Magdiretso sa kaundan

Magdiretso sa listahan sang kaundan

“Himua ang Hilikuton sang Isa Ka Ebanghelisador”

“Himua ang Hilikuton sang Isa Ka Ebanghelisador”

 “Himua ang Hilikuton sang Isa ka Ebanghelisador”

“Magmaligdong ka sa tanan nga butang, . . . himua ang hilikuton sang isa ka ebanghelisador.”​​—⁠⁠2 TIMOTEO 4:​5, NW.

1. Ano ang ginsugo ni Jesus sa iya mga sumulunod?

ANG ngalan kag mga katuyuan ni Jehova ginabantala sa bug-os nga duta. Ini bangod serioso ang dedikado nga katawhan sang Dios sa ginsugo ni Jesucristo sa iya mga sumulunod sang nagsiling sia: “Lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.”​​—⁠⁠Mateo 28:​19, 20, NW.

2. Ano nga instruksion ang nabaton sang manugtatap nga si Timoteo, kag ano ang isa ka paagi nga matuman sang Cristianong mga manugtatap ang ila ministeryo?

2 Serioso nga gintuman sang mga disipulo ni Jesus sang nahauna nga siglo ini nga sugo. Halimbawa, ginpalig-on ni apostol Pablo ang iya masigka-Cristiano nga manugtatap nga si Timoteo: “Himua ang hilikuton sang isa ka ebanghelisador, tumana sing bug-os ang imo ministeryo.” (2 Timoteo 4:​5, NW) Sa karon, ang isa ka paagi nga ginahimo sang isa ka manugtatap ang iya ministeryo amo ang makugi nga pagbantala sing Ginharian, regular nga nagaministeryo sa latagon. Halimbawa, ang pagpanguna sa pagbantala kag paghanas sa iban isa ka makapaladya nga pribilehiyo para sa manugtatap sa Pagtinuon Sang Kongregasyon sa Libro. Gintuman ni Pablo ang iya personal nga salabton nga ibantala ang maayong balita, kag nagbulig sia sa paghanas sa iban sa ministeryo.​​—⁠⁠Binuhatan 20:20; 1 Corinto 9:​16, 17.

 Makugi nga mga Ebanghelisador sang Una

3, 4. Ano ang mga naeksperiensiahan ni Felipe subong isa ka ebanghelisador?

3 Nakilala ang unang mga Cristiano subong makugi nga mga ebanghelisador. Binagbinaga ang ebanghelisador nga si Felipe. Isa sia sa “pito ka lalaki nga may pamatuod . . . puno sang espiritu kag kaalam” nga ginpili agod managtag nga walay pinilian sing pagkaon adlaw-adlaw sa nagahambal sing Griego kag sing Hebreo nga Cristianong mga balo nga babayi sa Jerusalem. (Binuhatan 6:​1-6, NW) Sang matapos na ining pinasahi nga tulumanon kag nag-inaplaag ang tanan luwas sa mga apostoles bangod sang paghingabot, nagkadto si Felipe sa Samaria. Didto ginbantala niya ang maayong balita kag ginhatagan sia sang balaan nga espiritu sing gahom sa pagpagua sa mga demonyo kag pagpaayo sa piang kag paralisado nga mga indibiduwal. Madamo nga mga Samariahanon ang nagbaton sa mensahe sang Ginharian kag nabawtismuhan. Sang mabatian ini, ginpadala sang mga apostoles nga yara sa Jerusalem sanday apostol Pedro kag Juan sa Samaria agod nga ang bag-o nabawtismuhan nga mga tumuluo makabaton sing balaan nga espiritu.​​—⁠⁠Binuhatan 8:​4-​17.

4 Masunod nga gintuytuyan sang espiritu sang Dios si Felipe sa Etiopiahanon nga eunuco sa dalanon padulong sa Gaza. Sa tapos sang klaro nga paathag ni Felipe tuhoy sa tagna ni Isaias, ining tawo nga “may daku nga pagbulut-an sa idalom ni Candace nga hara sang mga Etiopiahanon” nagtuo kay Jesucristo kag nabawtismuhan. (Binuhatan 8:​26-​38) Pagkatapos sini, nagkadto si Felipe sa Azoto kag dayon sa Cesarea, nga ‘nagawali sing maayong balita sa tanan nga banwa’ sa dalanon. (Binuhatan 8:​39, 40) Isa gid sia ka maayo nga halimbawa sa paghimo sang hilikuton sang isa ka ebanghelisador!

