Magdiretso sa kaundan

Magdiretso sa listahan sang kaundan

Iluga si Jehova, ang Aton Dios nga Wala sing Ginapasulabi

Iluga si Jehova, ang Aton Dios nga Wala sing Ginapasulabi

 Iluga si Jehova, ang Aton Dios nga Wala sing Ginapasulabi

“Wala sing ginapasulabi ang Dios.”​​—⁠ROMA 2:11.

1, 2. (a) Ano ang katuyuan ni Jehova sa mga Canaanhon sa kabilugan? (b) Ano ang ginhimo ni Jehova, kag ano nga mga pamangkot ang ginpautwas sini?

SAMTANG nagakampo sa Patag sang Moab sang 1473 B.⁠C.⁠E., namati sing maayo ang Israel kay Moises. Isa ka mabudlay nga kahimtangan ang nagahulat sa tabok sang Suba Jordan. Ginpahayag ni Moises ang katuyuan ni Jehova nga lutuson sang Israel ang pito ka gamhanan nga pungsod sang mga Canaanhon sa Ginsaad nga Duta. Makapasalig gid ang mga pinamulong ni Moises: “Pat-od nga itugyan sila sa imo ni Jehova nga imo Dios, kag lutuson mo sila”! Indi dapat makigkatipan ang Israel sa ila, kag indi sila dapat hatagan sing pabor.​​—⁠Deuteronomio 1:⁠1; 7:⁠1, 2.

2 Apang, ginluwas ni Jehova ang isa ka pamilya gikan sa una nga siudad nga ginsalakay sang Israel. Ang katawhan gikan sa apat pa ka banwa gin-amligan man sang Dios. Ngaa? Ano ang ginatudlo sa aton tuhoy kay Jehova sang talalupangdon nga mga hitabo may kaangtanan sa paglampuwas sining mga Canaanhon? Kag paano naton sia mailog?

Mga Reaksion sa Kabantugan ni Jehova

3, 4. Ano ang epekto sang mga balita tuhoy sa mga kadalag-an sang mga Israelinhon sa mga indibiduwal sa Canaan?

3 Sa tion sang 40 ka tuig nga yara ang Israel sa kahanayakan antes magsulod sa Ginsaad nga Duta, si Jehova nag-amlig kag nagpakig-away para sa iya katawhan. Sa bagatnan sang Ginsaad nga Duta, gin-atubang sang Israel ang Canaanhon nga hari sang Arad. Paagi sa bulig ni Jehova ginlutos sia kag ang iya katawhan sang mga Israelinhon sa Horma. (Numeros 21:​1-3) Sang ulihi, nangalihid ang Israel sa duta sang Edom kag nagpaaminhan sa aminhan-sidlangan sang Patay nga Dagat. Sa sini nga duog, nga ginpuy-an anay ni Moab, may mga Amornon na. Wala ginpaagi sang Amornon nga si Hari Sihon ang Israel sa iya teritoryo. Natabo ang inaway sa Jahaz, nga maathag nga yara sa aminhan sang Kasulgan nga Nalupyakan sang Arnon, diin napatay si Sihon. (Numeros 21:​23, 24; Deuteronomio 2:​30-​33) Sa unhan pa sa aminhan, naggahom si Og sa iban nga mga Amornon sa Basan. Bisan pa higante si Og, wala gid sia sing padaug kay Jehova. Napatay si Og sa Edrei. (Numeros 21:​33-​35; Deuteronomio 3:​1-3, 11) Ang mga balita tuhoy sa sini nga mga kadalag-an pati na ang mga istorya tuhoy sa Exodo sang Israel gikan sa Egipto may daku gid nga epekto sa mga indibiduwal nga nagapuyo sa Canaan.⁠ *

4 Sang ginsubol sang Israel ang Canaan pagtabok nila sa Jordan, nagkampo sila sa Gilgal. (Josue 4:​9-​19) Yara lang sa unhan ang napaderan nga siudad sang Jerico. Ang nabatian sang Canaanhon nga si Rahab tuhoy sa mga pagpanghikot ni Jehova nagpahulag sa iya nga manghikot nga may pagtuo. Bilang resulta, sang ginlaglag ni Jehova ang Jerico, ginluwas Niya sia kag ang iya panimalay.​​—⁠Josue 2:​1-​13; 6:​17, 18; Santiago 2:⁠25.

