Magdiretso sa kaundan

Magdiretso sa listahan sang kaundan

Kinabubut-on nga Ginahalad Nila ang Ila Kaugalingon

Kinabubut-on nga Ginahalad Nila ang Ila Kaugalingon

 Kinabubut-on nga Ginahalad Nila ang Ila Kaugalingon

“ANG imo katawhan magahalad sang ila kaugalingon sing kinabubut-on.” (Salmo 110:3) Ini nga mga pulong may pinasahi nga kahulugan para sa 46 ka estudyante sang ika-118 nga klase sang Watchtower Bible School of Gilead. Paano sila naghanda agod makaeskwela sa sini nga eskwelahan, nga nagahanas sa mga manugmisyonero sa paghatag sing espirituwal nga mga kinahanglanon sang mga tawo sa iban nga mga pungsod? Si Mike kag si Stacie, nga mga estudyante sang ika-118 nga klase, nagpaathag: “Ang desisyon namon nga magkabuhi sing simple nagbulig sa amon nga mabuhinan ang mga sablag kag unahon ang espirituwal nga mga butang sa amon kabuhi. Determinado kami nga indi pagtugutan nga maupangan sang amon pagtin-ad sa negosyo ang espirituwal nga mga tulumuron.” Kaangay ni Mike kag ni Stacie, ang iban nga mga estudyante sini nga klase kinabubut-on nga naghalad sang ila kaugalingon kag handa na sila karon nga mag-alagad subong mga manugbantala sang Ginharian sa apat ka kontinente.

Sang Sabado, Marso 12, 2005, maathag nga nalipay gid ang 6,843 ka tumalambong samtang nagapamati sila sa programa sang gradwasyon. Si Theodore Jaracz, nga katapo sang Nagadumala nga Hubon sang mga Saksi ni Jehova, amo ang tsirman. Sa tapos maabiabi ang mga bisita, nga nagtambong gikan sa 28 ka pungsod, ginpatalupangod niya ang balor sang edukasyon sa Biblia. Ginakutlo si William Lyon Phelps, isa ka Amerikano nga edukador, ang humalambal nagsiling: “Ang tanan nga may madamo sing ihibalo sa Biblia mahimo gid tawgon nga edukado.” Bisan pa mapuslanon ang sekular nga edukasyon, mas labaw gid ang edukasyon sa Biblia. Nagabulig ini sa mga tawo nga magkuha sing ihibalo tuhoy sa Dios, nga nagadul-ong sa kabuhi nga wala sing katapusan. (Juan 17:3) Ginhatagan sing komendasyon ni Utod Jaracz ang mga naggradwar tungod sang ila pagkahanda nga makigbahin sing daku sa bug-os globo nga programa sang pagpanudlo sa Biblia nga ginahimo sa kapin sa 98,000 ka kongregasyon sang mga Saksi ni Jehova sa bug-os nga kalibutan.

Sibu sa Tion nga Pagpalig-on Para sa mga Naggradwar

Pagkatapos sang nagabukas nga pamulongpulong sang tsirman, si William Samuelson nagpamulongpulong sa topiko nga “Kon Paano Kamo Mangin Kaangay sa Madabong nga Kahoy nga Olibo sa Balay Sang Dios,” nga napasad sa Salmo 52:8. Ginpatalupangod niya nga ang kahoy nga olibo malaragwayon nga ginagamit sa Biblia subong simbulo sang pagkamabungahon, katahom kag dignidad. (Jeremias 11:16) Ginapaanggid ang mga estudyante sa mga kahoy nga olibo, ang humalambal nagsiling: “Tamdon kamo ni Jehova nga matahom kag may dignidad samtang matutom ninyo nga ginatuman ang hilikuton nga pagbantala sing Ginharian sa inyo mga teritoryo subong mga misyonero.” Subong nga ang mga gamot sang kahoy nga olibo kinahanglan makapangalapkap sing maayo agod makalampuwas sa  panahon sang pamangag, kinahanglan man nga pabakuron sang mga estudyante ang ila espirituwal nga mga gamot agod mabatas ang di-pagsapak, pagpamatok, ukon iban pa nga mga pagtilaw nga mahimo nila maatubang sa ila pag-alagad sa iban nga mga pungsod.​—⁠Mateo 13:21; Colosas 2:​6, 7.

