Magdiretso sa kaundan

Magdiretso sa listahan sang kaundan

Daw Ano Kabakod ang Imo pagtuo?

Daw Ano Kabakod ang Imo pagtuo?

 Daw Ano Kabakod ang Imo Pagtuo?

“Bangod sang inyo pagtuo nagatindog kamo.”​—⁠2 CORINTO 1:24.

1, 2. Ngaa dapat may pagtuo kita, kag paano ini labi nga magabakod?

NAKAHIBALO ang mga alagad ni Jehova nga dapat may pagtuo sila. Sa katunayan, ‘kon wala sing pagtuo imposible nga mapahamut-an ang Dios.’ (Hebreo 11:⁠6) Busa, maalamon nga nagapangayo kita sa pangamuyo sing balaan nga espiritu kag sing pagtuo, nga bahin sang maayo gid nga bunga sini. (Lucas 11:13; Galacia 5:​22, 23) Mapabakod man naton ini nga kinaiya kon ilugon naton ang pagtuo sang mga masigkatumuluo.​—⁠2 Timoteo 1:⁠5; Hebreo 13:7.

2 Ang aton pagtuo labi nga magabakod kon padayunon naton ang dalanon nga ginapahamtang sang Pulong sang Dios para sa tanan nga mga Cristiano. Ang pagtuo labi nga magalig-on kon basahon naton adlaw-adlaw ang Biblia kag tun-an sing maukod ang Kasulatan sa bulig sang mga publikasyon nga ginaaman paagi sa “matutom nga tulugyanan.” (Lucas 12:42-44; Josue 1:​7, 8) Magapalig-unay kita sang aton pagtuo paagi sa aton regular nga pagtambong sa Cristianong mga miting, mga asambleya, kag mga kombension. (Roma 1:​11, 12; Hebreo 10:​24, 25) Kag nagabakod ang aton pagtuo kon nagapakighambal kita sa iban sa ministeryo.​—⁠Salmo 145:10-13; Roma 10:11-15.

3. May kaangtanan sa pagtuo, ano nga bulig ang matigayon naton gikan sa mahigugmaon nga Cristianong mga gulang?

3 Ginapabakod sang mahigugmaon nga Cristianong mga gulang ang aton pagtuo paagi  sa paghatag sing Makasulatanhon nga laygay kag pagpalig-on. Kaangay sila ni apostol Pablo, nga nagsiling sa mga taga-Corinto: “Mga masigkamanugpangabudlay kami para sa inyo kalipay, kay bangod sang inyo pagtuo nagatindog kamo.” (2 Corinto 1:​23, 24) Ang isa pa ka badbad nagasiling: “Nagapangabudlay kami upod sa inyo agod malipay kamo, bangod ang inyo pagtuo mabakod.” (Contemporary English Version) Ang mga matarong nagakabuhi bangod sang pagtuo. Sa pagkamatuod, ang isa indi mahimo magpakita sing pagtuo para sa aton ukon makahimo sa aton nga matutom nga mga manughupot sing integridad. May kaangtanan sa sini, ‘dapat naton dalhon ang aton kaugalingon nga lulan.’​—⁠Galacia 3:11; 6:5.

4. Paano ang Makasulatanhon nga mga rekord tuhoy sa matutom nga mga alagad sang Dios makabulig sa pagpabakod sa aton pagtuo?

4 Ang Kasulatan madamo sing rekord tuhoy sa mga tawo nga may pagtuo. Ayhan nahibaluan naton ang madamo sang ila tumalagsahon nga mga buhat, apang nahibaluan man bala naton ang pagtuo nga ginpakita nila sa adlaw-adlaw, ayhan sa sulod sang malawig nga pagkabuhi? Magabakod ang aton pagtuo kon binagbinagon naton karon kon paano nila ginpakita ini nga kinaiya sa mga kahimtangan nga kaanggid sa aton.

