Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Sa dumaan nga Israel, ano ang ginapatuhuyan sang milagruso nga kapawa nga kon kaisa ginatawag nga Shechinah nga makita sa Labing Balaan nga duog sang tabernakulo kag sang templo?

Si Jehova, ang mahigugmaon nga Amay kag Manug-amlig sang iya katawhan, naghimo sang iya presensia nga madayag gid sa Israel. Ang isa ka paagi agod mahimo niya ini amo ang paagi sa isa ka masanag nga panganod nga naangot gid sa iya duog sang pagsimba.

Ining kitaon nga kapawa nagarepresentar sa di-makita nga presensia ni Jehova. Makita ini sa Labing Balaan nga duog sang tabernakulo kag sang templo nga gintukod ni Solomon. Ining milagruso nga kapawa wala nagakahulugan nga si Jehova yari diri. Ang Dios indi makaigo sa bisan ano nga tinukod nga ginhimo sang mga tawo. (2 Cronica 6:18; Binuhatan 17:24) Ining labaw sa kinaugali nga kapawa sa santuaryo sang Dios makapasalig sa mataas nga saserdote kag paagi sa iya sa tanan nga Israelinhon nga ang maamligon nga presensia ni Jehova nagaatipan sa ila kag sa ila mga kinahanglanon.

Pagkatapos sang dag-on sang pagsulat sang Biblia, ining kapawa gintawag sa Aramaiko nga lenguahe nga Shechinah (shekhi·nahʹ), nga nagakahulugan “ina nga nagapuyo” ukon “ang puluy-an.” Ini nga termino indi makita sa Biblia apang masapwan sa mga badbad nga Aramaiko sang Hebreong Kasulatan, nga gintawag man ang mga Targum.

Sang naghatag sang mga instruksion sa pagtukod sang tabernakulo, si Jehova nagsiling kay Moises: “Ibutang mo ang takop sa ibabaw sang Kaban, kag sa sulod sang Kaban ibutang mo ang pagpamatuod nga ihatag ko sa imo. Kag didto magapakigkita ako sa imo kag magapakighambal ako sa imo gikan sa ibabaw sang takop, sa tunga sang duha ka kerubin nga yara sa ibabaw sang kaban.” (Exodo 25:​21, 22) Ang Kaban nga ginhinambitan amo ang ginkulapan sang bulawan nga kahon nga yara sa Labing Balaan nga duog. May duha ka bulawan nga kerubin sa ibabaw sang takop sang Kaban.

Sa diin magahambal si Jehova? Ginsabat niya ini sang nagsiling sia kay Moises: “Sa panganod magapakita ako sa ibabaw sang takop.” (Levitico 16:2) Ining panganod yara sa ibabaw sang sagrado nga Kaban sa tunga sang duha ka bulawan nga kerubin. Wala ginasugid sang Biblia kon daw ano kataas ang panganod ukon kon daw ano ini kalayo sa mga kerubin.

Ining masanag nga panganod nagaiwag sa Labing Balaan nga duog. Sa katunayan, amo lamang ini ang nagapasanag sa sining duog. Amo man ini ang nagapasanag kon magsulod ang mataas nga saserdote sa nasulod nga bahin sa Adlaw sang Katumbasan. Nagatindog sia sa presensia ni Jehova.

May importansia bala ining milagruso nga kapawa para sa mga Cristiano? Nakita ni apostol Juan sa palanan-awon ang isa ka siudad nga “wala sing kagab-ihon.” Ang siudad amo ang Bag-o nga Jerusalem, nga ginahuman sang hinaplas nga mga Cristiano nga ginbanhaw agod maggahom kaupod ni Jesus. Ang kapawa sa sining simbuliko nga siudad indi gikan sa adlaw ukon sa bulan. Ang himaya ni Jehova nga Dios direkta nga nagaiwag sa sining organisasyon, subong nga ang Shechinah nga panganod nag-iwag sa Labing Balaan nga duog. Subong man, ang Kordero, si Jesucristo, amo ang “suga” sang siudad. Sa amo, ining “siudad” nagahatag sang iya espirituwal nga kapawa kag pabor sa mga gintubos nga katawhan gikan sa tanan nga pungsod subong panuytoy para sa ila.​—⁠Bugna 21:22-25.

Bangod nagabaton sila sining bugana nga mga pagpakamaayo gikan sa hitaas, ang mga sumilimba ni Jehova makapat-od nga si Jehova ang ila manug-amlig nga Manugbantay kag mapinalanggaon nga Amay.