Sugilanon sang Kabuhi

Gintudluan ni Jehova Halin sa Akon Pagkapamatan-on

PANUGIRON NI RICHARD ABRAHAMSON

“O Dios, gintudluan mo ako halin sa akon pagkapamatan-on, kag tubtob karon padayon ko nga ginapahayag ang imo makatilingala nga mga binuhatan.” Tuguti ako sa pagpaathag kon ngaa ining mga tinaga sang Salmo 71:17 may pinasahi nga kahulugan sa akon.

NASUGILANON sang akon iloy nga si Fannie Abrahamson ang mga Estudyante sang Biblia, ang tawag sang una sa mga Saksi ni Jehova, sang 1924. Isa ka tuig pa lang ako sadto. Samtang ginatudluan sing mga kamatuoran sa Biblia si Nanay, ginaduaw niya gilayon ang iya mga kaingod kag ginasugiran sila sang mga butang nga iya natun-an, kag gintudluan man niya kami sang akon magulang nga lalaki kag magulang nga babayi. Antes ako makahibalo sa pagbasa, ginbuligan niya ako nga masaulo ang madamo nga mga kasulatan tuhoy sa mga pagpakamaayo sang Ginharian sang Dios.

Sang talipuspusan nga bahin sang dekada 20, ang amon grupo sang mga Estudyante sang Biblia sa La Grande, sa estado sang Oregon, E.⁠U.⁠A., diin ako natawo kag nagdaku, ginatapuan sang pila ka babayi kag kabataan. Bisan pa malayo kami, ginaduaw kami sing makaisa ukon sing makaduha ka beses kada tuig sang nagalakbay nga mga ministro, nga ginatawag mga pilgrim. Naghatag sila sing makapalig-on nga mga pamulongpulong, nag-upod sa amon sa pamalaybalay nga ministeryo, kag nagpakita sing maluluy-on nga interes sa mga kabataan. Lakip sa sining pinalangga nga mga utod amo sanday Shield Toutjian, Gene Orrell, kag John Booth.

Wala sing bisan isa sa amon grupo ang nakatambong sa kombension sa Columbus, Ohio, sang 1931, diin pormal nga ginbaton sang mga Estudyante sang Biblia ang ngalan nga mga Saksi ni Jehova. Apang ang wala sing representante sa  kombension nga mga kompanya, nga tawag sadto sa mga kongregasyon, kag naligwin nga mga grupo nagtipon sadto nga Agosto sa ila kaugalingon nga mga duog agod pormal nga aprobahan ang resolusyon sa pagbaton sa ngalan. Ginhimo ini sang amon diutay nga grupo sa La Grande. Nian, sa kampanya sang 1933 sa pagpanagtag sing pulyeto nga The Crisis, ginsaulo ko ang isa ka presentasyon sa Biblia, kag sa pinakauna nga tion, isahanon ako nga nagpanaksi sa mga pamalay.

Sang dekada 30, nag-amat-amat lapnag ang pagpamatok sa amon hilikuton. Agod maatubang ini, gingrupo ang mga kompanya sa gintawag sang una nga mga dibisyon, nga naghiwat sing magagmay nga mga asambleya kag nagpakigbahin sing makaisa ukon makaduha ka beses kada tuig sa pagbantala nga mga hilikuton, nga gintawag sang una nga mga divisional campaign. Sa sini nga mga asambleya, gintudluan kami sang mga metodo sa pagbantala kag ginhanas kon paano matinahuron nga pakig-angutan ang mga pulis nga magpamalabag. Sanglit ang mga Saksi masami ginpaatubang sa huwes sang pulisiya ukon sa regular nga korte, gin-ensayo namon ang amon inughambal gikan sa isa ka naimprinta nga instruksion nga ginatawag Order of Trial. Nagsangkap ini sa amon agod maatubang ang pagpamatok.

