Magdiretso sa kaundan

Magdiretso sa listahan sang kaundan

Di-minyo kag Kontento sa Pag-alagad kay Jehova

Di-minyo kag Kontento sa Pag-alagad kay Jehova

 “Ang Bulig sa Akon Nagagikan kay Jehova”

Di-minyo kag Kontento sa Pag-alagad kay Jehova

“MADAMO sa amon ang malipayon gid bisan pa di-minyo,” siling sang isa ka Cristianong babayi sa Espanya. Ano ang rason sang iya pagkakontento? “Nalipay gid kami nga hilway gikan sa madamo nga kabalaka agod nga makaalagad kami sing bug-os sa amon Dios nga si Jehova.”

Nahisanto ini nga balatyagon sa ginsiling sang Pulong sang Dios tuhoy sa pagkadiminyo. Sang ginpaathag ni apostol Pablo ang mga butang nga may kahilabtanan sa pag-asawahay, ginsiling niya ining gin-inspirar nga ideya: “Ginasiling ko sa mga di-minyo kag sa balo nga mga babayi, maayo sa ila nga magpabilin subong sa akon.” Si Pablo mismo di-minyo. Apang ano ang iya rason sa pagpanugda nga magpabilin nga di-minyo? Ginpatalupangod niya nga ang minyo nga tawo nabahinbahin, samtang ang di-minyo nga lalaki ukon babayi “nagakabalaka sa mga butang sang Ginuo.” (1 Corinto 7:​8, 32-34) Ang pag-alagad kay Jehova amo ang panguna nga rason nga nagapabatyag sing kalipay kag pagkakontento sa isa ka di-minyo nga tawo.

Pagpabilin nga Di-minyo nga May Dungganon nga Katuyuan

Ang ginsiling ni Pablo mahimo nga makalilibog para sa mga kultura nga nagapadaku sa importansia sang pagminyo kag pagpamilya. Apang, si Jesucristo​—⁠nga di-minyo mismo apang malipayon kag kontento​—⁠nagsambit sing isa ka dungganon nga katuyuan para sa di-minyo nga mga Cristiano. Sia nagsiling: “May mga eunuco nga ginhimo nga eunuco ang ila kaugalingon bangod sa ginharian sang mga langit. Sia nga makaaman sing hulot sa sini mag-aman sing hulot sa sini.”​—⁠Mateo 19:12.

Nahisanto sa sinang mga pulong, nasapwan sang madamo nga ang pagpabilin nga di-minyo nagatugot sa ila nga alagdon ang Dios nga wala sing tublag nga kinaandan sa mga minyo. (1 Corinto 7:35) Linibo ka di-minyo nga Cristiano ang malipayon nga nagasimba kay Jehova, kag nakasapo sila sing kalipay sa aktibo nga pagbulig sa iban.⁠ *

Madamo sang di-minyo nga mga Cristiano ang nakarealisar nga ang kalipay indi lamang para sa mga minyo kag nga ang kasubo indi lamang naeksperiensiahan sang tanan nga di-minyo. Ang minyo kag di-minyo nga mga indibiduwal, kon kaisa nagaeksperiensia sing kalipay subong man sing kasubo. Sa katunayan, realistiko nga ginsiling sang Biblia nga ang pagminyo mismo nagadala sing ‘kapipit-an sa unod.’​—⁠1 Corinto 7:28.

Di-minyo Bangod sang Kahimtangan

Madamo ang di-minyo indi bangod nga luyag nila kundi bangod sang mga kahimtangan. Mahimo nga ginahandum nila ang gugma, pagpakig-upod, kag pagpalanga nga matigayon sa sulod sang pag-asawahay. Apang, para sa iban, ang pinansial ukon iban pa nga mga kabangdanan mahimo makaupang sa pagminyo sa karon. Ang pila ka Cristiano​—⁠madamo sa ila pinalangga nga espirituwal nga mga utod nga babayi​—⁠nagpabilin nga di-minyo bangod determinado sila sa pagsunod sa laygay sang Biblia nga magminyo “lamang sa Ginuo.” (1 Corinto 7:39) Mainunungon sila nga nagapangita sing milinyuon sa tunga lamang sang dedikado, bawtismado nga mga sumilimba ni Jehova.

