Magdiretso sa kaundan

Magdiretso sa listahan sang kaundan

Mga Babayi nga Nagpahalipay sang Tagipusuon ni Jehova

Mga Babayi nga Nagpahalipay sang Tagipusuon ni Jehova

 Mga Babayi nga Nagpahalipay sang Tagipusuon ni Jehova

“Kabay nga balusan ni Jehova ang imo ginhimo, kag kabay nga may yara himpit nga suhol para sa imo gikan kay Jehova.”​​—⁠RUT 2:⁠12.

1, 2. Paano kita makabenepisyo paagi sa pagbinagbinag sa mga halimbawa sang mga babayi sa Biblia nga nagpahalipay sang tagipusuon ni Jehova?

ANG kahadlok sa Dios nagtiklod sa duha ka babayi nga indi pagtumanon ang sugo ni Paraon. Ang pagtuo nagpahulag sa isa ka makihilawason nga babayi nga ibutang sa katalagman ang iya kabuhi agod amligan ang duha ka Israelinhon nga mga lampitaw. Ang pagkamahinantupon kag pagkamapainubuson sa tion sang krisis nagbulig sa isa ka babayi nga luwason ang madamo nga kabuhi kag punggan nga makasala sa dugo ang hinaplas ni Jehova. Ang pagtuo kay Jehova nga Dios upod ang espiritu sang pagkamaabiabihon nagpahulag sa isa ka babayi nga balo kag iloy nga ihatag ang katapusan na lang niya nga pagkaon sa isa ka manalagna sang Dios. Pila lamang ini sa madamo nga mga halimbawa sang mga babayi sa Kasulatan nga nagpahalipay sang tagipusuon ni Jehova.

2 Ang panimuot ni Jehova sa sining mga babayi kag ang pagpakamaayo niya sa ila nagapakita nga mas importante sa iya ang espirituwal nga mga kinaiya sangsa kon bala ang isa lalaki ukon babayi. Sa kalibutan karon nga nagasalimuang sa pisikal nga mga butang, mabudlay gid nga unahon sang isa ang iya espirituwalidad. Apang mahimo niya ini unahon, subong sang ginapakita sang minilyon ka mahinadlukon-sa-Dios nga mga babayi nga nagahuman sa daku nga bahin sang katawhan sang Dios sa karon. Ginailog sining Cristianong mga babayi ang pagtuo, paghantop, pagkamaabiabihon, kag iban pa maayo nga mga kinaiya nga ginpakita sang mahinadlukon-sa-Dios nga mga babayi nga ginsambit sa Biblia. Siempre pa, luyag man ilugon sang Cristianong mga lalaki ang mga kinaiya nga ginpakita sining huwaran nga mga babayi sang una. Agod makita kon paano naton ini mahimo sa daku nga kasangkaron, binagbinagon naton sing mas detalyado ang kasaysayan sa Biblia tuhoy sa mga babayi nga ginsambit sa panugod.​—⁠Roma 15:⁠4; Santiago 4:8.

Ang mga Babayi nga Wala Magtuman sa Sugo ni Paraon

3, 4. (a) Ngaa wala gintuman ni Sifra kag ni Pua ang sugo ni Paraon nga pamatyon ang tanan nga bag-ong bun-ag nga Israelinhon nga mga lalaki? (b) Paano ginbalusan ni Jehova ang duha ka partera bangod sang ila kaisog kag diosnon nga kahadlok?

3 Sa mga pagdungog sa kaso sa Nuremberg, nga ginhimo sa Alemanya pagkatapos sang Bug-os Kalibutan nga Inaway II, gindepensahan sang madamo nga ginsentensiahan sing pagkabilanggo sa sala nga pagpamatay ang mga krimen nga ginhimo nila paagi sa pagsiling nga ginsunod lamang nila ang ginsugo sa ila. Ipaanggid karon sila sa duha ka Israelinhon nga mga partera, nga sanday Sifra kag Pua, nga nagpuyo sa dumaan nga Egipto sa tion sang paggahom sang wala mahingalanan apang mapiguson nga Paraon. Bangod sang kahadlok nga nagadamo ang populasyon sang mga Hebreo, ginsugo ni Paraon ang duha ka partera nga pamatyon ang tanan nga bag-ong bun-ag nga Hebreong mga lalaki. Ano ang ginhimo sang mga babayi sa sining malaut nga sugo? “Wala [sila] maghimo suno sa ginsugo sa ila sang hari sang Egipto, kundi gintipigan nila nga buhi ang kabataan nga lalaki.” Ngaa wala mahadlok sa tawo ining mga babayi? Bangod “nahadlok [sila] sa matuod nga Dios.”​​—⁠Exodo 1:​15, 17; Genesis 9:6.