Ang Pagtuo Nagahatag sa Aton sing Kaisog

5. Ano ang Makasulatanhon nga pamatuod nga ang pagtuo nagapabakod sa aton nga ibantala ang pulong sang Dios sing maisog?

5 Ang pagtuo nagapabakod sa aton nga ibantala ang pulong sang Dios sing maisog. Maisugon nga gintagna ni Enoc ang paghukom sang Dios. “Yari karon!” siling niya, “si Jehova nag-abot upod ang iya balaan nga linaksa, agod ipatuman ang paghukom batok sa tanan, kag agod hukman ang tanan nga di-diosnon nahanungod sa tanan nila nga di-diosnon nga mga buhat nga ginhimo nila sa di-diosnon nga paagi, kag nahanungod sa tanan makakilibang nga mga butang nga ginpamulong sang di-diosnon nga mga makasasala batok sa iya.” (Judas 14, 15) Sang mabatian ini nga mga pulong, luyag patyon si Enoc sang iya di-diosnon nga mga kaaway. Apang, masidla sia nga nagpamulong nga may pagtuo, kag “ginkuha sia” sang Dios sang ginpatulog sia sang Dios sa kamatayon, ayhan wala magtugot nga mag-antos sia sang kasakit sang kamatayon. (Genesis 5:24; Hebreo 11:⁠5) Indi naton maeksperiensiahan ini nga mga milagro, apang ginasabat ni Jehova ang aton mga pangamuyo agod mabantala naton ang iya pulong nga may pagtuo kag kaisog.​—⁠Binuhatan 4:24-31.

6. Paano ang hatag-Dios nga pagtuo kag kaisog nagbulig kay Noe?

6 Bangod sang pagtuo si Noe “nagtukod sing arka agod maluwas ang iya panimalay.” (Hebreo 11:⁠7; Genesis 6:13-22) Si Noe “isa [man] ka manugbantala sang pagkamatarong” nga maisog nga nagbantala sang paandam sang Dios sa iya mga kontemporaryo. (2 Pedro 2:⁠5) Mahimo nga ginyaguta nila ang iya mensahe tuhoy sa magaabot nga Anaw, kasubong sang pagyaguta sang iban kon ginahatag naton ang Makasulatanhon nga pamatuod nga ang karon nga sistema sang mga butang laglagon sa dili madugay. (2 Pedro 3:3-12) Apang, kaangay ni Enoc kag ni Noe, mapahayag naton ini nga mensahe bangod sang aton hatag-Dios nga pagtuo kag kaisog.

Ang Pagtuo Nagabulig sa Aton nga Magpailob

7. Paano ginpakita ni Abraham kag sang iban pa ang pagtuo kag pagpailob?

7 Kinahanglan naton ang pagtuo kag pailob, ilabi na samtang ginahulat naton ang katapusan sining malauton nga sistema. Lakip sa mga ‘magapanubli sang mga saad paagi sa pagtuo kag pagpailob’ amo ang mahinadlukon sa Dios nga si patriarka Abraham. (Hebreo 6:​11, 12) Bangod sang  pagtuo ginbiyaan niya ang siudad sang Ur, pati na ang tanan nga mga kasulhayan sini, kag nangin pangayaw sa isa ka dumuluong nga pungsod nga ginsaad sang Dios sa iya. Si Isaac kag si Jacob mga manunubli sini man nga saad. Apang, “sa pagtuo ini sila tanan napatay, bisan pa wala nila matigayon ang katumanan sang mga saad.” Bangod sang pagtuo ‘ginhimulatan nila ang maayo pa nga duog, nga amo, ang isa nga langitnon.’ Gani, ang Dios ‘nag-aman sing isa ka siudad para sa ila.’ (Hebreo 11:8-16) Huo, si Abraham, si Isaac, kag si Jacob​—⁠kag ang ila diosnon nga mga asawa⁠​—⁠mapailubon nga naghulat sa langitnon nga Ginharian sang Dios, nga sa idalom sini banhawon sila sa duta.

8. Walay sapayan sang ano nga si Abraham, si Isaac, kag si Jacob nagpakita sing pailob kag pagtuo?

8 Si Abraham, si Isaac, kag si Jacob wala madulai sing pagtuo. Ang Ginsaad nga Duta wala mag-abot sang panahon nila, kag wala nila makita ang tanan nga pungsod nga ginpakamaayo paagi sa binhi ni Abraham. (Genesis 15:​5-7; 22:15-18) Bisan pa ang ‘siudad nga gintukod sang Dios’ nag-abot paglipas lamang sang mga siglo, ining mga lalaki padayon nga nagpakita sing pagtuo kag pailob sa ila bug-os nga kabuhi. Sa pagkamatuod, amo man sini ang dapat naton himuon karon nga ang Mesianikong Ginharian nagaluntad na sa langit.​—⁠Salmo 42:​5, 11; 43:5.

