Magdiretso sa kaundan

Magdiretso sa listahan sang kaundan

“Magpabilin Kamo nga Nagabantay”!

“Magpabilin Kamo nga Nagabantay”!

 “Magpabilin Kamo nga Nagabantay”!

“Ang ginasiling ko sa inyo ginasiling ko sa tanan, Magpabilin kamo nga nagabantay.”​​—⁠MARCOS 13:37.

1, 2. (a) Ano nga leksion ang natun-an sang isa ka tawo tuhoy sa pag-amlig sa iya pagkabutang? (b) Sa ilustrasyon ni Jesus tuhoy sa makawat, ano ang matun-an naton tuhoy sa pagpabilin nga nagamata?

GINATAGO ni Juan ang iya bilidhon nga mga butang sa balay. Ginatago niya ini sa idalom sang iya katre​​—⁠nga para sa iya amo ang pinakasigurado nga duog sa balay. Apang, isa ka gab-⁠i, samtang nagakatulog sila nga mag-asawa, may makawat nga nagsulod sa ila hulot. Nahibaluan gid sang kawatan kon diin sia mangita. Hinayhinay nga ginpanguha niya ang tagsa ka bilidhon nga butang gikan sa idalom sang katre subong man ang kuwarta nga ginbutang ni Juan sa isa ka hunoshunos sang lamesa sa tupad sang katre. Pagkaaga, natukiban ni Juan nga kinawatan sila. Indi niya malipatan ang masakit nga leksion nga natun-an niya: Indi mabantayan sang isa ka tawo ang iya mga pagkabutang kon nagakatulog sia.

2 Amo man sini sa espirituwal nga kahulugan. Indi naton maamligan ang aton paglaum kag ang aton pagtuo kon matulugan kita. Busa, naglaygay si Pablo: “Indi kita magtulog subong sang ginahimo sang iban, kundi magpabilin kita nga nagamata kag huptan ang aton kaligdong.” (1 Tesalonica 5:⁠6) Agod ipakita kon daw ano ka importante ang magpabilin nga nagamata, gingamit ni Jesus ang ilustrasyon tuhoy sa makawat. Ginlaragway niya ang  mga butang nga matabo antes sia magkari subong Hukom, nian nagpaandam sia: “Busa, magpadayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo. Apang hibalua ninyo ang isa ka butang, nga kon ang tagbalay nakasayod kon sa ano nga hugna sang pagbantay magaabot ang kawatan, magapabilin sia kuntani nga nagamata kag indi magatugot nga kawatan ang iya balay. Bangod sini pamatud-⁠i man ninyo ang inyo kaugalingon nga handa, bangod sa oras nga wala ninyo ginahunahuna, magaabot ang Anak sang tawo.” (Mateo 24:42-​44) Wala nagapahibalo ang makawat kon san-⁠o sia maabot. Magaabot sia kon wala sing nagapaabot sa iya. Sing kaanggid, subong sang ginsiling ni Jesus, ang katapusan sining sistema magaabot sa ‘oras nga wala naton ginahunahuna.’

“Magpabilin Kamo nga Nagamata, Magtindog Kamo sing Malig-on sa Pagtuo”

3. Ginagamit ang ilustrasyon tuhoy sa mga ulipon nga nagahulat sang pagbalik sang ila agalon gikan sa kasal, paano ginpakita ni Jesus ang pagkaimportante sang pagpabilin nga nagamata?

3 Sa mga pulong nga narekord sa Ebanghelyo ni Lucas, ginpaanggid ni Jesus ang mga Cristiano sa mga ulipon nga nagahulat sa pagbalik sang ila agalon gikan sa kasal. Dapat sila magpabilin nga alerto agod nga nagamata sila kon mag-abot sia, nga handa sa pag-abiabi sa iya. Sing kaanggid, si Jesus nagsiling: “Sa oras nga wala ninyo ginahunahuna magaabot ang Anak sang tawo.” (Lucas 12:40) Bangod madugay na nga nagaalagad kay Jehova, mahimo nga indi na mabatyagan sang iban ang pagkahilingagawon sang aton tion karon. Mahimo magahinakop pa gani sila nga malayo pa ang katapusan. Apang mahimo nga ipahilayo sini nga panghunahuna ang aton igtalupangod gikan sa espirituwal nga mga butang kag ipatuhoy ini sa materyal nga mga tulumuron, mga tublag nga makapatuyo sa aton sa espirituwal.​​—⁠Lucas 8:​14; 21:​34, 35.