Temprano nga Pagtubo sang Kamatuoran sa Biblia

Nagauswag ang akon apresasyon sa mga kamatuoran sa Biblia kag sa pasad-Biblia nga paglaum sang pagkabuhi nga walay katapusan sa idalom sang langitnon nga Ginharian sang Dios. Sadto, wala ginhatagan sing pagpadaku ang pagpabawtismo sang mga wala sing paglaum nga maggahom sa langit upod kay Cristo. (Bugna 5:​10; 14:​1, 3) Walay sapayan sini, ginsilingan ako nga kon determinado ako sa akon tagipusuon sa paghimo sang kabubut-on ni Jehova, nagakaigo nga magpabawtismo ako. Gani nagpabawtismo ako sang Agosto 1933.

Sang 12 anyos ako, ang akon maestra nagsiling nga isa ako ka maayo nga humalambal-publiko, gani ginkumbinsi niya si Nanay nga patigayunon ang dugang pa nga paghanas para sa akon. Ginhunahuna ni Nanay nga makabulig ini sa akon agod makaalagad sing mas maayo kay Jehova. Gani nanglaba sia sa instruktor sa sulod sang isa ka tuig agod mabayaran ang akon mga leksion. Ang paghanas nakabulig sa akon ministeryo. Sang 14 anyos ako, nagbalatian ako sing rheumatic fever, kag bangod sini nauntat ang akon pag-eskwela sing kapin sa isa ka tuig.

Sang 1939, nag-abot sa amon lugar ang isa ka bug-os tion nga ministro nga si Warren Henschel.⁠ * Sia ang akon magulang sa espirituwal, kag ginaupod niya ako sa pagministeryo sa latagon sa sulod sang malawig nga inadlaw. Ginbuligan niya gilayon ako nga makaumpisa sa pag-alagad subong vacation pioneer, isa ka porma sang temporaryo nga bug-os tion nga ministeryo. Sadto nga tingadlaw, ginhimo nga isa ka kompanya ang amon grupo. Gintangdo si Warren nga company servant, kag gintangdo ako nga konduktor sang Pagtinuon sa Ang Lalantawan. Sang gintawag si Warren agod mag-alagad sa Bethel, ang internasyonal nga ulong-talatapan sang mga Saksi ni Jehova sa Brooklyn, New York, ako ang nangin company servant.

 Pag-umpisa sa Bug-os Tion nga Ministeryo

Ang dugang nga responsibilidad sang pag-alagad subong company servant nagpabakod sang akon handum nga magsulod sa regular nga bug-os tion nga ministeryo, nga nahimo ko sang 17 anyos ako pagkatapos sang akon ikatlo nga tuig sa hayskul. Si Tatay indi namon karelihion, apang maayo sia nga manug-atipan sa kinahanglanon sang amon pamilya kag isa sia ka tawo nga may mataas nga mga prinsipio. Luyag niya nga magpadayon ako sa kolehiyo. Apang, nagsiling man sia nga basta indi lang ako magsalig sa iya sang akon galastuhon, pagusto ako sa akon himuon. Gani gin-umpisahan ko ang pagpayunir sang Septiembre 1, 1940.

Antes ako maglakat, ginpabasa ako sang akon iloy sang Hulubaton 3:​5, 6: “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop. Sa tanan mo nga dalanon talupangda sia, kag tadlungon niya ang imo banas.” Matuod gid, ang akon pagsalig kay Jehova sa tanan nga tion nangin isa gid ka daku nga bulig sa akon.

Sang ulihi, nakigbuylog ako kanday Joe kag Margaret Hart sa pagministeryo sa aminhan-sentro nga bahin sang Washington State. Sarisari ang teritoryo​​—⁠mga rantsuhan sang baka kag karnero, mga komunidad sang mga Indian, subong man madamong magagmay nga mga banwa kag mga baryo. Sang tigpamulak sang 1941, gintangdo ako bilang company servant sa kongregasyon sa Wenatchee, Washington.

