Magdiretso sa kaundan

Magdiretso sa listahan sang kaundan

Ginhiusa sang Gugma sa Dios

Ginhiusa sang Gugma sa Dios

 Ginhiusa sang Gugma sa Dios

SANG natukod ang Cristianong kongregasyon sang nahauna nga siglo sang aton Kumon nga Dag-on, ang isa sang talalupangdon nga mga kinaiya sini​—⁠walay sapayan sang pagkananuhaytuhay sang mga miembro sini​—⁠amo ang paghiusa sini. Ang mga sumilimba sang matuod nga Dios naghalin sa mga pungsod sa Asia, Europa, kag Aprika. Nanuhaytuhay ang ila ginhalinan​—⁠mga saserdote, soldado, ulipon, nagdalangop, manugbaligya, propesyonal, kag mga negosyante. Ang pila mga Judiyo, kag ang iban, mga Gentil. Madamo anay sa ila ang mga makihilahion, homoseksuwal, palahubog, kawatan, ukon manugkilkil. Apang, sang nangin Cristiano sila, ginbiyaan nila ang ila malain nga mga buhat kag nahiusa gid sa pagtuo.

Ngaa napahiusa sang unang-siglo nga Cristianismo ining mga tawo? Ngaa natigayon nila ang paghidait sa isa kag isa kag sa mga tawo sa kabilugan? Ngaa wala sila nag-entra sa mga rebelyon kag mga sinuay? Ngaa ang una nga mga Cristiano tuhay gid sa dalagku nga mga relihion karon?

Ano ang Nagpahiusa sa mga Miembro sang Kongregasyon?

Ang panguna nga kabangdanan sang paghiusa sang mga masigkatumuluo sang unang siglo amo ang gugma sa Dios. Ginakilala sang mga Cristiano sadto ang ila panguna nga obligasyon nga higugmaon ang matuod nga Dios nga si Jehova sing bug-os tagipusuon, kalag, kag hunahuna. Halimbawa, ginsugo si apostol Pedro, nga isa  ka Judiyo, nga duawon ang isa ka Gentil, isa nga indi niya kinaandan nga ginapalapitan. Ang panguna nga nagpahulag sa iya sa pagtuman amo ang gugma kay Jehova. Si Pedro kag ang iban pa nga Cristiano sadto nakaagom sing suod nga kaangtanan sa Dios nga pasad sa sibu nga ihibalo sa Iya personalidad, mga luyag, kag mga di-naluyagan. Sang ulihi, nahangpan sang tanan nga sumilimba nga kabubut-on ni Jehova nga “maghiusa [sila] sa isa ka painuino kag isa ka panghunahuna.”​—⁠1 Corinto 1:10; Mateo 22:37; Binuhatan 10:1-35.

Ang mga tumuluo nahiusa pa gid bangod sang ila pagtuo kay Jesucristo. Luyag gid nila sia ilugon. Ginsugo niya sila: “Higugmaon ninyo ang isa kag isa; subong nga ako naghigugma sa inyo . . . Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:​34, 35) Indi ini dapat mangin isa ka umalagi nga balatyagon, kundi isa ka masinakripisyuhon nga gugma. Ano ang mangin resulta? Nagpangamuyo si Jesus para sa mga nagatuo sa iya: “Nagapangabay ako . . . agod nga sila tanan mangin isa, subong nga ikaw, Amay, nahiusa sa akon kag nagahiusa ako sa imo, agod sila man mahiusa sa aton.”​—⁠Juan 17:​20, 21; 1 Pedro 2:21.

Ginbubo ni Jehova ang iya balaan nga espiritu, ukon aktibo nga puersa, sa iya matuod nga mga alagad. Ginasakdag sining espiritu ang paghiusa sa tunga nila. Ginbuligan sila sini nga mahangpan ang mga panudlo sang Biblia nga ginbaton sang tanan nga kongregasyon. Ang mga sumilimba ni Jehova nagabantala sing amo man nga mensahe​—⁠ang pagpakabalaan sang ngalan ni Jehova paagi sa Mesianikong Ginharian sang Dios, isa ka langitnon nga panguluhan nga magagahom sa bug-os nga katawhan. Nahangpan sang una nga mga Cristiano ang ila obligasyon nga mangin “indi bahin sining kalibutan.” Amo nga kon may pag-alsa sibil ukon inaway militar, ang mga Cristiano nagapabilin nga neutral. Nagapakighidait sila sa tanan.​​—⁠Juan 14:26; 18:36; Mateo 6:​9, 10; Binuhatan 2:​1-4; Roma 12:17-​21.

