Magdiretso sa kaundan

Magdiretso sa listahan sang kaundan

Tuguti ang “Pulong” ni Jehova nga Mag-amlig sa Imo

Tuguti ang “Pulong” ni Jehova nga Mag-amlig sa Imo

 Tuguti ang “Pulong” ni Jehova nga Mag-amlig sa Imo

SA MARAGTASON nga inaway sang Marathon sang 490 B.⁠C.⁠E., mga 10 ka libo tubtob 20 ka libo ka taga-Atenas ang nakig-away batok sa mas madamo katama nga hangaway sang Persia. Ang isa sa mga taktika sang mga Griego amo ang phalanx​—⁠isa ka guban sang mga soldado nga nagamartsa sing ikitay. Ang ila nagaikitay nga mga taming daw pader tan-awon nga may nagaululhot nga mga bangkaw. Ang phalanx amo ang nagpabantog sa mga taga-Atenas sang malutos nila ang mas madamo nga hangaway sang Persia.

Ang matuod nga mga Cristiano nagapakig-away sa espirituwal. Nagapakigbato sila sa gamhanan nga mga kaaway​—⁠ang di-makita nga mga manuggahom sang malaut nga sistema sang mga butang karon, nga ginlaragway sa Biblia subong “mga manuggahom sang kalibutan sining kadudulman, . . . malaut nga mga puersa nga espiritu sa langitnon nga mga duog.” (Efeso 6:​12; 1 Juan 5:19) Ang katawhan sang Dios padayon nga nagadaug​—⁠apang indi sa ila kaugalingon nga kusog. Ang kadungganan iya ni Jehova, nga amo ang nagaamlig kag nagatudlo sa ila, subong sang ginsiling sang Salmo 18:30: “Ang pulong ni Jehova dalisay. Sia isa ka taming sa tanan nga nagadangop sa iya.”

Huo, paagi sa iya dalisay nga “pulong” nga yara sa Sagrado nga Kasulatan, si Jehova nagataming sa iya mainunungon nga mga alagad gikan sa espirituwal nga kahalitan. (Salmo 19:​7-​11; 119:93) Tuhoy sa kaalam nga ginapakita sang Pulong sang Dios, si Solomon nagsulat: “Indi mo ini pagbayaan, kag magatipig ini sa imo. Higugmaa ini, kag magaamlig ini sa imo.” (Hulubaton 4:⁠6; Manugwali 7:12) Paano ang diosnon nga kaalam magaamlig sa aton batok sa kahalitan? Binagbinaga ang halimbawa sang dumaan nga Israel.

Katawhan nga Gin-amligan sang Diosnon nga Kaalam

Ang Kasuguan ni Jehova nag-amlig kag nagtuytoy sa mga Israelinhon sa tanan nga bahin sang kabuhi. Halimbawa, ang mga reglamento sa pagkaon, katinlo, kag kuarentinas naghilway sa ila gikan sa madamo nga balatian nga nagsalot sa iban nga mga pungsod. Nakadungan lang ang siensia sa talaksan  sang Kasuguan sang Dios sang nadiskobrehan ang bakterya sang ika-19 nga siglo. Ang mga kasuguan tuhoy sa pagpanag-iya sang duta, pagbakal liwat, paghilway sa utang, kag pagpautang nga may saka nagahatag sing kaayuhan sa Israel paagi sa pagpasanyog sing isa ka malig-on nga sosiedad kag maayo nga ekonomiya. (Deuteronomio 7:​12, 15; 15:​4, 5) Ang Kasuguan ni Jehova nakabulig pa gani agod mahuptan ang maayo nga kondisyon sang duta sang Israel! (Exodo 23:​10, 11) Ang mga sugo batok sa butig nga pagsimba nag-amlig sa mga tawo sa espirituwal, nagaamlig sa ila sa pag-atake sang demonyo, paghalad sang bata, kag madamo pa nga kalautan, luwas pa sa makahuluya nga buhat sang pagyaub sa walay kabuhi nga mga idolo.​—⁠Exodo 20:​3-5; Salmo 115:​4-8.

Maathag nga ang “pulong” ni Jehova “indi walay pulos nga pulong” para sa Israel; sa baylo, nagkahulugan ini sang kabuhi kag sang paglawig sang mga adlaw sang tanan nga nagapamati sa sini. (Deuteronomio 32:47) Sa karon, matuod gihapon ini sa mga nagapamati sa maalamon nga mga pulong ni Jehova, bisan pa nga ang mga Cristiano wala na napaidalom sa Kasuguan nga katipan. (Galacia 3:​24, 25; Hebreo 8:8) Sa pagkamatuod, sa baylo sang mga kasuguan, ang mga Cristiano may madamo nga prinsipio sang Biblia nga magatuytoy kag magaamlig sa ila.