Isa ako ka attendant sa isa sang amon mga asambleya sa Walla Walla, Washington, nga nagaabiabi sa mga nagasulod sa awditoryum. Natalupangdan ko nga indi mapaandar sang isa ka utod nga pamatan-on nga lalaki ang loud speaker. Gani ginpanugyan ko nga magbayluhanay kami sing asaynment. Sang nagbalik si Albert Hoffman, ang regional servant, kag nakita niya nga ginbayaan ko ang akon asaynment, malulo nga ginpaathag niya sa akon kon daw ano ka importante nga indi pagbayaan ang asaynment luwas lamang kon hatagan sing lain. Wala ko gid malimtan ang iya laygay halin sadto.

Sang Agosto 1941, nagplano ang mga Saksi ni Jehova sing isa ka daku nga kombension sa St. Louis, Missouri. Ginbutangan sang mag-asawa nga Hart sing trapal kag mga pulungkuan ang likod sang ila pickup. Siam kami ka payunir ang nagbiyahe sing 2,400 kilometros pakadto sa St. Louis sakay sa sini nga trak. Halos isa ka semana ang paglakbay pakadto kag amo man pabalik. Sa kombension, ginbulubanta sang mga pulis nga 115,000 ang pinakamadamo nga tumalambong. Bisan pa ang tumalambong ayhan mas manubo sa sini, pat-od nga mas madamo ini sangsa mga 65,000 ka Saksi sa Estados Unidos sadto. Ang kombension nakapalig-on gid sa espirituwal.

Pag-alagad sa Brooklyn Bethel

Sang nagbalik ako sa Wenatchee, nakabaton ako sing sulat nga nagapareport sa akon sa Brooklyn Bethel. Sang pag-abot ko sang Oktubre 27, 1941, gindala ako sa opisina ni Nathan H. Knorr, ang manugtatap sa imprintahan. Maluluy-on niya nga ginpaathag sa akon kon ano ang Bethel kag ginpadaku niya ang importansia sang pagpabilin nga suod kay Jehova agod magmadinalag-on sa pagtener diri. Pagkatapos gindala ako sa Shipping Department kag ginhatagan sing trabaho nga paghigot sang mga karton sang inugpadala nga literatura.

 Sang Enero 8, 1942, napatay si Joseph Rutherford, nga amo ang nagapanguna sa mga Saksi ni Jehova sa bug-os kalibutan. Lima ka adlaw pagkatapos sini, ginpili sang mga direktor sang Sosiedad si Utod Knorr nga magbulos sa iya. Sang ginpahibalo ini sa panimalay Bethel ni W. E. Van Amburgh, ang madugay na nga sekretaryo-tesorero sang Sosiedad, sia nagsiling: “Madumduman ko pa sang napatay si C. T. Russell [sang 1916] kag ginbuslan sia ni J. F. Rutherford. Ang Ginuo padayon nga nagtuytoy kag nagpauswag sang Iya hilikuton. Sa karon, ginalauman ko man nga mag-uswag ang hilikuton sa idalom ni Nathan H. Knorr subong presidente bangod hilikuton ini sang Ginuo, indi sang tawo.”

Sang Pebrero 1942, gin-anunsio nga umpisahan ang “Advanced Course in Theocratic Ministry.” Gindesinyo ini agod hanason ang mga taga-Bethel nga mapauswag ang ila ikasangkol sa pagpanalawsaw sa mga topiko sa Biblia, organisahon sing nagakaigo ang ila materyal, kag epektibo nga ipresentar ini. Bangod nahanas anay ako sa paghambal sa publiko, madasig ang akon pag-uswag sa programa.

Sa wala madugay, gin-asayn ako sa Service Department, nga nagatatap sang ministeryo sang mga Saksi sa Estados Unidos. Sang ulihi nga bahin sang amo nga tuig, nadesisyunan nga sugdan liwat ang isa ka programa para sa pagduaw sang mga ministro sa mga kompanya sang mga Saksi. Sa karon, ining nagalakbay nga mga ministro, nga gintawag mga alagad para sa mga kauturan, ginatawag na nga mga manugtatap sang sirkito. Sang tingadlaw sang 1942, ginhiwat ang isa ka kurso sa Bethel sa paghanas sa mga utod sa sini nga sahi sang ministeryo, kag nangin pribilehiyo ko nga malakip sa mga hanason. Nadumduman ko gid nga si Utod Knorr, nga isa sa mga instruktor, nagpadaku sini nga punto sa amon: “Indi pagtinguhai nga pahamut-an ang tawo. Kay wala ka gid sing mapahamut-an. Pahamut-i si Jehova, kag mapahamut-an mo ang tanan nga nagahigugma sa iya.”

