Magdiretso sa kaundan

Magdiretso sa listahan sang kaundan

Indi Mag-untat sa Paghimo sing Maayo

Indi Mag-untat sa Paghimo sing Maayo

 Indi Mag-untat sa Paghimo sing Maayo

“HUPTI nga maayo ang inyo paggawi sa tunga sang mga pungsod,” laygay ni apostol Pedro. (1 Pedro 2:12) Ang Griegong tinaga nga ginbadbad nga “maayo” nagapatuhoy sa isa nga “matahom, dungganon, halangdon, ekselente.” Sa karon nga panahon, daw indi realistiko nga paabuton nga mangin dungganon ukon halangdon ang paggawi sang katawhan sa kabug-usan. Apang, sa kabilugan, ang katawhan ni Jehova karon nagmadinalag-on sa pagsunod sa laygay ni Pedro. Sa katunayan, kilala sila sa bug-os nga kalibutan bangod sang ila maayo nga paggawi.

Talalupangdon gid ini kon binagbinagon naton ang mga problema kag kabalaka nga ginaatubang naton sa sining “makahalanguyos nga mga tion nga mabudlay pakigbagayan.” (2 Timoteo 3:1) Ang mga pagtilaw bahin na sang aton matag-adlaw nga kabuhi, kag kinaandan na nga ginapamatukan ang Cristianong paagi sang pagkabuhi. Dugang pa, samtang ang iban nga mga pagtilaw umalagi lamang, ang iban nagapadayon, kag nagabaskog pa gani. Walay sapayan sini, si apostol Pablo naglaygay: “Indi kita mag-untat sa paghimo sing maayo, kay sa nagakaigo nga panahon magaani kita kon indi kita mangampo.” (Galacia 6:9) Paano gid bala naton mahimo​—⁠kag padayon nga himuon​—⁠ang maayo bisan pa nagaatubang kita sing masakit nga mga pagtilaw kag mabudlay katama nga mga pagpamatok?

Bulig sa Paghimo sang Maayo

Ang pagkamangin “dungganon, halangdon, ekselente” maathag nga nagadalahig sang nasulod nga pagkatawo, isa ka kinaiya sang tagipusuon. Busa, ang paghupot sing maayo nga paggawi sa atubangan sang mga pagtilaw kag mga kabudlayan, indi isa ka gulpiada nga reaksion, kundi resulta sang adlaw-adlaw nga pagsunod kag pagtuman sang mga prinsipio sa Biblia sa tanan nga aspekto sang kabuhi. Ano ang pila ka butang nga makabulig sa aton sa sining bahin? Binagbinaga ang masunod.

Palambua ang panimuot sang hunahuna ni Cristo. Kinahanglan ang pagkamapainubuson agod mabatas ang daw indi makatarunganon nga butang. Ang tawo nga may mataas nga paghunahuna sa kaugalingon masami nga indi makabatas sa indi maayo nga pagtratar. Apang, si Jesus ‘nagpaubos kag nangin matinumanon tubtob sa kamatayon.’ (Filipos 2:​5, 8) Paagi sa pag-ilog sa iya, indi kita ‘malapyo ukon mangampo’ sa aton sagrado nga pag-alagad. (Hebreo 12:​2, 3) Himua ang mapainubuson nga pagkamatinumanon paagi sa pagkooperar sing kinabubut-on sa mga nagapanguna sa inyo kongregasyon. (Hebreo 13:17) Tun-i nga tamdon ang iban subong “labaw” sangsa imo, nga ginauna ang ila mga intereses sangsa imo kaugalingon nga mga intereses.​—⁠Filipos 2:​3, 4.

Dumduma nga ginahigugma ka ni Jehova. Dapat kumbinsido kita nga si Jehova “amo sia kag nga sia ang nangin manugpadya sadtong hanuot nga nagapangita sa iya.” (Hebreo 11:6) Nagakabalaka gid sia sa aton kag luyag niya nga matigayon naton ang kabuhi nga walay katapusan. (1 Timoteo 2:⁠4; 1 Pedro 5:7) Ang pagdumdom nga wala sing makapahamulag sang gugma sang Dios sa aton makabulig sa aton nga indi magpangampo sa idalom sang pagtilaw.​—⁠Roma 8:​38, 39.