Ginabaton sang tanan nga tumuluo ang salabton nga sakdagon ang paghiusa. Paano? Paagi sa pagpat-od nga ang ila paggawi nahisanto sa Biblia. Busa, si apostol Pablo nagsulat sa mga Cristiano: “Ubahon ninyo ang daan nga personalidad nga nahisuno sa inyo una nga dalanon sang paggawi,” kag “magsuklob sing bag-o nga personalidad.”​—⁠Efeso 4:22-32.

Nagapadayon nga Paghiusa

Sa pagkamatuod, ang mga tumuluo sang unang siglo di-himpit, kag may nag-utwas anay nga mga kahimtangan nga nagtilaw sang ila paghiusa. Halimbawa, ginasaysay sang Binuhatan 6:1-6 ang di-paghangpanay sa ulot sang Judiyo nga mga Cristiano nga nagahambal sing Griego kag yadtong nagahambal sing Hebreo. Ang mga nagahambal sing Griego nagbatyag nga ginaihig-ihig sila. Apang, sang nakalab-ot sa mga apostoles ining problema, naatipan nila ini sing madasig kag sing makatarunganon. Sang ulihi, ang hulusayon tuhoy sa doktrina nagdul-ong sa kontrobersiya tuhoy sa mga salabton sang mga di-Judiyo sa Cristianong kongregasyon. Nahimo ang desisyon pasad sa mga prinsipio sang Biblia, kag ining desisyon ginbaton sang tanan sa mga kongregasyon.​—⁠Binuhatan 15:1-29.

Ginapakita sining mga halimbawa nga ang di-paghangpanay wala nagdul-ong sa etniko nga pagbinahinbahin ukon sa di-paghiusa nga resulta sang estrikto nga pagpatuman sang mga pagtamod sa doktrina sang unang-siglo nga Cristianong kongregasyon. Ngaa? Bangod ang mga kabangdanan sang paghiusa​—⁠ang gugma kay Jehova, ang pagtuo kay Jesucristo, ang masinakripisyuhon nga gugma sa isa kag isa, ang pagbaton sa panuytoy sang balaan nga espiritu, ang  pareho nga paghangop sa mga panudlo sang Biblia, kag ang kahanda sa pagbag-o sang paggawi sang isa​—⁠mabaskog gid nga mga puersa agod mahuptan ang paghiusa kag paghidait sa kongregasyon sadto.

Nahiusa sa Pagsimba sa Moderno nga Tion

Sarang man bala matigayon ang kaanggid nga paghiusa karon? Ining mga butang makapahiusa bala gihapon sa mga miembro sang isa ka pagtuluuhan kag makapakighidait sa tanan nga rasa sa tanan nga bahin sang kalibutan? Huo! Ang mga Saksi ni Jehova nahiusa sa bug-os kalibutan nga paghiliutod nga naglapnag sa kapin sa 230 ka kadutaan, mga isla, kag mga teritoryo. Kag nahiusa sila sa amo man nga mga butang nga nagpahiusa sa mga Cristiano sang unang siglo.

Ang panguna gid nga kabangdanan sang paghiusa sang mga Saksi ni Jehova amo ang ila debosyon kay Jehova nga Dios. Buot silingon sini nga magaunong sila sa iya sa bisan ano nga kahimtangan. Ang mga Saksi ni Jehova nagapakita man sing pagtuo kay Jesucristo kag sa iya mga panudlo. Ining mga Cristiano nagapakita sing masinakripisyuhon nga gugma sa ila mga masigkatumuluo kag nagabantala sing amo man nga maayong balita sang Ginharian sang Dios sa tanan nga kadutaan nga ila ginabantalaan. Nalipay sila sa pagpakigsugilanon sining Ginharian sa mga tawo sang tanan nga pagtuluuhan, rasa, nasyonalidad, kag katilingban. Neutral man ang mga Saksi ni Jehova sa mga hilikuton sang kalibutan, sa amo nagabulig ini sa ila sa pag-atubang sa politikal, kultural, sosyal, kag komersial nga mga pag-ipit nga nagabahinbahin gid sa katawhan. Ginbaton sang tanan nga Saksi ang ila obligasyon nga sakdagon ang paghiusa paagi sa ila paggawi nahisuno sa mga talaksan sang Biblia.