Gin-implementar ang paglakbay nga hilikuton sang Oktubre 1942. Ang pila sa amon sa Bethel nakigbahin sa sini sa pila ka talipuspusan sang semana, nga nagaduaw sa mga kongregasyon nga indi maglampas sa 400 kilometros halin sa New York City. Gin-usisa namon ang mga report tuhoy sa hilikuton nga pagbantala kag mga tumalambong sa miting sang kongregasyon, nakigsapol kami sa mga may responsibilidad sa kongregasyon, naghatag sing isa ukon duha ka pamulongpulong, kag nagbantala upod sa mga Saksi sa kongregasyon.

Sang 1944, isa ako sa mga taga-Service Department nga ginpadala agod magduaw sa mga kongregasyon sa sulod sang anom ka bulan, sa mga estado sang Delaware, Maryland, Pennsylvania, kag Virginia. Sang ulihi, sa sulod sang pila ka bulan, nagduaw ako sa mga kongregasyon sa Connecticut, Massachusetts, kag Rhode Island. Sang pagbalik ko sa Bethel, nagtrabaho ako sing part-time sa opisina upod ni Utod Knorr kag sang iya sekretaryo nga si Milton Henschel, diin natun-an ko ang aton bug-os kalibutan nga hilikuton. Nagtrabaho man ako sing part-time sa Opisina sang Tesorero sa idalom sang pagtatap ni W. E. Van Amburgh kag sang iya kabulig, si Grant Suiter. Nian, sang 1946, gintangdo ako nga mangin manugtatap sang pila ka opisina sa Bethel.

Daku nga mga Pagbag-o sa Akon Kabuhi

Samtang nagapangalagad sa mga kongregasyon sang 1945, nakilala ko si Julia Charnauskas sa Providence, Rhode Island. Sang tungatunga sang 1947, ginpamensaran namon ang pagpakasal. Luyag ko gid nga mag-alagad sa Bethel, apang sadto, wala sing kahimusan nga mapasulod man ang isa ka tiayon agod magpangalagad didto. Gani sang Enero 1948, naggua ako sa Bethel, kag ginkasal kami ni Julia (Julie). Nagtrabaho ako sing part-time sa isa ka supermarket sa Providence, kag nagpayunir kami sing magkaupod.

Sang Septiembre 1949, gin-imbitar ako sa hilikuton sa sirkito sa aminhan-katundan nga Wisconsin. Daku gid nga pagbag-o ini para sa amon ni Julie nga magbantala sa magagmay nga mga banwa kag mga uma nga nagaproseso sing gatas. Malawig kag matugnaw ang panahon sang tigtulugnaw, nga sinemana nga may mas manubo pa sa sero nga temperatura kag madamol nga niebe. Wala kami sing salakyan. Apang, may nagadul-ong pirme sa amon pakadto sa masunod nga kongregasyon.

Wala madugay nga naumpisahan ko ang hilikuton sa sirkito, naghiwat kami sing sirkito nga asambleya. Nadumduman ko nga detalyado ko nga gin-usisa ang pag-atipan sa tanan nga butang, kag bangod sini daw ginnerbios ang iban. Gani malulo nga ginpaathag sa akon sang manugtatap sa distrito, nga si Nicholas Kovalak, nga ang lokal nga mga utod naanad sa paghimo sang mga butang sa ila kaugalingon nga paagi kag indi ako dapat magkabalaka  sa tagsa ka detalye. Ini nga laygay nakabulig sa akon sa pag-atubang sa madamo nga mga asaynment halin sadto.