Ang Pagtuo Nagahatag sa Aton sing Pinakamataas nga mga Tulumuron

9. Ano ang kaangtanan sang pagtuo sa mga tulumuron?

9 Wala gid gin-ilog sang matutom nga mga patriarka ang manubo nga estilo sang pagkabuhi sang mga Canaanhon, kay may yara sila mas mataas nga mga tulumuron. Ang pagtuo nagahatag man sa aton sing espirituwal nga mga tulumuron nga nagabulig sa aton nga magpabilin nga nahamulag sa kalibutan nga yara sa gahom sang isa nga malauton, si Satanas nga Yawa.​—⁠1 Juan 2:15-17; 5:19.

10. Paano naton nahibaluan nga ginhimud-usan ni Jose ang tulumuron nga mas mataas sangsa mangin bantog sa kalibutan?

10 Bangod sang pagtuytoy sang Dios, ang anak ni Jacob nga si Jose nangin administrador sang pagkaon sang Egipto, apang indi niya tulumuron nga mangin isa ka bantog nga tawo sa sining kalibutan. Bangod sang iya pagtuo sa katumanan sang mga saad ni Jehova, ginsilingan sang 110-anyos nga si Jose ang iya mga utod: “Malapit na ako mapatay; apang ang Dios pat-od nga magaliso sang iya igtalupangod sa inyo, kag pat-od nga paguwaon niya kamo gikan sa sini nga duta pakadto sa duta nga ginsumpa niya kay Abraham, kay Isaac kag kay Jacob.” Nangabay si Jose nga ilubong sia sa ginsaad nga duta. Sang mapatay sia, gin-embalsamar sia kag ginsulod sa lungon sa Egipto. Apang sang ginhilway ang mga Israelinhon gikan sa pagkaulipon sa Egipto, ginkuha ni manalagna Moises ang mga tul-an ni Jose kag ginlubong sa Ginsaad nga Duta. (Genesis 50:22-26; Exodo 13:19) Ang pagtuo kaangay sang kay Jose dapat magpahulag sa aton nga himud-usan ang mga tulumuron nga mas mataas sangsa mangin bantog sa kalibutan.​—⁠1 Corinto 7:29-31.

11. Sa anong paagi naghatag si Moises sing pamatuod nga may yara sia espirituwal nga mga tulumuron?

11 Si Moises ‘nagpasulabi nga pintasan upod sa  katawhan sang Dios sangsa maagom ang umalagi nga pagpangalipay sa sala’ subong may tinun-an nga katapo sang harianon nga pamilya sang Egipto. (Hebreo 11:23-26; Binuhatan 7:20-22) Bangod sini, nadula niya ang kalibutanon nga kadungganan kag ayhan ang dungganon nga lubong sa napunihan nga lungon sa kilala nga lulubngan sa Egipto. Apang ano ang balor sini kon ipaanggid sa pribilehiyo nga mangin “tawo sang matuod nga Dios,” manugpatunga sang katipan nga Kasuguan, manalagna ni Jehova, kag manunulat sang Biblia? (Esdras 3:⁠2) Handum mo gid bala ang kadungganan sa kalibutan, ukon ginhatagan ka bala sang pagtuo sing mas mataas nga espirituwal nga mga tulumuron?

Ang Pagtuo Nagaresulta sa Makaalayaw nga Kabuhi

12. Ano ang epekto sang pagtuo sa kabuhi ni Rahab?

12 Ang pagtuo nagahatag sa mga tawo indi lamang sing pinakamataas nga mga tulumuron kundi sing makaalayaw man nga kabuhi. Si Rahab nga taga-Jerico mahimo nagbatyag nga ang iya kabuhi subong isa ka makihilawason indi makaalayaw. Apang, nangin makaalayaw ang iya kabuhi sang nagpakita sia sing pagtuo! Sia man “ginpahayag nga matarong paagi sa mga binuhatan [sang pagtuo], pagkatapos niya ginbaton sing maabiabihon ang [Israelinhon nga] mga mensahero kag ginpaguwa sila sa liwan nga dalan,” amo nga nakapalagyo sila sa ila Canaanhon nga mga kaaway. (Santiago 2:24-26) Bangod ginkilala niya si Jehova subong matuod nga Dios, si Rahab nagpakita man sing pagtuo sang gintalikdan niya ang iya makihilawason nga kabuhi. (Josue 2:9-11; Hebreo 11:​30, 31) Nagpamana sia sing isa ka alagad ni Jehova, indi sing isa ka di-tumuluo nga Canaanhon. (Deuteronomio 7:​3, 4; 1 Corinto 7:39) Nakatigayon si Rahab sing daku nga pribilehiyo nga mangin katigulangan sang Mesias. (1 Cronica 2:3-15; Rut 4:20-22; Mateo 1:​5, 6) Kaangay sang iban, nga ang pila sa ila nagtalikod sa imoral nga kabuhi, makabaton sia sing isa pa ka padya​—⁠ang pagkabanhaw sa paraiso nga duta.

