Magdiretso sa kaundan

Magdiretso sa listahan sang kaundan

Ang Paghukom ni Jehova Magaabot Batok sa Malauton

Ang Paghukom ni Jehova Magaabot Batok sa Malauton

 Ang Paghukom ni Jehova Magaabot Batok sa Malauton

“Maghanda ka sa pag-atubang sa imo Dios.”​​—⁠AMOS 4:⁠12.

1, 2. Ngaa makasalig kita nga dulaon sang Dios ang kalautan?

DULAON gid bala ni Jehova ang kalautan kag pag-antos sa sining duta? Sa pamuno sang ika-21 nga siglo, ini nga pamangkot nagakaigo gid. Daw subong bala nga bisan diin man kita magtan-aw, makita naton ang ebidensia sang kapintas sang tawo sa iya isigkatawo. Ginahandum gid naton ang isa ka kalibutan nga wala sing kasingki, terorismo, kag kagarukan!

2 Maayo na lang, makasalig gid kita nga dulaon ni Jehova ang kalautan. Ang mga kinaiya sang Dios nagapasalig sa aton nga magapanghikot sia batok sa mga malauton. Si Jehova matarong kag makatarunganon. Sa Salmo 33:​5, ang iya Pulong nagasugid sa aton: “Sia mahigugmaon sa pagkamatarong kag katarungan.” Ang isa pa ka salmo nagasiling: “Ang bisan sin-o nga nagahigugma sang kasingki pat-od nga dumtan sang Iya [ni Jehova] kalag.” (Salmo 11:5) Pat-od gid nga indi pagpabay-an tubtob san-o ni Jehova, ang labing gamhanan nga Dios nga nagahigugma sang matarong kag katarungan, kon ano ang iya ginadumtan.

3. Ano ang ipadaku sa dugang nga pagbinagbinag sa tagna ni Amos?

3 Binagbinaga ang isa pa ka rason kon ngaa makapat-od kita nga dulaon ni Jehova ang kalautan. Ang rekord tuhoy sa iya mga pagpakig-angot sang una nagagarantiya sini. Ang tumalagsahon nga mga halimbawa sang wala nagabag-o nga pagpakig-angot ni Jehova sa mga malauton masapwan sa tulun-an sang Biblia nga Amos. Ang dugang nga pagbinagbinag sa tagna ni Amos magapadaku sang tatlo ka butang tuhoy sa paghukom sang Dios. Una, pirme ini nagakabagay. Ikaduha, indi ini malikawan. Kag ikatlo, mapilion ini, kay si Jehova nagahukom sa mga malauton apang nagakaluoy sa mga mahinulsulon kag matarong.​​—⁠Roma 9:​17-​26.

Ang Paghukom sang Dios Pirme Nagakabagay

4. Diin ginpadala ni Jehova si Amos, kag sa ano nga katuyuan?

4 Sang panahon ni Amos, ang mga Israelinhon natunga na sa duha ka ginharian. Ang isa amo ang nabagatnan nga duha-ka-tribo nga ginharian sang Juda. Ang isa pa amo ang naaminhan nga napulo-ka-tribo nga ginharian sang Israel. Ginsugo ni Jehova si Amos nga mangin manalagna, kag gikan sa iya banwa nga natawhan sa Juda ginpadala sia sa Israel. Gingamit didto sang Dios si Amos sa pagpahayag sang Iya paghukom.

5. Batok sa anong mga pungsod una nga nagtagna si Amos, kag ano ang isa ka rason kon ngaa nagakabagay sila hukman sang Dios?

5 Wala ginsugdan ni Amos ang iya hilikuton paagi sa pagpahayag sang paghukom ni Jehova batok sa batinggilan nga naaminhan  nga ginharian sang Israel. Sa baylo, nagsugod sia paagi sa pagbantala sang paghukom sang Dios batok sa anom ka kaingod nga mga pungsod. Ini nga mga pungsod amo ang Siria, Filistia, Tiro, Edom, Amon, kag Moab. Apang nagakabagay gid bala sila hukman sang Dios? Sa pagkamatuod gid. Ang isa ka rason amo nga mga kaaway gid sila sang katawhan ni Jehova.