Katawhan nga Naamligan sang mga Prinsipio

Ang mga kasuguan may limitado nga aplikasyon kag mahimo nga temporaryo lang. Apang, ang prinsipio sang Biblia, subong sadsaran nga mga kamatuoran, masami nga may mas masangkad kag permanente nga aplikasyon. Binagbinaga, halimbawa, ang prinsipio sa Santiago 3:​17, nga nagasiling sing bahin: “Ang kaalam nga gikan sa hitaas una sa tanan putli, nian mahidaiton.” Paano makaamlig ining sadsaran nga kamatuoran sa katawhan sang Dios karon?

Ang pagkaputli nagakahulugan sang katinlo sa moral. Gani, ang mga nagapabalor sang pagkaputli nagapanikasog nga likawan indi lang ang paghimo sang imoralidad kundi ang mga butang man nga nagadul-ong sa sini, lakip na ang seksuwal nga mga pagdalamguhanon kag pornograpiya. (Mateo 5:28) Subong man, ang mga magnobyahanay nga nagadumdom gid sang prinsipio sang Santiago 3:17 nagalikaw sang sobra nga kahirop nga mahimo magdul-ong sa indi nila pagpakita sing pagpugong sa kaugalingon. Bangod ginatuytuyan sila sang prinsipio, nagapabilin sila nga putli kag wala sila nagapangatarungan nga mientras wala nila aktual nga ginalapas ang kasuguan, ang ila paggawi kalahamut-an gihapon kay Jehova. Nahibaluan nila nga ‘makita ni Jehova kon ano ang yara sa tagipusuon’ kag nagapanghikot sila pasad diri. (1 Samuel 16:⁠7; 2 Cronica 16:9) Maamligan sining mga maalam ang ila lawas batok sa madamong balatian nga ginalaton paagi sa pagpakighirop nga lapnag sa karon kag matipigan man nila ang ila mental kag emosyonal nga kapagros.

Ang kaalam sang Dios “mahidaiton” man, siling sang Santiago 3:17. Nahibaluan naton nga ginatinguhaan ni Satanas nga patalikdon kita kay Jehova paagi sa pagsab-ug sing espiritu sang kasingki sa aton mga tagipusuon, sing bahin paagi sa kwestionable nga mga balasahon, pelikula, musika, kag mga hampang sa kompyuter​—⁠ang pila sini nagabuyok sa humalampang nga himuon ang daw indi mahanduraw nga kasingki kag pagpatay! (Salmo 11:5) Ang mas nagasingki nga krimen karon nagapakita nga nagamadinalag-on si Satanas. Tuhoy sa sini nga krimen, sang nagligad nga pila ka tuig ginkutlo sang pamantalaan sang Australia nga The Sydney Morning Herald si Robert Ressler ang nag-imbento sang termino nga “serial killer.” Si Ressler nagsiling nga ang mga manugpatay nga gin-interbyu niya sang dekada 70 napukaw sang soft-core nga mga balasahon ukon video nga “indi tama kalaw-ay kon ikumparar karon.” Gani, ginapanan-aw ni Ressler ang “isa ka madulom nga palaabuton​—⁠isa ka bag-ong siglo nga magadamo ang nagapamatay.”

Sa pagkamatuod, pila lang ka bulan pagkatapos sadto nga balita, isa ka kriminal ang nagtiro sing 16 ka kabataan kag sa ila maestra sa kindergarten sa Dunblane Scotland, dayon nagpanginmatay sia. Pagkadason nga bulan isa naman ka naghuramentado nga lalaki ang nagmasaker sing 32 ka tawo sa malinong nga banwa sang Tasmania sa Port Arthur, Australia. Sining ulihi nga tinuig, natublag gid ang Estados Unidos sa mga pagpangmasaker sa eskwelahan, amo nga nakapamangkot ang mga Amerikano, Ngaa nagakatabo ini? Sang Hunyo 2001, nangin ulong-dinalan sa bug-os nga kalibutan ang natabo sa Japan sang nagsulod sa eskwelahan ang  isa ka naghuramentado nga tawo kag ginbuno ang 8 ka kabataan nga yara sa una kag ikaduha nga grado tubtob mapatay kag ginpilasan ang 15 pa ka tawo. Pat-od gid nga ini nga kalainan may madamo nga kabangdanan, apang ang kasingki sa media ginakabig nga isa sa sini. “Kon ang isa ka produkto nagabakal kag nagadaku ang benta bangod sang 60-segundos nga pasayod,” sulat sang kolumnista nga si Phillip Adams sang Australia, “pat-od gid nga ang duha ka oras nga mega-milyones nga pelikula makapabag-o sang panimuot.” Amo nga sa balay sang kriminal sa Port Arthur, nakakumpiskar ang mga pulis sing 2,000 ka masingki kag pornograpiko nga mga video.

