Magdiretso sa kaundan

Magdiretso sa listahan sang kaundan

Nagpamunga ang Maayong Balita sa São Tomé kag Príncipe

Nagpamunga ang Maayong Balita sa São Tomé kag Príncipe

 Nagpamunga ang Maayong Balita sa São Tomé kag Príncipe

ANG kalabanan nga tawo ayhan wala pa gid makabati tuhoy sa São Tomé kag Príncipe. Ini nga mga isla indi kinaandan nga ginapasayod sa mga brosyur tuhoy sa mga balakasyunan. Sa mapa sang kalibutan, daw kaangay sila sang diutay nga mga pintok nga nahamtang sa Gulf of Guinea sa katundan nga baybayon sang Aprika, ang São Tomé halos yara sa ekuador kag ang Príncipe yara nayon sa aminhan-sidlangan. Ang maulanon, mahun-og nga klima nagpatubas sing madabong nga mga kagulangan, nga nagatabon sa banglid sang kabukiran nga may kataason nga kapin sa 2,000 metros.

Ining tropiko nga mga isla, nga ginapalibutan sang asul nga dagat kag mga baybayon nga ginakubayan sing mga palma, ginaistaran sang mainabyanon kag mabuot nga mga tawo, nga ang salakot nga ginhalinan sa Aprika kag Europa nagresulta sa isa ka matahom nga pagsamuay sang kultura. Ang 170,000 ka pumuluyo masako sa panguna nga produkto sini nga ginabaligya sa luwas, ang cacao, ukon sa pagpanguma kag pagpangisda. Sining ulihi nga mga tinuig, bisan ang pagkaon para sa isa ka adlaw ginapanglaghap.

Apang, isa ka hitabo ang nasaksihan sang katapusan nga dekada sang ika-20 nga siglo nga nag-apektar sing daku sa kabuhi sang nagadamo nga mga pumuluyo sa sini nga mga isla. Sang Hunyo 1993, legal nga narehistro ang mga Saksi ni Jehova sa gobierno sang São Tomé kag Príncipe, gani natapos ang isa ka malawig kag masami mabudlay nga tinion sa kasaysayan sang mga Saksi ni Jehova sa sini nga mga isla.

Mga Binhi nga Ginsab-ug sa Idalom sang Kabudlayan

Mahimo nga ang nahauna nga Saksi nag-abot sa sini nga pungsod sang temprano nga bahin sang katuigan 1950 sang ang mga bilanggo gikan sa iban nga mga kolonya sang Portugal sa Aprika gintapok agod magtrabaho sa mga kampo sang pilit  nga pagpangabudlay sa sini nga mga isla. Ang Saksi, nga isa ka Aprikano nga payunir, ukon bug-os tion nga ministro, gintapok gikan sa Mozambique bangod ginbantala niya ang maayong balita sang Ginharian sang Dios sa amo nga pungsod. Nangin masako ining nagaisahanon nga Saksi, kag sa sulod sang anom ka bulan, may 13 pa nga nakigbahin sa pagpalapnag sing maayong balita. Sang ulihi, nag-abot ang iban pa nga mga Saksi nga may kaanggid man nga kahimtangan halin sa Angola. Sa tion sang ila pagkabilanggo, ginhimuslan nila ang tagsa ka kahigayunan agod mapaambit ang maayong balita sa lokal nga mga pumuluyo.

Sang 1966 ang tanan nga kauturan nga nabilanggo sa mga kampo sang pilit nga pagpangabudlay sa São Tomé nagpalauli sa kadak-an sang Aprika. Ang diutay nga grupo sang mga manugbantala sang Ginharian nga nabilin maisugon nga nagpadayon. Ginhingabot sila, ginkastigo, kag ginbilanggo bangod nagtipon sila para sa pagtuon sa Biblia, kag wala sing isa nga nagduaw ukon nagpalig-on sa ila. Naagom sang pungsod ang independensia sini gikan sa Portugal sang 1975, kag sing amat-amat nagpamunga ang mga binhi sang kamatuoran sang Ginharian.

