Magdiretso sa kaundan

Magdiretso sa listahan sang kaundan

Pagpalambo sang Pagtamod ni Cristo sa Pagkadaku

Pagpalambo sang Pagtamod ni Cristo sa Pagkadaku

 Pagpalambo sang Pagtamod ni Cristo sa Pagkadaku

“Kon sin-o man ang luyag mangin daku sa inyo dapat mangin ministro ninyo.”​—⁠MATEO 20:26.

1. Ano ang pagtamod sang kalibutan sa pagkadaku?

MALAPIT sa dumaan nga siudad sang Thebes (Karnak karon) sa Egipto, mga 500 kilometros sa bagatnan sang Cairo, makita ang 18 metros kataas nga estatwa ni Paraon Amenhotep III. Magabatyag gid nga tuman kagamay ang isa ka tawo kon ipaanggid niya ang iya kaugalingon sa sining daku katama nga imahen. Ini nga monumento, nga gintuyo agod dayawon ang manuggahom, isa ka simbulo sang pagtamod sang kalibutan sa pagkadaku​—⁠ang paghimo sa kaugalingon nga daku kag importante gid kag pagpabatyag sa iban nga wala sila sing kabilinggan.

2. Ano nga halimbawa ang ginpakita ni Jesus sa iya mga sumulunod, kag ano ang dapat naton ipamangkot sa aton kaugalingon?

2 Ipaanggid ini nga pagtamod sa pagkadaku sa gintudlo ni Jesucristo. Bisan pa si Jesus ang “Ginuo kag Manunudlo” sang iya mga sumulunod, gintudlo niya sa ila nga ang pagkadaku resulta sang pag-alagad sa iban. Sa katapusan nga adlaw sang iya kabuhi sa duta, ginpakita ni Jesus ang kahulugan sang iya gintudlo paagi sa paghinaw sa mga tiil sang iya mga disipulo. Kubos gid ini nga pag-alagad! (Juan 13:​4, 5, 14) Mag-alagad ukon alagdon​—⁠ano ang mas gusto mo? Napapagsik ka  bala sang halimbawa ni Cristo nga mangin mapainubuson kaangay niya? Kon amo, binagbinagon naton ang pagtamod ni Cristo sa pagkadaku kon ipaanggid sa pagtamod nga kinaandan sa kalibutan.

Isikway ang Pagtamod sang Kalibutan sa Pagkadaku

3. Ano nga mga halimbawa sa Biblia ang nagapakita sang masubo nga nadangatan sang mga naghingamo sing himaya halin sa mga tawo?

3 Madamo nga halimbawa sa Biblia ang nagapakita nga ang pagtamod sang kalibutan sa pagkadaku nagadul-ong sa kapaslawan. Hunahunaa ang gamhanan nga si Haman, nga bantog sa palasyo sang hari sang Persia sang panahon ni Ester kag ni Mardoqueo. Ang paghingamo ni Haman sing himaya nagdul-ong sa iya kahuluy-an kag kamatayon. (Ester 3:⁠5; 6:10-12; 7:​9, 10) Binagbinaga ang natabo sa bugalon nga si Nabocodonosor, nga nagbuang sa putukputukan sang iya gahom. Ang iya tiko nga ideya sa pagkadaku makita sa sining pinamulong: “Indi bala nga amo ini ang Babilonia nga Daku, nga ginpatindog ko para sa harianon nga puluy-an paagi sa kusog sang akon gahom kag para sa himaya sang akon pagkahalangdon?” (Daniel 4:30) Yara man ang bugalon nga si Herodes Agripa I, nga nagbaton sing di-nagakaigo nga himaya para sa iya kaugalingon sa baylo nga himayaon ang Dios. “Ginkaon sia sang mga ulod kag napatay.” (Binuhatan 12:21-23) Bangod wala nila mahangpan ang pagtamod ni Jehova sa pagkadaku, nagdangat sila sa makahuluya nga pagkapukan.

