Magdiretso sa kaundan

Magdiretso sa listahan sang kaundan

“Maghigugmaanay Kamo”

“Maghigugmaanay Kamo”

 Maghigugmaanay Kamo”

“Sa sini ang tanan makahibalo nga kamo mga disipulo ko, kon maghigugmaanay kamo.”​—⁠JUAN 13:35.

1. Ano nga kinaiya ang ginpadaku ni Jesus wala madugay antes sang iya kamatayon?

“MAHAL nga mga anak.” (Juan 13:33) Paagi sa sining mapinalanggaon nga mga pulong, ginsilingan ni Jesus ang iya mga apostoles sang gab-i antes sang iya kamatayon. Wala kita sing rekord sa Ebanghelyo nga gingamit ni Jesus ining mahinuklugon nga mga pulong sa pagpakighambal sa ila antes sini. Apang, sadtong pinasahi nga gab-⁠i, napahulag sia nga gamiton ining mapinalanggaon nga mga pulong agod ipaalinton ang iya tudok nga gugma sa iya mga sumulunod. Sa katunayan, naghambal si Jesus tuhoy sa gugma sing mga 30 ka beses sadto nga gab-⁠i. Ngaa ginpadaku gid niya ini nga kinaiya?

2. Ngaa ang pagpakita sing gugma importante gid para sa mga Cristiano?

2 Ginpaathag ni Jesus kon ngaa importante gid ang gugma. “Sa sini,” siling niya, “ang tanan makahibalo nga kamo mga disipulo ko, kon maghigugmaanay kamo.” (Juan 13:35; 15:​12, 17) Ang mangin sumulunod ni Cristo naangot sing suod sa pagpakita sing utudnon nga gugma. Ang matuod nga mga Cristiano makilala, indi paagi sa pinasahi nga pagpamayo ukon sa pila ka di-kinaandan nga kustombre, kundi paagi sa mainit kag mapinalanggaon nga gugma nila sa isa kag isa. Ining pinasahi nga gugma amo ang ikaduha sa tatlo ka panguna nga mga kinahanglanon sa pagkadisipulo ni Cristo nga ginsambit sa umpisa sang nagligad nga artikulo. Ano ang makabulig sa aton agod makapadayon sa pagtuman sini nga kinahanglanon?

‘Paghimo Sini sing Labi kag Labi Pa’

3. Ano nga laygay tuhoy sa gugma ang ginhatag ni apostol Pablo?

3 Subong sang mga sumulunod ni Cristo sang unang siglo, ining talalupangdon nga gugma makita man karon sa tunga sang matuod nga mga disipulo ni Cristo. Si apostol Pablo nagsulat sa mga Cristiano sang unang siglo: “Nahanungod sa utudnon nga gugma, wala kamo sing kinahanglan nga magsulat kami sa inyo, kay kamo gid natudluan sang Dios nga maghigugmaanay; kag, sa  katunayan, ginahimo ninyo ini sa tanan nga mga kauturan.” Apang, si Pablo nagdugang: “Padayon nga himuon ninyo ini sing labi kag labi pa.” (1 Tesalonica 3:12; 4:​9, 10) Dapat man naton pamatian ang laygay ni Pablo kag panikasugan nga magpakita sang gugma sa isa kag isa “sing labi kag labi pa.”

