Magdiretso sa kaundan

Magdiretso sa listahan sang kaundan

Pabakura ang Inyo mga Kamot

Pabakura ang Inyo mga Kamot

 Pabakura ang Inyo mga Kamot

SA Biblia, ang kamot ginasambit sing kapin sa 1,800 ka beses. Ang mga idiom ukon malaragwayon nga mga pulong nga nagadalahig sa kamot ginagamit sa nanuhaytuhay nga paagi. Halimbawa, ang matinlo nga kamot nagapakita sing pagkawala sing sala. (2 Samuel 22:21; Salmo 24:​3, 4) Ang paghumlad sa kamot nagakahulugan sing pagkaalwan sa iban. (Deuteronomio 15:11; Salmo 145:16) Ang isa nga nagarisgo sang iya kabuhi ginasiling nga nagabutang sang iya kalag sa iya kamot. (1 Samuel 19:⁠5) Ang pagluya sang kamot nagakahulugan sing pagluya sang buot. (2 Cronica 15:⁠7) Kag ang pagpabakod sang kamot amo ang pagpalig-on kag pagpakusog para sa paghikot.​​—⁠1 Samuel 23:16.

Sa karon kinahanglanon gid nga pabakuron naton ang aton mga kamot. Nagakabuhi kita sa “makahalanguyos nga mga tion nga mabudlay pakigbagayan.” (2 Timoteo 3:⁠1) Kon maluyahan kita sing buot, ang huyog sang tawo amo ang pag-untat, ang pagpaluya sang aton mga kamot. Kinaandan na nga makita ang mga tin-edyer nga nagauntat sa pag-eskwela, ang mga bana nga nagabiya sa ila pamilya, kag ang mga iloy nga nagapabaya sa ila mga kabataan. Subong mga Cristiano, kinahanglan pabakuron naton ang aton mga kamot agod mabatas ang mga pagtilaw nga ginaatubang naton sa aton pag-alagad sa Dios. (Mateo 24:13) Sa paghimo sini, ginapahalipay naton ang tagipusuon ni Jehova.​—⁠Hulubaton 27:11.

Kon Paano Ginapabakod ang mga Kamot

Dapat pabakuron sang mga Judiyo sang panahon ni Esdras ang ila mga kamot agod matapos ang pagtukod liwat sa templo ni Jehova sa Jerusalem. Paano ginpabakod ang ila mga kamot? Ang rekord nagasiling: “Ginhiwat nila ang kapiestahan sang tinapay nga walay tapay sing pito ka adlaw nga may kasadya; kay si Jehova nagpasadya sa ila, kag ginpaliso niya ang tagipusuon sang hari sang Asiria sa ila agod pabakuron ang ila mga kamot sa buluhaton sa balay sang matuod nga Dios, ang Dios sang Israel.” (Esdras 6:22) Maathag nga paagi sa iya aktibo nga kusog gintandog ni Jehova ang “hari sang Asiria” agod tugutan ang katawhan sang Dios nga magbalik, kag ginpahulag Niya ang panimuot sang mga tawo, amo nga natapos nila ang buluhaton nga ila ginsugdan.

Sang ulihi, sang ang mga pader sang Jerusalem kinahanglan nga kay-uhon, ginpabakod ni Nehemias ang mga kamot sang iya mga kauturan para sa buluhaton. Aton mabasa: “Ginsugiran ko sila tuhoy sa kamot sang akon Dios, kon daw ano ini ka maayo sa akon, kag subong man tuhoy sa mga pulong sang hari nga ginsiling niya sa akon. Sa sini nagsiling sila: ‘Magtindog kita kag magtukod kita.’ Gani ginpabakod nila ang ila mga kamot para sa maayo nga buluhaton.” Bangod napabakod ang ila mga kamot, natukod liwat ni Nehemias kag sang iya mga kaupod nga mga Judiyo ang mga pader sang Jerusalem sa sulod sang 52 lamang ka adlaw!​—⁠Nehemias 2:18; 6:​9, 15.