5. Ano ang nagpahulag sa mga Gabaonhon nga manghikot sing maalamon?

5 Masunod, nagtaklad ang Israel gikan sa kapatagan malapit sa suba pasulod sa sentro nga mga pukatod sang rehiyon. Nagasunod sang panuytoy ni Jehova, naggamit si Josue sing mga taktika sa pagsalakay batok sa siudad sang Ai. (Josue, kapitulo 8) Ang balita tuhoy sa malaglagon nga kalutusan nagpahulag sa madamong Canaanhon nga mga hari nga magtingob para sa inaway. (Josue 9:​1, 2) Tuhay naman ang ginhimo sang mga pumuluyo sang malapit nga Hevhanon nga siudad sang Gabaon. “Sila, suno sa ila kaugalingon nga kabubut-on,” siling sang Josue 9:​4, “nagpanghikot sing maalamon.” Kaangay ni Rahab, nabatian nila  ang pagluwas ni Jehova sa iya katawhan sa Exodo kag sa paglutos kay Sihon kag kay Og. (Josue 9:​6-​10) Narealisar sang mga Gabaonhon nga wala sing pulos ang pagbato. Gani bilang tiglawas sang Gabaon kag sang tatlo ka malapit nga siudad​​—⁠Kefira, Beerot, kag Kiryat-jearim⁠​—⁠nagpadala sila kay Josue sa Gilgal sing isa ka delegasyon nga nagpakunokuno nga naghalin sila sa malayo nga duog. Nagmadinalag-on ang ila pahito. Nakigkatipan si Josue sa ila nga nagpasigurado sang ila kaluwasan. Pagligad sang tatlo ka adlaw nahisayran ni Josue kag sang mga Israelinhon nga gindaya gali sila. Apang, nanumpa sila kay Jehova sa katipan kag gani gintuman nila ini. (Josue 9:​16-​19) Nahamut-an bala ini ni Jehova?

6. Ano ang reaksion ni Jehova sa pagpakigkatipan ni Josue sa mga Gabaonhon?

6 Gintugutan ang mga Gabaonhon nga mangin mga manugpangahoy kag manugsag-ub sing tubig para sa mga Israelinhon, kag “para sa altar ni Jehova” sa tabernakulo. (Josue 9:​21-​27) Wala labot sini, sang ginpahog sang lima ka Amornon nga hari kag sang ila mga hangaway ang mga Gabaonhon, milagruso nga nagpasilabot si Jehova. Mas madamo nga kaaway ang napatay sa mga bato nga yelo sangsa ginpatay sang mga tropa ni Josue. Ginsabat pa gani ni Jehova ang pangabay ni Josue nga magpahimunong ang adlaw kag ang bulan agod malutos sing bug-os ang mga kaaway. “Wala pa sing adlaw nga kaangay sadto, antes sini ukon pagkatapos sini,” siling ni Josue, “nga namati si Jehova sa tingog sang isa ka tawo, kay si Jehova mismo ang nagapakig-away para sa Israel.”​​—⁠Josue 10:​1-​14.

7. Anong kamatuoran nga ginbaton ni Pedro ang ginpakita sa kaso sang pila ka Canaanhon?

7 Ang Canaanhon nga si Rahab kag ang iya panimalay, subong man ang mga Gabaonhon, nagkahadlok kay Jehova kag nanghikot sing nahisuno. Maathag nga ginapakita sang natabo sa ila ang kamatuoran nga ginsiling sang ulihi sang Cristianong apostol nga si Pedro: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.”​—⁠Binuhatan 10:​34, 35.

Pagpakig-angot kay Abraham kag sa Israel

8, 9. Paano ginpakita ang pagkawala sing pinasulabi ni Jehova sa iya mga pagpakig-angot kay Abraham kag sa pungsod sang Israel?