4. Suno kay Pablo kag kay Jesus, sin-o ang dapat naton hatagan sing pinasahi nga konsiderasyon?

4 Sa amo man nga inspirado nga sulat, ginpalig-on ni apostol Pablo ang mga masigkatumuluo nga “maghambal sing malugpayon sa mga kalag nga ginapung-awan” kag “sakdagon ang mga maluya.” (1 Tesalonica 5:14) Sa isa pa ka higayon, ginpahanumdom niya ang mga Cristiano nga ang mga “mabakod dapat magdala sa mga kaluyahon sang mga indi mabakod.” (Roma 15:⁠1) Naghatag man sing instruksion si Jesus tuhoy sa pagbulig sa mga maluya. Sa tapos matagna nga sa gab-i nga dakpon sia bayaan sia ni Pedro, ginsilingan ni Jesus si Pedro: “Kon makabalik ka na, palig-una ang imo mga kauturan.” Ngaa? Bangod bayaan man nila si Jesus kag gani nagakinahanglan man sing bulig. (Lucas 22:32; Juan 21:15-​17) Busa, ginasugo kita sang Pulong sang Dios nga higugmaon ang mga maluya sa espirituwal kag ang mga wala na nagapakig-upod sa Cristianong kongregasyon. (Hebreo 12:12) Ngaa himuon naton ini? Ginasabat ini sang duha ka maathag nga ilustrasyon nga ginhatag ni Jesus.

Isa ka Nadula nga Karnero kag Isa ka Nadula nga Sensilyo

5, 6. (a) Anong duha ka malip-ot nga ilustrasyon ang ginsugid ni Jesus? (b) Ano ang ginapakita sini nga mga ilustrasyon tuhoy kay Jehova?

5 Agod tudluan ang iya mga tagpalamati kon paano ginatamod ni Jehova ang mga nagtalang, naghatag si Jesus sing duha ka malip-ot nga ilustrasyon. Ang isa tuhoy sa isa ka manugbantay sang karnero. Si Jesus nagsiling: “Sin-o bala nga tawo sa inyo nga may isa ka gatos ka karnero, nga kon madula ang isa sa ila, indi magbiya sang kasiaman kag siam sa kahanayakan kag pangitaon ang isa nga nadula tubtob makita niya ini? Kag sang nakita niya ini ginapas-an niya ini sa iya abaga kag nagakalipay. Kag sang nakapauli sia ginatipon niya ang iya mga abyan kag mga kaingod, nga nagasiling sa ila, ‘Magkalipay kamo upod sa akon, bangod nakita ko ang akon karnero nga nadula.’ Nagasiling ako sa inyo nga sa amo may daku pa nga kalipay sa langit tungod sa isa ka makasasala nga nagahinulsol sangsa kasiaman kag siam ka matarong nga wala nagakinahanglan sing paghinulsol.”​—⁠Lucas 15:4-7.

6 Ang ikaduha nga ilustrasyon tuhoy sa isa ka babayi. Si Jesus nagsiling: “Sin-o bala nga babayi nga may napulo ka drakma nga sensilyo, nga kon madula niya ang isa ka drakma nga sensilyo, indi magsindi sang suga kag magsilhig sang iya balay kag magpangita sing maayo tubtob nga makita niya ini? Kag sang makita niya ini, ginatipon niya ang mga babayi nga abyan niya kag mga kasilingan, nga nagasiling: ‘Magkalipay kamo upod sa akon, bangod nakita ko ang drakma nga sensilyo nga akon nadula.’ Busa, ginasiling ko sa inyo, may kalipay sa tunga sang mga anghel sang Dios tungod sa isa ka makasasala nga nagahinulsol.”​—⁠Lucas 15:8-10.

7. Anong duha ka leksion ang matun-an naton gikan sa mga ilustrasyon tuhoy sa nadula nga karnero kag sa nadula nga sensilyo?

7 Ano ang matun-an naton gikan sa sining duha ka malip-ot nga ilustrasyon? Ginapakita sini sa aton (1) kon paano naton dapat tamdon ang mga nagluya kag (2) kon ano ang dapat naton himuon agod buligan sila. Binagbinagon naton ini nga mga punto.

Nadula Apang Bilidhon

8. (a) Ano ang reaksion sang manugbantay sang karnero kag sang babayi tuhoy sa mga butang nga ila nadula? (b) Ano ang ginasugid sa aton sang ila reaksion tuhoy sa kon paano nila ginatamod ang nadula nila nga mga butang?

