Magdiretso sa kaundan

Magdiretso sa listahan sang kaundan

Isa ka Malip-ot nga Sulat nga Nagbag-o sang Akon Kabuhi

Isa ka Malip-ot nga Sulat nga Nagbag-o sang Akon Kabuhi

 Sugilanon sang Kabuhi

Isa ka Malip-ot nga Sulat nga Nagbag-o sang Akon Kabuhi

PANUGIRON NI IRENE HOCHSTENBACH

Natabo ini sang Martes sang gab-i sang 1972. Disiseis anyos ako sadto kag nag-upod ako sa akon mga ginikanan sa isa ka relihioso nga miting sa Eindhoven, isa ka siudad sa probinsia sang Brabant, sa Netherlands. Indi ako mapahamtang kag mas gusto ko pa nga yara sa iban nga duog. Nian duha ka bataon nga babayi ang nagtunghol sa akon sang isa ka malip-ot nga sulat nga nagasiling: “Mahal nga Irene, luyag ka namon buligan.” Wala ko sadto mahunahuna kon paano ang isa ka malip-ot nga sulat magabag-o sang akon kabuhi. Apang antes ko isugid kon ano ang masunod nga natabo, pasugira anay ako tuhoy sa akon ginhalinan.

NATAWO ako sa isla sang Belitung, sa Indonesia. Madumduman ko pa ang pila ka tunog sa sining tropikal nga isla​​—⁠ang pagkalas sang mga palma kon mahangin, ang mahinay nga huganas sang malapit nga suba, ang inudyak sang kabataan nga nagahampang sa palibot sang amon balay, subong man ang tunog sang musika sa amon puluy-an. Sang 1960, sang apat ka tuig pa lang ako, nagsaylo ang amon pamilya halin sa Indonesia pa Netherlands. Malawig ang amon paglakbay nga sakay sa barko, kag ang indi ko gid malipatan nga tunog amo ang iya sang akon paborito nga hampanganan​​—⁠ang gindala ko nga diutay nga komikero (clown) nga may mga bombo. Sa edad nga pito ka tuig, nadula ang akon palamatin-an bangod sang isa ka balatian, kag sugod sadto indi ko na mabatian ang bisan ano nga tunog sa akon palibot. Handumanan na lang sang gahod ang nabilin sa akon.

Nagdaku nga Bungol

Bangod sang mapinalanggaon nga pag-atipan sang akon mga ginikanan, wala ko marealisar sang primero ang mga kabudlayan sang bungol. Subong isa ka bata, ginhunahuna ko nga daw  masadya man nga may daku ako nga hearing aid, bisan pa diutay lamang ang nabulig sini sa akon. Agod makapakigsugilanon sa akon, nagagamit sing yeso ang amon kaingod nga mga kabataan agod isulat ang ila inughambal sa akon sa kilid sang sementado nga dalan, kag ginasabat ko sila, bisan indi ko mabatian ang akon tingog.

Samtang nagadaku ako, nahibaluan ko nga tuhay ako sa mga tawo sa akon palibot. Natalupangdan ko man nga ginasunlog ako sang iban bangod bungol ako, samtang ang iban nagalikaw sa akon. Nagsugod ako sa pagbatyag nga napain kag masinulub-on. Nahangpan ko na kon ano ang kahimtangan sang isa ka bungol, kag samtang nagadaku ako, nagdugang man ang akon kahadlok sa indi bungol nga mga tawo.

Agod makaeskwela ako sa pinasahi nga eskwelahan para sa mga bungol, ginsaylo sang akon mga ginikanan ang bug-os nga pamilya halin sa isa ka minuro sa probinsia sang Limburg pakadto sa siudad sang Eindhoven. Nagpangita didto ang akon amay sing trabaho, kag ang akon manghod nga lalaki kag duha ka magulang nga babayi nag-eskwela sa bag-o nga eskwelahan. Nagapasalamat gid ako sa mga pagpasibu nga ginhimo nila para sa akon kaayuhan. Sa eskwelahan, gintudluan ako sa pagpasibu sang kabaskugon sang akon tingog kag sa paghambal sing mas maathag. Kag bisan pa ang mga manunudlo wala nagagamit sang sign language, gintudluan ako sang akon mga klasmeyt sa pagsenyas.