13. Paano nakasala si David may kaangtanan kay Bat-seba, apang ano nga panimuot ang ginpakita niya?

13 Sa tapos talikdan ang iya makasasala nga pagkabuhi, si Rahab padayon nga naglakat sa matadlong nga banas. Apang, ang iban nga madugay na nga nagdedikar sa Dios nakasala sing daku. Si Hari David nagpanghilahi upod kay Bat-seba, ginpapatay niya ang bana ni Bat-seba sa inaway, kag dayon ginpangasawa sia. (2 Samuel 11:1-27) Bilang paghinulsol nga may daku  nga kasubo, si David nakitluoy kay Jehova: “Indi pagkuhaa sa akon ang imo balaan nga espiritu.” Wala madula ni David ang espiritu sang Dios. Nagtuo sia nga bangod sang kaluoy ni Jehova, indi Niya pagtamayon ang “buong kag nadugmok nga tagipusuon” bangod sa sala. (Salmo 51:​11, 17; 103:10-14) Bangod sang ila pagtuo, si David kag si Bat-seba ginpadyaan nga malakip sa mga katigulangan sang Mesias.​—⁠1 Cronica 3:⁠5; Mateo 1:​6, 16; Lucas 3:​23, 31.

Pagtuo nga Ginpabakod sang Pasalig

14. Ano nga mga pasalig ang nabaton ni Gideon, kag paano ini nga rekord makaapektar sang aton pagtuo?

14 Bisan pa nagalakat kita sa pagtuo, kinahanglan naton kon kaisa ang pasalig nga buligan sang Dios. Matuod ini kay Hukom Gideon, ang isa nga “paagi sa pagtuo nakadaug sang mga ginharian sa inaway.” (Hebreo 11:​32, 33) Sang ginsalakay sang mga Midianhon kag sang ila mga kaalyado ang Israel, si Gideon nahil-ob sang espiritu sang Dios. Bangod luyag niya ang pasalig nga si Jehova upod sa iya, nagpanugda sia sing mga pagtilaw may kaangtanan sa bulbulon nga panit nga ginbutang sa linasan sa bug-os nga gab-⁠i. Sa una nga pagtilaw, ang panit lamang ang may tun-og, samtang ang duta nagpabilin nga mamala. Sa masunod nga pagtilaw, baliskad ang natabo. Bangod napabakod sia sa sining mga pagtilaw, ang mainandamon nga si Gideon nagpanghikot nga may pagtuo kag ginlutos ang mga kaaway sang Israel. (Hukom 6:33-40; 7:19-25) Kon mangayo kita sing pasalig antes maghimo sing desisyon, wala ini nagakahulugan nga kulang kita sing pagtuo. Ginapakita gid naton ang pagtuo kon ginakonsulta naton ang Biblia kag ang Cristianong mga publikasyon kag kon nagapangayo kita sing pagtuytoy sang balaan nga espiritu sa pangamuyo kon nagahimo sing mga desisyon.​—⁠Roma 8:​26, 27.

15. Paano makabulig sa aton ang pagbinagbinag sa pagtuo ni Barak?

15 Ang pagtuo ni Hukom Barak ginpabakod sang pasalig paagi sa pagpalig-on. Ginpalig-on sia ni manalagna Debora nga sugdan ang paghimo sing tikang nga mahilway ang mga Israelinhon gikan sa pagpamigos ni Hari Jabin nga Canaanhon. Bangod sang pagtuo kag sang pasalig nga ginaalay-ayan sia sang Dios, ginpangunahan ni Barak sa inaway ang 10,000 ka lalaki nga indi tanto naarmasan kag nalutos nila ang mas madamo nga puwersa ni Jabin nga ginapangunahan ni Sisera. Yadto nga kadalag-an ginsambit sa masadya nga ambahanon nanday Debora kag Barak. (Hukom 4:⁠1⁠–​5:31) Ginpalig-on ni Debora si Barak nga magpanghikot subong gintangdo sang Dios nga lider sang Israel, kag isa sia sang mga alagad ni Jehova nga paagi sa pagtuo “nagdaug sa mga hangaway sang mga dumuluong.” (Hebreo 11:34) Ang pagbinagbinag kon paano ginpakamaayo sang Dios si Barak tungod sang pagpanghikot nga may pagtuo mahimo magpahulag gid sa aton nga magpanghikot kon daw nagapangalag-ag kita sa pagtuman sang isa ka mabudlay nga hilikuton sa pag-alagad kay Jehova.