8 Sa duha ka ilustrasyon may butang nga nadula, apang talupangda ang reaksion sang mga tag-iya. Ang manugbantay sang karnero wala magsiling: ‘Ano ang balor sang isa ka karnero samtang may yara pa ako sing 99? Wala ini sing kabilinggan sa akon.’ Ang babayi wala magsiling: ‘Ngaa mangilin ako sa isa ka sensilyo? Kontento na ako sa siam nga nabilin sa akon.’ Sa baylo, ginpangita sang manugbantay ang nadula niya nga karnero subong bala nga daw amo lang ini ang iya ginapanag-iyahan. Kag ginbatyag gid sang babayi ang pagkadula sang iya sensilyo subong bala nga wala na sia sing iban pa nga sensilyo. Sa duha ka kahimtangan ang nadula nga butang nagpabilin nga bilidhon sa tag-iya. Ano ang ginapakita sini?

9. Ano ang ginailustrar sang kabalaka nga ginpakita sang manugbantay kag sang babayi?

 9 Talupangda ang konklusion ni Jesus sa duha ka hitabo: “Sa amo may daku pa nga kalipay sa langit tungod sa isa ka makasasala nga nagahinulsol” kag “busa, ginasiling ko sa inyo, may kalipay sa tunga sang mga anghel sang Dios tungod sa isa ka makasasala nga nagahinulsol.” Busa, ang pagkabalaka sang manugbantay kag sang babayi nagapakita, sa pila ka kasangkaron, sang balatyagon ni Jehova kag sang iya langitnon nga mga tinuga. Subong nga ang nadula bilidhon gihapon para sa manugbantay sang karnero kag sa babayi, bilidhon man sa mga mata ni Jehova ang mga nadaldal palayo kag wala na nagapakig-angot sa katawhan sang Dios. (Jeremias 31:⁠3) Ini nga mga indibiduwal mahimo nga maluya sa espirituwal, apang indi man gid sila rebelyuso. Walay sapayan sang ila kaluyahon, mahimo nga ginasunod nila gihapon sa pila ka kasangkaron ang mga ginapatuman ni Jehova. (Salmo 119:176; Binuhatan 15:29) Gani, subong sang una, mahinay si Jehova sa ‘pagtabog sa ila gikan sa iya atubangan.’​—⁠2 Hari 13:23.

10, 11. (a) Paano naton dapat tamdon ang mga nadaldal palayo sa kongregasyon? (b) Suno sa duha ka ilustrasyon ni Jesus, paano naton mapakita ang aton kabalaka sa ila?

10 Kaangay ni Jehova kag ni Jesus, kita man nagakabalaka gid sa mga maluya kag wala na nagapakig-upod sa Cristianong kongregasyon. (Ezequiel 34:16; Lucas 19:10) Ginatamod naton ang mga maluya sa espirituwal subong nadula nga karnero​—⁠indi subong indibiduwal nga indi na mabuligan. Wala kita nagapangatarungan: ‘Ngaa magkabalaka pa sa isa nga maluya? Maayo gihapon ang kongregasyon bisan wala sia.’ Sa baylo, kaangay ni Jehova, ginatamod naton ang mga nadaldal palayo apang luyag manumbalik subong mga bilidhon.

11 Apang, paano naton mapakita ang aton kabalaka sa ila? Ginapakita sang duha ka ilustrasyon ni Jesus nga mahimo naton ini (1) paagi sa paghimo sing una nga tikang, (2) sa paagi nga mangin mainayuhon, kag (3) sa paagi nga mangin determinado. Binagbinagon naton ini sing isa-isa.

Paghimo sing Una nga Tikang

12. Ano ang ginasugid sa aton sang pinamulong nga ‘magapangita sa isa nga nadula’ tuhoy sa panimuot sang manugbantay?

12 Sa nahauna nga ilustrasyon, nagsiling si Jesus nga ang manugbantay ‘magapangita sa isa nga nadula.’ Ang manugbantay naghimo sing una nga tikang kag hungod nga ginpangita ang nadula nga karnero. Ang kabudlayan, katalagman, kag kalayuon wala makapugong sa iya. Sa kabaliskaran, nagpadayon sa pagpangita ang manugbantay “tubtob makita niya ini.”​—⁠Lucas 15:4.