5. Sa ano ilabi na kilala ang apat ka anak nga babayi ni Felipe?

5 Aktibo pa gihapon si Felipe sa ministeryo sa Cesarea pagligad sang mga 20 ka tuig. Sang si Pablo kag si Lucas nagdayon sa iya puluy-an, sia “may apat ka anak nga babaying ulay, nga nagpanagna.” (Binuhatan 21:​8-​10) Mahimo gid nga nahanas sila sing maayo sa espirituwal, makugi sa ministeryo, kag nahatagan pa gani sing pribilehiyo nga magpanagna. Ang kakugi sang mga ginikanan sa ministeryo may maayo nga epekto sa mga anak nga lalaki kag mga anak nga babayi karon, sa amo magapahulag sa ila nga mangin makugi sa pag-ebanghelyo sa bug-os nila nga kabuhi.

Makugi nga mga Ebanghelisador Karon

6. Ano nga kadalag-an ang natigayon sang mga ebanghelisador sang nahauna nga siglo?

6 Sa iya daku nga tagna nga nagapatuhoy sa aton adlaw kag sa tion sang katapusan, si Jesucristo nagsiling: “Ang maayong balita kinahanglan ibantala anay sa tanan nga kapungsuran.” (Marcos 13:10) Ang katapusan magaabot sa tapos mabantala ang maayong balita “sa bug-os nga kalibutan.” (Mateo 24:14) Samtang ginabantala ni Pablo kag sang iban pa nga mga ebanghelisador sang nahauna nga siglo ang maayong balita, madamo ang nangin mga tumuluo, kag gintukod ang mga kongregasyon sa lainlain nga mga duog sa bug-os nga Emperyo sang Roma. Ang mga gulang nga gintangdo sa pag-alagad sa sining mga kongregasyon nagpakigbahin upod sa ila mga kauturan sa pag-ebanghelyo kag napalapnag ang pagbantala nga hilikuton. Ang pulong ni Jehova naglambo kag nagmadinalag-on sadtong mga adlaw, kaangay man sa karon bangod minilyon ka mga Saksi ni Jehova ang nagahimo sang hilikuton sang mga ebanghelisador. (Binuhatan 19:20) Isa ka bala sa sining malipayon nga mga nagadayaw kay Jehova?

7. Ano ang ginahimo karon sang mga manugbantala sang Ginharian?

7 Madamo nga mga manugbantala sang Ginharian karon ang nagahimulos sa mga kahigayunan nga mapadaku ang ila bahin sa pag-ebanghelyo. Linibo ang nangin misyonero, kag ginatos ka libo ang nagapakigbahin sa bug-os tion nga pag-ebanghelyo subong mga regular kag auxiliary payunir. Kag daw ano kaayo nga hilikuton ang ginahimo sang mga lalaki, mga babayi, kag mga kabataan nga nagaalagad subong makugi nga mga manugbantala sang Ginharian! Sa pagkamatuod, ang tanan nga katawhan ni Jehova nagaagom sang iya bugana nga mga pagpakamaayo samtang nagaalagad sila sa iya sing abaga sa abaga subong Cristianong mga ebanghelisador.​​—⁠⁠Sofonias 3:​9, NW.

8. Ano nga hilikuton sa pagbutang sing tanda ang ginahimo karon, kag sin-o ang nagahimo sini?

8 Ginhatag sang Dios sa hinaplas nga mga sumulunod ni Jesus ang salabton nga ibantala ang maayong balita sa bug-os nga duta. Ang nagabulig sa ila sa sining hilikuton sa pag-ebanghelyo  amo ang nagadamo nga ‘iban nga mga karnero’ ni Cristo. (Juan 10:16) Sing matagnaon, ining nagaluwas-kabuhi nga hilikuton ginapaanggid sa pagbutang sing tanda sa mga agtang sang mga nagapanghayhay kag nagabakho sa makangilil-ad nga mga butang nga nagakatabo karon. Sa indi madugay, laglagon na ang mga malauton. Samtang wala pa ini, isa gid ka pribilehiyo nga dalhon ang nagaluwas-kabuhi nga mga kamatuoran sa mga pumuluyo sang duta!​​—⁠⁠Ezequiel 9:​4-6, 11.