6. Ngaa laglagon sang Dios ang Siria, Filistia, kag Tiro?

6 Halimbawa, ginpakamalaut ni Jehova ang mga Sirianhon bangod “ginligis nila ang Gilead.” (Amos 1:3) Ang mga Sirianhon nang-agaw sing teritoryo sa Gilead​​—⁠isa ka duog sa Israel sa sidlangan sang Suba Jordan​​—⁠kag nanghalit sing grabe sa katawhan sang Dios didto. Kamusta naman ang Filistia kag Tiro? Ang sala sang mga Filistinhon amo nga gindala nila ang mga Israelinhon nga mga tinapok, ukon mga bihag, kag ginbaligya sila sa mga Edominhon, kag ang iban naman nga mga Israelinhon nahulog sa kamot sang mga manugpatikang sang ulipon. (Amos 1:​6, 9) Hunahunaa lamang​​—⁠ang katawhan sang Dios ginbaligya subong ulipon! Indi katingalahan nga laglagon ni Jehova ang Siria, Filistia, kag Tiro.

7. Sa ano magkaanggid ang Edom, Amon, kag Moab sa Israel, kag paano nila gintratar ang mga Israelinhon?

7 Ang Edom, Amon, kag Moab may butang nga magkaanggid sa Israel kag sa isa kag isa. Ang tatlo ka pungsod himata sang Israel. Ang mga Edominhon kaliwat ni Abraham paagi sa kapid ni Jacob nga si Esau. Busa, mga utod sila sang Israel. Ang mga Amonhon kag mga Moabnon mga kaliwat sang hinablos ni Abraham nga si Lot. Apang ginkabig bala sang Edom, Amon, kag Moab ang ila himata nga mga Israelinhon subong mga utod? Wala gid! Wala kaluoy nga gingamitan sing espada sang Edom ang “iya kaugalingon nga utod,” kag ginpintasan sang mga Amonhon ang ila Israelinhon nga mga bihag. (Amos 1:​11, 13) Bisan pa wala ginsambit sing direkta ni Amos ang di-maayo nga pagtratar sang Moab sa katawhan sang Dios, ang mga Moabnon may malawig nga maragtas sang pagpakig-away sa Israel. Ang silot sa sining tatlo ka himata nga mga pungsod mabug-at gid. Laglagon sila sing masingki ni Jehova.

Ang Paghukom sang Dios Indi Malikawan

8. Ngaa ang mga paghukom sang Dios batok sa anom ka pungsod nga malapit sa Israel indi malikawan?

8 Maathag gid nga ang anom ka pungsod nga ginsambit sa una nga bahin sang tagna ni Amos nagakabagay hukman sang Dios. Dugang pa, indi gid nila ini malikawan. Sa Amos kapitulo 1, bersikulo 3, tubtob kapitulo 2, bersikulo 1, si Jehova anom ka beses nga nagsiling: “Indi ko ini pagpaisulon.” Nahisanto gid sa iya pulong, ginhukman niya ini nga mga pungsod. Ginapakita sang maragtas nga ini nga mga pungsod nalaglag sang ulihi. Ti, sa di-magkubos apat sa ila​​—⁠Filistia, Moab, Amon, kag Edom​​—⁠sang ulihi ang wala na nagaluntad!

9. Ano ang nagakabagay sa mga pumuluyo sang Juda, kag ngaa?

 9 Masunod nga ginsentro sang tagna ni Amos ang igtalupangod sa ikapito nga pungsod​​—⁠ang iya tumandok nga teritoryo, ang Juda. Ang iya mga manugpalamati sa naaminhan nga ginharian sang Israel mahimo nga nakibot sang mabatian nila si Amos nga nagapahayag sing paghukom batok sa ginharian sang Juda. Ngaa nagakabagay hukman ang mga pumuluyo sang Juda? “Bangod ginsikway nila ang kasuguan ni Jehova,” siling sang Amos 2:4. Wala ginbalewala ni Jehova ining hungod nga paglapas sa Iya kasuguan. Suno sa Amos 2:​5, sia nagtagna: “Magapadala ako sing kalayo sa Juda, kag lamunon sini ang mga puluy-an nga torre sang Jerusalem.”

10. Ngaa indi malikawan sang Juda ang kailo?

10 Indi malikawan sang di-matutom nga Juda ang nagapakari nga kailo. Sa ikapito nga tion, si Jehova nagsiling: “Indi ko ini pagpaisulon.” (Amos 2:4) Nabaton sang Juda ang gintagna nga silot sang ginhapay ini sang mga Babilonianhon sang 607 B.⁠C.⁠E. Sa liwat nakita naton nga indi malikawan sang mga malauton ang paghukom sang Dios.

11-13. Batok sa anong pungsod ilabi na nga nagtagna si Amos, kag ano nga mga sahi sang pagpamigos ang ginhimo didto?