13. Ano ang reaksion sang matutom nga mga lalaki sang una sa mga kinahanglanon sang mga maluya, kag paano naton mailog ini nga mga halimbawa sa Biblia?

13 Sing kaanggid, ang pagbulig sa tawo nga palalig-unon masami nagakinahanglan nga ang mas mabaskog amo ang maghimo sang una nga tikang. Nahangpan ini sang matutom nga mga lalaki sang una. Halimbawa, sang natalupangdan sang anak ni Hari Saul nga si Jonatan nga ang iya mahirop nga abyan nga si David nagakinahanglan sang pagpalig-on, si Jonatan “nagtindog kag nagkadto kay David sa Hores, agod mapalig-on niya ang iya kamot may kaangtanan sa Dios.” (1 Samuel 23:​15, 16) Pagligad sang mga siglo, sang nakita ni Gobernador Nehemias nga ang pila sang iya mga kauturan nga Judiyo naluyahan sing buot, ‘nagtindog man sia gilayon’ kag ginpalig-on sila nga ‘dumdumon si Jehova.’ (Nehemias 4:14) Dapat man kita karon ‘magtindog’​—⁠maghimo sang una nga tikang⁠—sa pagpalig-on sa mga maluya. Apang sin-o sa kongregasyon ang dapat maghimo sini?

14. Sin-o sa Cristianong kongregasyon ang dapat magbulig sa mga maluya?

 14 Ang Cristianong mga gulang ilabi na nga may salabton sa ‘pagpabaskog sa mga kamot nga maluya, kag sa pagpalig-on sa mga tuhod nga nagakurog’ kag sa ‘pagsiling sa mga mabinalak-on sing tagipusuon: “Magpakabakod kamo. Dili kamo mahadlok.”’ (Isaias 35:​3, 4; 1 Pedro 5:​1, 2) Apang, talupangda nga ang laygay ni Pablo nga “maghambal sing malugpayon sa mga kalag nga ginapung-awan” kag “sakdagon ang mga maluya” wala ginhatag sa mga gulang lamang. Kundi, ang mga pulong ni Pablo ginpatuhoy sa bug-os nga “kongregasyon sang mga taga-Tesalonica.” (1 Tesalonica 1:⁠1; 5:14) Kon amo, ang pagbulig sa mga maluya isa ka hilikuton sang tanan nga mga Cristiano. Kaangay sang manugbantay sa ilustrasyon, ang tagsa ka Cristiano dapat mapahulag sa ‘pagpangita sa isa nga nadula.’ Sa pagkamatuod, mangin epektibo gid ini paagi sa bulig sang mga gulang. Makahimo ka bala sing pila ka tikang sa pagbulig sa isa nga maluya sa inyo kongregasyon?

Mangin Mainayuhon

15. Ano ang ginhimo sang manugbantay kag ngaa subong sini ang ginhimo niya?

15 Ano ang ginhimo sang manugbantay sang nakita niya ang nadula nga karnero? ‘Ginpas-an niya ini sa iya mga abaga.’ (Lucas 15:⁠5) Daw ano ka makatalandog kag importante nga detalye! Mahimo nga ang karnero nagadalangdalang sa sulod sang mga inadlaw kag mga gab-i sa indi pamilyar nga teritoryo, ayhan may katalagman pa gani sa mga leon. (Job 38:​39, 40) Wala sing duhaduha nga nagluya ang karnero bangod kulang sing kalan-on. Ayhan tuman na ini kaluya amo nga indi na sini masarangan ang mga balagbag nga masumalang niya sa pagbalik sa panong. Gani, ginkuha kag ginhakwat sang manugbantay ang karnero, kag ginpas-an ini agod malandas ang tanan nga balagbag pabalik sa panong. Paano naton mapakita ang pagtatap nga ginpakita sini nga manugbantay?