4. Sin-o ang sa likod sang matinaastaason nga panimuot sa kalibutan?

4 Nagakaigo lang ang paghandum nga magkabuhi sa paagi nga nagahatag sa aton sing kadungganan kag pagtahod. Apang, ginahingalitan sang Yawa ini nga handum paagi sa pagpalig-on sang pagkamatinaastaason, nga nagapabanaag sang iya mga ambisyon. (Mateo 4:​8, 9) Indi pagkalimti nga sia ang “dios sining sistema sang mga butang,” kag determinado sia sa pagpalapnag sang iya panghunahuna sa duta. (2 Corinto 4:⁠4; Efeso 2:⁠2; Bugna 12:9) Bangod nahibaluan sang mga Cristiano ang ginhalinan sini nga panghunahuna, ginasikway nila ang pagtamod sang kalibutan sa pagkadaku.

5. Nagagarantiya bala sing dayon nga kalipay ang kadalag-an, kabantugan, kag manggad? Ipaathag.

5 Ang isa ka ideya nga ginapalapnag sang Yawa amo nga ang kabantugan sa kalibutan, pagdayaw sang mga tawo, kag daku nga manggad nagaresulta gid sa malipayon nga kabuhi. Matuod bala ini? Ang kadalag-an, kabantugan, kag manggad nagagarantiya bala sang isa ka malipayon nga kabuhi? Ginapaandaman kita sang Biblia nga indi magpadaya sa sini nga panghunahuna. Nagsulat ang maalam nga si Hari Solomon: “Nakita ko ang tanan nga lakas nga pagpangabudlay kag ang tanan nga pagkasampaton sa pagpangabudlay, nga nagakahulugan ini sang pagpaindis-indis sa isa kag isa; ini man walay pulos kag paglagas sa hangin.” (Manugwali 4:4) Madamong indibiduwal nga naghingamo sing kabantugan ukon manggad sa kalibutan sa ila bug-os nga kabuhi ang makapamatuod sa sining inspirado nga laygay sang Biblia. Isa ka halimbawa amo ang tawo nga nagbulig sa pagdesinyo, paghimo, kag pagtilaw sa spacecraft nga ginsakyan sang mga tawo pakadto sa bulan. Nagsiling sia: “Nagtrabaho ako sing lakas kag nangin lantip sa akon ginahimo. Apang wala ini naghatag sa akon sing dayon nga kalipay kag kalinong sa hunahuna.”⁠ * Ang ideya  sang kalibutan sa pagkadaku, sa patag man sang negosyo, isport, ukon kalingawan, wala nagapasalig sing dayon nga kalipay.

Pagkadaku Gikan sa Pag-alagad Bangod sang Gugma

6. Ano ang nagapakita nga sayop ang pagtamod ni Santiago kag ni Juan sa pagkadaku?

6 Ginpakita sa isa ka hitabo sa kabuhi ni Jesus kon ano ang nalakip sa tunay nga pagkadaku. Si Jesus kag ang iya mga disipulo nagalakbay anay pa Jerusalem para sa Paskuwa sang 33 C.⁠E. Sa dalanon, ang duha ka pakaisa ni Jesus, si Santiago kag si Juan, nagpakita sing sayop nga pagtamod sa pagkadaku. Paagi sa ila iloy, nagpangabay sila kay Jesus: ‘Isiling mo nga maglingkod kami sa imo tuo kag sa imo wala, sa imo ginharian.’ (Mateo 20:21) Sa mga Judiyo, isa ka daku nga kadungganan ang paglingkod sa tuo ukon sa wala. (1 Hari 2:19) Bangod sang ambisyon, gintinguhaan ni Santiago kag ni Juan nga matigayon ang labing prominente nga mga duog. Luyag nila angkunon ini nga mga posisyon sang awtoridad. Nahibaluan ni Jesus ang ila ginahunahuna kag gingamit niya ini nga okasyon agod tadlungon ang ila sayop nga pagtamod sa pagkadaku.

