Magdiretso sa kaundan

Magdiretso sa listahan sang kaundan

Luyag Mo Bala Mabuhi sing Walay Katapusan?

Luyag Mo Bala Mabuhi sing Walay Katapusan?

 Luyag Mo Bala Mabuhi sing Walay Katapusan?

“WALA ako nahadlok mapatay,” siling sang isa ka tigulang nga babayi sa Japan. “Apang nagakalisod ako nga biyaan ining mga bulak sa ulihi.” Nahangpan sang Cristianong ministro nga nagduaw sa iya puluy-an kon ngaa nasiling niya ini, bangod ang babayi may matahom nga hardin. Madamo sa nagasiling nga wala sila nahadlok mapatay ang nagaapresyar gid sa dalayawon nga mga tinuga kag sa pagkamatuod mahimo nagahandum nga mabuhi sing walay katapusan.

Mabuhi sing walay katapusan? Madamo ang wala nagapati sa sini. Ang iban nagasiling pa gani nga indi sila interesado nga mabuhi sing walay katapusan. Ngaa amo sini ang ginasiling sang iban?

 Kabuhi nga Walay Katapusan​—⁠Makatalaka?

Ang iban nagahunahuna nga makatalaka ang magkabuhi sing walay katapusan. Mahimo ang ginahunahuna nila amo ang makatalaka nga kabuhi sang madamo nga nagretiro nga tawo nga ang ginahimo amo ang magtan-aw na lang sang telebisyon. Kon amo sina ang ginahunahuna mo, binagbinaga ang ginsiling sang astronomo nga si Robert Jastrow sang ginpamangkot sia kon bala ang kabuhi nga walay katapusan isa ka pagpakamaayo ukon sumpa. Si Jastrow nagsabat: “Mangin pagpakamaayo ini sa mga may mausisaon nga hunahuna kag sa mga mahiligon sa pagtuon. Ang paghunahuna nga may yara sila wala katapusan nga tion agod magtigayon sing ihibalo makalilipay gid para sa ila. Apang para sa mga nagahunahuna nga natun-an na nila ang tanan nga dapat tun-an kag sirado ang mga hunahuna, isa ini ka makakulugmat nga sumpa. Indi sila makahibalo kon paano gamiton ang ila tion.”

Ang imo panimuot amo gid ang magapat-od kon bala ang kabuhi nga walay katapusan mangin makatalaka ukon indi. Kon may yara ikaw ‘mausisaon nga hunahuna kag mahiligon ka sa pagtuon,’ hunahunaa lamang ang imo mahimo sa patag sang taliambong, musika, arkitektura, pagpanghardin, ukon sa bisan ano nga mapuslanon nga butang nga naluyagan mo. Ang kabuhi nga dayon sa duta isa ka makalilipay nga paglaum agod mapalambo mo ang imo ikasarang sa nanuhaytuhay nga patag.

Ang ikasarang nga makapakita kag makabatyag sing gugma sing walay katapusan makahimo gid sa kabuhi nga dayon nga makalilipay. Gintuga kita nga may kapasidad sa pagpakita sing gugma, kag malipayon kita kon mabatyagan naton nga ginahigugma kita. Ang matuod nga paghigugmaanay nagadala sing tudok nga kaayawan nga wala nagaugdaw sa pagligad sing tion. Ang pagkabuhi sing dayon makahatag sing walay katapusan nga kahigayunan sa pagpalambo sang gugma indi lamang sa isigkatawo kundi ilabi na sa Dios. “Kon ginahigugma sang bisan sin-o ang Dios,” siling ni apostol Pablo, “ginakilala niya ining isa.” (1 Corinto 8:3) Daw ano ka dalayawon nga paglaum​—⁠nga ang Soberano sang bug-os nga uniberso makilala naton kag makilala niya kita! Dugang pa, wala sing untat ang pagtuon tuhoy sa aton mahigugmaon nga Manunuga. Paano, nian, mangin makatalaka kag makasulubo ang kabuhi nga walay katapusan?