4. Ano nga pagpati ang magabulig sa aton sa pagpabilin nga nagabantay, kag paano ini ginpakita ni Jesus?

4 Makakuha kita sing isa pa ka leksion gikan sa ilustrasyon ni Jesus. Bisan pa wala mahibal-⁠i sang mga ulipon ang oras nga magaabot ang ila agalon, nahibaluan nila kon san-⁠o nga gab-⁠i sia magaabot. Mabudlayan sila kuntani sa pagpulaw sa bug-os nga gab-⁠i kon sa pagdumdom nila ang ila agalon mahimo mag-abot sa iban nga gab-⁠i. Apang, nahibaluan nila kon san-⁠o nga gab-⁠i sia maabot, kag naghatag ini sa ila sing daku nga rason nga magpulaw. Kaanggid sa sini, maathag nga ginapahayag sang mga tagna sang Biblia nga nagakabuhi kita sa tion sang katapusan; apang wala sini ginasugid sa aton kon san-o gid ang adlaw ukon oras sang katapusan. (Mateo 24:36) Ang aton pagpati nga ang katapusan magaabot nagabulig sa aton sa pagpabilin nga nagamata, apang kon kumbinsido kita nga tuman na kalapit ang adlaw ni Jehova, labi pa nga mapahulag kita nga magbantay.​​—⁠Sofonias 1:⁠14.

5. Paano naton masunod ang laygay ni Pablo nga ‘magpabilin nga nagamata’?

5 Sang magsulat si Pablo sa mga taga-Corinto, nagpanugyan sia: “Magpabilin kamo nga nagamata, magtindog kamo sing malig-on sa pagtuo.” (1 Corinto 16:13) Huo, ang aton pagpabilin nga nagamata may yara kaangtanan sa aton pagpabilin nga malig-on sa Cristianong pagtuo. Paano kita makapabilin nga nagamata? Paagi sa pagtigayon sing mas madalom nga ihibalo sa Pulong sang Dios. (2 Timoteo 3:​14, 15) Ang maayong batasan sa personal nga pagtuon kag ang regular nga pagtambong sa mga miting nagabulig agod mapalig-on ang aton pagtuo, kag ang padayon nga pagdumdom sa adlaw  ni Jehova isa ka importante nga bahin sang aton pagtuo. Gani ang aton pagrepaso sa tion kag tion sang Makasulatanhon nga pamatuod nga nagakabuhi kita malapit sa katapusan sining sistema magabulig sa aton nga indi pagkalipatan ang importante nga mga kamatuoran tuhoy sa sining nagapakari nga katapusan.⁠ * Maayo man nga talupangdon naton ang mga nagakatabo sa kalibutan nga katumanan sang tagna sa Biblia. Ang isa ka utod nga lalaki sa Alemanya nagsulat: “Sa kada tion nga nagatan-aw ako sing mga balita​​—⁠mga inaway, mga linog, kasingki, kag pagdagta sa aton planeta⁠​—⁠ginapadaku sini sa akon nga malapit na ang katapusan.”

6. Sa anong paagi gin-ilustrar ni Jesus ang huyog nga mangin indi alerto sa espirituwal samtang nagaligad ang tion?

6 Sa Marcos kapitulo 13, mabasa naton ang isa pa ka rekord sang laygay ni Jesus sa iya mga sumulunod nga magpabilin sila nga nagamata. Suno sa sini nga kapitulo, ginpaanggid ni Jesus ang ila kahimtangan sa iya sang manugbantay sang ganhaan nga nagahulat sa pagbalik sang iya agalon gikan sa paglakbay sa malayo. Wala makahibalo ang manugbantay sang ganhaan kon ano nga oras mabalik ang iya agalon. Dapat lamang sia magpadayon sa pagbantay. Ginpatuhuyan ni Jesus ang apat ka hugna sang pagbantay nga mahimo mag-abot ang agalon. Ang ikap-at nga hugna sang pagbantay nagasugod sa mga alas tres sang kaagahon tubtob sa pagbutlak sang adlaw. Sa sining hingapusan nga hugna sang pagbantay, mahimo nga madali madaug sang katuyo ang manugbantay sang ganhaan. Suno sa report, ginakabig sang mga soldado ang oras antes sang pamanagbanag subong amo ang maayo gid nga oras nga madakop ang kaaway nga indi makapangaman. Sing kaanggid, sa sining hingapusan nga bahin sang katapusan nga mga adlaw, nga sa espirituwal nga kahulugan mahamuok nga nagakatulog ang kalibutan sa palibot naton, mahimo nga dapat kita magpanikasog sing kapin pa nga magpabilin nga nagamata. (Roma 13:​11, 12) Busa, sa iya ilustrasyon, si Jesus sulitsulit nga nagpanugyan: “Magpabilin kamo nga nagabantay, magpabilin kamo nga nagamata . . . Busa padayon kamo nga magbantay . . . Ang ginasiling ko sa inyo ginasiling ko sa tanan, Magpabilin kamo nga nagabantay.”​​—⁠Marcos 13:32-37.