Sang 1950, nakabaton ako sing temporaryo nga asaynment​​—⁠dumalahan ang pagpangita sing mga dalayunan para sa mga delegado sa pinakauna sang aton madamong dalagku nga mga kombension sa Yankee Stadium sa New York City. Makakulunyag ang kombension halin sa umpisa tubtob matapos, nga may mga delegado gikan sa 67 ka pungsod kag may pinakamataas nga tumalambong nga 123,707! Pagkatapos sang kombension, nagpadayon kami ni Julie sa paglakbay nga ministeryo. Malipayon kami sa sirkito nga hilikuton. Apang, luyag namon nga padayon nga iboluntaryo ang amon kaugalingon sa ano man nga sahi sang bug-os tion nga ministeryo. Gani kada tuig, nagapadala kami sing aplikasyon para sa pag-alagad sa Bethel kag para sa pagmisyonero. Nalipay kami sang mabaton namon sang 1952 ang imbitasyon nga mag-eskwela sa ika-20 nga klase sang Watchtower Bible School of Gilead, diin ginhanas kami para sa misyonero nga hilikuton.

Pag-alagad sa Luwas

Sang maggradwar kami sang 1953, gin-asayn kami sa Britanya, diin nangalagad ako sa hilikuton sa distrito sa bagatnan sang Inglaterra. Wala pa malab-utan isa ka tuig sa sini nga hilikuton, nga naluyagan gid namon ni Julie, nakibot kami sa nabaton namon nga asaynment nga magsaylo sa Denmark. Nagkinahanglan sing bag-o nga manugtatap ang sanga talatapan sa Denmark. Bangod yara lang ako sa malapit kag nahanas sa sini nga hilikuton sa Brooklyn, ginpadala ako agod magbulig. Nagsakay kami sa bapor pakadto sa Netherlands, kag halin didto, nagsakay kami sa tren pakadto sa Copenhagen, Denmark. Nakaabot kami sang Agosto 9, 1954.

Ang isa sa mga problema nga dapat solbaron amo nga wala ginbaton sang pila ka mga utod nga may mga katungdanan ang direksion gikan sa ulong-talatapan sa Brooklyn. Subong man, naghalin sa Bethel ang tatlo sa apat ka manugbadbad  sang aton mga publikasyon sa Danes kag sang ulihi nag-untat sa pagpakig-upod sa mga Saksi ni Jehova. Apang ginsabat ni Jehova ang amon mga pangamuyo. Ang duha ka payunir, nga sanday Jørgen kag Anna Larsen, nga part-time anay nga mga manugbadbad, nangin handa sa pagbulig sing bug-os tion. Gani ang pagbadbad sang aton mga magasin sa Danes nangin tayuyon nga wala sing nalaktawan nga bisan isa ka isyu. Ang mag-asawa nga Larsen yara gihapon sa Bethel sa Denmark, kag si Jørgen coordinator sang Komite sang Sanga.

Isa gid ka pagpalig-on sadto nga mga tinuig ang regular nga pagbisita ni Utod Knorr. Nagahinguyang gid sia sing tion agod masugilanon ang kada isa, nga nagasugid sing mga eksperiensia nga naghatag sing paghantop kon paano atubangon ang mga problema. Sang nagduaw sia sang 1955, nadesisyunan nga magpatindog kami sing bag-o nga sanga nga may imprintahan agod makaimprinta kami sing mga magasin para sa Denmark. Isa ka lote sa naaminhan nga suburbio sang Copenhagen ang ginbakal, kag sang tingadlaw sang 1957, nagsaylo kami sa bag-o gintukod nga edipisyo. Si Harry Johnson, upod sang iya asawa nga si Karin, nga kasan-o lang nag-abot sa Denmark pagkagradwar sa ika-26 nga klase sang Gilead, nagbulig agod masugdan ang pagpahamtang kag pagpadalagan sang imprintahan.

