Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Paano naton mapasubo ang balaan nga espiritu sang Dios, kay indi man ini persona?

Si apostol Pablo nagsulat: “Indi pagpasubua ang balaan nga espiritu sang Dios.” (Efeso 4:30, NW) Ginhangop sang iban ining pinamulong subong nagapakita nga ang balaan nga espiritu isa ka persona. Apang, ang mga publikasyon sang “tulugyanan nga matutom” masunson nagahatag sing pasad-sa-Kasulatan kag pasad-sa-maragtas nga mga pamatuod nga wala gintamod sang mga Cristiano sang una ang balaan nga espiritu subong isa ka persona ukon isa ka dios nga tupong sa Labing Mataas kag bahin sang ginatawag nga Trinidad. * (Lucas 12:42) Gani wala ginpatuhuyan ni Pablo ang balaan nga espiritu sang Dios subong persona.

Ang balaan nga espiritu sang Dios amo ang iya di-makita nga aktibo nga kusog. (Genesis 1:2, NW) Si Jesus magabawtismo “sa balaan nga espiritu,” subong nga si Juan nagbawtismo sa tubig. (Lucas 3:16, NW) Sang Pentecostes 33 C.E., mga 120 ka disipulo ang ‘napuno sang balaan nga espiritu’—maathag nga wala sila napuno sang isa ka persona. (Binuhatan 1:​5, 8; 2:​4, 33, NW) Ining mga hinaplas nakabaton sing langitnon nga paglaum, kag gintuytuyan sila sang espiritu sang Dios sa matutom nga pagkabuhi. (Roma 8:​14-​17; 2 Corinto 1:​22) Ang espiritu nagpatubas sing diosnon nga mga bunga kag nagbulig sa ila nga malikawan ang makasasala nga “mga buhat sang unod” nga wala nagapahamuot sa Dios.—Galacia 5:​19-​25.

Kon kita mga alagad sang Dios nga may dutan-on nga paglaum, wala kita mahaplasan sang balaan nga espiritu. Apang, matigayon man naton ang espiritu sang Dios subong sang may langitnon nga paglaum. Gani, mapasubo man naton ang espiritu. Apang paano?

Kon ginasikway naton ang laygay sang Kasulatan nga ginsulat sa idalom sang panuytoy sang balaan nga espiritu, mapalambo naton ang mga batasan nga mahimo magresulta sa hungod nga pagpakasala batok sa espiritu, indi pagkahamuot ni Jehova, kag kalaglagan sa ulihi. (Mateo 12:31, 32) Ayhan wala pa kita nagapakasala sing mabug-at, apang mahimo nga mapalambo naton ang mga panimuot nga mahimo magdul-ong sa aton sa pagpanghikot nga supak sa panuytoy sang espiritu. Sa sini nga mga kahimtangan, mapasubo naton ang balaan nga espiritu.

Kon amo, paano naton malikawan nga mapasubo ang espiritu sang Dios? Dapat gid naton kontrolon ang aton panghunahuna kag mga buhat. Sa iya sulat sa mga taga-Efeso, sa kapitulo 4, naghambal si apostol Pablo tuhoy sa paglikaw sa mga huyog sa di-bunayag nga mga pinamulong, ginahuptan nga kaakig, pagkatamad, kag indi maayo nga hambalanon. Kon nasuklob na naton ang “bag-ong kinaugali” kag magbalik sa malain  nga mga buhat anay, ano ang ginahimo naton? Ginakontra naton ang inspirado-sang-espiritu nga laygay sang Pulong sang Dios, ang Biblia. Sa paghimo sini, mapasubo naton ang balaan nga espiritu.