7. Anong matuod nga katalagman ang nagaluntad, kag samtang ginahunahuna ini, ano nga pagpalig-on ang mabasa naton pirme sa Biblia?

7 Sing madamo nga beses sa tion sang iya ministeryo kag sa tapos sia mabanhaw, ginpanugyan ni Jesus ang pagkamabinantayon. Sa katunayan, sa halos kada tion nga ginapatuhuyan sang Kasulatan ang katapusan sining sistema sang mga butang, masapwan naton ang paandam nga magpabilin nga nagamata ukon magpadayon nga nagabantay.⁠ * (Lucas 12:​38, 40; Bugna 3:⁠2; 16:14-​16) Maathag nga  isa gid ka matuod nga katalagman ang espirituwal nga pagkatuyo. Kinahanglan naton tanan ini nga mga paandam!​​—⁠1 Corinto 10:12; 1 Tesalonica 5:​2, 6.

Ang Tatlo ka Apostoles nga Wala Magpabilin nga Nagamata

8. Sa hardin sang Getsemane, ano ang ginhimo sang tatlo sang mga apostoles ni Jesus sa iya pangabay nga magpadayon sila sa pagbantay?

8 Indi lamang maayo nga mga katuyuan ang kinahanglan agod makapabilin kita nga nagamata, subong sang makita naton sa halimbawa nanday Pedro, Santiago, kag Juan. Sila nga tatlo espirituwal nga mga lalaki nga matutom nga nagsunod kay Jesus kag nagpakita sing tudok nga gugma sa iya. Walay sapayan sini, sang gab-⁠i sang Nisan 14, 33 C.⁠E., wala sila magpabilin nga nagamata. Sa tapos nila masaulog ang Paskuwa sa isa ka naibabaw nga hulot, nag-upod ang tatlo ka apostoles kay Jesus sa hardin sang Getsemane. Didto ginsilingan sila ni Jesus: “Ang akon kalag masinulub-on sing tama, tubtob gid sa kamatayon. Pabilin kamo diri kag padayon nga magbantay kaupod nakon.” (Mateo 26:38) Makatlo nga nangamuyo si Jesus sing hugot sa iya langitnon nga Amay, kag sa makatlo nga nagbalik sia sa iya mga abyan, naabtan niya sila nga nagakatulog.​​—⁠Mateo 26:​40, 43, 45.

9. Ano ang mahimo isa ka kabangdanan sang pagkatuyo sang mga apostoles?

9 Ngaa ginpaslaw sining matutom nga mga lalaki si Jesus sadto nga gab-⁠i? Ang kalapyo isa ka kabangdanan. Ayhan pasado na sa tungang-gab-⁠i sadto, kag “mabug-at ang ila mga mata” bangod sa katuyo. (Mateo 26:43) Walay sapayan sini, si Jesus nagsiling: “Magpabilin kamo nga nagabantay kag mangamuyo sing padayon, agod indi kamo magsulod sa pagsulay. Ang espiritu, sa pagkamatuod, nalangkag, apang ang unod maluya.”​​—⁠Mateo 26:41.

10, 11. (a) Walay sapayan nga kapoy na sia, ano ang nakabulig kay Jesus agod padayon sia nga makabantay sa hardin sang Getsemane? (b) Ano ang matun-an naton gikan sa natabo sa tatlo ka apostoles sang ginpangabay sila ni Jesus nga magpadayon sa pagbantay?