Napauswag namon ang amon pag-organisar sing dalagku nga mga kombension sa Denmark, kag nakabulig ang akon eksperiensia sang nagpangabudlay ako sa mga kombension sa Estados Unidos. Sang 1961 ang amon daku nga internasyonal nga kombension sa Copenhagen gintambungan sang mga delegado gikan sa kapin sa 30 ka pungsod. Ang pinakamataas nga tumalambong 33,513. Sang 1969, ginhiwat sa amon lugar ang pinakadaku sa tanan nga mga kombension nga ginhiwat sa Scandinavia, nga may pinakamadamo nga tumalambong nga 42,073!

Sang 1963, gin-agda ako nga mag-eskwela sa ika-38 nga klase sang Gilead. Isa ini ka napulo ka bulan nga kurso nga pinasahi nga gindesinyo para hanason ang mga nagapangalagad sa mga sanga talatapan. Nalipay gid ako nga makaupod liwat ang panimalay Bethel sa Brooklyn kag makabenepisyo sa mga eksperiensia sang mga nagpangabudlay sing madamo nga tinuig sa pagtatap sa mga ulubrahon sa ulong-talatapan.

Pagkatapos sining kurso sa paghanas, nagbalik ako sa Denmark agod padayon nga tatapon ang akon mga responsibilidad didto. Dugang pa, nangin pribilehiyo ko nga magpangalagad subong manugtatap sa sona, nga nagaduaw sa mga sanga sa nakatundan kag naaminhan nga Europa agod palig-unon ang mga nagapangalagad didto kag buligan sila nga tumanon ang ila mga responsibilidad. Ang pinakaulihi nga ginduaw ko amo ang Katundan nga Aprika kag Caribbean.

Sa talipuspusan sang dekada 70, nangita ang mga utod sa Denmark sing lugar nga matukuran sing isa ka mas daku nga pasilidad para sa nagadugang nga hilikuton sa pagbadbad kag pag-imprinta. Isa ka matahom nga lugar ang nakita mga 60 kilometros sa katundan sang Copenhagen. Upod ako sa iban pa nga nagplano kag nagdesinyo sining bag-o nga pasilidad, kag ginlauman namon ni Julie nga mag-istar upod sa panimalay Bethel sa bag-o kag matahom nga puluy-an sini. Apang, lain ang natabo.

Nagbalik sa Brooklyn

Sang Nobiembre 1980, gin-agda kami ni Julie nga mag-alagad sa Bethel sa Brooklyn, diin nag-abot kami sang temprano nga bahin sang Enero 1981. Manugsesenta anyos na kami sadto, kag pagkatapos mahinguyang ang halos katunga sang amon kabuhi sa pagpangalagad sa aton pinalangga nga mga kauturan sa Denmark, indi mahapos para sa amon nga magbalik sa Estados Unidos. Apang, wala namon ginsentro ang amon pamensaron sa kon ano ang amon gusto kundi ginsentro namon ini sa amon bag-o nga mga asaynment kag sa ano man nga mga hangkat nga dalhon sini.

Nag-abot kami sa Brooklyn kag naghanda sa pagtener  didto. Gin-asayn si Julie sa opisina sang accounting, nga pareho man sang iya obra sa Denmark. Gin-asayn ako sa Writing Department agod magbulig sa pag-iskedyul sang pagproseso sang aton mga publikasyon. Ang temprano nga bahin sang dekada 80 isa ka tion sang pagbag-o sa aton mga pagpalakat sa Brooklyn, bangod naggamit na kita sing mga kompyuter kag offset nga pag-imprinta sa baylo sang mga makinilya kag mainit nga tingga. Wala ako sing ihibalo tuhoy sa mga kompyuter apang may pila ako nga nahibaluan tuhoy sa pag-organisar kag pagtrabaho upod sa iban.

Wala madugay pagkatapos sini, kinahanglan pabakuron ang pag-organisar sa Art Department bangod gamiton na naton ang full-color offset nga pag-imprinta kag de-kolor nga mga ilustrasyon kag mga laragway. Bisan indi ako dibuhista, makabulig ako sa pag-organisar. Gani nangin pribilehiyo ko ang pagtatap sa sini nga departamento sa sulod sang siam ka tuig.