9. Paano mabuligan ang mga bag-uhan sa ministeryo?

9 Kon madugaydugay na kita nga nagapakigbahin sa hilikuton sa pag-ebanghelyo, mahimo gid nga mabuligan naton ang mga bag-uhan sa kongregasyon. Kon kaisa, mahimo naton sila iupod sa ministeryo. Ang mga gulang ginapalig-on nga himuon ang tanan nga masarangan nila agod pabakuron sa espirituwal ang mga masigkatumuluo. Daku ang mahimo sang maayong mga panikasog sang mapainubuson nga mga manugtatap agod buligan ang iban nga mangin makugi kag mabungahon nga mga ebanghelisador.​​—⁠⁠2 Pedro 1:​5-8.

Pagpanaksi sa mga Pamalay

10. Ano nga halimbawa sa ministeryo ang ginhatag ni Cristo kag sang iya una nga mga sumulunod?

10 Naghatag si Jesucristo sa iya mga sumulunod sing isa ka maayo gid nga halimbawa subong isa ka ebanghelisador. Tuhoy sa ministeryo ni Cristo kag sang iya mga apostoles, ang Pulong sang Dios nagasiling: “Naglibot sia sa mga banwa kag mga minuro, nga nagawali kag nagadala sang maayong balita sang ginharian sang Dios. Kag kaupod niya ang napulog-duha.” (Lucas 8:1) Kamusta naman ang mga apostoles mismo? Sang ginbubo ang balaan nga espiritu sang Pentecostes sang 33 C.⁠E., “sa adlaw-adlaw sa templo kag sa puluy-an wala sila mag-untat sa pagpanudlo kag pagwali kay Jesus subong nga Cristo.”​​—⁠⁠Binuhatan 5:⁠42.

11. Suno sa Binuhatan 20:​20, 21, ano ang ginhimo ni apostol Pablo sa iya ministeryo?

11 Bangod sang iya makugi nga pag-ebanghelyo, nakasiling si apostol Pablo sa taga-Efeso nga Cristianong mga gulang: “Wala ako mag-isol sa pag-asoy sa inyo sang bisan ano nga mapuslanon, kag nagatudlo sa inyo sa dayag kag sa pamalaybalay.” Sang si Pablo ‘nagatudlo sa pamalaybalay,’ mga puluy-an bala sang iya mga masigkasumilimba kay Jehova ang ginkadtuan niya, nga nagaduaw sa mga masigkatumuluo subong pagbantay sa ila? Indi, kay nagpadayon sia sa pagpaathag: ‘Nagapanaksi ako sa mga Judiyo kag sa mga Griego sang paghinulsol sa Dios kag pagtuo sa aton Ginuong Jesucristo.’ (Binuhatan 20:​20, 21) Sa kabilugan, ang mga nakadedikar na kay Jehova indi magkinahanglan sing instruksion tuhoy sa “paghinulsol sa Dios kag pagtuo sa aton Ginuong Jesucristo.” Ginhanas ni Pablo ang taga-Efeso nga Cristianong mga gulang sa pagpamalaybalay nga ministeryo samtang gintudluan naman niya ang mga di-tumuluo tuhoy sa paghinulsol kag pagtuo. Sa paghimo sini, gin-ilog ni Pablo ang metodo nga ginsugdan ni Jesus.

12, 13. Nahisanto sa Filipos 1:​7, ano ang nahimo sang katawhan ni Jehova tuhoy sa ila kinamatarong sa pagbantala?