10 Walay duhaduha nga kapoy man si Jesus sadtong importante nga gab-⁠i. Apang, sa baylo nga magtulog, ginhinguyang niya yadtong importante nga hingapusan nga mga tinion sang kahilwayan sa pagpangamuyo sing hugot. Mga pila ka adlaw antes sini, ginlaygayan niya ang iya mga sumulunod nga mangamuyo, nga nagasiling: “Magpabilin nga nagamata, nian, sa tanan nga tion nga nagaampo nga magmadinalag-on kamo sa pagpalagyo sa sining tanan nga butang nga natalana nga mahanabo, kag sa pagtindog sa atubangan sang Anak sang tawo.” (Lucas 21:36; Efeso 6:18) Kon pamatian naton ang laygay ni Jesus kag sundon ang iya maayong halimbawa tuhoy sa pangamuyo, ang aton tinagipusuon nga mga pag-ampo kay Jehova magabulig sa aton sa pagpabilin nga nagamata sa espirituwal.

11 Sa pagkamatuod, indi kaangay sang iya mga disipulo, nahangpan sadto ni Jesus nga sa indi madugay dakpon sia kag pakamalauton sa kamatayon. Ang mga pagtilaw sa iya magadangat sa isa ka masakit nga katapusan sa usok sang pag-antos. Ginpaandaman ni Jesus ang iya mga apostoles tuhoy sining mga butang, apang wala nila mahangpi ang iya ginsiling. Amo kon ngaa natulugan sila samtang nagpabilin sia nga nagamata nga nagapangamuyo. (Marcos 14:27-​31; Lucas 22:15-​18) Kaangay sang mga apostoles, maluya man ang aton unod kag may yara mga butang nga wala pa naton mahibaluan. Apang, kon indi naton mahantop ang pagkahilingagawon sang aton tion karon, mahimo nga matulugan kita sa espirituwal nga kahulugan. Paagi lamang sa pagpabilin nga alerto nga makapabilin kita nga nagamata.

Tatlo ka Importante nga mga Kinaiya

12. Ano ang tatlo ka kinaiya nga gin-angot ni Pablo sa paghupot sang aton kaligdong?

12 Paano naton padayon nga mabatyagan ang pagkahilingagawon sang tion? Nahangpan na naton ang pagkaimportante sang pangamuyo kag ang kinahanglanon nga padayon nga dumdumon ang adlaw ni Jehova. Dugang pa, ginsambit ni Pablo ang tatlo ka importante nga mga kinaiya nga dapat naton palambuon. Sia nagsiling: “Para sa aton nga natungod sa adlaw, huptan naton ang aton kaligdong kag isul-ob ang limbutong sang pagtuo kag gugma kag subong pandong ang paglaum sang kaluwasan.” (1 Tesalonica 5:⁠8) Binagbinagon naton sa malip-ot ang mabulig sa aton sang pagtuo, paglaum, kag gugma agod magpabilin kita nga nagamata sa espirituwal.

13. Ano ang mabulig sang pagtuo sa aton pagpabilin nga alerto?

13 Dapat kita maghupot sing di-mationg nga pagtuo nga si Jehova nagaluntad kag “manugpadya [sia] sadtong hanuot nga nagapangita sa iya.” (Hebreo 11:⁠6) Ang una nga katumanan sang tagna ni Jesus sang nahauna nga siglo tuhoy sa katapusan nagapalig-on sang aton pagtuo sa daku pa nga katumanan sini sa aton tion. Kag bangod sang aton pagtuo, labi pa nga ginakalangkagan naton  ang adlaw ni Jehova, kay napat-od naton nga ‘ang matagnaon nga palanan-awon pat-od nga magaabot. Indi ini magpalantang.’​​—⁠Habacuc 2:3.