 Kon kaisa, ang pila sining mga indibiduwal ginasubuan. Sa tapos gin-ako nga amo ini ang iya ginabatyag, isa ka di-minyo nga utod nga babayi ang nagsiling: “Nahibaluan namon ang kasuguan ni Jehova kag indi gid namon luyag nga indi mapahamut-an si Jehova sa bisan ano nga paagi. Mahimo luyag namon ang pagpakig-upod sang isa ka tiayon, apang bisan sulitsuliton pa sang mga tawo sa kalibutan ang ila paninguha nga ‘patigayunon ini,’ malig-on kami sa amon pamat-od nga magpabilin nga di-minyo. Indi gani namon luyag bisan pa ang pagpakig-upod sa di-tumuluo nga mga lalaki ukon mga babayi.” Dalayawon gid ang kasubong sini nga mga Cristiano sa pag-aplikar sang laygay sang Biblia kag pagpabilin sa mataas nga mga talaksan sang moral agod mapahamut-an si Jehova walay sapayan sang bisan ano man nga kasubo nga ila naeksperiensiahan.

Maalwan nga mga Bulig Halin sa Dios

Mainunungon si Jehova sa mga nagapakita sing pagkamainunungon sa iya sa mga butang subong sang indi pagminyo sa mga indibiduwal nga wala nagaalagad sa iya. Pasad sa personal nga inagihan, makasiling si Hari David: “Sa mainunungon magapanghikot ka [Jehova] sing mainunungon.” (Salmo 18:25) Kag sa mga matutom nga nagatuman sa iya, nagasaad ang Dios: “Indi ko gid kamo pagbiyaan ukon pagpatumbayaan.” (Hebreo 13:5) Sa pag-ilog kay Jehova, mahimo naton mahatagan pirme sing komendasyon ang tanan nga di-minyo nga mga Cristiano nga matutom nga nagatuman sa Pulong sang Dios. Mahimo man naton ipangamuyo nga palig-unon sila ni Jehova sa pag-atubang sang ila mga kabudlayan.​—⁠Hukom 11:30-40.

Nasapwan sang madamo nga di-minyo nga mga Cristiano nga ang pagpakigbahin sing bug-os sa hilikuton nga pagpanudlo sing Biblia nagahatag sing kahulugan sa ila kabuhi. Binagbinaga ang halimbawa ni Patricia, isa ka di-minyo nga babayi nga mga 35 ang edad kag isa ka payunir, ukon bug-os tion nga ebanghelisador. Sia nagsiling: “Bisan pa madamo sing pagtilaw sa pagpabilin nga di-minyo, nagatugot ini sa akon nga mangin regular payunir. Bangod di-minyo ako, mas mapasibusibu ko ang akon iskedyul, nga nagatugot sa akon sing madamo nga tion sa pagtuon. Natun-an ko man nga magsalig sing kapin kay Jehova, ilabi na sa mabudlay nga mga tion.”

Ini nga mga pagtamod napasad sa masaligan nga saad sang Biblia: “Itugyan kay Jehova ang imo dalanon, kag magsalig sa iya, kag sia mismo magapanghikot.” (Salmo 37:5) Sa pagkamatuod, ang tanan nga matutom nga mga sumilimba ni Jehova, minyo ukon di-minyo, makasapo sing lugpay kag kusog sa inspirado nga pinamulong: “Ang bulig sa akon nagagikan kay Jehova.”​—⁠Salmo 121:2.

[Nota]

^ par. 7 Tan-awa ang 2005 Calendar of Jehovah’s Witnesses, Hulyo/Agosto.

[Blurb sa pahina 9]

“Ang tawo nga di-minyo nabalaka sa mga butang sang Ginuo, kon paano niya matigayon ang kahamuot sang Ginuo.”​—⁠1 CORINTO 7:32

[Kahon sa pahina 8]

PAGHIMO SANG PAGKADIMINYO NGA MAKAPALADYA

Si Jesus nga wala gid magminyo nagsiling: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.”​—⁠Juan 4:34.

Ang apat ka di-minyo nga anak nga babayi ni Felipe nagpabilin nga masako sa ‘pagpanagna.’​—⁠Binuhatan 21:​8, 9.

Ang di-minyo nga mga utod nga babayi nga nagabantala sing mensahe sang Ginharian bahin sang ‘daku nga hangaway sang mga babayi nga nagabantala sing maayong balita.’​—⁠Salmo 68:11.