8 Ginpatalupangod ni disipulo Santiago ang di-bagay nga kaayo sang Dios sa Iya pagpakig-angot kay Abraham kag sa iya kaliwat. Ang pagtuo ni Abraham, indi ang iya etniko nga ginhalinan, ang naghimo sa iya nga “abyan ni Jehova.” (Santiago 2:23) Ang pagtuo kag gugma ni Abraham kay Jehova nagdala sing mga pagpakamaayo sa iya mga kaliwat. (2 Cronica 20:7) Si Jehova nagsaad kay Abraham: “Pat-od nga pakamaayuhon ko ikaw kag pat-od nga pabuaron ko ang imo binhi subong sang kabituunan sa mga langit kag subong sang balas nga yara sa baybayon.” Apang talupangda ang saad sa masunod nga bersikulo: “Paagi sa imo binhi ang tanan nga pungsod sang duta pat-od nga magapakamaayo sang ila kaugalingon.”​​—⁠Genesis 22:​17, 18; Roma 4:1-8.

9 Kabaliskaran sang pagpakita sing pagpasulabi, ginpakita ni Jehova paagi sa mga pagpakig-angot niya sa Israel ang iya mahimo para sa mga nagatuman sa iya. Ini nga mga pagpakig-angot mga halimbawa kon paano ginpakita ni Jehova ang mainunungon nga gugma sa iya matutom nga mga alagad. Bisan pa ang Israel “pinasahi nga pagkabutang” ni Jehova, wala ini nagakahulugan nga ang iban nga katawhan indi makaagom sang kaayo sang Dios. (Exodo 19:⁠5; Deuteronomio 7:​6-8) Matuod, gintubos ni Jehova ang Israel gikan sa pagkaulipon sa Egipto kag pagkatapos nagpahayag: “Kamo lamang ang ginkilala ko sa tanan nga  panimalay sang duta.” Apang paagi kay manalagna Amos kag sa iban pa, nagsaad man si Jehova sing isa ka makalilipay nga paglaum para sa “tanan nga mga pungsod.”​​—⁠Amos 3:⁠2; 9:​11, 12; Isaias 2:​2-4.

Si Jesus, ang Wala sing Ginapasulabi nga Manunudlo

10. Paano gin-ilog ni Jesus ang iya Amay sa pagpakita sing pagkawalay pinasulabi?

10 Sang iya ministeryo sa duta, si Jesus, nga amo ang eksakto nga larawan sang iya Amay, nag-ilog kay Jehova nga wala sing ginapasulabi. (Hebreo 1:⁠3) Ang panguna niya nga ginakabalak-an sa amo nga tion amo ang pagpangita sa “nadula nga mga karnero sang panimalay sang Israel.” Apang, wala sia magpangalag-ag sa pagpanaksi sa isa ka Samaritana sa bubon. (Mateo 15:24; Juan 4:​7-​30) Naghimo man sia sing milagro sa pangabay sang isa ka opisyal sa hangaway, nga indi isa ka Judiyo. (Lucas 7:​1-​10) Isa pa ini ka pagpakita sang iya gugma sa katawhan sang Dios paagi sa iya mga buhat. Ang mga disipulo ni Jesus nagbantala man sing lapnag. Nangin maathag nga ang talaksan sa pagbaton sing pagpakamaayo ni Jehova naangot, indi sa nasyonalidad, kundi sa panimuot. Ang mapainubuson, bunayag sing tagipusuon nga mga tawo nga gutom sa kamatuoran nagapamati sa maayong balita sang Ginharian. Sa kabaliskaran, ang mga bugalon kag matinaastaason nagtamay kay Jesus kag sa iya mensahe. “Dayag ko ikaw nga ginadayaw, Amay, Ginuo sang langit kag duta,” pahayag ni Jesus, “bangod gintago mo sing mahalungon ini nga mga butang gikan sa mga maalam kag mga utukan, kag ginpahayag ini sa mga bata. Huo, O Amay, bangod ang paghimo sini amo ang paagi nga imo ginakahamut-an.” (Lucas 10:21) Kon nagapakig-angot kita sa iban pasad sa gugma kag pagtuo, wala kita sing ginapasulabi, nakahibalo nga amo ini ang paagi nga ginakahamut-an ni Jehova.