Ang Kabuhi​​—⁠Malip-ot kag Bilidhon

Ang iban nagahunahuna nga ang kabuhi nangin bilidhon lamang bangod sa kalip-ot sini. Ang kabuhi kuno daw kaangay sang bulawan, nga diutay lamang. Siling nila, nga kon ang bulawan masapwan bisan diin lang, mangin barato ini. Apang bisan amo pa sina ang matabo, ang bulawan mangin matahom gihapon. Pat-od nga amo man ang kabuhi.

 Mahimo naton mapaanggid ang pag-agom sang kabuhi nga dayon sa pagtigayon sing madamo nga hangin. Ang hangin mahimo kabigon sang mga marinero sa isa ka naaberiya nga submarino subong isa ka bilidhon gid nga butang. Pagkatapos sila masalbar, sa banta mo indi na bala nila maapresyar ang hangin bangod madamo na ang nahaklo nila? Sigurado nga indi gid!

Kaangay sinang mga marinero, sarang kita masalbar kag mabuhi sing walay katapusan. “Kay ang bayad nga ginabayad sa sala amo ang kamatayon,” sulat ni apostol Pablo, “apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.” (Roma 6:23) Paagi sa halad gawad ni Jesus, dulaon sang Dios ang pagkadihimpit kag kamatayon kag hatagan ang matinumanon nga katawhan sing dulot nga kabuhi nga walay katapusan. Dapat gid kita magpasalamat sa sining mahigugmaon nga kahimusan!

Kamusta Naman ang Imo mga Hinigugma?

Mahimo maghunahuna ang iban: ‘Kamusta naman ang akon mga hinigugma? Wala na sing pulos ang dayon nga kabuhi sa duta kon wala sila.’ Ayhan nakakuha ka na sing ihibalo sa Biblia kag natun-an mo nga may posibilidad nga maagom ang kabuhi nga walay katapusan sa paraiso nga duta. (Lucas 23:43; Juan 3:​16; 17:3) Natural lamang nga luyag mo nga ato man didto ang imo pamilya, iban pa nga hinigugma, kag pinalangga nga mga abyan, nga ginaagom ang amo man nga kalipay nga ginalauman mo nga matigayon sa ginsaad sang Dios nga bag-ong kalibutan sang pagkamatarong.​​—⁠2 Pedro 3:⁠13.

Apang ano abi kon ang imo mga abyan kag mga hinigugma wala sing interes nga mabuhi sing walay katapusan sa isa ka paraiso nga duta? Indi ini pagtuguti nga magpaluya sang imo buot. Magpadayon sa pagkuha sing sibu nga ihibalo sa Kasulatan, kag iaplikar ini. Si apostol Pablo nagsulat: “Sigurado ka gid bala, Cristianong asawa, nga indi mo maluwas ang imo bana? Ukon sigurado ka gid bala, Cristianong bana, nga indi mo maluwas ang imo asawa?” (1 Corinto 7:​16, Today’s English Version) Ang mga tawo mahimo magbag-o. Halimbawa, ang isa ka tawo nga nagpamatok anay sa Cristianismo nagbag-o sang ulihi kag nangin gulang sa Cristianong kongregasyon. Nagsiling sia: “Nagapasalamat gid ako nga ang akon pinalangga nga pamilya mainunungon nga nagsunod sa mga prinsipio sang Biblia walay sapayan sang tanan ko nga pagpamatok.”

Nabalaka gid ang Dios sa imo kabuhi kag sa kabuhi sang imo mga hinigugma. Sa pagkamatuod, “Indi luyag [ni Jehova] nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:9) Gusto ni Jehova nga Dios nga ikaw kag ang imo mga hinigugma mabuhi sing walay katapusan. Mas labaw ang Iya gugma sangsa di-himpit nga mga tawo. (Isaias 49:15) Ti, ngaa indi ka magpalambo sing maayo nga kaangtanan sa Dios? Nian mabuligan mo ang imo mga hinigugma nga maghimo sing amo man. Bisan pa wala sila nagapati sa kabuhi nga walay katapusan karon, ang ila panimuot mahimo magbag-o kon makita nila nga ginaaplikar mo ang sibu nga ihibalo sang Biblia.