Naamligan ang hunahuna kag tagipusuon sang mga nagasunod sa mga prinsipio sang Biblia gikan sa tanan nga porma sang kalingawan nga nagapalambo sang kakunyag sa kasingki. Gani, “ang espiritu sang kalibutan” wala sing lugar sa ila hunahuna kag mga handum. Sa baylo ‘natudluan sila sang espiritu sang Dios,’ kag ginatinguhaan nila nga palambuon ang mga bunga sini, nga nagalakip sang paghidait. (1 Corinto 2:​12, 13; Galacia 5:​22, 23) Ginahimo nila ini paagi sa regular nga pagtuon sa Biblia, pangamuyo, kag makapalig-on nga pagpamalandong. Ginalikawan man nila nga makig-upod sa mga tawo nga may masingki nga huyog, kag sa baylo ginapakamaayo nga makig-upod sa mga tawo, nga kaangay nila, nagahandum sang mahidaiton nga bag-ong kalibutan ni Jehova (Salmo 1:​1-3; Hulubaton 16:29) Huo, daku gid nga proteksion ang diosnon nga kaalam!

Tuguti ang “Pulong” ni Jehova nga Mag-amlig sang Imo Tagipusuon

Sang ginsulay si Jesus sa kahanayakan, nangatarungan sia kay Satanas paagi sa pagkutlo sing sibu sang Pulong sang Dios. (Lucas 4:​1-​13) Apang, wala lamang sia nakigdebate sa Yawa agod pamatud-an kon sin-o sa ila ang maalam. Paagi sa pagpasad sang iya pangatarungan sa Kasulatan, nakapamulong si Jesus gikan sa tagipusuon, gani ang epektibo nga taktika sang Yawa sa Eden, napaslawan kay Jesus. Mapaslawan man sa aton ang mga pahito ni Satanas kon pun-on naton ang aton tagipusuon sang mga pulong ni Jehova. Amo ini ang pinakamaayo nga mahimo naton, kay “nagagikan sa [tagipusuon] ang mga tuburan sang kabuhi.”​—⁠Hulubaton 4:23.

Dugang pa, dapat naton padayon nga bantayan ang aton tagipusuon kag indi mag-untat. Sang napaslawan si Satanas sa kahanayakan, wala sia mag-untat sa pagtilaw kay Jesus. (Lucas 4:13) Indi man sia mag-untat sa pagtilaw sa aton, nga nagagamit sing lainlain nga pahito agod bungkagon ang aton integridad. (Bugna 12:17) Gani, ilugon naton si Jesus paagi sa pagpalambo sing tudok nga gugma sa Pulong sang Dios, kag sa wala untat man nga pagpangabay sing balaan nga espiritu kag kaalam. (1 Tesalonica 5:​17; Hebreo 5:7) Sa bahin ni Jehova, nagsaad sia nga ang tanan nga nagadangop sa iya indi mahalitan sa espirituwal.​—⁠Salmo 91:​1-​10; Hulubaton 1:⁠33.

Ang Pulong sang Dios Nagaamlig sa Kongregasyon

Indi maupangan ni Satanas nga ang gintagna nga “dakung kadam-an” makalampuwas sa dakung kapipit-an. (Bugna 7:​9, 14) Apang, nagatinguha gid sia nga sulayon bisan ang pila lang ka indibiduwal nga Cristiano agod madula nila ang kahamuot ni Jehova. Ina nga pahito nagmadinalag-on sa dumaan nga Israel kag nagresulta sa kamatayon sang 24,000 sa atangan na mismo sang Ginsaad nga Duta. (Numeros 25:​1-9) Siempre pa, ang nakasala nga mga Cristiano nga hanuot nga naghinulsol makabaton sing mahigugmaon nga bulig kag mapasag-uli sa espirituwal. Apang, ang di-mahinulsulon nga mga makasasala, kaangay ni Zimri sang una, nagabutang sa iban sa moral kag espirituwal nga katalagman. Kaangay sang mga soldado sa phalanx nga naghaboy sang ila mga taming, ginabutang nila sa peligro indi lamang ang ila kaugalingon kundi ang ila man kaupdanan.