11. Paano ginpakita ang pagkawalay pinasulabi sa Cristianong kongregasyon sang una?

11 Sa Cristianong kongregasyon sang una, ang mga Judiyo kag di-Judiyo alalangay. “Himaya kag dungog kag paghidait para sa tagsatagsa nga nagahimo sing maayo,” paathag ni Pablo, “una para sa Judiyo kag para man sa Griego. Kay wala sing ginapasulabi ang Dios.”⁠ * (Roma 2:​10, 11) Indi ang ila nasyonalidad ang nagpat-od kon bala nakabenepisyo sila sa di-bagay nga kaayo ni Jehova kundi ang ila reaksion sang matun-an nila ang tuhoy kay Jehova kag ang paglaum nga ginahatag paagi sa gawad sang iya Anak, si Jesus. (Juan 3:​16, 36) Si Pablo nagsulat: “Indi sia Judiyo sa gua lamang, ukon pagsirkunsidar nga sa gua lamang sa unod. Kundi isa sia ka Judiyo sa sulod, kag ang iya pagsirkunsidar amo sa tagipusuon paagi sa espiritu, kag indi paagi sa nasulat nga pagsulundan.” Nian paagi sa mapahituon nga paggamit sing mga tinaga sa termino nga “Judiyo” (buot silingon “sang Juda,” nga amo, pagdayaw), si Pablo nagdugang: “Ang pagdayaw sa iya nagagikan, indi sa mga tawo, kundi sa Dios.” (Roma 2:​28, 29) Si Jehova nagadayaw nga wala sing ginapasulabi. Kita man bala?

12. Ano nga paglaum ang ginahatag sang Bugna 7:⁠9, kag kay sin-o?

12 Sang ulihi, sa isa ka palanan-awon, nakita ni apostol Juan ang matutom nga hinaplas nga mga Cristiano nga ginalaragway subong isa ka espirituwal nga pungsod sang 144,000, nga “ginpamat-inan gikan sa tagsa ka tribo sang mga anak sang Israel.” Pagkatapos sini nakita ni Juan “ang isa ka dakung kadam-an . . . gikan sa tanan nga pungsod kag tribo kag katawhan kag hambal, nga nagatindog sa atubangan sang trono kag sang Kordero, nga napanaptan sing malaba nga mga panapton nga maputi; kag may mga paklang sang palma sa ila mga kamot.” (Bugna 7:​4, 9) Sa amo, tanan nga etniko nga mga grupo ukon lenguahe ginabaton sa modernong-adlaw nga Cristianong kongregasyon. Ang mga indibiduwal sa tanan nga ginhalinan may paglaum nga makalampuwas sa nagapakari nga “dakung kapipit-an” kag makainom gikan sa “mga tuburan sang tubig nga nagahatag sing kabuhi” sa bag-ong kalibutan.​​—⁠Bugna 7:​14-​17.

Positibo nga mga Epekto

13-15. (a) Paano naton malandas ang mga kinatuhayan sa rasa kag kultura? (b) Magsambit sing mga halimbawa sang mga benepisyo nga mahatag sang pagpakita sing pagkamainabyanon.

13 Kilala gid kita ni Jehova, subong sang isa ka  maayo nga amay sa iya mga anak. Sing kaanggid, kon mahangpan naton ang iban paagi sa pagpakita sing interes sa ila kultura kag ginhalinan, mangin indi na salapakon ang mga kinatuhayan. Ang mga sablag bangod sang etniko nga ginhalinan nagakadula, kag ang pag-abyanay kag gugma nagabakod. Ang paghiusa nagauswag. (1 Corinto 9:​19-​23) Ginapakita ini sa hilikuton sang mga misyonero nga nagaalagad sa mga teritoryo sa iban nga pungsod. Interesado sila sa mga tawo nga nagapuyo didto, kag bilang resulta, indi madugayan kag nagasuod na sila sa lokal nga mga kongregasyon.​​—⁠Filipos 2:4.