Pagpasangkad kag Pagtukod

Sadto mismo nga bulan sang legal nga pagrehistro sang 1993, may yara kataason nga 100 ka manugbantala sang Ginharian. Sadto man nga tuig, nag-abot ang espesyal nga mga payunir halin sa Portugal. Bangod sang ila mga panikasog nga mahibaluan ang Portuguese Creole, ginpalangga sila sang lokal nga mga pumuluyo. Ang pagpangita sing lote nga patindugan sing Kingdom Hall amo dayon ang nangin prioridad. Sang mabalitaan ini nga kinahanglanon, gindonar sang utod nga si Maria ang katunga sang lote nga nahamtangan sang iya diutay nga balay. Ang lote hustuhan gid para sa isa ka daku nga Kingdom Hall. Lipod kay Maria, bangod wala na sia sing kahimataan, interesado gid sa sini nga lote ang ambisyuso nga mga developer. Isa ka adlaw, isa ka kilala nga negosyante ang nakighambal kay Maria.

“Ang nabatian ko tuhoy sa imo indi gid pabor para sa imo!” paandam niya sa iya. “Nabatian ko nga gindonar mo ang imo lote. Wala ka bala makahibalo nga daku ang bili sini bangod nahamtang ini diri mismo sa siudad?”

“Kon ibaligya ko ang lote sa imo, pila ang bakal mo?” pamangkot ni Maria. Sang wala magsabat ang tawo, si Maria nagpadayon: “Bisan ihatag mo  pa sa akon ang tanan nga kuarta sa bug-os nga kalibutan, indi ini bastante bangod indi mabakal sang kuarta ang kabuhi.”

“Indi bala nga wala ka sing mga anak?” pamangkot sang tawo.

Agod matapos na ang paghambalanay, si Maria nagsiling: “Ang lote iya ni Jehova. Ginpahulam niya ini sa akon sa sulod sang madamo nga tinuig, kag karon gin-uli ko na ini sa iya. Nagalaum ako nga mabuhi sing dayon.” Nian ginpamangkot niya ang tawo: “Mahatag mo bala ang kabuhi nga wala sing katapusan?” Wala makatingog nga nagtalikod ang tawo kag naglakat.

Ang resulta amo ang isa ka matahom kag duha sing panalgan nga bilding nga gintukod sa bulig sang kalipikado nga mga utod halin sa Portugal. May bug-os ini nga basement, isa ka malapad nga Kingdom Hall, kag mga kuarto. May mga hulot-klasehan man ini para sa mga eskwelahan para sa mga gulang, ministeryal nga mga alagad, kag mga payunir. Duha ka kongregasyon karon ang nagahiwat sang ila mga miting sa sini, sa amo nagahimo sini nga sentro sang isa ka maayo nga edukasyon para sa matuod nga pagsimba sa kabisera.

Sa Mé-Zochi, may isa ka kongregasyon nga may 60 ka makugi nga mga manugbantala. Bangod ang mga miting ginahiwat anay sa isa ka temporaryo lang nga Kingdom Hall nga nahamtang sa kasagingan, maathag gid nga kinahanglanon ang isa ka nagakaigo nga Kingdom Hall. Ginpahibalo ini sa city hall, kag ang mga nagasimpatiya nga mga opisyal nagtanyag sing isa ka maayo nga lote sa higad sang mayor nga dalan. Isa ka matahom nga Kingdom Hall ang gintukod sa sulod sang duha ka bulan sa bulig sang mga kauturan halin sa Portugal, nga naggamit sang madasig nga pagpatindog nga metodo. Ang lokal nga mga pumuluyo daw indi makapati sa ila nakita. Ang isa ka taga-Sweden nga enhinyero nga nadalahig sa isa ka proyekto sang pagtukod sa siudad natingala gid nga makita ang mga kauturan nga nagapangabudlay. “Indi ini mapatihan!” siling niya. “Ang mga Saksi ni Jehova, diri sa Mé-Zochi, nagagamit sing isa ka pamaagi sang madasig nga pagpatindog! Dapat namon organisahon ang amon proyekto sa amo sini nga paagi.” Gindedikar ang Kingdom Hall sang Hunyo 12, 1999, nga gintambungan sang 232. Ang Kingdom Hall nangin panguna nga talan-awon sang mga bisita sa siudad sang Mé-Zochi.

