangod sa akon ngalan,” paandam ni Jesus, “apang sia nga nagbatas tubtob sa katapusan amo ang maluwas.” (Mateo 10:22) Kon kaisa, ining pagdumot nagaresulta sa mapasipalahon nga mga panumbungon.  Mahimo kita tamdon sang mapasulabihon nga mga opisyal sang gobierno subong “rebelyuso” ukon “subersibo.” Mahimo kita kabigon sang mga hayag nga manugpamatok nga magarot nga sekta kag gani dapat kita dumilian. (Binuhatan 28:22) Apang mahimo naton mapamatud-an nga sayop ining butig nga mga panumbungon. Paano? Paagi sa pagsunod sa laygay ni apostol Pedro: “[Mangin] handa pirme sa pagpangapin sa tagsa nga nagapangayo sa inyo sing pangatarungan tuhoy sa paglaum nga yara sa inyo, apang ginahimo ini nga may malulo nga buot kag daku nga pagtahod.” (1 Pedro 3:15) Dugang pa, kinahanglan man naton gamiton ang “maayong hambalanon nga indi matagudilian; agod ang tawo nga nagapamatok mahuy-an, nga wala sing bisan anong malain nga masiling nahanungod sa aton.”​—⁠Tito 2:8.

Bisan pa nagatinguha kita nga tinluan ang aton ngalan sa mga pasipala, indi kita dapat maluyahan sing buot ukon mabalaka gid sa di-makatarunganon nga mga pasipala. Si Jesus, ang himpit nga Anak sang Dios, gin-akusahan sing pagpasipala, sedisyon, kag espiritismo pa gani. (Mateo 9:⁠3; Marcos 3:​22; Juan 19:12) Si apostol Pablo ginpasipalahan. (1 Corinto 4:13) Wala ginsapak ni Jesus kag ni Pablo yadtong mga pasipala kag nagpabilin sila nga masako sa ila hilikuton. (Mateo 15:14) Nahibaluan nila nga indi gid nila mapahamut-an ang ila mga kaaway, bangod “ang bug-os nga kalibutan yara sa gahom sang isa nga malauton.” (1 Juan 5:19) Sa karon, nagaatubang man kita sang amo nga hangkat. Indi kita dapat mahadlok kon ang madinumtanon nga mga manugpamatok magpalapta sing kabutigan batok sa aton.​​—⁠Mateo 5:⁠11.

Ang Importante Gid nga Opinyon

Nagkalainlain ang pagtamod sang mga tawo sa aton, depende ini sa ila mga motibo kag sa ila nabatian tuhoy sa aton. Ginadayaw kag ginapadunggan kita sang pila, ginapakalain kag ginakaugtan naman kita sang iban. Apang madamo kita sing rason nga magkalipay kag di-magkabalaka, mientras nagapatuytoy kita sa mga prinsipio sang Biblia.

Si apostol Pablo nagsulat: “Ang bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong, agod nga ang tawo sang Dios may lubos nga ikasarang, nga nasangkapan sing bug-os para sa tagsa ka maayong buhat.” (2 Timoteo 3:​16, 17) Matigayon naton ang kahamuot ni Jehova nga Dios kag sang iya Anak nga si Jesucristo, kon batunon naton sing mapinasalamaton ang Pulong sang Dios subong giya sa tanan naton nga ginahimo. Kay man, ang labing importante nga pagtamod amo ang iya ni Jehova kag sang iya Anak. Ang ila pagtamod sa aton nagapakita gid sang aton matuod nga balor. Labaw sa tanan, ang aton kabuhi nadepende sa ila kahamuot.​​—⁠Juan 5:​27; Santiago 1:⁠12.

[Blurb sa pahina 30]

“Daw nahuya ako nga dayawon, pero sa tuodtuod lang nanamian ako.”​—⁠MAMALAYBAY NGA SI RABINDRANATH TAGORE SANG INDIA

[Mga retrato sa pahina 31]

Importante ang opinyon sang aton mga masigkatumuluo

[Credit Line sang retrato sa pahina 30]

Culver Pictures