Gani, ang Biblia nagsugo: “Dili na kamo magpakig-upod kay bisan sin-o nga ginatawag nga utod nga isa ka makihilawason ukon isa ka tawo nga mahamkunon ukon isa ka sumilimba sang idolo ukon isa ka mapasipalahon ukon isa ka palahubog ukon isa ka manugkilkil, bisan sa pagkaon dili kamo magpakig-upod sa sining tawo. . . . Kuhaa ang tawo nga malaut gikan sa tunga ninyo.” (1 Corinto 5:​11, 13) Wala ka bala nagaugyon nga ining maalamon nga “pulong” magaamlig sa moral kag espirituwal nga katinlo sang Cristianong kongregasyon?

Sa kabaliskaran, ginakabig sang madamo nga simbahan sang Cristiandad kag subong man sang mga apostata nga ang pila ka bahin sang Biblia  nga nagasumpakil sa moderno kag liberal nga mga pagtamod sa moralidad kinaraan na. Gani, ginapakamatarong nila ang tanan nga sahi sang mabug-at nga sala bisan pa sa tunga sang mga klero. (2 Timoteo 4:​3, 4) Apang, talupangda nga pagkatapos ginsambit sang Hulubaton 30:5 ang kaangay-taming nga “pulong” ni Jehova, ginsundan ini sang sugo sa bersikulo 6: “Indi pagdugangi ang iya mga pulong, agod indi ka niya pagsabdungon, kag agod indi ka mapamatud-an nga isa ka butigon.” Huo, yadtong nagapatiko sang Biblia matuod gid nga espirituwal nga mga butigon​—⁠ang pinakatalamayon nga mga butigon sa tanan! (Mateo 15:​6-9) Mapinasalamaton kita nian, nga mangin bahin sining organisasyon nga nagatahod gid sa Pulong sang Dios.

Naamligan sang “Kahumot”

Bangod ang katawhan sang Dios nagasunod sa Biblia kag nagapaambit sa iban sang makapaumpaw nga mensahe sini, ginapalapnag nila ang kaangay incienso nga “kahumot” sang kabuhi nga nagapahalipay kay Jehova. Apang para sa mga di-matarong nga mga indibiduwal, ang mga nagadala sini nga mensahe nagapalapnag, suno pagbadbad ni J. B. Phillips, sang “baho sang kamatayon.” Huo, sa malaragwayon nga kahulugan, ginguba sang sistema sang mga butang ni Satanas ang igbalatyag sa pagpanimaho sang malauton, gani daw indi sila mapahamtang ukon nagapamatok pa gani kon yara ang nagapalapnag sang “kahumot ni Cristo.” Sa pihak nga bahin, ang mga makugi nga nagapalapnag sing maayong balita nangin “kahumot ni Cristo sa tunga sang mga naluwas.” (2 Corinto 2:​14-​16) Naugot ining mga bunayag sing tagipusuon sa pagkasalimpapaw kag kabutigan sang butig nga relihion. Busa, kon basahan naton sila sang Pulong sang Dios kag ipaambit ang mensahe sang Ginharian, naganyat sila kay Cristo kag luyag nila nga makatuon sing dugang pa.​​—⁠Juan 6:⁠44.

Gani indi magluya ang imo buot kon ang iban wala nagapamati sa mensahe sang Ginharian. Sa baylo, tamda ang “kahumot ni Cristo” bilang espirituwal nga proteksion nga nagatabog sa makahalalit nga mga indibiduwal palayo sa espirituwal nga kahimtangan nga ginapuy-an sang katawhan sang Dios, samtang nagaganyat sa mga bunayag sing tagipusuon.​​—⁠Isaias 35:​8, 9.

Nagdaug ang Griegong mga soldado sa Marathon bisan pa mas madamo ang ila kaaway bangod nagaikitay gid sila kag nagauyat sing hugot sang ila mga taming. Sing kaanggid, sigurado man ang kadalag-an sang mainunungon nga mga Saksi ni Jehova sa ila espirituwal nga pagpakig-away, kay amo ini ang ila “palanublion.” (Isaias 54:17) Gani, kabay nga ang tagsa sa aton padayon nga magdangop kay Jehova nga nagapabilin nga “nagapanguyapot sing hugot sa pulong sang kabuhi.”​​—⁠Filipos 2:16.

[Mga retrato sa pahina 31]

‘Ang kaalam nga gikan sa hitaas una sa tanan putli, nian mahidaiton’