Sing kaanggid, ginapabakod man ni Jehova ang aton mga kamot sa pagbantala sing maayong balita tuhoy sa Ginharian. (Mateo 24:14) Ginahimo niya ini paagi sa ‘pagsangkap sa aton sa tagsa ka maayong butang agod himuon ang iya kabubut-on.’ (Hebreo 13:21) Ginhatagan niya kita sing de-kalidad gid nga mga galamiton. May Biblia kita kag pasad-sa-Biblia nga mga libro, magasin, brosyur, tract, kag audio kag video nga mga rekord nga magamit naton sa paglab-ot sa mga tawo sa bug-os nga kalibutan. Sa katunayan,  ang aton mga publikasyon matigayon sa kapin sa 380 ka lenguahe. Dugang pa, paagi sa mga miting sa kongregasyon, mga asambleya, kag mga kombension, ginatudluan kag ginahanas kita ni Jehova kon paano gamiton ining maayo nga mga galamiton sa pagtuman sang aton ministeryo.

Bisan pa ginapabakod ni Jehova ang aton mga kamot sa madamo gid nga paagi, ginapaabot man niya nga magpanikasog kita. Dumduma ang ginsiling ni manalagna Eliseo kay Hari Jehoas, nga nagpangayo sing bulig kay Eliseo sa pagpakig-away batok sa mga nagsalakay nga Sirianhon. Ginsilingan ni Eliseo ang hari nga magkuha sing pila ka baslay kag itibsok ini sa duta. Ang rekord sa Biblia nagasiling: “Nagtibsok sia sing tatlo ka beses kag nag-untat. Kag ang tawo sang matuod nga Dios nagsingkal sa iya; gani nagsiling sia: ‘Dapat kuntani lima ukon anom ka beses ang pagtibsok! Sa amo pat-od nga mapukan mo ang Siria tubtob nga mapapas, apang karon tatlo ka beses nga pukanon mo ang Siria.’ ” (2 Hari 13:​18, 19) Bangod wala magpanikasog sing makugi si Jehoas, limitado lamang ang iya kadalag-an sa pagpakig-away sa mga Sirianhon.

Amo man nga prinsipio ang naaplikar sa aton kon luyag naton tumanon ang ginapahimo ni Jehova sa aton. Sa baylo nga kahangaw-an ang mga balagbag nga maatubang naton ukon kon daw mangin ano kabudlay ang hilikuton, dapat naton ini himuon sing makugi kag sing bug-os tagipusuon. Dapat naton pabakuron ang aton mga kamot kag magpangayo sing bulig kay Jehova.​—⁠Isaias 35:​3, 4.

Si Jehova Magapabakod sang Aton mga Kamot

Buligan gid kita ni Jehova kag pabakuron niya ang aton mga kamot sa paghimo sang iya kabubut-on. Siempre, indi magahimo sing milagro ang Dios kag himuon ang tanan nga butang para sa aton. Ginapaabot niya nga himuon naton ang aton bahin​—⁠pagbasa sing Biblia adlaw-adlaw, paghanda kag pagtambong sa mga miting sing regular, pagpakigbahin sa ministeryo sing masunson kon posible, kag ang pirme nga pagpangamuyo sa iya. Kon matutom kag mahugod naton nga ginahimo ang aton bahin samtang may kahigayunan kita, hatagan kita ni Jehova sing kusog sa paghimo sang iya ginapaabot sa aton.​—⁠Filipos 4:13.

Binagbinaga ang kahimtangan sang isa ka Cristiano nga namatyan sang asawa kag iloy sa isa lang ka tuig. Ginasakitan pa sia sang ginbiyaan sang iya umagad nga babayi ang iya anak kag nagbiya sa Cristianong dalanon sang pagkabuhi. “Natun-an ko nga indi naton mapili ang aton pagtilaw, ukon kon san-o ini mahanabo ukon kon daw ano ini kasunson,” siling sini nga utod. Paano sia nakatigayon sing kusog agod makapadayon? “Ang pangamuyo kag ang personal nga pagtuon amo ang nakabulig sa akon agod makalampuwas. Kag ang suportar sang akon espirituwal nga mga kauturan nakalugpay gid sa akon. Labaw sa tanan, narealisar ko ang importansia sang pagpalambo sing maayo nga kaangtanan kay Jehova antes mag-utwas ang mabudlay nga mga kahimtangan.”

Ano man ang imo maeksperiensiahan sa kabuhi, mangin determinado nga magsalig sing bug-os kay Jehova kag panginpuslan ang tanan niya nga mga aman para sa pagpabakod sang imo mga kamot. Nian makaalagad ka sing maayo gid kay Jehova kag sa amo magahatag sing kadayawan kag kadungganan sa iya hamili nga ngalan.​​—⁠Hebreo 13:15.

[Retrato sa pahina 31]

Bangod wala sia magpanikasog sing makugi, limitado lamang ang kadalag-an ni Jehoas sa pagpakig-away batok sa mga Sirianhon