4 Huo, ang mga partera nagdangop kay Jehova, kag sia naman, nangin “taming” sa ila, kag gin-amligan niya sila gikan sa kasingkal ni Paraon. (2 Samuel 22:31; Exodo 1:​18-​20) Apang indi lamang amo sini ang ginbalos ni Jehova sa ila. Ginhatagan niya si Sifra kag si Pua sang ila kaugalingon nga mga pamilya. Ginpadunggan pa gani niya ining mga babayi paagi sa pagsulat sang ila mga ngalan kag mga binuhatan sa iya inspirado  nga Pulong agod mabasa sang ulihi nga mga kaliwatan, samtang ang ngalan naman ni Paraon wala na madumduman.​​—⁠Exodo 1:​21; 1 Samuel 2:​30b; Hulubaton 10:7.

5. Paano karon ginapakita sang madamong Cristianong mga babayi ang panimuot nga kaangay sa panimuot ni Sifra kag ni Pua, kag paano sila balusan ni Jehova?

5 May mga babayi bala karon nga kaangay nanday Sifra kag Pua? Huo, may yara! Kada tuig, linibo sang subong sini nga mga babayi ang maisog nga nagabantala sing nagahatag-kabuhi nga mensahe sang Biblia sa mga kadutaan diin ginadumili ini sang “sugo sang hari,” sa amo ginabutang sa katalagman ang ila kahilwayan ukon ang ila kabuhi pa gani. (Hebreo 11:23; Binuhatan 5:​28, 29) Bangod sang ila gugma sa Dios kag sa isigkatawo, ining maisog nga mga babayi wala magtugot nga may magapauntat sa ila sa pagpaambit sing maayong balita sang Ginharian sang Dios sa iban. Gani, madamong Cristianong mga babayi ang nagaatubang sing pagpamatok kag paghingabot. (Marcos 12:​30, 31; 13:​9-​13) Kaangay ni Sifra kag ni Pua, nahibaluan gid ni Jehova ang mga buhat sining maayo gid kag maisog nga mga babayi, kag ipakita niya ang iya gugma sa ila paagi sa pagtipig sang ila ngalan sa iya “tulun-an sang kabuhi,” kon magbatas sila sing matutom tubtob sa katapusan.​—⁠Filipos 4:⁠3; Mateo 24:13.

Ginpahalipay sang Isa Anay ka Makihilawason ang Tagipusuon ni Jehova

6, 7. (a) Ano ang nahibaluan ni Rahab tuhoy kay Jehova kag sa iya katawhan, kag paano sia naapektuhan sini nga ihibalo? (b) Paano ginapadunggan sang Pulong sang Dios si Rahab?

6 Sang tuig 1473 B.⁠C.⁠E., si Rahab, nga isa ka makihilawason, nagapuyo sa siudad sang Jerico sa Canaan. Maathag gid nga si Rahab isa ka babayi nga madamo sing nahibaluan. Sang nagdangop sa iya puluy-an ang duha ka Israelinhon nga mga lampitaw, ginsaysay niya sa ila ang espesipiko nga mga detalye tuhoy sa milagruso nga paggua (Exodo) sang Israel gikan sa Egipto, bisan pa natabo ini 40 ka tuig na ang nakalipas! Nahibaluan man niya ang ulihi nga mga kadalag-an sang Israel batok kay Hari Sihon kag kay Hari Og nga mga Amornon. Talupangda ang epekto sini nga ihibalo sa iya. Nagsiling sia sa mga lampitaw: “Nakahibalo ako nga pat-od nga ihatag ni Jehova sa inyo ang duta, . . . kay si Jehova nga inyo Dios amo ang Dios sa langit sa ibabaw kag sa duta sa idalom.” (Josue 2:​1, 9-11) Huo, ang tagipusuon ni Rahab natandog gid sang iya nahibaluan tuhoy kay Jehova kag sa Iya mga ginhimo para sa Israel kag nagtiklod ini kay Rahab nga magtuo sa Iya.​—⁠Roma 10:10.