7. Paano ginlaragway ni Jesus ang matuod nga Cristianong pagkadaku?

7 Nahibaluan ni Jesus nga sa sining matinaastaason nga kalibutan, ang ginakabig nga daku amo ang isa nga nagakontrol kag nagamando sa iban kag makatigayon sa gilayon sang tanan nga iya pangayuon. Apang sa mga sumulunod ni Jesus, ang mapainubuson nga pag-alagad amo ang talaksan sang pagkadaku. Si Jesus nagsiling: “Kon sin-o man ang luyag mangin daku sa inyo dapat mangin ministro ninyo, kag kon sin-o man ang luyag mauna sa inyo dapat mangin ulipon ninyo.”​—⁠Mateo 20:​26, 27.

8. Ano ang buot silingon sang mangin ministro, kag ano ang mahimo naton ipamangkot sa aton kaugalingon?

8 Ang Griegong tinaga nga ginbadbad “ministro” sa Biblia amo ang isa nga mapisan kag maukod nga nagapanikasog sa pag-alagad sa iban. Gintudluan ni Jesus ang iya mga disipulo sing importante nga leksion: Ang pagmando sa iban nga tawo wala nagahimo sa isa nga daku; ang pag-alagad sa iban bangod sang gugma amo ang nagahimo sa iya nga daku. Pamangkuta ang imo kaugalingon: ‘Ano ayhan ang batyagon ko kon ako si Santiago ukon si Juan? Mahangpan ko ayhan nga ang matuod nga pagkadaku resulta sang pag-alagad bangod sang gugma?’​—⁠1 Corinto 13:3.

9. Anong halimbawa ang ginpakita ni Jesus sa pagpakig-angot sa iban?

 9 Ginpakita ni Jesus sa iya mga disipulo nga ang talaksan sang kalibutan sa pagkadaku indi amo ang talaksan sang tulad-Cristo nga pagkadaku. Wala gid sia magbatyag nga superyor sa mga gin-alagaran niya ukon nagpabatyag sa ila nga mas kubos. Ang tanan nga sahi sang tawo​—⁠lalaki, babayi, kag kabataan, manggaranon, imol, kag gamhanan, subong man ang kilala nga mga makasasala​—⁠luyag mag-upod sa iya. (Marcos 10:13-16; Lucas 7:37-50) Masami nga nasabaran ang mga tawo sa mga may kakulangan. Tuhay si Jesus. Bisan pa ang iya mga disipulo kon kaisa walay pasunaid kag nagbaisay, mapailubon niya sila nga gintudluan, ginapakita sa ila nga mapainubuson gid sia kag malulo.​—⁠Zacarias 9:⁠9; Mateo 11:29; Lucas 22:24-27.

10. Paano makita sa bug-os nga kabuhi ni Jesus ang iya di-makagod nga pag-alagad sa iban?

10 Ginpakita sang di-makagod nga halimbawa sang pinakabantog nga Anak sang Dios ang matuod nga kahulugan sang pagkadaku. Si Jesus wala magkari sa duta agod alagdon kundi agod mag-alagad sa iban, nagpang-ayo sang “nanarisari nga balatian” kag naghilway sa mga tawo gikan sa gahom sang mga demonyo. Bisan pa ginkapoy sia kag kinahanglan magpahuway, pirme niya gin-una ang kinahanglanon sang iban sangsa iya kaugalingon, nagapanikasog nga lugpayan sila. (Marcos 1:32-34; 6:30-34; Juan 11:​11, 17, 33) Bangod sang iya gugma, ginbuligan niya ang mga tawo sa espirituwal, naglakbay sing ginatos ka kilometro sa yab-ukon nga dalanon agod ibantala ang maayong balita sang Ginharian. (Marcos 1:​38, 39) Gintamod gid ni Jesus ang pag-alagad sa iban nga importante katama.

