Magdiretso sa kaundan

Magdiretso sa listahan sang kaundan

Ang mga Naggradwar sa Gilead Nagakadto sa Ila Teritoryo Subong Makugi nga mga Mangangani!

Ang mga Naggradwar sa Gilead Nagakadto sa Ila Teritoryo Subong Makugi nga mga Mangangani!

 Ang mga Naggradwar sa Gilead Nagakadto sa Ila Teritoryo Subong Makugi nga mga Mangangani!

“ANG alanyon bugana, apang pila lamang ang mga mamumugon. Busa, pakitluoy kamo sa Agalon sang alanyon agod magpadala sia sing mga mamumugon sa iya alanyon.” (Mateo 9:​37, 38) Ini nga pinamulong may pinasahi nga kahulugan para sa naggradwar nga mga estudyante sang ika-116 nga klase sang Watchtower Bible School of Gilead samtang nagahanda sila sa pagkadto sa ila teritoryo subong mga misyonero.

Sang Sabado, Marso 13, 2004, nagtipon ang kabug-usan nga 6,684 para sa programa sang gradwasyon sa Watchtower Educational Center sa Patterson, New York, kag sa iban pa nga lokasyon sa Bethel diin makita sa telebisyon ang programa, kag ang klase nakabaton sing mga laygay kag pagpalig-on. Tanan kita makabenepisyo gikan sa laygay nga ginpaalinton, samtang nagapangabudlay kita sing makugi sa espirituwal nga pag-ani.

Ang nagabukas nga pamulongpulong ni Theodore Jaracz, isa ka katapo sang Nagadumala nga Hubon kag gradwado sang ikapito nga klase sang Gilead, nagpadaku sang pinamulong ni Jesus: “Lakat kamo kag maghimo sing mga disipulo sa mga tawo sa tanan nga kapungsuran.” (Mateo 28:​19, 20) Nagakaigo gid ini, bangod ang mga gradwado ginpadala agod mag-alagad sa 20 ka pungsod! Ginpahanumdom niya ang mga estudyante nga ang instruksion gikan sa Pulong sang Dios nagsangkap sing bug-os sa ila agod mangin makugi nga mangangani sa pinakaimportante nga espirituwal nga pag-ani.​—⁠Mateo 5:16.

Kon Paano Mangin Mapatubason nga mga Mangangani

Ang nahauna nga humalambal sa programa amo si Robert Wallen, nga tinuig na nga nagapanghikot sing suod sa Gilead School. Nagapamulongpulong sa tema nga “Ang Katahom Sang Kaawa,” ginsilingan niya ang mga estudyante: “Ang kaawa isa ka lenguahe nga bisan ang mga bungol makabati kag ang mga bulag makakita.” Nahibaluan gid ni Jesus ang kalisod sang iban kag nagtinguha sia nga mapahaganhagan ini. (Mateo 9:36) May madamo man nga kahigayunan ang mga estudyante sa paghimo sini​—⁠sa pagbantala nga hilikuton, sa kongregasyon, sa puluy-an sang mga misyonero, kag sa ila mismo pag-asawahay. Ginlaygayan sila sang humalambal: “Ipakita ang katahom sang kaawa sa inyo mismo kabuhi samtang nagaalagad kamo sa iban. Ang inyo lamang pinakamaayo nga paggawi ang tuman na para sa adlaw-adlaw nga pagkabuhi sa puluy-an sang mga misyonero. Gani, mangin determinado nga panaptan ang inyo kaugalingon sing kaawa.”​—⁠Colosas 3:12.

Masunod, ginpasangkad ni Gerrit Lösch, isa ka katapo sang Nagadumala nga Hubon kag gradwado sang ika-41 nga klase sang Gilead, ang tema nga “Mga Manugbantala Sang Kaluwasan.” (Isaias 52:7) Agod makalampuwas ang mga tawo kon laglagon na ang presente nga sistema sang mga butang, dapat sila magkuha sing sibu nga ihibalo gikan sa Pulong sang Dios, magpahayag sing dayag sang ila pagtuo, kag magpabawtismo. (Roma 10:10; 2 Timoteo 3:​15; 1 Pedro 3:21) Apang, ang panguna nga rason sa pagbantala sing kaluwasan amo, indi agod luwason ang mga tawo, kundi agod hatagan  sing kadayawan ang Dios. Gani, ginlaygayan ni Utod Lösch ang mangin mga misyonero: “Dalha ang mensahe sang Ginharian sa mga ukbong sang duta, kag mangin makugi nga mga manugbantala sang kaluwasan, tanan sa kadayawan ni Jehova.”​—⁠Roma 10:18.