7 Ang pagtuo ni Rahab nagpahulag sa iya nga magpanghikot. Gin-abiabi niya ang Israelinhon nga mga lampitaw sa “mahidaiton nga paagi,” kag gintuman niya ang ila nagaluwas-kabuhi nga mga instruksion sang ginsalakay sang Israel ang Jerico. (Hebreo 11:31; Josue 2:18-21) Pat-od gid nga ang mga buhat sang pagtuo ni Rahab nagpahalipay sang tagipusuon ni Jehova, kay gin-inspirar niya ang Cristianong disipulo nga si Santiago nga ilakip ang iya ngalan upod kay Abraham, nga abyan sang Dios, subong huwaran nga dapat ilugon sang mga Cristiano. Si Santiago nagsulat: “Sa amo man nga paagi indi bala nga si Rahab nga makihilawason ginpahayag man nga matarong paagi sa mga binuhatan, pagkatapos niya ginbaton sing maabiabihon ang mga mensahero kag ginpagua sila sa liwan nga dalan?”​—⁠Santiago 2:25.

8. Paano ginpakamaayo ni Jehova si Rahab bangod sang iya pagtuo kag pagkamatinumanon?

8 Ginbalusan ni Jehova si Rahab sa madamo nga paagi. Una, milagruso nga gintipigan niya ang kabuhi ni Rahab kag sang tanan nga nagdangop sa iya puluy-an​—⁠nga amo, “ang panimalay sang iya amay kag ang tanan nga iya.” Nian gintugutan niya sila nga magpuyo sa “tunga sang Israel,” diin ginkabig sila subong mga tumandok. (Josue 2:​13; 6:​22-​25; Levitico 19:​33, 34) Apang indi lamang amo sini ang ginbalos ni Jehova sa iya. Ginhatagan man ni Jehova si Rahab sing kadungganan nga mangin katigulangan ni Jesucristo. Daw ano gid nga pagpakita sing mahigugmaon nga kaayo sa isa ka Canaanhon nga babayi nga sumilimba anay sang mga idolo!⁠ *​​—⁠Salmo 130:​3, 4.

9. Paano ang panimuot ni Jehova kay Rahab kag sa pila ka Cristianong mga babayi sang unang siglo mangin makapalig-on sa pila ka babayi sa karon?

9 Kaangay ni Rahab, gintalikdan sang pila ka Cristianong mga babayi, halin sang unang siglo tubtob karon, ang imoral nga pagkabuhi agod pahamut-an ang Dios. (1 Corinto 6:9-11) Pat-od gid nga ang pila sa ila nagdaku sa palibot nga kaanggid sadto anay sa dumaan nga Canaan, diin ang imoralidad lapnag kag ginatamod pa gani subong normal. Apang, ginbag-o nila ang ila pagkabuhi bangod ginpahulag sila sang pagtuo nga napasad sa sibu nga ihibalo sang Kasulatan. (Roma 10:17) Gani, masiling man tuhoy sa sining mga babayi nga “wala sila ginakahuya sang Dios, nga pagtawgon nga ila Dios.” (Hebreo 11:16) Isa gid ini ka kadungganan!

Ginpakamaayo Bangod sang Iya Pagkamahinantupon

10, 11. Ano nga mga sirkunstansia may kaangtanan kay Nabal kag kay David ang nagtiklod kay Abigail nga magpanghikot?

10 Madamong matutom nga mga babayi sang una ang nagpakita sing pagkamahinantupon sa tumalagsahon nga paagi, amo nga nangin hamili sila sa katawhan ni Jehova. Ang isa sini nga babayi amo si Abigail, nga asawa ni Nabal, nga isa ka Israelinhon nga manggaranon nga tag-iya sang duta. Ang pagkamahinantupon ni Abigail nangin kabangdanan agod maluwas ang mga kabuhi kag mapunggan nga magpakasala sa dugo si David, nga palaabuton nga hari sang Israel. Mabasa naton ang sugilanon tuhoy kay Abigail nga narekord sa 1 Samuel kapitulo 25.