Kamusta naman ang imo patay na nga mga pinalangga? Para sa minilyon nga nagkalamatay, ang Biblia nagasaad sing dalayawon nga paglaum sang pagkabanhaw​—⁠pagbugtaw gikan sa kamatayon kag pagkabuhi sa Paraiso sa duta. Si Jesucristo nagsaad: “Ang oras magaabot nga ang tanan nga yara sa handumanan nga mga lulubngan . . . magagua.” (Juan 5:​28, 29) Bisan ang mga napatay nga wala nakakilala sa Dios pagabanhawon man, kay ang Biblia nagasiling: “May pagkabanhaw sang mga matarong kag mga dimatarong.” (Binuhatan 24:15) Makalilipay gid nga abiabihon sila sa pagkabanhaw!

Dayon nga Kabuhi​—⁠Isa ka Makalilipay nga Palaabuton

Kon karon pa lang nakasapo ka na sing kalipay kag pagkakontento walay sapayan sang tanan nga kabudlayan sa sining kalibutan, pat-od gid nga magmalipayon ka sa dayon nga kabuhi sa isa ka paraiso nga duta. Walay sapayan sang ginsugid sang isa ka Saksi ni Jehova ang mga pagpakamaayo nga matigayon sa pagkabuhi sing walay katapusan, ang isa ka babayi nagsiling: “Indi ko luyag mabuhi sing walay katapusan. Kontento na ako sa kabuhi nga 70 ukon 80 anyos.” Ang isa ka Cristianong gulang nga natabuan nga ato didto namangkot sa iya: “Napamensar mo na bala kon  ano ang batyagon sang imo kabataan kon mapatay ka?” Nagtululagay ang luha niya sang mahunahuna niya kon daw ano ayhan nga kasubo ang ila mabatyagan kon madulaan sila sing iloy. “Sa nahauna nga tion, narealisar ko nga nangin makagod gali ako,” ako niya, “kag nakita ko nga ang kabuhi nga walay katapusan indi gali isa ka makagod nga paglaum kundi nagadalahig ini sang pagkabuhi para sa iban.”

Ang iban nagabatyag nga wala sing nagakabalaka kon mabuhi man sila ukon mapatay. Apang, nabalaka ang aton Manughatag-Kabuhi sa aton, nga nagsiling: “Sa nagakabuhi ako, . . . nahamuot ako, indi sa kamatayon sang malauton, kundi sa pagbiya sang malauton gikan sa iya dalanon agod padayon sia nga mabuhi.” (Ezequiel 33:11) Kon nabalaka gid ang Dios bisan sa kabuhi sang mga malauton, pat-od nga mas nagaulikid pa gid sia sa mga nagahigugma sa iya.

Si Hari David sang dumaan nga Israel nagsalig gid sa mahigugmaon nga pag-ulikid ni Jehova. Si David isa ka bes nagsiling: “Kon magbiya sa akon ang akon amay kag akon iloy, nian si Jehova magasapopo sa akon.” (Salmo 27:10) Mahimo nga nagasalig gid si David sa gugma sang iya mga ginikanan sa iya. Apang bisan pa ang iya mga ginikanan​—⁠ang pinakasuod nga mga tawo sa iya​—⁠magabiya sa iya, nahibaluan niya nga indi gid sia pagpatumbayaan sang Dios. Bangod sang iya gugma kag kabalaka, si Jehova nagatanyag sa aton sing kabuhi nga dayon kag walay katapusan nga pagpakig-abyan sa iya. (Santiago 2:23) Indi pa bala naton pagbatunon ining hamili katama nga mga regalo?

[Retrato sa pahina 7]

Ang gugma sa Dios kag sa isigkatawo amo ang magahimo sa kabuhi nga walay katapusan nga mangin malipayon