14. Daw ano ka importante ang paglaum agod makapabilin kita nga nagamata?

14 Ang aton pat-od nga paglaum kaanggid sang “angkla para sa kalag” nga nagabulig sa aton nga batason ang mga kabudlayan bisan kinahanglan nga hulaton pa naton ang pat-od nga katumanan sang mga saad sang Dios. (Hebreo 6:​18, 19) Si Margaret, isa ka hinaplasan sang espiritu nga utod nga nobentahon na ang edad nga nabawtismuhan sang nagligad nga 70 ka tuig, nagbaton: “Sang ang akon bana malapit na mapatay sa kanser sang 1963, ginbatyag ko nga maayo kuntani kon mag-abot na ang katapusan. Apang narealisar ko karon nga akon lamang kaugalingon nga mga intereses ang ginhunahuna ko. Wala pa kami sing ideya sadto kon sa ano nga kasangkaron magasangkad ang hilikuton sa bug-os nga kalibutan. Bisan sa karon, madamo pa sing mga duog diin ang hilikuton bag-o pa lang ginsugdan. Gani nalipay ako nga nagpailob si Jehova.” Ginapasalig kita ni apostol Pablo: “Ang pagbatas [nagapatubas] sing kalahamut-an nga kahimtangan; ang kalahamut-an nga kahimtangan naman, sing paglaum, kag ang paglaum wala nagadul-ong sa kabang-awan.”​​—⁠Roma 5:​3-5.

15. Paano ang gugma magapahulag sa aton bisan pa daw madugay na kita nga nagahulat?

 15 Ang Cristianong gugma isa ka talalupangdon nga kinaiya bangod amo ini ang motibo sa tanan nga ginahimo naton. Walay sapayan kon san-⁠o man ang gintalana nga tion ni Jehova sa iya orasan, nagaalagad kita sa iya bangod ginahigugma naton sia. Ang gugma sa isigkatawo nagapahulag sa aton nga ibantala ang maayong balita sang Ginharian, bisan kon tubtob san-⁠o pa itugot sang Dios ang aton pagbantala kag bisan pa nagabalikbalik kita sa amo lang gihapon nga mga puluy-an. Subong sang ginsulat ni Pablo, “nagapabilin ang pagtuo, paglaum, gugma, ining tatlo; apang ang labing daku sa sini amo ang gugma.” (1 Corinto 13:13) Ang gugma nagabulig sa aton nga magbatas kag magpabilin nga nagamata. “Ginalauman [sang gugma] ang tanan nga butang, ginabatas ang tanan nga butang. Ang gugma wala gid nagakapaslawi.”​—⁠1 Corinto 13:​7, 8.

“Hupti sing Maayo ang Yara sa Imo”

16. Sa baylo nga mangin uyaya, ano nga panimuot ang dapat naton palambuon?

16 Nagakabuhi kita sa importante nga mga tion kon san-⁠o pirme kita ginapahanumdom sang mga nagakatabo sa kalibutan nga yari na kita sa hingapusan nga bahin sang katapusan nga mga adlaw. (2 Timoteo 3:​1-5) Indi karon ang tion nga mangin uyaya kita kundi ‘huptan sing maayo ang yara sa aton.’ (Bugna 3:11) Paagi sa ‘pagkamabinantayon may kaangtanan sa mga pangamuyo’ kag paagi sa pagpalambo sing pagtuo, paglaum, kag gugma, mapamatud-an naton ang aton kaugalingon nga nakahanda sa tion sang pagtilaw. (1 Pedro 4:⁠7) Madamo kita sing hilimuon sa hilikuton sang Ginuo. Ang pagkamasako sa mga buhat sang diosnon nga debosyon magabulig sa aton nga magpabilin nga nagamata sing bug-os.​​—⁠2 Pedro 3:⁠11.

17. (a) Ngaa indi dapat magluya ang aton buot kon indi matuman ang aton ginalauman? (Tan-awa ang kahon sa pahina 21.) (b) Paano naton mailog si Jehova, kag ano nga pagpakamaayo ang nagahulat sa mga nagahimo sini?

17 “Si Jehova ang akon bahin,” sulat ni Jeremias, “amo nga magahulat ako sa iya. Maayo si Jehova sa isa nga nagalaum sa iya, sa kalag nga padayon nga nagapangita sa iya. Maayo kon ang isa maghulat, sing hipos, sang pagluwas ni Jehova.” (Panalabiton 3:​24-​26) Ang iban sa aton nagahulat sa malip-ot pa lamang nga tion. Ang iban naman madamo nga tinuig na nga nagahulat nga makita ang pagluwas ni Jehova. Apang, malip-ot lamang ining paghulat kon ipaanggid sa dayon nga palaabuton! (2 Corinto 4:​16-​18) Kag samtang ginahulat naton ang gintalana nga tion ni Jehova, mapalambo naton ang kinahanglanon nga Cristianong mga kinaiya kag mabuligan ang iban nga himuslan ang pagpailob ni Jehova kag batunon ang kamatuoran. Kon amo, kabay nga magbantay kita tanan. Ilugon naton si Jehova kag mangin mapailubon, nga ginapasalamatan ang paglaum nga ginhatag niya sa aton. Kag samtang matutom nga nagapabilin kita nga alerto, kabay nga lig-unon naton ang aton pagpanguyapot sa ginalauman nga kabuhi nga walay katapusan. Nian, pat-od nga maaplikar sa aton ining matagnaon nga mga saad: “[Si Jehova] magabayaw sa imo sa pagpanag-iya sang duta. Kon ang malauton utdon, makita mo ini.”​​—⁠Salmo 37:⁠34.