Sa Efeso kapitulo 5, mabasa naton ang laygay ni Pablo tuhoy sa paglikaw sa indi maayo nga interes sa pagpakighilawas. Ginpalig-on man sang apostol ang mga masigkatumuluo nga likawan ang makahuluya nga paggawi kag malaw-ay nga linahog. Kon indi naton luyag nga mapasubo ang balaan nga espiritu sang Dios, dapat naton ini dumdumon kon nagapili kita sing kalingawan. Ngaa abi interesado kita sa sining mga butang paagi sa paghambal tuhoy sa sini, pagbasa tuhoy sa sini, kag pagtan-aw nga ginaarte ini sa telebisyon ukon sa iban pa?

Sa pagkamatuod, mapasubo naton ang espiritu sa iban pa nga mga paagi. Ang espiritu ni Jehova nagapahiusa sang kongregasyon, apang pananglitan nagapalapta kita sing makahalalit nga kutsokutso ukon nagagrupogrupo kita sa kongregasyon. Wala bala naton ginakontra ang panuytoy sang espiritu padulong sa paghiusa? Sa kabilugan, mapasubo naton ang balaan nga espiritu, kaangay sadtong mga nagtuga sing pagbinahinbahin sa kongregasyon sa Corinto. (1 Corinto 1:​10; 3:​1-4, 16, 17) Mapasubo man naton ang espiritu kon hungod nga wala naton ginatahod ang gintangdo sang espiritu nga mga lalaki sa kongregasyon.—Binuhatan 20:28; Judas 8.

Kon amo, maathag nga maalamon nga binagbinagon naton ang aton panimuot kag mga buhat pasad sa nahibaluan naton nga panuytoy sang balaan nga espiritu nga makita sa Biblia kag sa Cristianong kongregasyon. Dapat man kita ‘magpangamuyo nga may balaan nga espiritu,’ nga nagapauyon sa impluwensia sini kag pirme nagapanghikot suno sa ginasiling sang inspirado nga Pulong sang Dios. (Judas 20, NW) Kabay nga mangin determinado kita nga indi gid mapasubo ang espiritu kundi pirme magpatuytoy sa sini sa kadungganan sang balaan nga ngalan ni Jehova.

Ginpaanggid ni Jesucristo ang kabudlayan sang isa ka manggaranon nga tawo sa pagsulod sa Ginharian sa kabudlayan sang isa ka kamelyo sa pagtinguha nga makalapos sa buho sang dagom. Ginpatuhuyan bala ni Jesus ang literal nga kamelyo kag dagom nga inugpanahi?

Sa tatlo ka teksto sa Kasulatan tuhoy sini, duha ang magkaanggid. Suno sa rekord ni Mateo, si Jesus nagsiling: “Mahapos pa sa kamelyo nga maglapos sa buho sang dagom sangsa isa ka manggaranon nga magsulod sa ginharian sang Dios.” (Mateo 19:24) Sing kaanggid, ang Marcos 10:25 mabasa: “Mahapos pa sa kamelyo nga maglapos sa buho sang dagom sangsa magsulod ang manggaranon sa ginharian sang Dios.”

Ang pila ka reperensia nagasiling nga ang “buho sang dagom” amo anay ang gamay nga gawang sa isa sang dalagku nga mga gawang sang Jerusalem. Kon ang daku nga gawang sirado kon gab-i, ang gamay mahimo mabuksan. Ginpatihan nga makaigo ang kamelyo sa sini. Amo bala ini ang ginpatuhuyan ni Jesus?

Maathag nga indi. Ginpatuhuyan ni Jesus ang dagom nga inugpanahi. Bangod nasapwan sa sina nga duog ang dumaan nga mga dagom nga human sa tul-an kag ang iban human sa metal, mahimo gid nga gingamit ini sing kinaandan sa mga panimalay. Ang Lucas 18:25, (NW), nagadula sang pangduhaduha tuhoy sa pinamulong ni Jesus, kay ginkutlo sini si Jesus nga nagasiling: “Sa katunayan, mas mahapos pa sa isa ka kamelyo nga makalusot sa buho sang dagom nga inugpanahi sangsa isa ka manggaranon nga tawo nga makasulod sa ginharian sang Dios.”