Magsalig sing bug-os kay Jehova. Importante ang pagsalig kay Jehova, ilabi na kon ang mga pagtilaw daw wala sing katapusan ukon makatalagam sa aton kabuhi. Dapat magsalig gid kita nga si Jehova indi magtugot sang bisan ano nga pagtilaw  nga ‘labaw sa aton masarangan,’ nga pirme sia ‘magahatag sing lulutsan.’ (1 Corinto 10:13) Bisan gani ang katalagman nga mapatay sarang naton maatubang sing maisugon kon yara kay Jehova ang aton pagsalig.​​—⁠2 Corinto 1:​8, 9.

Magpadayon sa pangamuyo. Importante ang tinagipusuon nga pangamuyo. (Roma 12:12) Ang hanuot nga pangamuyo isa sa mga paagi nga magapasuod sa aton kay Jehova. (Santiago 4:8) Paagi sa personal nga eksperiensia, matun-an naton nga “bisan ano man nga butang ang pangayuon naton . . . , nagapamati sia sa aton.” (1 Juan 5:14) Kon tugutan ni Jehova nga magpadayon ang pagtilaw sa aton integridad, mangamuyo kita sa iya agod makabatas. (Lucas 22:41-​43) Ang pangamuyo nagapahanumdom sa aton nga wala gid kita nagaisahanon, bangod si Jehova dampig sa aton, pirme gid kita magamadinalag-on.​​—⁠Roma 8:​31, 37.

Maayong mga Buhat​—⁠‘Isa ka Rason sang Kadayawan kag Kadungganan’

Sa tion kag tion, ang tanan nga Cristiano ‘nagaantos sing sarisari nga mga pagtilaw.’ Apang “indi kita [dapat] mag-untat sa paghimo sing maayo.” Kon yara sa idalom sang kahuol, magkuha sing kusog gikan sa ihibalo nga ang imo katutom “masapwan [sa ulihi] nga sa kadayawan kag himaya kag kadungganan.” (1 Pedro 1:​6, 7) Himusli sing bug-os ang tanan nga espirituwal nga aman gikan kay Jehova agod pabakuron ka. Kon nagakinahanglan ka sing bulig, magpalapit sa mga manugbantay, mga manunudlo, kag mga manuglaygay sa Cristianong kongregasyon. (Binuhatan 20:28) Mangin regular sa pagtambong sa tanan nga miting sang kongregasyon, nga ‘nagapukaw sa aton sa gugma kag sa maayong mga buhat.’ (Hebreo 10:24) Ang isa ka programa sang adlaw-adlaw nga pagbasa sang Biblia kag personal nga pagtuon magabulig sa imo nga mangin alisto kag mabaskog sa espirituwal; subong man ang regular nga pagpakigbahin sa Cristianong ministeryo.​​—⁠Salmo 1:​1-3; Mateo 24:14.

Samtang dugang nga maeksperiensiahan mo ang gugma kag pag-atipan ni Jehova, labi nga magadugang ang imo handum nga mangin “makugi sa maayong mga buhat.” (Tito 2:14) Dumduma nga “sia nga nakabatas tubtob sa katapusan amo sia ang maluwas.” (Mateo 24:13) Huo, mangin determinado nga ‘indi mag-untat sa paghimo sing maayo’!

[Blurb sa pahina 29]

Dapat magsalig gid kita nga si Jehova indi magtugot sang bisan ano nga pagtilaw nga ‘labaw sa aton masarangan,’ nga pirme sia ‘magahatag sing lulutsan’

[Mga retrato sa pahina 30]

Ang pagkasako sa teokratikong mga hilikuton makabulig sa paghanda sa aton sa pag-atubang sa mga pagtilaw