12 Ang pagpamalaybalay nga ministeryo mahimo nga mabudlay. Halimbawa, nagapangakig ang iban kon magduaw kita sa ila puluy-an nga dala ang mensahe sang Biblia. Indi naton luyag nga paakigon ang mga tawo. Apang, ang pamalaybalay nga ministeryo Makasulatanhon, kag ginapahulag kita sang gugma sa Dios kag sa isigkatawo nga magpanaksi sa sining paagi. (Marcos 12:28-​31) Agod ‘mapangapinan kag legal nga matukod’ ang aton kinamatarong sa pagbantala sa mga pamalay, nagpasaka kita sing mga kaso sa mga hukmanan, lakip ang Korte Suprema sang Estados Unidos. (Filipos 1:​7, NW) Sa halos tanan nga mga kaso nagdesisyon ini nga korte pabor sa aton. Ang isa ka halimbawa sini amo ang masunod nga desisyon:

13 “Ang pagpanagtag sing relihioso nga mga pampleta isa ka madugay na nga porma sang pagmisyonero nga ebanghelyo​​—⁠⁠subong kadugay sang maimbento ang mga makina sa pag-imprinta. Isa ini ka mabaskog nga puersa sang nanuhaytuhay nga relihiosong mga kahublagan sa sulod sang mga tinuig. Ini nga porma sang pag-ebanghelyo ginagamit karon, sa daku nga kasangkaron sang nanuhaytuhay nga relihiosong mga sekta nga may mga kolporteur nga nagadala sing Ebanghelyo sa linibo ka puluy-an kag nagatinguha paagi sa personal nga mga pagduaw sa pagganyat sing mga magapasakop sa ila pagtuluuhan. . . . Ini nga porma sang relihioso nga pagpanghikot ginahatagan sing importansia sang Nahauna nga Amienda [sa Konstitusyon sang Estados Unidos] subong sang importansia nga ginahatag sini sa pagsimba sa mga simbahan kag pagsermon gikan sa mga pulpito.”​​—⁠⁠Murdock v. Pennsylvania, 1943.

 Ngaa Dapat Kita Magpadayon sa Pagbantala?

14. Ano ang mahimo mangin amat-amat nga epekto sa ulihi sang aton ministeryo?

14 Madamo ang mga rason kon ngaa dapat kita magpanaksi sa mga pamalay. Sa kada tion nga magduaw kita sa isa ka tagbalay, nagatinguha kita sa pagtanom sing isa ka binhi sang Makasulatanhon nga kamatuoran. Paagi sa mga pagduaw liwat, nagatinguha kita nga bunyagan ini. Kag mahimo nga ini amat-amat nga magalambo sa ulihi, kay si Pablo nagsulat: “Ako nagtanom, si Apolos nagbunyag, apang ang Dios nagpatubo.” (1 Corinto 3:6) Gani magpadayon kita sa ‘pagtanom kag sa pagbunyag,’ nagasalig nga ‘patubuon’ ini ni Jehova.

15, 16. Ngaa sulitsulit kita nga nagaduaw sa mga tawo sa ila puluy-an?

15 Ginahimo naton ang hilikuton sang mga ebanghelisador bangod yara sa katalagman ang mga kabuhi. Paagi sa pagbantala mahimo naton maluwas ang aton kaugalingon kag ang mga magapamati sa aton. (1 Timoteo 4:16) Kon nahibaluan naton nga yara sa katalagman ang kabuhi sang isa ka tawo, pakulahaw lamang bala nga magatinguha kita sa pagbulig sa iya? Indi gid! Bangod kaluwasan ang nadalahig, sulitsulit nga nagaduaw kita sa mga tawo sa ila puluy-an. Nagabag-o ang mga kahimtangan. Ang isa nga wala anay namati bangod masako sia mahimo nga handa na mamati sa mensahe sang Biblia sa masunod nga tion. Mahimo nga lain naman nga katapo sang pamilya ang magabukas sa ganhaan, kag mahimo nga magdul-ong ini sa paghambalanay tuhoy sa Biblia.

16 Indi lamang ang ila mga kahimtangan kundi ang panimuot man sang mga tagbalay ang mahimo magbag-o. Halimbawa, ang masakit nga pagkadula sang isa nga hinigugma bangod sa kamatayon mahimo nga magpahulag sa isa ka indibiduwal nga mamati sa mensahe sang Ginharian. Luyag naton lugpayan ini nga tawo, ipahibalo sa iya ang iya espirituwal nga kinahanglanon, kag ipakita sa iya kon paano ini mapaayawan.​​—⁠⁠Mateo 5:​3, 4, NW.

