Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Ano ang hitabo nga narekord sa Exodo 4:24-26, kag kay sin-o kabuhi ang yara sa katalagman?

Si Moises nagapakadto sa Egipto upod sa iya asawa, nga si Zipora, kag sa iya mga anak nga lalaki, nga sanday Gersom kag Eliezer, sang natabo ang masunod: “Natabo sa dalayunan sa dalanon nga si Jehova nagsugata sa iya kag nagtinguha sa pagpatay sa iya. Nian si Zipora nagkuha sing santikan kag gin-utod ang napunta nga panit sang iya anak nga lalaki kag gintandog ini sa iya mga tiil kag nagsiling: ‘Bangod ikaw isa ka nobyo sa dugo sa akon.’ Gani ginpabay-an niya sia. Nian nagsiling sia: ‘Isa ka nobyo sa dugo sa akon,’ bangod sang sirkunsisyon.” (Exodo 4:​20, 24-26, NW) Bisan pa ini nga teksto indi maathag kag indi mapat-od ang kahulugan, ang Kasulatan nagahatag sing pila ka paathag sa sining mga bersikulo.

Wala ginasambit sing espesipiko sang rekord kon kay sin-o kabuhi ang yara sa katalagman. Apang, makahinakop gid kita nga indi ini ang kabuhi ni Moises, kay bag-o lang sia makabaton sing sugo gikan sa Dios nga pangunahan niya ang mga Israelinhon sa paggua sa Egipto. (Exodo 3:10) Indi mahimo nga sa paglakat niya agod tumanon ini nga asaynment, ibutang sa katalagman sang anghel sang Dios ang kabuhi ni Moises. Busa mahimo nga kabuhi ini sang isa sa iya mga anak nga lalaki. Ang kasuguan nga nauna na nga ginhatag kay Abraham tuhoy sa sirkunsisyon nagsiling: “Ang lalaking di-sirkunsidado nga wala masirkunsidar sa unod sang iya napunta nga panit utdon gikan sa iya katawhan; nalalis niya ang akon katipan.” (Genesis 17:14) Mahimo nga nalipatan ni Moises nga ipasirkunsidar ang iya anak nga lalaki, kag sa amo ang kabuhi sang bata nga lalaki ginbutang sa katalagman sang anghel ni Jehova.

Kay sin-o mga tiil ang natandog sang gin-utod ni Zipora ang napunta nga panit sang iya anak nga lalaki sa pagtadlong sang natabo? Iya sang anghel ni Jehova nga may gahom sa pagpatay sa wala masirkunsidar nga anak nga lalaki. Makatarunganon, kon amo, nga ginpatandog ni Zipora ang napunta nga panit sa mga tiil sang anghel, ginpresentar ini sa iya subong ebidensia nga ginsunod niya ang katipan.

Ang ekspresyon ni Zipora nga “ikaw isa ka nobyo sa dugo sa akon” di-kinaandan. Ano ang ginapahangop sini nga ekspresyon tuhoy sa iya? Paagi sa pagsunod niya sa mga ginapatuman sang katipan sa sirkunsisyon, ginkilala ni Zipora ang pagpakigkatipan kay Jehova. Ang Kasuguan nga katipan nga ginhimo sang ulihi upod sa mga Israelinhon nagpakita nga sa isa ka pagpakigkatipan, si Jehova mahimo makabig subong bana kag ang pihak nga partido subong asawa. (Jeremias 31:32) Gani, sang gintawag si Jehova (paagi sa iya tiglawas nga anghel) subong “isa ka nobyo sa dugo,” daw ginakilala ni Zipora ang pagpasakop niya sa mga kondisyon sini nga katipan. Daw subong bala nga ginbaton niya ang katulad-asawa nga posisyon sa sirkunsisyon nga katipan, kag si Jehova nga Dios ang bana. Diin man sa sini, bangod sang iya desidido nga buhat sang pagkamatinumanon sa ginapatuman sang Dios, ang kabuhi sang iya anak nga lalaki wala na nabutang sa katalagman.