Ang Pagtuo Nagapalambo sing Paghidait

16. Anong maayo nga halimbawa ang ginhatag ni Abraham agod huptan ang pagpakighidait kay Lot?

16 Subong nga ang pagtuo nagabulig sa aton nga matuman ang mabudlay nga mga hilikuton sa pag-alagad sa Dios, nagapalambo man ini sing paghidait kag kalinong. Ginpapili sang tigulang nga si Abraham ang iya mas bataon nga hinablos nga si Lot sing labing maayo nga halalban sang nag-away ang ila mga manugbantay sang panong kag kinahanglan na nga magbulagay sila. (Genesis 13:7-12) Mahimo gid nga si Abraham may pagtuo nga nagpangayo sing bulig sa Dios sa pangamuyo agod malubad ini nga problema. Sa baylo nga unahon ang iya kaugalingon nga kaayuhan, ginlubad niya ini sing mahidaiton. Kon kita kag ang aton Cristianong utod indi maghangpanay, mangamuyo kita nga may pagtuo kag ‘himud-usan ang paghidait,’ ginadumdom ang halimbawa ni Abraham sang mahigugmaon nga pagpatugsiling.​—⁠1 Pedro 3:10-12.

17. Ngaa makasiling kita nga ang paglainay sing buot sa tunga nanday Pablo, Bernabe, kag Marcos nahusay sa mahidaiton nga paagi?

17 Binagbinaga kon paano kita mabuligan nga mapalambo ang paghidait kon iaplikar naton nga may pagtuo ang Cristianong mga prinsipio. Sang sugdan na ni Pablo ang iya ikaduha nga misyonero nga paglakbay, nagsugot si Bernabe sa panugda nga duawon nila liwat ang mga kongregasyon sa Cipre kag Asia Minor. Apang, luyag ni Bernabe nga paupdon ang iya pakaisa nga si Marcos. Indi magsugot si Pablo bangod ginbiyaan anay sila ni Marcos sa Pamfilia. Natabo ang “pagsilabo sang kaakig,” kag bangod sini nga di-paghangpanay, nagsipakay sila. Gin-upod ni Bernabe si Marcos pakadto sa Cipre, samtang gin-upod naman ni Pablo  si Silas kag “naglibot sa Siria kag Cilicia, nga nagapabakod sang mga kongregasyon.” (Binuhatan 15:36-41) Ang ila paglainay sing buot nahusay, kay si Marcos nag-upod sang ulihi kay Pablo sa Roma, kag maayo ang ginsiling sang apostol tuhoy sa iya. (Colosas 4:10; Filemon 23, 24) Sang mabilanggo si Pablo sa Roma sang mga 65 C.⁠E., nagsiling sia kay Timoteo: “Upda si Marcos, kay mapuslanon sia sa pag-alagad sa akon.” (2 Timoteo 4:11) Mahimo nga ginlakip gid ni Pablo sa iya mga pangamuyo ang iya kaangtanan kay Bernabe kag kay Marcos, kag nagresulta ini sa kalinong nga naangot sa “paghidait sang Dios.”​—⁠Filipos 4:​6, 7.

18. Ano ang mahimo nga natabo sa kaso ni Eudias kag ni Sintique?

18 Sa pagkamatuod, bangod di-himpit, “kita tanan nagakasandad sa madamong beses.” (Santiago 3:⁠2) Si Pablo nagsulat tuhoy sa duha ka Cristianong babayi nga wala maghangpanay: “Nagapangabay gid ako kay Eudias kag nagapangabay gid ako kay Sintique nga magtigayon sila sing pareho nga panghunahuna sa Ginuo. . . . Padayon nga buligi ining mga babayi nga nagapanikasog upod sa akon sa maayong balita.” (Filipos 4:​1-3) Mahimo gid nga mahidaiton nga nahusay sining diosnon nga mga babayi ang ila problema paagi sa pag-aplikar sang laygay subong sang narekord sa Mateo 5:​23, 24. Ang pag-aplikar sa Makasulatanhon nga paagi nga may pagtuo makabulig sing daku agod mapalambo ang paghidait sa karon.

