Magdiretso sa kaundan

Magdiretso sa listahan sang kaundan

Bulig Agod Huptan ang Pagkasagrado sang Dugo

Bulig Agod Huptan ang Pagkasagrado sang Dugo

 Report sang mga Manugbantala sang Ginharian

Bulig Agod Huptan ang Pagkasagrado sang Dugo

SA BUG-OS nga duta ang mga alagad ni Jehova nagpakita sing pagkamainunungon sa Dios may kaangtanan sa pagkasagrado sang dugo. (Binuhatan 15:​28, 29) Ang bulig para sa Cristianong paghiliutod gin-aman sang matutom kag mainandamon nga ulipon nga klase. (Mateo 24:45-​47) Tan-awon naton kon ano ang mga resulta sini sa Pilipinas.

Ang sanga sa Pilipinas nagreport: “Ginpahibalo kami sang 1990 nga ang mga tiglawas halin sa Brooklyn Bethel magahiwat sing isa ka seminar diri sa Pilipinas. Gin-agda ang kauturan nga mga lalaki halin sa pila ka sanga sa Asia, lakip ang Korea, Taiwan, kag Hong Kong. Ang katuyuan amo ang pagbulig sa pagtukod sing Hospital Information Services sa ila mga sanga kag subong man sa paghimo sing kahimusan para sa mga Hospital Liaison Committee. Sa Pilipinas ang mga komite una nga gintukod sa apat ka dalagku nga mga siudad.” Ang mga komite nagtinguha sa pagpangita sing mga doktor nga luyag magkooperar sa aton may kaangtanan sa aton Cristianong panindugan tuhoy sa dugo. Buligan man nila ang mga kauturan kon may mag-utwas nga mga problema tuhoy sa dugo.

Napili si Remegio nga mag-alagad sa Hospital Liaison Committee sa Baguio. Sa paglipas sang tion, nakita sang mga doktor ang epekto sang mga hilikuton sang komite. Nadumduman pa ni Remegio ang isa ka okasyon sang nakigsapol ang madamo nga doktor sa isa Hospital Liaison Committee agod mahibaluan kon paano bulngon ang Saksi nga mga pasyente nga nagapangindi sa dugo. Si Remegio nagsiling: “Nagsugod sa pagpamangkot ang mga doktor, apang binudlayan gid ako bangod ang mga pamangkot tuman ka teknikal.” Nangamuyo sia kay Jehova sing bulig sa pag-atubang sini nga problema. Si Remegio nagsiling pa: “Sa tapos sang kada pamangkot, ang iban nga doktor nagbayaw sang ila mga kamot kag nagsaysay kon paano nila gin-atubang ang kaanggid nga kahimtangan.” Nalipay si Remegio bangod sang bulig, ilabi na bangod ang pagpamangkot kag pagsabat naglawig sing duha ka oras.

May yara na karon 21 ka komite sa bug-os nga pungsod, nga ginatapuan sang may kabilugan nga 77 ka kauturan nga mga lalaki. Si Danilo, nga isa ka Saksi kag isa ka doktor, nagsiling: “Narealisar sang mga doktor nga ang ila Saksi nga mga pasyente ginasakdag sang isa ka organisasyon nga mahigugmaon nga nagaulikid sa ila.” May isa ka doktor nga daw nagpangalag-ag sang primero nga operahan ang isa ka utod nga lalaki nga indi magpatughong sing dugo. Apang, malig-on ang utod sa iya panindugan. Naoperahan sia kag nagmadinalag-on. Ang Hospital Information Services nagreport: “Nakibot gid ang doktor sa pag-ayo sang utod. Sia nagsiling: ‘Pasad sa natabo diri, kon ang isa sang inyo katapo magpaopera nga wala nagagamit sing dugo, nalipay ako nga himuon ini.’”