Magdiretso sa kaundan

Magdiretso sa listahan sang kaundan

Bulig sa Macedonia

Bulig sa Macedonia

 Bulig sa Macedonia

“TABOK ka sa Macedonia kag tabangi kami.” (Binuhatan 16:9) Ginpakita sining mga pulong sang isa ka tawo sa palanan-awon ni apostol Pablo ang kinahanglanon nga ibantala ang maayong balita sang Ginharian sang Dios sa isa anay ka bag-o nga teritoryo, sa mga siudad karon sa Gresya.

Sa pungsod sang Macedonia karon, may yara lamang 1 ka Saksi ni Jehova sa kada 1,840 ka pumuluyo. Madamo nga tawo ang wala pa gid makabati tuhoy kay Jehova nga Dios. Huo, hilingagawon gid nga dapat mabatian sang mga tawo sa sining pungsod ang mensahe sang paghidait.​​—⁠⁠Mateo 24:14.

Ginbuksan sang Dios ang dalan agod mahatag ini nga kinahanglanon. Isa ka adlaw sang Nobiembre 2003, ang opisina sang mga Saksi ni Jehova sa Skopje, Macedonia, nakabaton sing wala ginapaabot nga tawag sa telepono. Naghalin ini sa Macedonian Center for International Cooperation, nga nagaagda sa mga Saksi nga magpatindog sing isa ka booth ukon puwesto agod ipaathag ang ila mga pagtuluuhan sa sulod sang tatlo ka adlaw nga eksibit sugod sa Nobiembre 20. Maayo gid ini nga higayon agod mabantalaan ang linibo ka tawo nga wala pa gid makabati sing maayong balita sang Ginharian!

Mapisan nga nagpangabudlay ang mga boluntaryo sa paghanda kag pagplastar sing isa ka displey sang nanuhaytuhay nga mga publikasyon sang mga Saksi ni Jehova sa Macedoniano nga lenguahe. Gindispley ang mga sampol sining mga literatura agod makakuha sing mga kopya ang mga bisita kon luyag nila. Naghatag ini sing kahigayunan sa madamo nga mga tawo nga makakuha sing libre kag makapaumpaw nga espirituwal nga tubig.​​—⁠⁠Bugna 22:17.

Naluyagan gid sang mga bisita ang mga publikasyon nga nagaapektar sang ila kabuhi, subong sang Questions Young People Ask​​—⁠⁠Answers That Work kag Ang Sekreto Sang Kalipay sa Pamilya. * Nobenta’y otso ka tawo ang naghatag sang ila mga direksion, nagapangabay nga duawon sila sang mga Saksi ni Jehova. Madamo ang nagkomento sing paborable tuhoy sa maayo nga hilikuton sang mga Saksi ni Jehova kag sa kalidad sang ila literatura.

Isa ka tawo ang nagpalapit sa puwesto nga ginadapit ang iya gamay nga bata nga lalaki. Namangkot ang amay kon may libro para sa mga bata. Ginpakita sa iya sang mga Saksi ang libro nga Ang Akon Libro Sang mga Sugilanon sa Biblia. * Gintan-aw niya ang mga  pahina sini kag makunyagon nga namangkot kon pila ang bili sini. Sang mahibaluan niya nga ang hilikuton sa pagpanudlo sang mga Saksi ni Jehova bug-os nga ginasakdag sang boluntaryo nga mga amot, labi pa nga nakunyag sia. (Mateo 10:8) Ginpakita niya ang libro sa iya bata nga lalaki kag nagsiling: “Kanami gid sini nga libro! Basahan ka ni Tatay sing isa ka sugilanon kada adlaw!”

Isa ka propesor sa pilosopiya ang nagpalapit sa puwesto. Interesado gid sia sa relihion sa kabilugan apang labi na sa mga pagtuluuhan sang mga Saksi ni Jehova. Samtang ginatan-aw niya ang mga pahina sang libro nga Mankind’s Search for God, * ang propesor nagsiling: “Lohiko gid nga ginpresentar ini nga materyal! Amo gid sini ang ginahunahuna ko nga nagakadapat.” Sang ulihi, ang pila ka estudyante gikan sa eskwelahan nga iya ginatudluan nagkadto man sa puwesto kag nangabay kon puede sila makatigayon sing libro nga nakuha sang ila propesor. Luyag nila tun-an ang pareho nga libro. Nagpati sila nga gamiton niya ang libro sa pagtudlo sa ila.