Pagkabuhi sa Akon Kaugalingon nga Kalibutan

Samtang nagadaku ako, nagpanikasog gid sing lakas ang akon mga ginikanan sa pagkomunikar sa akon, apang madamo nga mga butang ang indi ko mahangpan. Halimbawa, wala ko mahangpan nga ang akon mga ginikanan nagatuon gali sang Biblia upod sa mga Saksi ni Jehova. Apang nadumduman ko nga isa ka adlaw ang amon pamilya nagduaw sa isa ka duog nga may madamo nga tawo nga nagapungko sa mga bangko. Nagatulok sila tanan sa unahan, kon kaisa nagapamalakpak, kag kon kaisa nagatindog​​—⁠apang kon ngaa ining mga tawo nagahimo sini tanan, wala ako makahibalo. Sang ulihi, nahibal-an ko nga yara gali ako sa isa ka kombension sang mga Saksi ni Jehova. Pirme man ako ginapaupod sang akon mga ginikanan sa isa ka diutay nga tilipunan sa siudad sang Eindhoven. Daw naluyagan ko man didto bangod ang tanan mabuot kag daw malipayon ang akon pamilya, apang kon ngaa pirme kami nagakadto didto, wala ako makahibalo. Sa karon nahibaluan ko na nga yadtong diutay nga tilipunan isa gali ka Kingdom Hall sang mga Saksi ni Jehova.

Sing makapasubo, wala sing bisan isa sa tumalambong sa sining mga miting ang makapatpat paagi sa pagsenyas sang programa para sa akon. Nahisayran ko na karon nga luyag kuntani ako buligan sang mga nagtambong apang indi sila makahibalo kon paano ini himuon bangod indi ako makabati. Sa sining mga miting, nagbatyag ako nga napain kag naghunahuna, ‘Tani didto na lang ako sa eskwelahan sa baylo nga diri.’ Apang samtang ginahunahuna ko ini, may ginsulat ang duha ka batan-on nga babayi sa isa ka papel kag gintunghol ini sa akon. Amo yadto ang malip-ot nga sulat nga ginhinambitan ko sa introduksion. Wala ako sing ideya nga yadtong malip-ot nga sulat mangin umpisa sang hamili nga pag-abyanay nga magahilway sa akon gikan sa kalibutan sang akon pag-isahanon.

Pagpalambo sa Isa ka Hamili nga Pag-abyanay

Sanday Colette kag Hermine, nga naghatag sang malip-ot nga sulat, mga beintehon ang pangidaron. Sang ulihi, natukiban ko nga nagkadto sila sa kongregasyon sang mga Saksi ni Jehova nga akon ginatambungan agod mag-alagad subong mga regular payunir, ukon bug-os tion nga mga ministro. Bisan pa nga indi makahibalo sing sign language sanday Colette kag Hermine, mahangpan ko ang ila ginahambal paagi sa pagtulok sa ila mga bibig samtang nagahambal sila, kag paagi sa sini makakomunikar kami sing maayo.

Nalipay gid ang akon mga ginikanan sang nangabay sanday Colette kag Hermine nga tun-an namon ang Biblia, apang kapin pa sa sini ang ginhimo sining bataon nga mga babayi. Nagtinguha gid sila nga ipatpat sa akon ang mga miting  sa Kingdom Hall kag ilakip ako sa pagpakig-upod sa iban sa kongregasyon. Ginaensayo nila upod sa akon ang pasad-sa-Biblia nga mga presentasyon nga gamiton sa pagbantala nga hilikuton, kag ginabuligan man nila ako sa paghanda sa mga bahin sang estudyante para sa Teokratikong Eskwelahan Para sa Ministeryo. Handurawa lamang, may kaisog na ako karon sa paghatag sang akon bahin sa atubangan sang isa ka grupo sang makabati nga mga tawo!

Dugang pa, ginpabatyag sa akon nanday Colette kag Hermine nga masaligan ko sila. Mapailubon sila kag nagapamati sa akon. Bisan pa pirme kami nagakadlaw tuhoy sa akon mga kasaypanan, wala gid sila nagayaoyao sa akon; ni nagakahuya kon kaupod ako. Ginatinguhaan nila nga hangpon ang akon mga balatyagon kag ginakabig nila ako nga kaangay nila. Ining mabuot nga mga babayi naghatag sa akon sing isa ka matahom nga dulot​​—⁠ang ila gugma kag pagpakig-abyan.