[Mga nota]

^ par. 5 Ayhan makabulig nga repasuhon ang anom ka ebidensia nga nagapakita nga nagakabuhi kita sa “katapusan nga mga adlaw” nga ginsambit sa pahina 12-13 sang Enero 15, 2000, nga guwa sang Ang Lalantawan.​​—⁠2 Timoteo 3:1.

^ par. 7 Tuhoy sa Griegong berbo nga ginbadbad “magpabilin kamo nga nagamata,” ginpaathag sang leksikograpo nga si W. E. Vine nga ini literal nga nagakahulugan sing ‘tabugon ang katulugon,’ kag ‘nagapabutyag ini indi lamang sing pagmata, kundi sing pagkamabinantayon sadtong determinado sa isa ka butang.’

Paano Mo Sabton?

• Paano naton mapalig-on ang aton pagpati nga malapit na ang katapusan sining sistema sang mga butang?

• Ano ang matun-an naton gikan sa mga halimbawa nanday Pedro, Santiago, kag Juan?

• Ano ang tatlo ka kinaiya nga magabulig sa aton sa pagpabilin nga mabinantayon sa espirituwal?

• Ngaa tion karon nga ‘huptan sing maayo ang yara sa aton’?

[Mga Pamangkot sa Pagtinuon]

[Kahon/Retrato sa pahina 21]

“Malipayon ang Isa nga Padayon nga Nagahulat.”​​—⁠Daniel 12:12

Handurawa nga nagasuspetsa ang isa ka guardia nga ang makawat nagaplano nga kawatan ang duog nga ginaguardiahan niya. Kon gab-⁠i, ginapamatyagan sing maayo sang guardia ang bisan ano nga gahod nga mahimo magpatimaan nga may makawat. Pirme niya ginapamatyagan ang palibot kag ginasipat ang iya mga mata. Mahapos mahangpan kon ngaa madaya sia sang isa ka butig nga alarma​​—⁠ang gahod sang nagahuyop nga hangin sa mga kakahuyan ukon ang pagharungkadol sang isa ka butang nga nasalapay sang kuring.​​—⁠Lucas 12:​39, 40.

Kaanggid man sini ang mahimo matabo sa mga ‘malangkagon nga nagahulat sang pagpahayag sang aton Ginuong Jesucristo.’ (1 Corinto 1:⁠7) Nagdumdom ang mga apostoles nga ‘ipasag-uli dayon ni Jesus ang ginharian sa Israel’ pagkatapos sia mabanhaw. (Binuhatan 1:⁠6) Pagligad sang mga tuig, dapat pahanumdumon ang mga Cristiano sa Tesalonica nga ang presensia ni Jesus matabo pa sa palaabuton. (2 Tesalonica 2:​3, 8) Apang, wala ginbayaan sang una nga mga sumulunod ni Jesus ang banas nga nagadul-ong sa kabuhi bangod lamang wala matuman ang ila ginpaabot nga adlaw ni Jehova.​​—⁠Mateo 7:⁠13.

Sa aton adlaw, indi kita dapat magpabaya sa aton pagbantay bangod lamang daw naatrasar ang ginapaabot naton nga katapusan sining sistema sang mga butang. Ang isa ka alerto nga guardia mahimo madaya sang isa ka butig nga alarma, apang dapat sia magpadayon sa pagbantay! Amo ini ang iya trabaho. Amo man sa mga Cristiano.

[Retrato sa pahina 18]

Kumbinsido ka bala nga malapit na ang adlaw ni Jehova?

[Mga retrato sa pahina 19]

Ang mga miting, pangamuyo, kag maayo nga batasan sa pagtuon nagabulig sa aton nga magpadayon sa pagbantay

[Retrato sa pahina 22]

Kaangay ni Margaret, kabay nga mangin mapailubon kita kag padayon nga nagabantay