17. Ano ang panguna gid nga rason kon ngaa nagabantala kita?

17 Ang panguna gid nga rason kon ngaa nagapamalaybalay kita sa aton pagpanaksi ukon nagapakigbahin sa iban nga mga porma sang Cristianong ministeryo amo ang handum nga makapakigbahin kita sa pagpakilala sa ngalan ni Jehova. (Exodo 9:​16; Salmo 83:18) Daw ano ka makapaladya kon ang aton pag-ebanghelyo nagabulig sa mga nagahigugma sa kamatuoran kag pagkamatarong nga mangin mga dumalayaw ni Jehova! “Kamo nga mga pamatan-on nga lalaki kag kamo man nga mga ulay, kamo nga mga tigulang nga lalaki pati na ang mga bata nga lalaki,” amba sang salmista. “Magdayaw sila sang ngalan ni Jehova, kay ang iya ngalan lamang ang di-malab-ot sa kataason. Ang iya dignidad yara sa ibabaw sang duta kag langit.”​​—⁠⁠Salmo 148:​12, 13, NW.

Ang Pag-ebanghelyo Nagahatag sa Aton sing Personal nga Benepisyo

18. Paano kita nagabenepisyo gikan sa pag-ebanghelyo?

18 Ang pag-ebanghelyo nagahatag sa aton sing personal nga benepisyo sa nanuhaytuhay nga mga paagi. Ang pagpamalaybalay nga dala ang maayong balita nagabulig sa aton nga mapalambo ang pagkamapainubuson, ilabi na kon wala kita ginaabiabi sa aton pagduaw. Agod mangin epektibo nga mga ebanghelisador, dapat naton ilugon si Pablo, nga ‘nangin tanan nga butang sa tanan nga tawo, agod nga sa tanan nga bagay maluwas niya ang iban.’ (1 Corinto 9:​19-​23) Ang aton maeksperiensiahan sa ministeryo nagabulig sa aton nga mangin mataktikanhon. Paagi sa pagsandig kay Jehova kag pagpili sang aton mga tinaga, maaplikar naton ang laygay ni Pablo: “Magpamulong kamo sa gihapon nga may bugay, nga naunawan sing asin, agod nga makahibalo kamo kon ano ang dapat nga pagsabat ninyo sa tagsatagsa.”​​—⁠⁠Colosas 4:6.

19. Paano ang balaan nga espiritu nagabulig sa mga ebanghelisador?

19 Ang hilikuton sa pag-ebanghelyo nagapahulag man sa aton nga magsandig sa balaan nga espiritu sang Dios. (Zacarias 4:6) Nian, ang mga bunga sini​​—⁠⁠“gugma, kalipay, paghidait, pagbatas, pagkalulo, pagkaayo, pagkatutom, pagkamapainubuson, pagpugong sang kaugalingon”​​—⁠⁠mangin dayag sa aton ministeryo. (Galacia 5:​22, 23) May epekto ini sa aton mga pagpakig-angot sa mga tawo, kay ang pagsunod sa pagtuytoy sang espiritu nagabulig sa aton nga mangin mahigugmaon, malipayon kag mahidaiton, mabinatason kag malulo, magpakita sing kaayo kag pagtuo, kag sing pagkamapainubuson kag pagpugong sang kaugalingon samtang ginawali naton ang maayong balita.

20, 21. Ano ang pila ka pagpakamaayo kag mga benepisyo sang maukod nga pag-ebanghelyo?

20 Ang isa pa ka pagpakamaayo nga mabaton naton subong mga ebanghelisador amo ang  dugang nga pagkamahinuklugon. Kon isugid sang mga tawo ang ila mga problema​​—⁠⁠balatian, pagkawalay trabaho, mga pagtilaw sa puluy-an​​—⁠⁠wala kita nagapanghikot subong mga manuglaygay, kundi ginapaambit naton sa ila ang makapalig-on kag makalugpay nga mga teksto. Nagakabalaka kita sa mga tawo nga nabulagan sa espirituwal apang daw may gugma sa pagkamatarong. (2 Corinto 4:4) Kag makalilipay gid ang paghatag sing espirituwal nga bulig sa mga “husto nga nahuyog sa kabuhi nga walay katapusan”!​​—⁠⁠Binuhatan 13:​48, NW.