Si John E. Barr, isa sa tatlo ka katapo sang Nagadumala nga Hubon nga nakigbahin sa programa, nagpamulongpulong sa tema nga “Kamo ang Asin Sang Duta.” (Mateo 5:13) Ginpatalupangod niya nga subong nga ang literal nga asin nagapreserbar sang pagkaon agod indi madunot, ang pagbantala sang mga misyonero tuhoy sa Ginharian sang Dios may nagaluwas-kabuhi man nga epekto sa mga nagapamati, nga nagaamlig sa ila batok sa moral kag espirituwal nga pagkadunot. Pagkatapos, mainayuhon nga ginpalig-on ni Utod Barr ang mga naggradwar nga ‘huptan ang paghidait’ upod sa iban. (Marcos 9:50) “Palambua ninyo ang mga bunga sang espiritu, kag pat-ura nga ang inyo paggawi kag panghambal pirme mainayuhon kag mapatugsilingon,” laygay sang humalambal.

Ang “Magpabilin sa Sakayan sa Madalom nga Katubigan” amo ang tema nga ginpadaku ni Wallace Liverance, isa sa mga instruktor sa Gilead. Subong nga ang sakayan sa madalom nga katubigan makalayag sa husto nga direksion, ang paghangop sa “madalom nga mga butang sang Dios”​—⁠mga kamatuoran tuhoy sa katuyuan sang Dios kag kon paano ini himuon​—⁠makabulig man sa isa nga mag-uswag sa espirituwal. (1 Corinto 2:10) Ang pagpabilin lamang sa manabaw nga espirituwal nga katubigan paagi sa pagkakontento sa “nahauna nga mga butang sang sagrado nga mga pinamulong sang Dios” nagaupang sa aton pag-uswag kag mahimo pa gani nga ‘malunod nahanungod sa aton pagtuo.’ (Hebreo 5:​12, 13; 1 Timoteo 1:19) “Tuguti nga ang ‘kadalom sang kamanggaran kag kaalam kag ihibalo sang Dios’ magasakdag sa inyo sa inyo teritoryo subong mga misyonero,” hinakop ni Utod Liverance.​—⁠Roma 11:33.

Si Mark Noumair, isa pa ka instruktor sa Gilead, nagpamulongpulong sa topiko nga “Magakabuhi Bala Kamo Suno sa Inyo Palanublion?” Sa sulod na sang kapin sa 60 ka tuig, ang Watchtower Bible School of Gilead nakatigayon sang kredibilidad kag maayo gid nga reputasyon bangod sang ‘tinumpok nga maayo nga panaksi’ nga ginahatag sang mga gradwado sang eskwelahan. (Genesis 31:48) Ining palanublion sa Gilead ginpasa sa mga estudyante sang ika-118 nga klase. Ginpalig-on ni Utod Noumair ang mga estudyante nga ilugon ang dumaan nga mga Tekoanhon sang panahon ni Nehemias kag mapainubuson nga magkooperar sa lokal nga kongregasyon kag sa mga masigkamisyonero. Ginlaygayan sila nga likawan ang panimuot sang bugalon nga “mga dungganon” nga ginpatuhuyan ni Nehemias kag sa baylo mangin handa nga manghikot sing malinong nga wala nagapakitakita.​—⁠Nehemias 3:5.

Nagatudlo nga mga Eksperiensia kag mga Interbyu

Ang masunod nga bahin sang programa natig-uluhan “Ang Pulong Sang Dios Padayon nga Nagtubo.” (Binuhatan 6:7) Sa bulig sang instruktor sa Gilead nga si Lawrence Bowen, gin-akto sang mga estudyante ang ila mga eksperiensia sa ministeryo sa latagon samtang nagaeskwela. Ginpakita sang mga eksperiensia nga makugi nga ginbantala sang mga estudyante ang Pulong sang Dios kag ginpakamaayo gid ni Jehova ang ila mga panikasog.