Madamo nga leksikograpo ang nagaugyon sa badbad nga “dagom nga inugpanahi” subong sang pagbadbad sa New World Translation. Ang Griegong tinaga para sa “dagom” sa Mateo 19:24 kag sa Marcos 10:25 (rha·phisʹ) ginkuha sa berbo  nga nagakahulugan “panahi.” Kag ang Griegong termino sa Lucas 18:25 (be·loʹne) gingamit sa pagpatuhoy sa literal nga dagom sa pag-opera. Ang Vine’s Expository Dictionary of Old and New Testament Words nagasiling: “Ang ideya nga ipatuhoy ang ‘buho sang dagom’ sa gamay nga mga gawang daw karon lang ginhimo; wala gid sing pamatuod nga ginhangop ini sing subong sadtong mga tion. Ang tuyo sang Ginuo sa iya ginpamulong amo ang pagpabutyag sang pagkaimposible para sa tawo kag indi kinahanglan nga tinguhaan nga pahapuson ang kabudlayan paagi sa pagpahangop nga ang dagom may tuhay nga ginapatuhuyan kag indi ang kinaandan nga gamit.”—1981, Tomo 3, pahina 106.

Ang iban nagasiling nga ang “kamelyo” sa sining mga bersikulo dapat badbaron nga “lubid.” Ang Griegong mga tinaga para sa lubid (kaʹmi·los) kag sa kamelyo (kaʹme·los) magkaanggid. Apang, ang Griegong tinaga para sa “kamelyo” kag indi ang para sa “lubid” ang makita sa Mateo 19:24 sa pinakadaan nga nagaluntad gihapon nga Griegong mga manuskrito sang Ebanghelyo ni Mateo (ang Sinaitic, ang Vatican Num. 1209, kag ang Alexandrine). Ginsiling nga orihinal nga ginsulat ni Mateo ang iya Ebanghelyo sa Hebreo kag mahimo nga sia mismo ang nagbadbad sini sa Griego. Nahibaluan gid niya ang ginsiling ni Jesus kag gani gingamit niya ang nagakaigo nga tinaga.

Kon amo, ginpatuhuyan ni Jesus ang isa ka literal nga dagom nga inugpanahi kag literal nga kamelyo. Gingamit niya ini agod ipadaku ang pagkaimposible sang isa ka butang. Apang buot silingon bala ni Jesus nga wala gid sing manggaranon nga tawo nga makasulod sa Ginharian? Indi, kay ang pinamulong ni Jesus wala gintuyo nga hangpon sing literal. Naggamit sia sing pagpasobra agod ipakita nga subong nga ang isa ka literal nga kamelyo indi makalapos sa buho sang literal nga dagom nga inugpanahi, imposible para sa isa ka manggaranon nga tawo nga makasulod sa Ginharian kon padayon sia nga magsalig sing daku sa iya manggad kag wala ginauna si Jehova sa iya kabuhi.—Lucas 13:24; 1 Timoteo 6:​17-​19.

Ginpamulong ini ni Jesus pagkatapos lang gid nga ginsikway sang isa ka manggaranon kag lamharon nga manugdumala ang daku nga pribilehiyo nga mangin sumulunod ni Jesus. (Lucas 18:18-24) Ang isa ka manggaranon nga tawo nga ang gugma sa iya mga pagkabutang mas daku pa sangsa espirituwal nga mga butang indi makapaabot nga makatigayon sing kabuhi nga wala sing katapusan sa kahimusan sang Ginharian. Apang, may pila ka manggaranon nga tawo nga nangin mga disipulo ni Jesus. (Mateo 27:57; Lucas 19:​2, 9) Gani ang isa ka manggaranon nga tawo nga mahunahunaon sa iya espirituwal nga kinahanglanon kag nagapangayo sing bulig sang Dios makabaton sing kaluwasan gikan sa Dios.—Mateo 5:3; 19:16-​26.

[Nota]

^ par. 3 Tan-awa ang brosyur nga Dapat Ka Bala Magpati sa Trinidad? nga ginbalhag sang mga Saksi ni Jehova.