14 Ang positibo nga mga epekto sang wala sing ginapasulabi makita sa madamo nga mga pungsod. Si Aklilu, nga naggikan sa Etiopia, nasubuan magpuyo sa kapital sang Britanya, sa London. Nadugangan pa ang iya kasubo sang nabatyagan niya ang pagkadimainabyanon sa mga tawo nga naggikan sa iban nga mga pungsod, nga daw mabatyagan sa madamo nga dalagku nga siudad sang Europa karon. Tuhay gid ang naeksperiensiahan ni Aklilu sang magtambong sia sa isa ka Cristianong miting sa Kingdom Hall sang mga Saksi ni Jehova! Gin-abiabi sia sang mga nagtambong didto, kag wala madugayi napahamtang na ang iya buot. Madasig ang iya pag-uswag sa pagpatudok sang iya apresasyon sa Manunuga. Wala magdugay, nagpangita sia sing mga kahigayunan nga makapakigbahin sa pagpalapnag sing maayong balita sang Ginharian sa iban sa amo nga duog. Sa pagkamatuod, isa ka adlaw sang ginpamangkot si Aklilu sang iya kaupod sa pagbantala kon ano na karon ang iya tulumuron sa kabuhi, nagsabat gilayon si Aklilu nga nagalaum sia nga sa pila ka adlaw mangin bahin sia sang isa ka kongregasyon nga nagagamit sang iya lenguahe, nga Amharico. Sang mahibaluan ini sang mga gulang sa lokal nga Ingles nga kongregasyon, naghimo sila sing kahimusan para sa isa ka publiko nga diskurso sa Biblia sa tumandok nga hambal ni Aklilu. Bangod sang imbitasyon nga magtambong, madamo nga mga dumuluong kag tumandok nga mga tawo ang nagsakdag sa una nga miting publiko sa Amharico sa Britanya. Sa karon, ang mga Etiopianhon kag ang iban pa sa amo nga duog nahiusa sa nagauswag nga kongregasyon. Nasapwan sang madamo didto nga wala sing makapugong sa ila sa pagpanindugan dampig kay Jehova kag simbuluhan ini paagi sa Cristianong bawtismo.​​—⁠Binuhatan 8:⁠26-36.

15 Ang mga kinaiya kag mga ginhalinan nanuhaytuhay. Indi ini talaksan sang pagkasuperyor ukon pagkakubos; mga kinatuhayan lamang ini. Sang nagatan-aw sa bawtismo sang bag-o nga dedikado nga mga alagad ni Jehova sa isla sang Malta, ang pagsinadya sang lokal nga mga Saksi nagdugang sa luha sang kalipay nga nagatulo sa mga mata sang mga bisita gikan sa Britanya. Ang mga grupo sang mga taga-Malta kag mga Britaniko nagpabutyag sang ila balatyagon apang sa magkatuhay nga paagi, kag ang ila daku nga gugma kay Jehova nagpabakod sa higot sang Cristianong paghiliupod.​​—⁠Salmo 133:⁠1; Colosas 3:14.

Paglandas sa Pag-ihig-ihig

16-18. Isaysay ang isa ka eksperiensia nga nagapakita kon paano malandas ang pag-ihig-ihig sa Cristianong kongregasyon.

16 Samtang nagatudok ang aton gugma kay Jehova kag sa aton Cristianong mga kauturan, labi pa naton nga mailog si Jehova sa paagi  nga ginatamod naton ang iban. Ang bisan ano nga pag-ihig-ihig nga nabatyagan naton anay sa iban nga mga nasyonalidad, rasa, ukon kultura mahimo malandas. Binagbinaga halimbawa ang kaso ni Albert nga nag-alagad sa British Army sa tion sang Bug-os Kalibutan nga Inaway II kag nabihag sang mga Hapones sang napukan ang Singapore sang 1942. Nag-obra sia sang ulihi sing mga tatlo ka tuig sa “riles sang kamatayon,” malapit sa ginkilala subong taytay sa suba sang Kwai. Sang ginbuy-an sia sang matapos ang inaway, nagabug-at sia sing 32 ka kilo, nabalian sing tul-an sa apipingig kag sa ilong, kag ginlupot, may bitok, kag malaria. Malala man ang kahimtangan sang linibo ka kaupod niya nga priso; madamo ang wala makalampuwas. Bangod sang kasingki nga nakita kag naeksperiensiahan ni Albert, nagpauli sia sang 1945 nga akig kag may hinakit, nga wala gid sing interes sa Dios ukon relihion.