“Daw Ano Kamo Kasanag?” amo ang pamangkot sang instruktor sa Gilead nga si Lawrence Bowen. Ginpatuhuyan niya ang pinamulong ni Jesus sa Mateo 6:22 kag ginpalig-on ang naggradwar nga mga estudyante nga huptan ang ila mata nga “simple” agod “mapabanaag ang espirituwal nga kasanag nga nagahimaya kay Jehova kag nagahatag sing benepisyo sa mga isigkatawo.” Sugod sa pamuno sang ministeryo ni Jesus, nagpahamtang sia sing himpit nga huwaran sa sini nga butang paagi sa pagsentro sang iya igtalupangod sa paghimo sang kabubut-on sang Dios. Ang pagpamalandong sa makatilingala nga mga butang nga gintudlo sang iya Amay sa iya sa langit nagbulig kay Jesus agod mabatas ang mga pagtilaw sa iya ni Satanas sa kahanayakan. (Mateo 3:​16; 4:​1-​11) Ginpakita ni Jesus ang bug-os nga pagsandig kay Jehova paagi sa pagtuman sa gintangdo sang Dios sa iya nga himuon. Sing kaanggid, agod malandas ang mga hangkat sa unahan, ang mga misyonero dapat padayon nga may maayo nga batasan sa pagtuon sa Biblia kag magsandig sing bug-os kay Jehova.

Si Mark Noumair, instruktor sa Gilead kag gradwado sang ika-77 nga klase sang Gilead, naghinakop  sining serye sang mga pamulongpulong paagi sa pagbinagbinag sa tema nga “Yari Kami sa Imo Kamot.” (Josue 9:25) Ginpalig-on niya ang mga estudyante nga ilugon ang panimuot sang dumaan nga mga Gabaonhon. Bisan pa ang Gabaon “isa ka daku nga siudad . . . kag ang tanan nga lalaki sini mga makusog,” ang mga Gabaonhon wala nag-insister nga kilalahon ukon nagpaabot nga tigayunon ang mga butang suno sa luyag nila. (Josue 10:2) Nag-alagad sila sing kinabubut-on subong “mga manugpangahoy kag manugsag-ub sang tubig” sa idalom sang mga Levinhon bilang pagsuportar sa pagsimba kay Jehova. (Josue 9:27) Daw subong bala nga ang naggradwar nga klase nagsiling sa Daku Pa nga Josue, si Jesucristo, “Yari kami sa imo kamot.” Karon, samtang nagakadto sila sa ila mga teritoryo sa iban nga pungsod, dapat nila batunon ang bisan anong hilikuton nga ginhatag sa ila sang Daku Pa nga Josue.

Mga Eksperiensia kag mga Interbyu

Ang “Buksi Sing Bug-os ang Kasulatan” amo ang tema nga ginbinagbinag ni Wallace Liverance, gradwado sang ika-61 nga klase sang Gilead kag isa sang mga instruktor, sa isa ka grupo sang mga estudyante. Ginsaysay kag gin-akto nila ang mga eksperiensia nila sa ministeryo sa latagon sa tion sang ila pag-eskwela. Maathag nga ang maid-id nga pagtuon nila sa Kasulatan sa kapin sa lima ka bulan nga paghanas naglab-ot sa ila tagipusuon kag nagpahulag sa ila nga ipaambit sa iban ang ila natun-an. (Lucas 24:32) Sa tion sang lima-ka-bulan nga pag-eskwela, napaambit sang isa ka estudyante ang iya natun-an sa iya mismo manghod nga lalaki. Nagpalig-on ini sa iya manghod nga pangitaon ang lokal nga kongregasyon kag sugdan ang iya mismo pagtuon sa Biblia. Kalipikado na sia karon subong isa ka di-bawtismado nga manugbantala.