16. Ngaa dapat man naton ipakita ang pagkamapinalanggaon sang manugbantay sa nagtalang nga karnero?

16 Ang isa ka tawo nga wala na makapakig-angot sa kongregasyon mahimo nga lapyo na sa espirituwal nga kahulugan. Kaangay sang karnero nga nahamulag sa manugbantay, ini nga indibiduwal mahimo nga nagadalangdalang sa sining di-mainabyanon nga teritoryo sang kalibutan. Bangod wala sing proteksion sang toril, ang Cristianong kongregasyon, labi pa sia nga nadayag sa mga pagsalakay sang Yawa, nga “nagaluyong subong sang isa ka nagangurob nga leon, nga nagapangita sing bisan sin-o man nga matukob.” (1 Pedro 5:⁠8) Dugang pa, nagluya sia bangod kulang sing espirituwal nga pagkaon. Gani, kon wala sing bulig mahimo nga tuman sa iya kaluya amo nga indi niya malandas ang mga balagbag nga masumalang niya sa pagbalik sa kongregasyon. Busa, dapat naton kuhaon, kon sa aton pa, mainayuhon nga hakwaton ang maluya, kag sapnayon sia pabalik. (Galacia 6:⁠2) Paano naton ini mahimo?

17. Paano naton mailog si apostol Pablo kon nagaduaw kita sa isa nga maluya?

17 Si apostol Pablo nagsiling: “Kon ang isa maluya, indi bala ako maluya man?” (2 Corinto 11:​29, The New English Bible; 1 Corinto 9:22) Si Pablo may empatiya sa mga tawo, pati na sa mga maluya. Dapat man kita magpakita sing kahanuklog sa  mga maluya. Kon nagaduaw sa maluya sa espirituwal nga Cristiano, pasaliga sia nga bilidhon sia sa mga mata ni Jehova kag ginakahidlawan sang iya mga masigka-Saksi. (1 Tesalonica 2:17) Pahibalua sia nga handa sila nga buligan sia kag handa nga mangin “isa ka utod nga natawo kon may kapiutan” para sa iya. (Hulubaton 17:17; Salmo 34:18) Ang aton tinagipusuon nga mga ekspresyon mahimo makapalig-on sa iya sing amat-amat tubtob nga makabalik sia sa panong. Ano ang masunod naton nga himuon? Ang ilustrasyon tuhoy sa babayi kag sa nadula nga sensilyo magahatag sa aton sing panuytoy.

Mangin Determinado

18. (a) Ngaa wala madulaan sing paglaum ang babayi sa ilustrasyon? (b) Ano ang determinado nga ginhimo sang babayi, kag ano ang resulta?

18 Nahibaluan sang babayi nga nadulaan sang sensilyo nga ang kahimtangan mabudlay apang may paglaum. Kon ang sensilyo nahulog sa malapad kag madabong sing tanom nga latagon ukon sa madalom kag malunang nga linaw, ayhan hunahunaon niya nga indi na gid ini makita. Apang, bangod nahibaluan niya nga ang sensilyo yara lang sa iya balay, kag posible nga makita, ginsugdan niya ang maid-id kag determinado nga pagpangita. (Lucas 15:⁠8) Una, nagsindi sia sing suga agod magsanag ang iya balay. Dayon nagsilhig sia sa salog, nagalaum nga may lagting sia nga mabatian. Sang ulihi, maid-id sia nga nagpangita sa mga pamusod kag mga hilit-hilit tubtob nga may nakita sia nga igpat sang pilak nga sensilyo. Ang determinado nga panikasog sang babayi ginpadyaan!

19. Ano nga leksion sa pagbulig sa mga maluya ang matun-an naton gikan sa ginhimo sang babayi sa ilustrasyon tuhoy sa nadula nga sensilyo?