Gin-interbyu ni Richard Ashe ang mga miembro sang pamilya Bethel nga nanghikot sing suod upod sa eskwelahan. Ginpahangop gid sang ila mga komento ang bulig nga ginahatag sang pamilya Bethel sa mga estudyante sang Gilead agod makabenepisyo gid sila sa pag-eskwela. Dayon, gin-interbyu ni Geoffrey Jackson ang pila ka gradwado sang Gilead sang nagligad. Ginpadaku nila ang madamo nga kahigayunan nga ginahatag sang pagmisyonero sa pagdayaw kag pagpadungog kay Jehova. Ang isa nagkomento: “Makita sang mga tawo ang tanan mo nga ginahimo subong misyonero. Nagapamati sila, nagatan-aw, kag ginadumdom nila ini.” Sa amo, ginpalig-on ang mga estudyante nga mangin mahunahunaon sa pagpahamtang sing maayo nga halimbawa sa tanan nga tion. Ining maayo nga laygay mapuslanon gid sa inadlaw nga maabot.

Ginhatag ni Stephen Lett, katapo sang Nagadumala nga Hubon, ang katapusan nga pamulongpulong nga natig-uluhan “Maglakat Subong mga Manugdala Sang ‘Tubig nga Buhi.’” (Juan 7:38) Nagsiling sia nga sa sulod sang nagligad nga lima ka bulan, nakabenepisyo gid sing daku ang mga estudyante paagi sa pag-inom sing madalom gikan sa kamatuoran sang Pulong sang Dios. Apang ano ang himuon sang mga misyonero sa impormasyon nga natigayon nila? Ginpalig-on ni Utod Lett ang mga naggradwar nga ipaambit sing maalwan ining espirituwal  nga katubigan agod nga matigayon sang iban ang ‘tuburan sang tubig nga nagaibwal agod maghatag sing kabuhi nga walay katapusan.’ (Juan 4:14) Nagsiling pa ang humalambal: “Indi gid ninyo pagkalimti nga hatagan si Jehova, ‘ang tuburan sang tubig nga buhi,’ sang dungog kag himaya nga nagakadapat sa iya. Mangin mapailubon kon nagatudlo sa mga naggua sa nagapamangag nga Babilonia nga Daku.” (Jeremias 2:13) Naghinakop si Utod Lett paagi sa pagpalig-on sa mga naggradwar nga ilugon sing mapagsik ang espiritu kag ang nobya kag padayon nga magsiling: “‘Kari!’ Kag ang bisan sin-o nga ginauhaw magkari; ang bisan sin-o nga maluyag sa pagkuha sing tubig sang kabuhi nga walay bayad.”​—⁠Bugna 22:17.

Ginhinakpan ni Utod Jaracz ang programa paagi sa pagbasa sing mga panamyaw nga nabaton gikan sa iban nga kadutaan. Ginsundan ini sang pagbasa sing sulat nga nagapasalamat sang isa ka estudyante sang naggradwar nga klase.

Makaalagad ka bala sa duog diin may daku pa nga pagkinahanglan? Kon mahimo mo ini, nian himud-usi ang espirituwal nga mga tulumuron, subong sang ginhimo sining naggradwar nga mga estudyante. Aguma ang kalipay kag kaayawan nga matigayon kon malipayon nga ginahalad sang isa ang iya kaugalingon sa pag-alagad sa Dios​—⁠isa man ka misyonero sa iban nga pungsod ukon isa ka ministro nga malapit sa puluy-an.

[Kahon sa pahina 13]

ESTADISTIKA SANG KLASE

Kadamuon sang mga pungsod nga gintiglawas: 8

Kadamuon sang mga pungsod nga ginpadalhan: 19

Kadamuon sang mga estudyante: 46

Promedyo nga edad: 33.0

Promedyo nga tuig sa kamatuoran: 16.5

Promedyo nga tuig sa bug-os tion nga ministeryo: 12.9

[Retrato sa pahina 15]

Ika-118 nga Naggradwar nga Klase sang Watchtower Bible School of Gilead

Sa listahan sa ubos, ang mga raya ginanumeruhan halin sa atubangan pa likod, kag ang mga ngalan ginalista halin sa wala pa tuo sa kada raya.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.