Magdiretso sa kaundan

Magdiretso sa listahan sang kaundan

Ang Hangkat sa Paghanas sa mga Bata Karon

Ang Hangkat sa Paghanas sa mga Bata Karon

 Ang Hangkat sa Paghanas sa mga Bata Karon

GAB-I na kag ang tag-iya sang restawran nagahimos nga manirado kag magpauli. Nian duha ka babayi kag isa ka bata nga lalaki ang nagsulod kag nag-order sing pagkaon. Bangod kapoy na katama, luyag na kuntani sila silingan sang tag-iya nga sirado na ang restawran, apang namat-od sia nga serbehan sila. Samtang ang duha ka babayi nagahambalanay kag nagakaon, ang bata naman nagduludalagan sa sulod sang restawran, nga nagakahulog ang tinapay sa salog kag gintapaktapakan ini. Sa baylo nga sawayon sia, ang iloy sang bata nagyuhum lang. Sang maghalin na sila, kinahanglan pa nga tinluan sang kapoy nga tag-iya ang mahigko nga salog.

Ginapakita sining matuod nga hitabo nga sa madamong pamilya, ang paghanas sa mga bata indi epektibo. Lainlain ang rason. Ginapagustuhan sang iban nga mga ginikanan ang ila mga kabataan sang luyag nila himuon, nagahunahuna nga ang mga kabataan dapat padakuon nga may espiritu sang kahilwayan. Ukon bangod masako gid sila, ang mga ginikanan mahimo nga wala sing tion sa paghatag sa ila mga kabataan sing nagakaigo nga atension kag kinahanglanon nga paghanas. Ang iban naman nga mga ginikanan nagadumdom nga ang pagpaeskwela sa ila bata amo ang pinakaimportante nga butang, gani ginapagustuhan nila ang ila bata kon ano ang iya himuon basta mataas ang iya mga grado sa eskwelahan kag makaeskwela sia sa isa ka kilala nga kolehiyo.

Apang, ang iban nagasiling nga ang mga talaksan sang mga ginikanan kag sang katilingban sa kabilugan dapat bag-uhon. Nagapangatarungan sila nga ang mga kabataan nadalahig na sa tanan nga sahi sang krimen kag ang kasingki sa eskwelahan nagalala adlaw-adlaw. Gani, ginpadaku sang isa ka prinsipal sa elementarya sa Seoul, Republika sang Korea, nga ang pagtudlo sa mga kabataan tuhoy sa pagpauswag sang ila personalidad dapat hatagan sing prioridad. Nagsiling sia: “Ang pagpalambo sing maayo nga mga kinaiya dapat unahon sangsa pagkuha sing ihibalo.”

Ang mga paandam wala ginasapak sang madamo nga mga ginikanan nga luyag magkolehiyo ang ila anak kag mangin madinalag-on sa kabuhi. Kon ikaw isa ka ginikanan, ano nga sahi sang tawo ang luyag mo sa imo anak? Isa bala ka hamtong nga nagapabalor sa moralidad kag responsabilidad? Isa nga mapatugsilingon sa iban, mapasibusibuon, kag may positibo nga panimuot? Kon amo, palihug binagbinaga ang masunod nga artikulo.