Isa ka Maragtason nga Kombension

Ang isa ka maragtason nga hitabo para sa mga Saksi ni Jehova sa São Tomé kag Príncipe amo ang  tatlo ka adlaw nga “Balaan nga Panudlo” Distrito nga Kombension sang Enero 1994​​—⁠ang pinakauna sa sini nga mga isla. Ginhiwat ini sa pinakamatahom kag air-conditioned nga awditoryum sang pungsod. Mahanduraw mo bala ang kalipay sang 116 ka manugbantala sang Ginharian nga makita ang 405 ka tumalambong kag sa una nga tion makatan-aw sing mga drama sa Biblia kag makabaton sing mga ginpagua nga balasahon sa kombension? Sa isa ka tropiko nga baybayon ginbawtismuhan ang 20 ka dedikado nga mga tawo.

Namag-uhan gid ang mga tawo sa pinasahi nga mga lapel badge sang mga tumalambong. Ang presensia sang 25 ka bisita halin sa Portugal kag Angola naghimo sang kombension nga daw internasyonal. Naglambo gilayon ang isa ka mainit nga higot sang Cristianong gugma, kag madamo ang naghibi sa katapusan nga sesyon sang nagpaalamay na sila.​​—⁠Juan 13:35.

Ang mga dyurnalista gikan sa National Radio nagkari kag gin-interbyu ang manugtatap sang kombension. Ginpalayag man nila ang pila ka bahin sang pila ka diskurso. Isa gid yadto ka maragtason nga hitabo, kag para sa sining madugay na nabaw-ing nga matutom nga mga Saksi, nagbulig ini agod ang kitaon nga organisasyon ni Jehova mangin daw malapit lang.

Pagpamunga Para sa Kadayawan ni Jehova

Kon mamunga ang mensahe sang Ginharian, nagapatubas ini sing maayo nga pagginawi nga nagahatag sing kadayawan kag kadungganan kay Jehova. (Tito 2:10) Nalipay ang isa ka dalagita sa iya natun-an gikan sa iya semanal nga pagtuon sa Biblia. Apang, gindumilian sia sang iya amay sa pagtambong sa mga miting sang kongregasyon. Sang matinahuron nga ginpaathag niya sa iya amay ang importansia sang Cristianong mga miting kag ang iya handum sa pagtambong, ginpalayas sia gilayon. Maathag nga naghunahuna ang iya amay nga himuon sang iya anak ang ginahimo sang madamo nga mga pamatan-on​​—⁠mag-ilop gilayon upod sa isa ka lalaki nga magabuhi sa iya. Sang nahibaluan sang amay nga nagkabuhi ang iya anak sing huwaran kag putli subong isa ka Cristiano, ginpapauli niya sia kag ginhatagan sing kahilwayan sa pag-alagad kay Jehova.

Ang isa pa ka halimbawa amo ang tuhoy sa lider sang isa ka banda. Nalugaw-an sia sa iya imoral nga pagkabuhi. Samtang nagapangita sing katuyuan sa kabuhi, nasugilanon sia sang mga Saksi. Sang ginsugdan niya nga ipahisuno ang iya kabuhi sa mga talaksan sang Biblia, nangin topiko sia sang sugilanon sang mga tawo. Wala madugay narealisar niya nga dapat indi na sia magpakig-upod sa indi maayo nga mga kaupdanan. (1 Corinto 15:33) Nian ginhimo niya ang kinahanglanon nga tikang nga mabawtismuhan bilang simbulo sang iya dedikasyon kay Jehova.