Ang eksibit naghatag sa pila ka tawo sing kahigayunan nga mabasa kag mabatian ang Makasulatanhon nga mga kamatuoran sa una nga tion. Isa ka grupo sang bungol nga mga pamatan-on ang nagtulutan-aw kon may maluyagan sila. Malip-ot nga ginpaathagan sila sang isa sa mga Saksi, sa bulig sang isa ka babayi nga nagpatpat sini paagi sa pagsinyas. Paagi sa mga ilustrasyon gikan sa libro nga Ang Pinakabantog nga Tawo nga Nagkabuhi,⁠ * ginpaathag niya nga gin-ayo ni Jesus ang mga may balatian, lakip ang mga bungol. Nalipay sila nga mahibaluan ang saad sang Biblia nga himuon man ini ni Jesus sa dili madugay sa mga tawo nga nagakabuhi sa duta karon. Ang pila sa ila malipayon nga nagbaton sing pasad sa Biblia nga literatura, kag ginhimo ang kahimusan nga maduaw sila sang isa ka Saksi nga makahibalo magsinyas.

Luwas sa Macedoniano nga lenguahe, matigayon man ang mga literatura sa Albaniano, Ingles, kag Turko. Isa ka lalaki nga indi makahambal sing Macedoniano ang nangabay sing pila ka literatura sa Ingles. Pagkatapos mabaton ang mga gua sang magasin nga Ang Lalantawan kag Magmata!, ginsambit niya nga makahambal sia sing Turko. Sang ginpakita sa iya ang literatura sa iya lenguahe, nakibot gid sia! Nakita niya nga luyag gid buligan sang mga Saksi ni Jehova ang tanan.

Isa gid ka maayo nga panaksi ang nahatag sadto nga okasyon, kag makapalig-on gid nga makita ang madamo nga mga tawo nga nagapakita sing interes sa kamatuoran sa Biblia! Huo, ginbuksan ni Jehova ang dalan agod mapalapnag pa gid ang maayong balita sang Ginharian sa Macedonia.

[Nota]

^ par. 6 Tanan ginbalhag sang mga Saksi ni Jehova.

^ par. 7 Tanan ginbalhag sang mga Saksi ni Jehova.

^ par. 8 Tanan ginbalhag sang mga Saksi ni Jehova.

^ par. 9 Tanan ginbalhag sang mga Saksi ni Jehova.

[Kahon/Mga retrato sa pahina 9]

TALALUPANGDON GID NGA PAG-USWAG!

Ang daku gid nga mga panikasog nga mabantala ang maayong balita sang Ginharian sang Dios nagsugod sang Mayo 17, 2003. Gindedikar sa Skopje ang isa ka bag-o nga opisina sang mga Saksi ni Jehova. Nahuman ang tinukod sa sulod sang duha ka tuig, nga nagpasangkad pa sang pasilidad sing mga apat ka beses.

Ang tatlo ka bilding may lugar nga gamiton subong mga opisina sang administrasyon kag pagbadbad kag subong man may mga tululugan, isa ka kusina, kag hulot-lalabhan. Si Guy Pierce, katapo sang Nagadumala nga Hubon sang mga Saksi ni Jehova, amo ang naghatag sang pamulongpulong para sa dedikasyon. Ang mga bisita gikan sa napulo ka pungsod nagtambong man sa programa sang dedikasyon. Ang tanan nakunyag kag nalipay gid nga makita ang bag-o, matahom nga mga bilding.

[Mapa sa pahina 8, 9]

(Para sa akktual nga pormat, tan-awa ang publikasyon)

BULGARIA

MACEDONIA

Skopje

ALBANIA

GRESYA

[Retrato sa pahina 8]

Skopje, Macedonia