11 Sa panugod sang sugilanon, si David kag ang iya mga sumulunod nagkampo malapit sa mga panong ni Nabal, nga ila gin-amligan nga walay bayad adlaw kag gab-i bangod sang ila maayong kabubut-on sa ila masigka-Israelinhon nga si Nabal.  Sang maubos ang mga suplay ni David, ginsugo niya ang napulo ka pamatan-on nga lalaki nga magpangayo sing pagkaon kay Nabal. May kahigayunan na karon si Nabal nga balusan si David kag padunggan sia subong hinaplas ni Jehova. Apang kabaliskaran ang ginhimo ni Nabal. Sa daku nga kaakig, gin-insultuhan niya si David kag ginpalakat ang mga pamatan-on nga wala sing dala. Sang nabatian ini ni David, gintipon niya ang 400 ka armado nga kalalakin-an kag naghanda sa pagtimalos. Nabalitaan ni Abigail ang masakit nga sabat sang iya bana kag maabtik kag mainandamon nga nagpanghikot sia agod pakalmahon si David paagi sa pagpadala sing madamo nga suplay. Nian personal sia nga nagkadto kay David.​—Bersikulo 2-20.

12, 13. (a) Paano si Abigail nangin mahinantupon kag matutom kay Jehova kag sa Iya isa nga hinaplas? (b) Ano ang ginhimo ni Abigail sang nagpauli sia, kag ano ang nangin resulta para sa iya?

12 Sang nasugata ni Abigail si David, ang iya mapainubuson nga pagpangabay sing kaluoy nagpakita sang iya tudok nga pagtahod sa hinaplas ni Jehova. “Si Jehova sa pagkamatuod magahimo sing balay nga malig-on sa akon ginuo, bangod nga ang akon ginuo nagapakig-away sang mga inaway ni Jehova,” siling niya, kag nagdugang pa sia nga si David tangduan ni Jehova subong pangulo sa Israel. (Bersikulo 28-30) Sa amo man nga tion, si Abigail nagpakita sing kaisog paagi sa pagsiling kay David nga, kon indi mapunggan ang iya pagtinguha nga magtimalos, magadul-ong ini sa pagpakasala sa dugo. (Bersikulo 26, 31) Nakamarasmas si David bangod sang pagkamapainubuson, tudok nga pagtahod, kag mahinantupon nga panghunahuna ni Abigail. Sia nagsabat: “Dalayawon si Jehova ang Dios sang Israel, nga nagpadala sa imo sining adlaw sa pagsugata sa akon! Kag bulahan ang imo pagkamahinantupon, kag bulahan ikaw nga nagpugong sa akon sining adlaw gikan sa pagpakasala sa dugo.”​—⁠Bersikulo 32, 33.

13 Sang makapauli, maisugon nga gintinguhaan ni Abigail nga sugiran ang iya bana tuhoy sa ginregalo niya kay David. Apang, sang nakita ni Abigail ang iya bana, “tama sia kahubog.” Gani naghulat si Abigail tubtob maumpawan sa kahubog si Nabal kag nian ginsugiran sia. Ano ang reaksion ni Nabal? Nakayasan sia sing daku amo nga daw naparalisar sia. Napulo ka adlaw sang ulihi napatay sia sa kamot sang Dios. Sang nabalitaan ni David ang tuhoy sa pagkapatay ni Nabal, gintanyagan niya nga pangasaw-on si Abigail, nga gindayaw niya kag gintahod sing daku. Ginbaton ni Abigail ang tanyag ni David.​—Bersikulo 34-42.

Mangin Kaangay Ka Bala ni Abigail?

14. Ano nga mga kinaiya ni Abigail ang luyag naton palambuon sa daku pa nga kasangkaron?

14 May nakita ka bala nga pila ka kinaiya ni Abigail nga luyag mo​—⁠lalaki ka man ukon babayi⁠—nga palambuon sa daku pa nga kasangkaron? Ayhan luyag mo magpanghikot sing mas mainandamon kag mahinantupon kon mag-utwas ang mga kabudlayan. Ukon mahimo luyag mo maghambal sing matawhay kag makatarunganon kon ang iban sa imo palibot nangin emosyonal. Kon amo, ngaa indi mo ini ipangamuyo kay Jehova? Nagasaad sia nga hatagan niya sing kaalam, paghantop, kag ikasarang sa pagpamensar ang tanan nga ‘padayon nga nagapangayo nga may pagtuo.’​—⁠Santiago 1:​5, 6; Hulubaton 2:1-6, 10, 11.