Iluga ang Pagkamapainubuson ni Cristo

11. Ano dapat ang mga kinaiya sang mga utod nga gintangdo sa pag-alagad subong mga manugtatap sa kongregasyon?

11 Sang ulihi nga bahin sang dekada 1800, ginpadaku ang nagakaigo nga panimuot nga dapat palambuon sang Cristianong mga manugtatap sang nagpili sing mga nagalakbay nga tiglawas agod alagaran ang mga kinahanglanon sang katawhan sang Dios. Suno sa Septiembre 1, 1894, nga Zion’s Watch Tower, kinahanglan ang mga lalaki nga “mahagop​—⁠agod indi sila magpahambog . . . , mapainubuson nga wala nagapakadaku sang ila kaugalingon, kundi kay Cristo​—⁠indi agod ipabutyag ang ila nahibaluan, kundi ang iya simple kag gamhanan nga Pulong.” Maathag nga ang matuod nga mga Cristiano indi dapat mag-abaga sing responsabilidad sa tuyo nga paayawan ang ila ambisyon ukon mangin prominente, poderuso, kag may kontrol sa iban. Ginadumdom sang mapainubuson nga manugtatap nga ang iya mga responsabilidad isa ka “maayong hilikuton,” indi isa ka ginbayaw nga posisyon agod himayaon ang iya kaugalingon. (1 Timoteo 3:​1, 2) Dapat gid panikasugan sang tanan nga gulang kag ministeryal nga alagad nga mag-alagad sa iban sing mapainubuson kag magpanguna sa balaan nga pag-alagad, nagapakita sing halimbawa nga takus ilugon.​—⁠1 Corinto 9:19; Galacia 5:13; 2 Timoteo 4:5.

12. Ano ang mahimo ipamangkot sang mga nagahandum sing mga pribilehiyo sa kongregasyon sa ila kaugalingon?

 12 Ang utod nga nagahandum sing mga pribilehiyo mahimo mamangkot sa iya kaugalingon: ‘Nagapangita bala ako sing mga kahigayunan sa pag-alagad sa iban, ukon luyag ko bala nga ako ang alagaran? Handa bala ako sa paghimo sang mapuslanon nga mga buluhaton nga indi madali matalupangdan sang iban?’ Halimbawa, mahimo nga handa ang isa ka lamharon nga utod nga lalaki nga magpamulongpulong sa Cristianong kongregasyon apang nagapangalag-ag sia sa pagbulig sa mga tigulang. Mahimo nga nasadyahan sia sa pagpakig-upod sa mga utod nga lalaki nga may katungdanan sa kongregasyon apang nagapangalag-ag sia sa pagpakigbahin sa pagbantala nga hilikuton. Dapat niya pamangkuton ang iya kaugalingon: ‘Ginapanikasugan ko lang bala ang mga bahin sang pag-alagad sa Dios nga bangod sini kilalahon kag dayawon ako? Ginatinguhaan ko bala nga mangin prominente?’ Ang pagtinguha sing himaya para sa kaugalingon indi gid pag-ilog kay Cristo.​—⁠Juan 5:41.

13. (a) Paano makaapektar sa iban ang halimbawa sang isa ka manugtatap sa pagkamapainubuson? (b) Ngaa masiling nga obligado ang isa ka Cristiano nga mangin mapainubuson?

13 Kon ginapanikasugan naton nga ilugon ang pagkamapainubuson ni Cristo, mapahulag kita nga mag-alagad sa iban. Binagbinaga ang halimbawa sang isa ka manugtatap sa sona nga nagausisa sa mga hilikuton sang isa ka sanga talatapan sang mga Saksi ni Jehova. Walay sapayan sang masako gid nga iskedyul kag mabug-at nga responsabilidad, nagdulog ini nga manugtatap agod buligan ang isa ka lamharon nga utod nga lalaki nga nabudlayan sa pagpasibu sa setting sang makina nga nagabutang sing staple sa magasin. “Daw indi ako makapati!” siling sang utod. “Ginsilingan niya ako nga pareho sini nga makina ang ginapaandar niya anay sang pamatan-on pa sia nga nagaalagad sa Bethel, kag nadumduman niya nga kabudlay gid makuha ang husto nga setting. Ginbuligan niya ako sa sini nga makina sa malawiglawig nga tion bisan may madamo pa sia nga importante nga himuon. Nagdayaw gid ako sa sini.” Nadumduman gihapon sini nga utod, nga isa na karon ka manugtatap sa isa ka sanga talatapan sang mga Saksi ni Jehova, ini nga buhat sang pagkamapainubuson. Kabay nga indi kita magbatyag nga tuman kataas ukon tuman ka importante sa paghimo sang kubos nga mga hilikuton. Sa baylo, dapat naton tigayunon ang “mapainubuson nga hunahuna.” Obligado kita sa sini. Bahin ini sang “bag-o nga personalidad” nga dapat isuklob sang isa ka Cristiano.​—⁠Filipos 2:⁠3; Colosas 3:​10, 12; Roma 12:16.