11 Bag-o lang ginpahayag ni manalagna Amos ang paghukom ni Jehova sa pito ka pungsod. Apang, nagsayop ang bisan sin-o nga nagahunahuna nga natapos na ni Amos ang iya pagpanagna. Madamo pa sing dapat ipahayag si Amos! Ginsugo sia ilabi na nga ipahayag ang matigdas nga mensahe sang paghukom batok sa naaminhan nga ginharian sang Israel. Kag ang Israel nagakabagay hukman sang Dios bangod sang malain gid nga kahimtangan sini sa moral kag espirituwal.

12 Ginbuyagyag sang pagpanagna ni Amos ang pagpamigos nga nangin kinaandan na sa ginharian sang Israel. May kaangtanan sini, ang Amos 2:​6, 7 nagasiling: “Amo ini ang ginasiling ni Jehova, ‘Bangod sa tatlo ka pagribok sang Israel, kag bangod sa apat, indi ko ini pagpaisulon, bangod ginbaligya nila ang matarong tungod lamang sa pilak, kag ang imol tungod sa bili sang isa ka pares sang sandalyas. Ginahandum nila ang yab-ok sang duta sa ulo sang mga kubos; kag ang dalan sang mga mahagop ginasikway nila.’”

13 Ang mga matarong ginbaligya “tungod lamang sa pilak,” ayhan buot silingon nga ginpamatbatan sang mga hukom nga nagabaton sing hamham nga pilak ang mga walay sala. Ang mga imol ginbaligya nga ulipon sang mga manugpautang tungod sa bili sang “isa ka pares sang sandalyas,” ayhan agod ibayad sa diutay lang nga utang. Ang wala kaluoy nga mga tawo ‘naghandum,’ ukon nagpanikasog, nga paubson ining “mga kubos” tubtob sa kahimtangan nga butangan sing yab-ok sining mga imol ang ila mismo ulo subong tanda sang kasubo, kalisod, ukon kahuya. Lapnag gid ang kagarukan amo nga ang  “mga mahagop” wala sing paglaum nga makatigayon sing hustisya.

14. Sin-o ang mga ginpigos sa napulo-ka-tribo nga ginharian sang Israel?

14 Talupangda kon sin-o ang mga ginapigos. Sila amo ang matarong, imol, kubos, kag mahagop nga mga pumuluyo sang pungsod. Ang Kasuguan nga katipan ni Jehova sa mga Israelinhon nagasugo nga ang mahuyang kag mga imol dapat kaluuyan. Apang, para sa mga indibiduwal nga sakop sang napulo-ka-tribo nga ginharian sang Israel, tuman gid kalain ang mga kahimtangan.

“Maghanda Ka sa Pag-atubang sa Imo Dios”

15, 16. (a) Ngaa ang mga Israelinhon ginpaandaman: “Maghanda ka sa pag-atubang sa imo Dios”? (b) Paano ginapakita sang Amos 9:​1, 2 nga ang mga malauton indi makalikaw sa paghukom sang Dios? (c) Ano ang natabo sa napulo-ka-tribo nga ginharian sang Israel sang 740 B.⁠C.⁠E.?

15 Bangod lapnag gid sa Israel ang imoralidad kag ang iban nga mga sala, may rason gid nga paandaman ni manalagna Amos ang rebelyuso nga pungsod: “Maghanda ka sa pag-atubang sa imo Dios.” (Amos 4:12) Indi malikawan sang di-matutom nga Israel ang nagapakari nga paghukom sang Dios bangod sa ikawalo nga tion, si Jehova nagsiling: “Indi ko ini pagpaisulon.” (Amos 2:6) Tuhoy sa mga malauton nga nagapanikasog sa pagpanago, ang Dios nagsiling: “Wala sing isa sa ila ang madinalag-on nga makapalagyo, kag wala sing isa sa ila ang makalikaw. Kon magkutkot sila pakadto sa Sheol, gikan didto kuhaon sila sang akon kamot; kag kon magsaka sila tubtob sa langit, gikan didto dalhon ko sila paidalom.”​​—⁠Amos 9:​1, 2.

16 Indi malikawan sang mga malauton ang paghukom ni Jehova paagi sa ‘pagkutkot pakadto sa Sheol,’ nga nagapatuhoy sing malaragwayon sa mga panikasog nga magpanago sa kaidadalman sang duta. Ni malikawan nila ang paghukom sang Dios paagi sa pagsaka “tubtob sa langit,” kon sayuron, sa pagpanikasog nga makakita sing dalangpan sa mataas nga mga bukid. Ang paandam ni Jehova maathag: Wala sing duog nga mapanaguan nga indi niya malab-ot. Ang katarungan sang Dios nagapatuman nga dapat manabat ang ginharian sang Israel tungod sa iya kalautan. Kag yadto nga tion nag-abot gid man. Sang 740 B.⁠C.⁠E.​​—⁠mga 60 ka tuig pagkatapos ginsulat ni Amos ang iya tagna​​—⁠ang ginharian sang Israel nalutos sang mga Asirianhon.