Labing importante, gintudluan ako nanday Colette kag Hermine nga makilala ang aton Dios, nga si Jehova, subong isa ka masaligan nga abyan. Ginpaathag nila nga nakita ako ni Jehova nga nagapungko sa Kingdom Hall kag nahangpan niya kon ano ang mga kabudlayan kag mga problema sang isa ka bungol. Mapinasalamaton gid ako nga ang amon gugma kay Jehova naghugpong sa amon nga tatlo subong mga mag-abyan! Napahulag ako sang pag-ulikid ni Jehova sa akon, kag bangod sang gugma sa iya, ginsimbuluhan ko ang akon dedikasyon sa iya paagi sa bawtismo sa tubig sang Hulyo 1975.

Pag-upod sa Pinasahi nga Abyan

Sang mga tinuig nga nagsunod, nagdamo ang akon nakilala nga Cristianong kauturan nga mga lalaki kag mga babayi. Isa ka utod nga lalaki ang nangin pinasahi gid nga abyan para sa akon, kag nagpakasal kami sang 1980. Wala madugay pagkatapos sadto, nag-alagad ako subong payunir, kag sang 1994 ako kag ang akon bana, nga si Harry, gin-asayn subong mga espesyal payunir sa teritoryo sang Dutch Sign Language. Pagkadason nga tuig, nag-atubang ako sing makahalangkat nga asaynment. Updan ko ang akon bana, nga indi bungol, samtang nagaduaw sia sa nanuhaytuhay nga kongregasyon subong tal-us nga manugtatap sa sirkito.

Amo sini ang akon ginahimo. Kon nagaduaw kami sa isa ka kongregasyon sa nahauna nga tion, sa gilayon nagapalapit ako kon posible sa madamo nga kauturan kag ginapakilala dayon ang akon kaugalingon. Ginasugiran ko sila nga bungol ako kag ginapangabay ko sila nga magtulok sa akon samtang nagahambal sing mahinay sa akon. Ginatinguhaan ko man nga makasabat dayon sa mga miting sa kongregasyon. Kag nagapamangkot ako kon may isa nga handa magpatpat para sa akon, paagi sa pagsenyas, sang mga miting kag pag-alagad sa latagon sina nga semana.

Nangin maayo ini nga paagi amo nga kon kaisa, nagakalipat ang mga kauturan nga indi gali  ako makabati, nga nagaresulta sa makahalam-ot nga mga kahimtangan. Halimbawa, nagasugid sila sa akon nga kon makita nila ako nga nagalakat sa banwa, ginapaserbato nila ang ila salakyan agod tamyawon ako, apang siempre, wala ako nagasapak. Kon kaisa nagakalipat man ako sa akon mga limitasyon​​—⁠subong sang tion nga naghutik ako sa akon bana tuhoy sa isa ka kompidensial nga butang. Sang nakita ko nga nagpalamula sia, nahibaluan ko nga matunog gali ang akon “hutik.”

Nagabulig man ang mga kabataan sa wala ginapaabot nga mga paagi. Sa isa ka kongregasyon nga ginduaw namon sa nahauna nga tion, nasat-uman sang isa ka nuebe-anyos nga bata nga lalaki nga ang iban sa Kingdom Hall daw nagapangalag-ag makigsugilanon sa akon, kag nagdesisyon sia nga dapat may himuon sia sa sini. Nagpalapit sia sa akon, gin-uyatan ang akon kamot, ginguyod ako sa tunga sang Kingdom Hall, kag nagsinggit sing matunog, “Ginapakilala ko sa inyo si Irene​​—⁠bungol sia!” Ang mga nagtipon didto nagpalapit sa akon kag nagpakilala sang ila kaugalingon.

Samtang ginaupdan ko ang akon bana sa sirkito nga hilikuton, ang akon mga abyan nagdamo. Tuhay gid ang akon pagkabuhi karon sangsa mga tinuig nga nagbatyag ako nga napain kag nagaisahanon! Sugod sang gab-i nga gintunghol nanday Colette kag Hermine ang malip-ot nga sulat sa akon, nabatyagan ko ang gahom sang pag-abyanay kag nakilala ko ang mga tawo nga nangin tuman ka pinasahi sa akon. Labaw sa tanan, nakilala ko si Jehova, ang pinakahamili gid nga Abyan. (Roma 8:​38, 39) Ginbag-o gid sadtong malip-ot nga sulat ang akon kabuhi!

[Retrato sa pahina 24]

Madumduman ko ang tunog sang akon paborito nga hampanganan

[Mga retrato sa pahina 25]

Sa ministeryo kag upod kay Harry nga akon bana