Pagtigayon sang Pagtamod ni Cristo sa Pagkadaku

14. Paano makabulig ang pagpamalandong sa aton kaangtanan sa Dios kag sa aton isigkatawo agod mapalambo naton ang nagakaigo nga pagtamod sa pagkadaku?

14 Paano naton matigayon ang nagakaigo nga pagtamod sa pagkadaku? Ang isa ka paagi amo ang pagpamalandong sa aton kaangtanan kay Jehova nga Dios. Bangod sang iya pagkahalangdon, gahom, kag kaalam, labaw gid sia sa ikasarang sang kubos nga mga tawo. (Isaias 40:22) Ang pagpamalandong sa aton kaangtanan sa aton isigkatawo nagabulig man sa aton nga mapalambo ang pagkamapainubuson. Halimbawa, mahimo malabawan naton ang iban sa pila ka bahin, apang mahimo nga mas maayo sila sa mas importante nga mga bahin sang kabuhi, ukon mahimo nga may pila ka kinaiya ang aton Cristianong kauturan nga wala sa aton. Ang matuod, madamo sa mga hamili sa itululok sang Dios ang indi luyag mangin prominente bangod mahagop kag mapainubuson sila.​—⁠Hulubaton 3:34; Santiago 4:6.

15. Paano ginapakita sang katutom sang katawhan sang Dios nga wala sing rason ang isa nga magbatyag nga labaw sangsa iban?

15 Ang mga eksperiensia sang mga Saksi ni Jehova nga gintilawan bangod sang ila pagtuo nagailustrar sini nga punto. Masami nga ang ginakabig sang kalibutan nga mga ordinaryo lamang  amo pa ang nagpabilin nga matutom sa Dios walay sapayan sang mabudlay nga mga pagtilaw. Ang pagpamalandong sa sini nga mga halimbawa makabulig sa aton nga mangin mapainubuson kag makatudlo sa aton nga ‘indi maghunahuna sing labaw sa dapat naton hunahunaon sa aton kaugalingon.’​—⁠Roma 12:3.⁠ *

16. Paano mapalambo sang tanan sa kongregasyon ang pagkadaku nga nagailog sa halimbawa ni Jesus?

16 Dapat palambuon sang tanan nga Cristiano, bata kag tigulang, ang pagtamod ni Cristo sa pagkadaku. Sa kongregasyon, lainlain nga mga hilikuton ang dapat himuon. Indi gid magkaugot kon ipahimo sa imo ang mga butang nga daw kubos. (1 Samuel 25:41; 2 Hari 3:11) Mga ginikanan, ginapalig-on bala ninyo ang inyo bata pa kag tin-edyer na nga mga anak nga himuon sing malipayon ang bisan ano nga asaynment nga ihatag sa ila, sa Kingdom Hall man, sa duog sang asambleya ukon kombension? Makita bala nila kamo nga nagahimo sang kubos nga mga hilikuton? Madumduman pa sang isa ka utod, nga nagaalagad karon sa ulong talatapan sang mga Saksi ni Jehova sa bug-os nga kalibutan, ang halimbawa sang iya mga ginikanan. Sia nagsiling: “Ang ila pagtamod sa pagtinlo sa Kingdom Hall ukon sa duog sang kombension nagtudlo sa akon nga importante ini para sa ila. Pirme sila nagaboluntaryo sa paghimo sang mga hilikuton para sa kaayuhan sang kongregasyon ukon sang paghiliutod, bisan pa daw kubos ini tan-awon. Ini nga panimuot nagbulig sa akon nga batunon sing kinabubut-on ang bisan ano nga hilikuton nga ihatag sa akon diri sa Bethel.”