17 Ang asawa ni Albert nga si Irene, nangin isa sang mga Saksi ni Jehova. Bilang pakomplaser sa iya asawa, nagtambong si Albert sa pila ka miting sang lokal nga kongregasyon sang mga Saksi ni Jehova. Si Paul, isa ka lamharon nga Cristiano nga bug-os tion nga ministro, nagduaw kay Albert agod tun-an ang Biblia upod sa iya. Wala madugayi kag narealisar ni Albert nga si Jehova nagatulok sa mga indibiduwal suno sa kahimtangan sang ila tagipusuon. Gindedikar niya ang iya kabuhi kay Jehova kag nagpabawtismo.

18 Nagsaylo sang ulihi si Paul sa London, nagtuon sing Hapones, kag nakig-upod sa nagahambal-Hapones nga kongregasyon. Sang nagpanugda sia nga dalhon ang pila ka bisita nga Hapones nga mga Saksi sa kongregasyon niya anay, nadumduman sang mga kauturan didto ang pag-ihig-ihig ni Albert sa mga tawo nga halin sa Japan. Sugod sang pagbalik niya sa Britanya, naglikaw si Albert nga maatubang ang bisan sin-o nga naghalin sa Japan, gani nagpalibog ang mga kauturan kon paano niya atubangon ang kahimtangan. Indi sila dapat nahangawa​​—⁠ginbaton ni Albert ang mga bisita nga may bug-os nga utudnon nga gugma.​​—⁠1 Pedro 3:​8, 9.

“Magpasangkad”

19. Ano nga laygay ni apostol Pablo ang makabulig sa aton kon may huyog kita nga magpasulabi?

19 “Ang pagpakita sing pagpasulabi indi maayo,” sulat sang maalam nga si Hari Solomon. (Hulubaton 28:21) Mahapos nga magsuod sa mga tawo nga kilala gid naton. Apang, kon kaisa diutay lang nga interes ang ginapakita naton sa indi naton tanto  ka kilala. Ini nga pagpasulabi indi nagakaigo sa isa ka alagad ni Jehova. Dapat gid naton tanan sundon ang maathag nga laygay ni Pablo nga “magpasangkad”​​—⁠huo, pasangkaron naton ang aton gugma sa mga masigka-Cristiano nga naggikan sa nagkalainlain nga ginhalinan.​​—⁠2 Corinto 6:⁠13.

20 May pribilehiyo man kita sa langitnon nga pagtawag ukon nagalaum nga magkabuhi sing dayon sa duta, ang aton pagkawalay pinasulabi nagabulig sa aton nga maagom ang paghiusa sa isa ka panong, isa ka Manugbantay. (Efeso 4:​4, 5, 16) Ang pagpanikasog nga ilugon si Jehova, ang aton Dios nga wala sing ginapasulabi, makabulig sa aton sa Cristianong ministeryo, sa aton pamilya, kag sa kongregasyon, sa pagkamatuod, sa tanan nga bahin sang kabuhi. Paano? Binagbinagon sang masunod nga artikulo ini nga topiko.

[Mga nota]

^ par. 3 Ang kabantugan ni Jehova nangin topiko sang sagrado nga mga ambahanon sang ulihi.​​—⁠Salmo 135:​8-​11; 136:​11-​20.

^ par. 11 Ang ekspresyon nga “Griego” diri nagapatuhoy sa mga Gentil sa kabilugan.​​—⁠Insight on the Scriptures, ginbalhag sang mga Saksi ni Jehova, Tomo 1, pahina 1004.

Paano Mo Sabton?

Paano ginpakita ni Jehova ang pagkawala sing pinasulabi kay Rahab kag sa mga Gabaonhon?

Paano ginpakita ni Jesus nga wala sia sing ginapasulabi sa iya pagpanudlo?

Ano ang makabulig sa aton nga malandas ang bisan ano nga pag-ihig-ihig sa kultura kag sa rasa?

[Mga Pamangkot sa Pagtinuon]

20. Sa ano nga bahin sang kabuhi dapat naton ilugon si Jehova, ang aton Dios nga wala sing ginapasulabi?

[Retrato sa pahina 13]

Ang pagsakop sang Israel sa Canaan nagsugod

[Retrato sa pahina 15]

Si Jesus wala magpangalag-ag sa pagpanaksi sa isa ka Samaritana

[Retrato sa pahina 16]

Isa ka Amharico nga miting publiko sa Britanya

[Retrato sa pahina 16]

Ang gugma ni Albert kay Jehova nagbulig sa iya nga malandas ang pag-ihig-ihig