15. Sa idalom sang anong mga kahimtangan importante gid para sa Cristianong mga babayi nga ipakita ang mga kinaiya ni Abigail?

15 Ining maayo nga mga kinaiya importante gid para sa isa ka babayi nga may di-tumuluo nga bana nga wala nagasunod sa mga prinsipio sang Biblia. Ayhan nagainom sia sing sobra. Ginalauman nga bag-uhon sini nga mga lalaki ang ila dalanon. Madamo ang naghimo sini​​—⁠sa masami bangod sang kalulo, tudok nga pagtahod, kag putli nga paggawi sang ila mga asawa.​—⁠1 Pedro 3:​1, 2, 4.

16. Bisan ano man ang iya kahimtangan sa puluy-an, paano mapakita sang isa ka Cristianong utod nga babayi nga ginapakabahandi niya ang iya kaangtanan kay Jehova labaw sa tanan?

16 Bisan ano man nga mga kabudlayan ang mahimo batason mo sa puluy-an, dumduma nga si Jehova yara pirme nga magasuportar sa imo. (1 Pedro 3:12) Gani manikasog nga pabakuron ang imo kaugalingon sa espirituwal. Mangamuyo sing kaalam kag sing malinong nga tagipusuon. Huo, magsuod sing labi pa kay Jehova paagi sa regular nga pagtuon sa Biblia, pagpangamuyo, pagpamalandong, kag pagpakig-upod sa mga masigka-Cristiano. Ang gugma ni Abigail sa Dios kag ang iya panimuot sa Iya hinaplas nga alagad wala maapektuhan sing negatibo sang undanon nga panghunahuna sang iya bana. Nagpanghikot sia pasad  sa matarong nga mga prinsipio. Bisan sa isa ka panimalay diin ang bana isa ka huwaran nga alagad sang Dios, nakahisayod ang isa ka Cristianong asawa nga dapat padayon sia nga manikasog nga pabakuron kag huptan ang iya kaugalingon nga espirituwalidad. Matuod, ang iya bana may Makasulatanhon nga obligasyon nga tatapon sia sa espirituwal kag materyal, apang sa katapusan, dapat sia magpangabudlay para sa iya “kaugalingon nga kaluwasan nga may kahadlok kag pagkurog.”​​—⁠Filipos 2:​12; 1 Timoteo 5:8.

Nakabaton Sia sing “Balos sang Manalagna”

17, 18. (a) Anong di-kinaandan nga pagtilaw sang pagtuo ang gin-atubang sang babayi nga balo sang Sarepta? (b) Ano ang reaksion sang babayi nga balo sa pangabay ni Elias, kag paano sia ginbalusan ni Jehova bangod sini?

17 Ang pag-atipan ni Jehova sa imol nga babayi nga balo sang panahon ni manalagna Elias nagapakita nga ginaapresyar gid niya ang mga nagasakdag sa matuod nga pagsimba paagi sa paggamit sang ila kaugalingon kag sang ila mga ikasarang agod buligan ang iban. Bangod sang malawig nga tigpalamangag sang panahon ni Elias, madamo ang naapektuhan sang gutom, pati na ang babayi nga balo kag ang iya anak nga lalaki nga nagapuyo sa Sarepta. Sang katapusan nga kalan-on na lang ang nabilin sa ila, nag-abot ang isa ka bisita​—⁠si manalagna Elias. Di-kinaandan gid ang iya ginpangabay. Bisan pa nakahibalo sia sang kahimtangan sang babayi, nagpangabay sia nga lutuan sia sing “diutay nga kalan-unon,” nga ginagamit ang katapusan nga lana kag harina sang babayi nga balo. Apang nagsiling pa si Elias: “Kay amo ini ang ginasiling ni Jehova nga Dios sang Israel, ‘Ang tadyaw sang harina dili maubusan, kag ang tibod sang lana dili mawad-an, tubtob sa adlaw nga si Jehova magapaulan sa duta.’”​​—⁠1 Hari 17:​8-​14.