Ang Pagtuo Nagabulig sa Aton nga Magbatas

19. Anong mabudlay nga kahimtangan ang wala gid magpaluya sang pagtuo ni Isaac kag ni Rebeca?

19 Bangod sang pagtuo mahimo man naton mabatas ang kapipit-an. Ayhan nagapangasubo kita bangod ginlapas sang isa ka bawtismado nga katapo sang aton pamilya ang Dios paagi sa pagminyo sa di-tumuluo. (1 Corinto 7:39) Si Isaac kag si Rebeca nag-antos bangod sang pagminyo sang ila anak nga si Esau sa di-diosnon nga mga babayi. Ang iya Hethanon nga mga asawa “nangin kapaitan sang espiritu” sa ila​—⁠amo nga si Rebeca nagsiling: “Naugot ako sining akon kabuhi bangod sang mga anak nga babayi ni Het. Kon si Jacob magkuha sing asawa gikan sa mga anak nga babayi ni Het subong sang mga anak nga babayi sang duta, ano pa ang kapuslanan sang kabuhi sa akon?” (Genesis 26:​34, 35; 27:46) Apang, ining mabudlay nga kahimtangan wala gid magpaluya sang pagtuo ni Isaac kag ni Rebeca. Kabay nga huptan naton ang mabakod nga pagtuo kon ang mga kahimtangan mangin tuman gid kabudlay sa aton.

20. Ano nga mga halimbawa sang pagtuo ang matigayon naton kay Noemi kag kay Rut?

20 Ang tigulang nga balo nga si Noemi taga-Judea kag nakahibalo sia nga ang pila ka babayi sang Juda mahimo magapanganak sing mga anak nga lalaki nga mangin katigulangan sang Mesias. Apang, bangod napatay ang iya mga anak nga lalaki nga wala sing anak kag sia naman tigulang na kag indi na makapanganak, daw imposible nga mangin katigulangan sang Mesias ang iya pamilya. Walay sapayan sini, ang iya balo nga umagad nga si Rut nangin asawa sang tigulang nga si Boaz, nag-anak sing anak nga lalaki, kag nangin katigulangan ni Jesus, ang Mesias! (Genesis 49:​10, 33; Rut 1:​3-5; 4:​13-​22; Mateo 1:​1, 5) Nalampuwasan sang pagtuo ni Noemi kag ni Rut ang kapipit-an kag naghatag ini sa ila sing kalipay. Makatigayon man kita sing daku nga kalipay kon huptan naton ang pagtuo walay sapayan sang kapipit-an.

21. Ano ang mahimo sang pagtuo para sa aton, kag ano ang dapat nga mangin determinasyon naton?

21 Bisan pa wala kita makahibalo kon ano ang mangin palaabuton naton subong indibiduwal, ang pagtuo magabulig sa aton nga maatubang ang bisan anong mabudlay nga kahimtangan. Ang pagtuo nagabulig sa aton nga magpakaisog kag magpailob. Nagahatag ini sa aton sing labing mataas nga mga tulumuron kag sing makaalayaw nga kabuhi. Ang pagtuo may yara maayo nga mga epekto sa aton kaangtanan sa iban kag nagabulig agod malampuwasan ang kapipit-an. Busa kabay nga kita ang “sahi nga may pagtuo padulong sa pagtipig nga buhi sa kalag.” (Hebreo 10:39) Sa kusog sang aton mahigugmaon nga Dios, nga si Jehova, kag sa iya himaya, padayon kita nga magpakita sing mabakod nga pagtuo.

Paano Mo Sabton?

• Ano ang Makasulatanhon nga pamatuod nga ang pagtuo makapaisog sa aton?

• Ngaa makasiling kita nga ang pagtuo nagahatag sa aton sing makaalayaw nga kabuhi?

• Paano ang pagtuo nagapalambo sing paghidait?

• Ano ang pamatuod nga ang pagtuo nagabulig sa aton nga mabatas ang kapipit-an?

[Mga Pamangkot sa Pagtinuon]

[Mga retrato sa pahina 16]

Ang pagtuo naghatag kay Noe kag kay Enoc sing kaisog agod ibantala ang mga mensahe ni Jehova

[Mga retrato sa pahina 17]

Ang pagtuo kaangay sang kay Moises magapahulag sa aton nga himud-usan ang espirituwal nga mga tulumuron

[Mga retrato sa pahina 18]

Ang pasalig nga mabulig ang Dios nagpabakod sang pagtuo ni Barak, ni Debora, kag ni Gideon