17. Paano mangin pagpakamaayo sa kongregasyon ang mapainubuson nga mga babayi?

17 Kon tuhoy sa pag-una sa interes sang iban sangsa kaugalingon, isa gid ka maayo nga halimbawa si Ester, nga nangin reyna sa Emperyo sang Persia sang ikalima nga siglo B.⁠C.⁠E. Bisan pa nagaistar sa palasyo, handa sia nga ibutang sa katalagman ang iya kabuhi para sa katawhan sang Dios, kag naghulag suno sa Iya kabubut-on. (Ester 1:​5, 6; 4:14-16) Bisan ano man ang ila kahimtangan sa kabuhi, ang mga Cristianong babayi karon makapakita man sang panimuot ni Ester paagi sa pagpalig-on sa napung-awan, pagduaw sa nagamasakit, pagpakigbahin sa pagbantala, kag pagkooperar sa mga gulang. Pagpakamaayo gid ining mapainubuson nga mga utod nga babayi sa kongregasyon!

Mga Pagpakamaayo sang Tulad-Cristo nga Pagkadaku

18. Ano ang mga benepisyo kon ipakita ang tulad-Cristo nga pagkadaku?

18 Madamo ikaw sing mabenepisyo kon huptan mo ang pagtamod ni Cristo sa pagkadaku. Ang di-makagod nga pag-alagad sa iban nagapahalipay sa ila kag sa imo man. (Binuhatan 20:35) Samtang nagapangabudlay ka sing kinabubut-on kag malangkagon para sa imo mga kauturan, palanggaon ka nila sing labi. (Binuhatan 20:37) Labi ka importante, ginatamod ni Jehova ang ginahimo mo para sa kaayuhan sang imo mga masigka-Cristiano subong halad sang pagdayaw sa iya.​—⁠Filipos 2:17.

19. Ano dapat ang aton determinasyon kon tuhoy sa pagtamod ni Cristo sa pagkadaku?

19 Dapat naton usisaon ang aton kaugalingon nga tagipusuon kag mamangkot: ‘Magahambal lang bala ako tuhoy sa pagpalambo sang pagtamod ni Cristo sa pagkadaku, ukon panikasugan ko nga himuon ini?’ Maathag ang ginabatyag ni Jehova sa mga matinaastaason. (Hulubaton 16:⁠5; 1 Pedro 5:5) Kabay nga ipakita sang aton mga buhat nga nalipay kita sa pagpadayag sang pagtamod ni Cristo sa pagkadaku, sa Cristianong kongregasyon man, sa aton pamilya, ukon sa adlaw-adlaw nga pagpakig-angot sa aton mga isigkatawo​—⁠ginahimo ang tanan nga butang sa himaya kag kadayawan sang Dios.​—⁠1 Corinto 10:31.

[Mga nota]

^ par. 5 Tan-awa ang “In Search of Success” sa The Watchtower, Mayo 1, 1982, pahina 3-6.

^ par. 15 Halimbawa, tan-awa ang 1992 Yearbook of Jehovah’s Witnesses, pahina 181-2, kag Ang Lalantawan nga Septiembre 1, 1993, pahina 27-​31.

Mapaathag Mo Bala?

• Ngaa dapat naton isikway ang pagtamod sang kalibutan sa pagkadaku?

• Ano ang pagtamod ni Jesus sa pagkadaku?

• Paano mailog sang mga manugtatap ang pagkamapainubuson ni Cristo?

• Ano ang makabulig sa aton nga mapalambo ang pagtamod ni Cristo sa pagkadaku?

[Mga Pamangkot sa Pagtinuon]

[Kahon sa pahina 17]

Sin-o ang May Pagtamod ni Cristo sa Pagkadaku?

Isa nga luyag alagdon ukon isa nga handa mag-alagad?

Isa nga luyag mangin sentro sang atension ukon isa nga nagahimo sang kubos nga mga hilikuton?

Isa nga nagabayaw sang iya kaugalingon ukon isa nga nagabayaw sa iban?

[Retrato sa pahina 14]

Daku nga imahen ni Paraon Amenhotep III

[Retrato sa pahina 15]

Nahibaluan mo bala kon ngaa napukan si Haman?

[Retrato sa pahina 16]

Nagapangita ka bala sing mga kahigayunan sa pag-alagad sa iban?