Ang Paghiusa Nagaganyat sa Iban

Ini nga paghiusa masami nagganyat sang interes sang mga indi Saksi. Halimbawa, si Ilse, * isa anay ka Katoliko nga madre sa isa ka kombento sa Alemanya. Ano ang nagganyat sa iya sa mga Saksi ni Jehova? Si Ilse nagsiling: “Sila ang pinakamaayo nga mga tawo nga akon nakilala. Wala sila nagaentra sa inaway; wala sila nagahimo sing bisan ano nga makahalit sa iban. Luyag nila buligan ang mga tawo nga magkabuhi sing malipayon sa paraiso sa duta sa idalom sang Ginharian sang Dios.”

Ang isa pa ka halimbawa amo si Günther, nga isa anay ka Aleman nga soldado nga ginpadala sa Pransia sang ikaduha nga bug-os kalibutan nga inaway. Isa ka adlaw naghiwat ang isa ka Protestante nga pari sing isa ka relihioso nga serbisyo para sa mga soldado sa yunit ni Günther. Ang pari nangamuyo sa Dios para sa pagpakamaayo, proteksion, kag kadalag-an. Pagkatapos sang serbisyo, si Günther gintangdo subong bantay. Paagi sa iya teleskopyo, nakita niya nga ang tropa sang kaaway sa pihak nga bahin nagatambong man sa relihioso nga serbisyo nga ginadumalahan sang isa ka pari. Si Günther nagsiling sang ulihi: “Mahimo nga ang pari nangamuyo man para sa pagpakamaayo, proteksion, kag kadalag-an. Nagpalibog ako kon paano ang Cristianong mga simbahan nagasuporta sa magkontrahanay nga mga grupo sa isa ka inaway.” Indi gid ini malipatan ni Günther. Sang nasugilanon sia sang ulihi sang mga Saksi ni Jehova, nga wala nagapakigbahin sa inaway, si Günther nangin bahin sang ila bug-os kalibutan nga paghiliutod.

Si Ashok kag si Feema mga miembro anay sang isa ka relihion sa Sidlangan. May altar sila sang isa ka dios sa ila balay. Sang gindapuan sang malubha nga balatian ang ila pamilya, gin-usisa nila liwat ang ila relihion. Sa ila pagpakigsugilanon sa mga Saksi ni Jehova, nagdayaw si Ashok kag si Feema sa mga panudlo sang Biblia kag sang gugma nga nagaluntad sa tunga sang mga Saksi. Sila karon makugi na nga mga manugbantala sang maayong balita sang Ginharian ni Jehova.

Sanday Ilse, Günther, Ashok, kag Feema nahiusa karon sa minilyon ka Saksi ni Jehova sa bug-os kalibutan nga paghiliutod. Nagapati sila sa saad sang Biblia nga ang mga butang nga nagapahiusa sa ila karon sa pagsimba magapahiusa man sa tanan nga matinumanon nga katawhan sa dili madugay. Nian, wala na sing magaluntad pa nga pagpamatay, kagamo, kag pagbinahinbahin sa ngalan sang relihion. Ang bug-os nga kalibutan mahiusa sa pagsimba sa matuod nga Dios, si Jehova.​—⁠Bugna 21:​4, 5.

[Nota]

^ par. 16 Gin-islan ang iban nga mga ngalan nga gingamit sa sining artikulo.

[Mga retrato sa pahina 4, 5]

Walay sapayan nga nanuhaytuhay ang ila ginhalinan, nahiusa ang mga Cristiano sang una