Magdiretso sa kaundan

Magdiretso sa listahan sang kaundan

Pagdayaw kay Jehova sa Eskwelahan

Pagdayaw kay Jehova sa Eskwelahan

 Pagdayaw kay Jehova sa Eskwelahan

SA BUG-OS nga kalibutan, ginatinguhaan sang pamatan-on nga mga Saksi ni Jehova nga dayawon ang Dios sa eskwelahan​—⁠paagi sa ila paghambal kag pagginawi. Binagbinaga ang pila ka eksperiensia nga nagapakita sang kakugi sini nga mga pamatan-on.

Ginpasulat ang isa ka pamatan-on nga Saksi sa Gresya sing report tuhoy sa polusyon sa atmospera sang duta. Sa tapos matan-aw ang Watch Tower Publications Index, nakita niya ang mapuslanon nga impormasyon sa magasin nga Magmata! kag ginsulat niya sa katapusan nga bahin sang iya salaysay nga amo ini ang iya reperensia. Ginsilingan sia sang iya maestra nga isa ini sa pinakamaayo nga mga salaysay nga iya nabasa. Gingamit sang ulihi sang maestra ini nga impormasyon sa isa ka seminar, kag maayo ang resulta. Gani namat-od ang utod nga pamatan-on nga tanyagan ang iya maestra sang iban pa nga mga gua sang Magmata! lakip na ang gua tuhoy sa serye nga “Mga Manunudlo​—⁠Ano ang Himuon Naton Kon Wala Sila?” Sang ulihi, gindayaw sang maestra ang magasin nga Magmata! sa klase, kag nagpangabay man sing mga kopya ang pila ka estudyante. Nagdala ang utod nga babayi sing mga kopya sang magasin sa eskwelahan agod mabasa nila ang iban nga mga gua.

Sa Benin, Aprika, nag-atubang sing di-kinaandan nga pag-ipit ang isa ka tin-edyer nga Cristiano. Batasan na sang mga ginikanan sang madamo nga estudyante sa ila eskwelahan nga tingob nga magkuha sing mga tutor sa mabudlay nga mga asignatura agod mahanda ang mga bata sa eksaminasyon. Apang, ginpili sang mga tutor ang Sabado sang aga para sa sini nga paghanda. Nangindi ang pamatan-on nga Saksi: “Nagabantala ang bug-os nga kongregasyon kon Sabado sang aga. Amo ini ang akon pinakamalipayon nga tion sa bug-os nga semana, kag indi ko ini pag-ibaylo sa bisan ano!” Komporme sa iya ang iya amay, nga isa ka nagasolo nga ginikanan kag isa man ka Saksi, gani ginpangabay niya ang isa ka grupo sang mga ginikanan kag mga tutor nga bag-uhon ang iskedyul. Apang, wala sila tanan magpasugot. Namat-od ang pamatan-on nga indi na lang magpa-tutor. Sa baylo, nagbantala sia upod sa ila kongregasyon. Ginyaguta sia sang iya mga kaklase, ginapauntat sia sa pagpanaksi kag ginasilingan nga biyaan niya ang iya Dios. Sigurado gid sila nga indi sia makapasar sa eksaminasyon. Apang, ini nga grupo sang nagpa-tutor nga mga estudyante amo ang wala nakapasar, samtang nakapasar naman ang aton utod nga pamatan-on. Gani, wala na sia ginayaguta. Karon, ginasilingan na sia sang mga estudyante, “Padayuna ang pag-alagad mo sa imo Dios.”

Sa Czech Republic, nagahanda ang isa ka 12 anyos nga lin-ay sing report tuhoy sa isa ka libro. Ginpalig-on sia sang iya iloy nga gamiton ang libro nga Ang Pinakabantog nga Tawo nga Nagkabuhi. Gin-umpisahan niya ang iya report sa mga pamangkot: “Ano sa banta ninyo? Sin-o gid ang pinakabantog nga tawo nga nagkabuhi?” Ginlaragway niya si Jesus, ang iya kabuhi sa duta, kag ang iya mga gintudlo. Nian ginpresentar niya sing detalyado ang kapitulo nga natig-uluhan “Isa ka Leksion Tuhoy sa Pagkamapinatawaron.” Nagsiling ang iya maestra, “Amo ini ang pinakamaayo nga report nga nabatian ko sa imo!” kag nagpasalamat sa nabaton niya nga isa ka kopya sang libro. Luyag man sang pila ka estudyante nga makatigayon sing kopya. Pagkadason nga adlaw, nalipay ang lin-ay nga ipanagtag ang 18 ka kopya.

Daku gid ang kalipay sining mga pamatan-on sa pagdayaw kay Jehova sa eskwelahan. Dapat naton tanan ilugon ang kakugi sini nga mga pamatan-on.