Ginapangita anay sang pila ka pamatan-on ang matuod nga relihion. Ang ila pagpangita nagdul-ong sa pagpakighambal nila sa mga pastor sang pila ka ebangheliko nga mga grupo, apang nagresulta ini sa labi pa nga pagkagumon kag kabang-awan. Bangod sini, nangin masingki sila nga mga lihuliho kag nangin mamulayon sa mga butang may kaangtanan sa relihion.

Isa ka adlaw, ang isa ka misyonero nga Saksi ni Jehova nagapakadto sa iya ginatun-an sing Biblia kag naglabay sia sa ginaistambayan sining mga pamatan-on. Luyag sang grupo nga sabton sang misyonero ang pila ka pamangkot kag ginhagad nila sia sa likod-balay, diin ginpapungko nila sia sa isa ka diutay nga bangko. Nagsinagunson ang mga pamangkot tuhoy sa mga topiko subong sang kalag, kalayuhon nga impierno, kabuhi sa langit, kag katapusan sang kalibutan. Ginsabat sang Saksi ang tanan nila nga mga pamangkot gikan sa Biblia nga gindaho sa iya sang lider sang gang. Pagligad sang isa ka oras, ang lider nga si Law, nagsiling sa misyonero: “Sang ginpangabay ka namon nga maghapit kag sabton ang mga pamangkot, ang tuyo namon amo nga yagutaon ka, subong sang ginhimo namon sa mga tawo gikan sa iban nga relihion. Abi namon wala sing bisan sin-o nga makasabat sa sining mga pamangkot. Apang nasabat mo ini, kag ginhimo mo ini nga Biblia lamang ang ginagamit! Sugiri ako, ano ang himuon ko agod makatuon sing dugang pa tuhoy sa Biblia?” Ginsugdan ang isa ka pagtuon sa Biblia upod kay Law, kag nagtambong sia gilayon sa mga miting. Wala madugay pagkatapos sadto, ginbiyaan niya ang grupo kag gintalikdan ang iya masingki nga kabuhi. Sa sulod sang isa ka tuig, gindedikar niya ang iya kabuhi kay Jehova kag ginbawtismuhan. Nagaalagad sia karon subong isa ka ministeryal nga alagad.

 Kustombre gid sa sini nga lugar nga magpuy-anay nga indi kasal. Madamo ang nagapuyopuyo sa sulod sang mga tinuig, kag nakaangkon sila sing mga kabataan. Nabudlayan sila nga batunon ang pagtamod sang Dios tuhoy sa sini. Makalilipay gid makita kon paano ginbuligan sang Pulong sang Dios ang isa ka tawo nga malandas ini nga problema.​​—⁠2 Corinto 10:​4-6; Hebreo 4:⁠12.

Nahangpan ni Antonio nga dapat niya himuon nga legal ang iya pag-asawahay kag nagplano sia nga himuon ini pagkatapos sang tigtalapas sang mais agod may galastuhon sia sa punsion sang iya kasal. Isa ka gab-i antes sang tigtalapas, kinawat ang iya mais. Nagdesisyon sia nga hulaton na lang ang masunod nga tigtalapas, kag sa liwat ginkawat ini. Sang liwat nga napaslawan ang isa pa ka panikasog nga makakita sing galastuhon para sa iya kasal, narealisar ni Antonio kon sin-o gid ang matuod nga nagapamatok sa iya. “Indi na ako magpalimbong pa kay Satanas,” siling niya. “Sa masunod nga isa ka bulan kag tunga, magapakasal kami, may punsion man ukon wala!” Gani nagpakasal sila, kag sa ila kakibot ang ila mga abyan nag-amot sing mga manok, mga pato, kag kanding para sa punsion sang ila kasal. Sang narehistro na ang ila pag-asawahay, si Antonio kag ang iya asawa​​—⁠upod sa ila anom ka kabataan​​—⁠nagpabawtismo subong simbulo sang ila dedikasyon kay Jehova.