Ang Paghukom sang Dios Mapilion

17, 18. Ano ang ginasugid sang Amos kapitulo 9 tuhoy sa kaluoy sang Dios?

17 Ginapahangop sa aton sang tagna ni Amos nga ang paghukom sang Dios pirme nagakabagay kag indi malikawan. Apang ginapakita man sang tulun-an sang Amos nga ang paghukom ni Jehova mapilion. Matultulan kag mahukman sang Dios ang mga malauton bisan diin man sila manago. Makita man niya ang mga mahinulsulon kag mga matarong​​—⁠sila nga ginapakitaan niya sing kaluoy. Matahom ini nga ginpatalupangod sa katapusan nga kapitulo sang tulun-an sang Amos.

18 Suno sa Amos kapitulo 9, bersikulo 8, si Jehova nagsiling: “Indi ko paglaglagon sing bug-os ang panimalay ni Jacob.” Subong sang makita sa mga bersikulo 13 tubtob 15, si Jehova nagsaad nga ‘tipunon niya liwat ang mga nabihag’ sa iya katawhan. Kaluuyan sila kag magaagom sing kalig-unan kag kahamungayaan. “Malambot sang manug-arado ang mangangani,” panaad ni Jehova. Hunahunaa lamang​​—⁠bugana gid ang ani amo nga antes pa matipon ang tanan, ang masunod nga tion sa pag-arado kag sa pagtanom nag-abot na!

19. Ano ang natabo sa nagkalabilin sang Israel kag Juda?

 19 Masiling naton nga ang paghukom ni Jehova batok sa mga malauton sa Juda kag Israel mapilion bangod ang mga mahinulsulon kag mga matarong ginkaluuyan sadto. Bilang katumanan sang tagna sa pagpasag-uli nga narekord sa Amos kapitulo 9, ang mahinulsulon nga nagkalabilin sang Israel kag Juda nagpauli gikan sa pagkabihag sa Babilonia sang 537 B.⁠C.⁠E. Sa pagpauli sa ila pinalangga nga dutang natawhan, ginpasag-uli nila ang putli nga pagsimba. May kalig-unan nga nagpatindog man sila liwat sang ila mga balay kag nagtanom sing mga ulubasan kag mga hardin.

Ang Paghukom ni Jehova Magaabot!

20. Ano ang ginapasalig sa aton sang pagbinagbinag naton sa mga mensahe sang paghukom nga ginpahayag ni Amos?

20 Ang pagbinagbinag naton sa mga mensahe sang paghukom sang Dios nga ginpahayag ni Amos nagapasalig sa aton nga dulaon ni Jehova ang kalautan sa panahon naton. Ngaa mapatihan naton ini? Una, ining mga halimbawa sang nagligad nga mga pagpakig-angot sang Dios sa mga malauton nagapakita kon paano sia magapanghikot sa panahon naton. Ikaduha, ang paghukom sang Dios sa apostata nga ginharian sang Israel nagapat-od nga laglagon sang Dios ang Cristiandad, ang labing makasasala nga bahin sang “Babilonia nga Daku,” ang emperyo sang butig nga relihion sa bug-os nga kalibutan.​​—⁠Bugna 18:2.

21. Ngaa ang Cristiandad nagakabagay hukman sang Dios?

21 Wala gid sing duhaduha nga ang Cristiandad nagakabagay hukman sang Dios. Ang iya malaut nga kahimtangan sa relihion kag moral indi matago. Ang paghukom ni Jehova batok sa Cristiandad​​—⁠kag sa tanan nga bahin sang kalibutan ni Satanas​​—⁠nagakabagay. Indi man ini malikawan, kay kon mag-abot na ang tion sa paghukom, ang ginasiling sang Amos kapitulo 9, bersikulo 1, matuman: “Wala sing isa sa ila ang madinalag-on nga makapalagyo, kag wala sing isa sa ila ang makalikaw.” Huo, bisan diin man manago ang mga malauton, matultulan sila ni Jehova.