Pagkatapos sining mga eksperiensia, gin-interbyu nanday Richard Ashe kag John Gibbard ang pila ka madugay na kag matutom nga mga alagad ni Jehova, pati na ang mga nagalakbay nga manugtatap nga nagabaton sing pinasahi nga paghanas sa Watchtower Educational Center. Mga gradwado sila sang nahauna nga mga klase sang Gilead School. Nadumduman sang isa ang ginsiling ni Utod Knorr sa ila klase: “Sa Gilead madamo kamo sing matun-an. Apang kon makatapos kamo nga nagdaku ang ulo ukon naghambog, napaslawan kami. Luyag namon nga makatapos kamo nga may daku ukon mahigugmaon nga tagipusuon.” Ginlaygayan sang mga nagalakbay nga kauturan ang presente nga klase nga mangin mainulikdon sa mga tawo, nga pakig-angutan ang iban subong sang pagpakig-angot ni Cristo, kag mapainubuson nga batunon ang bisan ano nga asaynment nga ginhatag sa ila. Ang pag-aplikar sini nga laygay magabulig gid sa bag-o nga mga misyonero nga mangin mapatubason sa ila mga teritoryo.

Magkadto sa Teritoryo Subong Makugi nga mga Mangangani!

Ang mga tumalambong nakahigayon sa pagpamati kay Stephen Lett, isa pa ka katapo sang Nagadumala nga Hubon. Ginhatag niya ang panguna nga pamulongpulong sang programa, nga natig-uluhan “Magkadto sa Teritoryo Subong Makugi nga mga Mangangani!” (Mateo 9:38) Sa literal nga pag-ani, ang tion sang pag-ani limitado. Kinahanglan nga magpangabudlay sing lakas ang mga mangangani. Ilabi na nga importante ini sa katapusan sining sistema sang mga butang! Sa dakung espirituwal nga pag-ani, nataya ang mga kabuhi. (Mateo 13:39) Ginpalig-on ni Utod Lett ang mga naggradwar, nga indi ‘magligoy sa ila hilikuton,’ kundi mangin ‘mainit sa espiritu’ kag “magpaulipon para kay Jehova” sa sining indi-na-gid-masulit nga pag-ani. (Roma 12:11) Ginkutlo sang humalambal ang pinamulong ni Jesus: “Bayawa ang inyo mga mata kag tan-awa ang kaumhan, nga maputi na ini agod anihon.” (Juan 4:35) Dayon ginpalig-on niya ang mga naggradwar nga ipakita ang ila kakugi sa pagpangani paagi sa pagpanikasog gid nga malab-ot ang mga tawo sa ano man nga oras ukon lugar nga masapwan sila kag paagi sa pagkalit sang tanan nga kahigayunan sa pagpanaksi sing di-pormal. Ang pagkaalisto sa mga kahigayunan makabulig sa paghatag sing epektibo nga pagpanaksi. Si Jehova isa ka makugi nga Dios, kag ginapaabot niya sa aton tanan nga ilugon sia kag magpangabudlay sing lakas sa espirituwal nga pag-ani.​—⁠2 Hari 19:31; Juan 5:⁠17.

Sa paghinakop sa programa, ang tsirman nga si Utod Jaracz, nagpaambit sang mga panamyaw gikan sa pila ka sanga talatapan kag nagpanagtag sing diploma sa mga estudyante. Ginbasa sang isa sa mga naggradwar ang isa ka sulat gikan sa klase, nga nagapabutyag sang ila tudok nga pagpasalamat tungod sa paghanas nga nabaton nila. Maathag nga ang programa sa gradwasyon sang ika-116 nga klase nagpahulag sa tanan nga tumalambong nga mangin determinado pa subong makugi nga mga mangangani.

[Kahon sa pahina 25]

ESTADISTIKA SANG KLASE

Kadamuon sang mga pungsod nga gintiglawas: 6

Kadamuon sang mga pungsod nga ginpadalhan: 20

Kadamuon sang mga estudyante: 46

Promedyo nga edad: 34.2

Promedyo nga tuig sa kamatuoran: 17.2

Promedyo nga tuig sa bug-os tion nga ministeryo: 13.9

[Retrato sa pahina 26]

Ika-116 nga Naggradwar nga Klase sang Watchtower Bible School of Gilead

Sa listahan sa ubos, ang mga idas ginanumeruhan halin sa atubangan pa likod, kag ang mga ngalan ginalista halin sa wala pa tuo sa tagsa ka idas.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.