18 Ano ayhan ang nangin reaksion mo sa sining di-kinaandan nga pangabay? Ang babayi nga balo sang Sarepta, nga ayhan nagakilala nga si Elias manalagna ni Jehova, “naghimo suno sa ginasiling ni Elias.” Ano ang ginbalos ni Jehova sa ginpakita niya nga pagkamaabiabihon? Milagruso nga gin-amanan niya sing pagkaon ang babayi, ang iya anak nga lalaki, kag si Elias sa tion sang tigpalamangag. (1 Hari 17:​15, 16) Huo, ginhatagan ni Jehova ang babayi nga balo sang Sarepta sing “balos sang manalagna,” bisan pa sia indi isa ka Israelinhon. (Mateo 10:41) Gindayaw man sang Anak sang Dios ining babayi nga balo sang ginsambit niya sia subong isa ka halimbawa sa di-matinuuhon nga katawhan sang iya banwa, ang Nasaret.​​—⁠Lucas 4:​24-​26.

19. Sa anong mga paagi ginapakita sang madamong Cristianong mga babayi sa karon ang panimuot nga kaangay sa panimuot sang babayi nga balo sang Sarepta, kag paano sila ginatamod ni Jehova?

19 Sa karon, madamong Cristianong mga babayi ang nagapakita sing panimuot nga kaangay sa panimuot sang babayi nga balo sang Sarepta. Halimbawa, kada semana, ang maalwan nga Cristianong mga utod nga babayi​—⁠ang madamo sa ila imol kag may mga pamilya nga ginaatipan⁠—nagapakita sing pagkamaabiabihon sa nagalakbay nga mga manugtatap kag sa ila mga asawa.  Ginaagda sang iban ang lokal nga bug-os tion nga mga ministro nga magkaon upod sa ila, ginabuligan nila ang mga imol, ukon sa iban pa nga paagi ginagamit ang ila kaugalingon kag ang ila ikasarang agod masakdag ang hilikuton sang Ginharian. (Lucas 21:4) Nakita bala ni Jehova ini nga mga sakripisyo? Huo! “Ang Dios indi di-matarong nga malipat sa inyo binuhatan kag sa gugma nga ginpakita ninyo tungod sa iya ngalan, nga nag-alagad kamo sa mga balaan kag padayon nga nagaalagad.”​—⁠Hebreo 6:10.

20. Ano ang binagbinagon sa masunod nga artikulo?

20 Sang unang siglo, ang pila ka mahinadlukon-sa-Dios nga mga babayi may pribilehiyo nga makaalagad kay Jesus kag sa iya mga apostoles. Sa masunod nga artikulo, binagbinagon naton kon paano ginpahalipay sini nga mga babayi ang tagipusuon ni Jehova, kag binagbinagon naton ang halimbawa sang modernong-adlaw nga mga babayi nga nagaalagad kay Jehova sing bug-os tagipusuon, bisan sa mabudlay nga mga kahimtangan.

[Nota]

^ par. 8 Ang listahan sang katigulangan ni Jesus, suno sa rekord ni Mateo, nagahingalan sa apat ka babayi​—⁠si Tamar, si Rahab, si Rut, kag si Maria. Ang tanan ginatahod sing daku sa Pulong sang Dios.​—⁠Mateo 1:​3, 5, 16.

Bilang Repaso

• Paano ginpahalipay sang masunod nga mga babayi ang tagipusuon ni Jehova?

• Si Sifra kag si Pua

• Si Rahab

• Si Abigail

• Ang babayi nga balo sang Sarepta

• Paano ang pagpamalandong sa mga halimbawa nga ginpakita sini nga mga babayi personal nga makabulig sa aton? Iilustrar.

[Mga Pamangkot sa Pagtinuon]

[Mga retrato sa pahina 9]

Madamong matutom nga mga babayi ang nag-alagad sa Dios walay sapayan sang “sugo sang hari”

 [Retrato sa pahina 10]

Ngaa si Rahab isa ka maayo nga halimbawa sang isa nga may pagtuo?

[Retrato sa pahina 10]

Anong mga kinaiya nga ginpakita ni Abigail ang luyag mo ilugon?

[Retrato sa pahina 12]

Madamong Cristianong mga babayi sa karon ang nagapakita sing panimuot sang babayi nga balo sang Sarepta