Ang Isla sang Príncipe

Ang 6,000 ka pumuluyo sang Príncipe panalagsa nga ginduaw sang nagliligad nga mga tinuig sang manugtatap sang sirkito kag mga payunir halin sa São Tomé. Ang mga tagaisla maabiabihon gid kag nalangkag sa pagpamati sa ginasiling sang mga Saksi. Pagkatapos mabasa ang tract nga ginbilin sa iya, ginpangita sang isa ka tawo ang mga payunir sang masunod nga adlaw kag nag-aha nga buligan sila sa pagpanagtag sing dugang pa nga mga tract. Ginpaathag sang mga payunir nga sila lamang ang dapat maghimo sini nga hilikuton, apang nagpamilit ang tawo nga mag-upod sa ila sa pamalaybalay agod mapakilala niya sila sa mga tagbalay upod ang panugyan nga mamati sila sing maayo. Naglakat gid man ining tawo sang ulihi, apang gindayaw anay niya ang mga payunir bangod sang importante nga hilikuton nga ginahimo nila.

Sang 1998 duha ka payunir halin sa São Tomé ang nagsaylo sa Príncipe, kag wala madugay nagdumala sila sing 17 ka pagtuon sang Biblia sa puluy-an. Nag-uswag ang hilikuton, kag wala madugay ang Pagtinuon sa Libro sang Kongregasyon nagapromedyo sing 16 ka tumalambong, kag kapin sa 30 ang nagtambong sa pamulongpulong publiko. Ginpresentar sa city hall nga kinahanglan ang duog tilipunan, kag makalilipay nga may ginhatag nga lote nga patindugan sang Kingdom Hall. Ang mga kauturan halin sa São Tomé nagboluntaryo sa pagpatindog sang isa ka diutay nga Kingdom Hall nga may hulot man para sa duha ka espesyal payunir.

Maathag gid nga ang maayong balita nagapamunga sing madamo pa sa sining nabaw-ing nga mga isla. (Colosas 1:​5, 6) Sang Enero 1990 may 46 ka manugbantala sa São Tomé kag Príncipe. Sang 2002 nga tuig sang pag-alagad, nalab-ot ang kataason nga 388 ka manugbantala sang Ginharian! Kapin sa 20 porsiento sang mga manugbantala ang yara sa bug-os tion nga pag-alagad, kag mga 1,400 ka pagtuon sa Biblia ang nadumalahan. Ang 2001 nga Memoryal gintambungan sang pinakamataas nga kadamuon nga 1,907. Huo, sa sining tropiko nga mga isla, ang pulong ni Jehova madasig nga nagalapnag kag ginahimaya.​​—⁠2 Tesalonica 3:1.

[Kahon/Retrato sa pahina 12]

Popular nga mga Pagwaragwag sa Radyo

Ang publikasyon nga gin-apresyar gid sa sini nga mga isla amo ang Questions Young People Ask​​—⁠Answers That Work.⁠ * Kada duha ka semana, ginapresentar ang isa ka 15-minutos nga programa nga may amo sini nga tig-ulo sa National Radio. Makakulunyag gid nga pamatian ang pamangkot sang manugwaragwag: “Mga pamatan-on, paano ninyo mahibaluan kon bala matuod gid ini nga gugma ukon pagsalimuang lamang nga gugma?” kag ginsundan niya ini paagi sa pagbasa sa isa ka bahin sang libro! (Tan-awa ang kapitulo 31.) Ang kaanggid man nga pagwaragwag nagpresentar sang pinili nga mga bahin sang libro nga Ang Sekreto Sang Kalipay sa Pamilya. *

[Mga nota]

^ par. 33 Ginbalhag sang mga Saksi ni Jehova.

^ par. 33 Ginbalhag sang mga Saksi ni Jehova.

[Retrato sa pahina 9]

Ang una nga Kingdom Hall sa São Tomé sang 1994

[Mga retrato sa pahina 10]

1. Ang ginhimo sing madasig nga Kingdom Hall sa Mé-Zochi

2. Isa ka maragtason nga distrito nga kombension ang ginhiwat sa sining awditoryum

3. Ang malipayon nga mga kandidato sa bawtismo sa kombension

[Credit Line sabg retrato sa pahina 8]

Globe: Mountain High Maps® Copyright © 1997 Digital Wisdom, Inc.