21 Ang regular nga pagpakigbahin sa hilikuton sa pag-ebanghelyo nagabulig sa aton nga isentro ang aton hunahuna sa espirituwal nga mga butang. (Lucas 11:34) Mapuslanon gid ini, kay kon indi amo sini, mahimo nga masulay kita sang materyalismo nga kinaandan sa kalibutan karon. Si apostol Juan naglaygay sa mga Cristiano: “Dili ninyo paghigugmaon ang kalibutan ukon ang mga butang nga yara sa kalibutan. Kon ang bisan sin-o nagahigugma sang kalibutan, ang gugma tungod sa Amay wala sa iya. Kay ang tanan nga yara sa kalibutan, ang kailigbon sang unod kag ang kailigbon sang mga mata kag ang bugal sang kabuhi, indi iya sang Amay kundi iya sang kalibutan. Kag ang kalibutan nagataliwan, kag ang kailigbon sini; apang ang nagahimo sang kabubut-on sang Dios nagapadayon sa gihapon.” (1 Juan 2:​15-​17) Ang maukod nga pag-ebanghelyo nga nagabugana sa hilikuton sang Ginuo nagabulig sa aton nga indi paghigugmaon ang kalibutan.​​—⁠⁠1 Corinto 15:58.

Magtipon sing mga Bahandi sa Langit

22, 23. (a) Ano nga mga bahandi ang ginatipon sang Cristianong mga ebanghelisador? (b) Paano ang masunod nga artikulo magabulig sa aton?

22 Ang makugi nga pagbantala sa Ginharian nagadala sing dayon nga mga benepisyo. Ginpakita ini ni Jesus sang nagsiling sia: “Dili kamo magtipon sa inyo kaugalingon sing mga bahandi sa duta, diin ang sipit kag ang tuktok nagapapas, kag diin ang mga makawat nagaguhab kag nagapangawat, kundi magtipon kamo sa inyo kaugalingon sing mga bahandi sa langit, diin walay sipit kag tuktok nga nagapapas kag diin ang mga makawat indi magguhab kag magpangawat. Kay kon diin ang inyo bahandi, didto man ang inyo tagipusuon.”​​—⁠⁠Mateo 6:​19-​21.

23 Kabay nga magpadayon kita sa pagtipon sing mga bahandi sa langit, kay nahibaluan naton nga wala na sing pribilehiyo nga maglabaw pa sa pagtiglawas sa Soberanong Ginuong Jehova subong iya mga Saksi. (Isaias 43:10-​12) Samtang ginatuman naton ang ginapahimo sa aton subong mga ministro sang Dios, mahimo gid nga mangin subong kita sang isa ka nobentahon na nga Cristianong babayi nga nagsiling tuhoy sa iya madugay na nga pag-alagad sa Dios: “Nagapasalamat ako kay Jehova bangod sa akon bug-os nga pag-alagad sa iya ginbaton niya ako walay sapayan sang akon mga kakulangan, kag hugot ako nga nagapangamuyo nga sia mangin akon mahigugmaon nga Amay tubtob sa walay katubtuban.” Kon pakabahandion man naton ang aton kaangtanan sa Dios, pat-od nga handumon naton nga himuon sing bug-os ang hilikuton sang isa ka ebanghelisador. Buligan kita sang masunod nga artikulo kon paano naton matuman sing bug-os ang aton ministeryo.

Paano Mo Sabton?

• Ngaa dapat naton himuon ang hilikuton sang isa ka ebanghelisador?

• Ano ang masiling mo tuhoy sa hilikuton sang mga ebanghelisador sang una kag karon?

• Ngaa nagapamalaybalay kita sa aton pagpanaksi?

• Paano ikaw nagabenepisyo gikan sa paghimo sang hilikuton sang isa ka ebanghelisador?

[Mga Pamangkot sa Pagtinuon]

[Retrato sa pahina 10]

Ang mga ebanghelisador kaangay ni Felipe kag sang iya mga anak nga babayi may malipayon nga mga katumbas sa karon

[Retrato sa pahina 14]

Paano ikaw personal nga nagabenepisyo samtang ginapaambit mo ang maayong balita sa iban?