Sang 1992, gin-asayn ako nga magbulig sa Publishing Committee sang Nagadumala nga Hubon kag ginsaylo sa Opisina sang Tesorero. Padayon ako diri nga nagabulig tuhoy sa pinansial nga mga hilikuton sang mga Saksi ni Jehova.

Pag-alagad Halin sa Akon Pagkapamatan-on Padayon

Halin sa akon pagkapamatan-on kag sa sulod sang 70 ka tuig sang dedikado nga pag-alagad, mapailubon nga gintudluan ako ni Jehova paagi iya Pulong, ang Biblia, kag paagi sa mabinuligon nga mga utod sa iya dalayawon nga organisasyon. Naghinguyang ako sing kapin sa 63 ka tuig sa bug-os tion nga ministeryo, kapin sa 55 sining mga tinuig upod sa akon mainunungon nga asawa nga si Julie. Matuod gid, nabatyagan ko nga bugana ako nga ginpakamaayo ni Jehova.

Sang naghalin ako sa balay sang 1940 agod magpayunir, ginyaguta sang akon amay ang akon desisyon kag nagsiling: “Toto, kon maghalin ka diri sa balay agod himuon ina, indi ka maglaum nga makapangayo ka sa akon sing bulig.” Sa pagligad sang mga tinuig, wala ko gid mahimo ini. Maalwan nga gin-amanan ako ni Jehova sang akon mga kinahanglanon, sa masami paagi sa mabinuligon nga mga masigka-Cristiano. Sang ulihi, natun-an sang akon amay nga respetuhon ang aton hilikuton, kag nag-uswag pa gani sia sa pagtuon sa kamatuoran sa Biblia antes sia napatay sang 1972. Si Nanay, nga may langitnon nga paglaum, matutom nga nagpadayon sa pag-alagad kay Jehova tubtob napatay sia sang 1985, sa edad nga 102 anyos.

Bisan matuod may mga problema nga nagautwas sa bug-os tion nga pag-alagad, wala gid nagsulod sa pensar namon ni Julie nga bayaan ang amon asaynment. Ginbuligan kami pirme ni Jehova sa sini nga pamat-od. Bisan sang nagtigulang na ang akon mga ginikanan kag nagkinahanglan sing bulig, ang akon magulang nga si Victoria Marlin nagtanyag sang iya bulig kag maluluy-on nga nag-atipan sa ila. Nagapasalamat gid kami sa iya mahigugmaon nga kontribusyon, nga nagbulig sa amon agod makapadayon sa bug-os tion nga ministeryo.

Mainunungon nga nagsuportar si Julie sa akon sa tanan namon nga asaynment, ginakabig ini subong bahin sang iya dedikasyon kay Jehova. Kag bisan pa 80 anyos na ako karon kag may mga ginabatyag na sa lawas, bugana ako nga ginpakamaayo ni Jehova. Napalig-on gid ako sang salmista, nga pagkatapos magsiling nga gintudluan sia sang Dios halin sa iya pagkapamatan-on, nagpangabay, ‘Bisan tubtob magtigulang ako, O Dios, indi ako pagpabayai, tubtob nga mapahayag ko sa mga magaabot pa ang tuhoy sa imo pagkagamhanan.’​​—⁠Salmo 71:​17, 18.

[Nota]

[Retrato sa pahina 20]

Upod si Nanay sang 1940, sang nag-umpisa ako sa pagpayunir

[Retrato sa pahina 21]

Kami sang kaupod ko nga mga payunir nga sanday Joe kag Margaret Hart

[Retrato sa pahina 23]

Sa adlaw sang amon kasal sang Enero 1948

[Retrato sa pahina 23]

Sang 1953, kaupod sa amon mga kaklase sa Gilead. Halin sa wala pa tuo: si Don kag si Virginia Ward, si Geertruida Stegenga, si Julie, kag ako

[Retrato sa pahina 23]

Upod sanday Frederick W. Franz kag Nathan H. Knorr sa Copenhagen, Denmark, sang 1961

[Retrato sa pahina 25]

Si Julie kag ako karon