19 Subong sang ginapahanumdom sa aton sining detalye sang ilustrasyon, ang suno sa Kasulatan nga salabton sa pagbulig sa maluya nga Cristiano masarangan naton. Subong man, narealisar naton nga nagakinahanglan ini sing panikasog. Sa pagkamatuod, nagsiling si apostol Pablo sa mga gulang sa Efeso: “Sa pagpangabudlay sing subong dapat ninyo buligan ang mga maluya.” (Binuhatan 20:35a) Dumduma nga wala makita sang babayi ang sensilyo paagi lamang sa pagpulupasiplat sa palibot sang iya balay sa pila ka tion. Nakita niya ini bangod ginpangita niya ini sing sistematiko “tubtob nga makita niya ini.” Subong man, kon panikasugan naton nga ipanumbalik ang maluya sa espirituwal nga indibiduwal, dapat kita mangin determinado kag sinsero. Ano ang sarang naton mahimo?

20. Ano ang sarang mahimo sa pagbulig sa mga maluya?

20 Paano naton mabuligan nga makapalambo sing pagtuo kag apresasyon ang maluya? Mahimo nga kinahanglan ang personal nga pagtuon sa Biblia sa nagakaigo nga Cristianong publikasyon. Sa pagkamatuod, paagi sa pagdumala sing pagtuon sa Biblia sa maluya nga indibiduwal mabuligan naton sia sing dalayon kag sing maid-id. Mahimo nga ang manugtatap sa pag-alagad amo ang nakahibalo sing maayo kon sin-o ang dapat maghatag sing bulig. Mahimo sia magpanugda kon ano nga topiko ang dapat tun-an kag kon ano nga publikasyon ang mapuslanon gid. Subong nga ang babayi  sa ilustrasyon naggamit sing mabuligon nga mga kagamitan agod magmadinalag-on, may yara man kita mga galamiton karon nga makabulig sa aton agod matuman ang aton hatag-Dios nga salabton sa pagbulig sa mga maluya. Ang duha sa aton bag-o nga mga galamiton, ukon mga publikasyon, mapuslanon gid sa sini nga hilikuton. Amo ini ang Simbaha ang Lamang Matuod nga Dios kag Mangin Suod kay Jehova.⁠ *

21. Paano ang pagbulig sa mga maluya nagadala sing mga pagpakamaayo sa tanan?

21 Ang pagbulig sa mga maluya nagadala sing mga pagpakamaayo sa tanan. Ang isa nga ginabuligan nagakalipay bangod nakapakig-upod sia liwat sa matuod nga mga abyan. Maagom naton ang tinagipusuon nga kalipay nga mahatag lamang sang paghatag. (Lucas 15:​6, 9; Binuhatan 20:35b) Magalambo ang gugma sa kongregasyon sa kabilugan samtang ang tagsatagsa ka katapo nagapakita sing mahigugmaon nga interes sa iban. Kag labaw sa tanan, nagapadungog ini sa aton matinatapon nga mga Manugbantay, si Jehova kag si Jesus, kay ang ila handum nga sakdagon ang mga maluya makita sa ila mga alagad sa duta. (Salmo 72:12-​14; Mateo 11:28-​30; 1 Corinto 11:⁠1; Efeso 5:⁠1) Busa, may maayo gid kita nga rason nga magpadayon sa ‘paghigugmaanay’!

[Nota]

^ par. 20 Ginbalhag sang mga Saksi ni Jehova.

Mapaathag Mo Bala?

• Ngaa ang pagpakita sing gugma importante sa tagsatagsa sa aton?

• Ngaa dapat naton pakitaan sing gugma ang mga maluya?

• Ano nga leksion ang ginatudlo sa aton sang mga ilustrasyon tuhoy sa nadula nga karnero kag sa nadula nga sensilyo?

• Anong praktikal nga mga tikang ang mahimo naton agod buligan ang isa nga maluya?

[Mga Pamangkot sa Pagtinuon]

[Mga retrato sa pahina 16, 17]

Sa pagbulig sa mga maluya, nagahimo kita sing una nga tikang kag nangin mainayuhon kag determinado

[Retrato sa pahina 17]

Ang pagbulig sa mga maluya nagadala sing mga pagpakamaayo sa tanan