22. Anong mga punto bahin sa paghukom sang Dios ang ginapaathag sa 2 Tesalonica 1:​6-8?

22 Ang paghukom sang Dios pirme nagakabagay, di-malikawan, kag mapilion. Makita ini sa pinamulong ni apostol Pablo: “Matarong sa bahin sang Dios nga balusan sing kapipit-an ang mga nagapapiot sa inyo, apang, sa inyo nga ginapapiutan, kapahuwayan kaupod namon sa pagpahayag ni Ginuong Jesus gikan sa langit kaupod sang iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.” (2 Tesalonica 1:6-8) “Matarong sa bahin sang Dios” nga balusan ang mga nagakabagay hukman bangod sang kapipit-an nga ginhimo nila sa iya mga hinaplas. Ini nga paghukom di-malikawan, kay ang mga malauton indi makalampuwas sa ‘pagpahayag ni Jesus kaupod sang iya gamhanan nga mga anghel sa nagadabdab nga kalayo.’ Ang paghukom sang Dios mangin mapilion man bangod timalusan ni Jesus “ang mga wala nagakilala sa Dios kag ang mga wala nagatuman sa maayong balita.” Kag ang balaan nga paghukom magahatag sing lugpay sa mga mahinadlukon sa Dios nga nagaantos sing kapipit-an.

Paglaum Para sa mga Matarong

23. Anong paglaum kag lugpay ang matigayon naton gikan sa tulun-an sang Amos?

23 Ang tagna ni Amos nagaunod sing makalilipay nga mensahe sang paglaum kag lugpay para sa mga matarong. Suno sa gintagna sang tulun-an sang Amos, wala ginlaglag sing bug-os ni Jehova ang iya katawhan sang una. Sang ulihi, gintipon niya liwat ang mga bihag nga Israel kag Juda, ginpapauli sila sa ila dutang natawhan kag ginpakamaayo sila sing bugana nga kalig-unan kag kahamungayaan. Ano ang buot silingon sini para sa panahon naton? Ginapat-od sini sa aton nga sa tion sang paghukom sang Dios, matultulan ni Jehova ang mga malauton bisan diin man sila manago kag makita man niya ang mga indibiduwal nga ginakabig niya nga takus sang iya kaluoy bisan diin man sila nagapuyo sa sining duta.

24. Sa anong mga paagi ginapakamaayo ang modernong-adlaw nga mga alagad ni Jehova?

 24 Samtang ginahulat naton ang paghukom ni Jehova batok sa mga malauton, ano ang maeksperiensiahan naton subong iya matutom nga mga alagad? Ti, ginapakamaayo kita ni Jehova sing nagaawas nga espirituwal nga kahamungayaan! Ginaagom naton ang isa ka sahi sang pagsimba nga hilway sa kabutigan kag pagpatiko nga resulta sang butig nga mga panudlo sang Cristiandad. Ginahatagan man kita ni Jehova sing bugana nga espirituwal nga pagkaon. Apang, dumduma nga upod sining bugana nga mga pagpakamaayo gikan kay Jehova, may yara man kita daku nga responsabilidad. Ginapaabot sang Dios nga paandaman naton ang iban tuhoy sa nagapakari nga paghukom. Luyag naton himuon ang tanan nga masarangan naton sa pagpangita sa mga tawo nga “husto nga nahuyog sa kabuhi nga walay katapusan.” (Binuhatan 13:48) Huo, handum naton nga madamo kita sing mabuligan nga makabenepisyo sa espirituwal nga kahamungayaan nga ginaagom naton karon. Kag luyag naton nga maluwas sila sa nagapakari nga paghukom sang Dios sa mga malauton. Sa pagkamatuod, agod maagom ini nga mga pagpakamaayo, dapat may yara kita nagakaigo nga kahimtangan sang tagipusuon. Subong sang makita naton sa masunod nga artikulo, ginapadaku man ini sa tagna ni Amos.

Paano Mo Sabton?

• Paano ginapakita sang tagna ni Amos nga ang mga paghukom ni Jehova pirme nagakabagay?

• Ano nga pamatuod ang ginahatag sang Amos agod ipakita nga ang paghukom sang Dios indi malikawan?

• Paano ginapakita sang tulun-an sang Amos nga ang paghukom sang Dios mapilion?

[Mga Pamangkot sa Pagtinuon]

[Retrato sa pahina 16, 17]

Ang ginharian sang Israel wala makalikaw sa paghukom sang Dios

[Retrato sa pahina 18]

Sang 537 B.⁠C.⁠E., ang nagkalabilin sang Israel kag Juda nagpauli gikan sa pagkabihag sa Babilonia