Magdiretso sa kaundan

Magdiretso sa listahan sang kaundan

“Tatapa Ninyo ang Panong sang Dios”

“Tatapa Ninyo ang Panong sang Dios”

 “Kari Kamo sa Akon, . . . kag Paumpawan Ko Kamo”

“Tatapa Ninyo ang Panong sang Dios”

“Yara kamo pirme agod mamati kag magpaambit sing mga pulong gikan sa Biblia nga nagapalig-on sa amon.”​​—⁠Pamela.

“Salamat sa tanan nga ginahimo ninyo para sa amon tanan. Daku gid ini nga butang sa amon.”​​—⁠Robert.

NAPAHULAG si Pamela kag si Robert nga isulat ining mga pulong sang pag-apresyar sa Cristianong mga gulang sa ila mga kongregasyon. Ang iban pa nga mga alagad sang Dios sa bug-os nga kalibutan nagapasalamat man sa dalayon nga suporta kag pag-atipan nga ginabaton nila gikan sa mga ‘nagatatap sa panong sang Dios.’ (1 Pedro 5:⁠2) Sa pagkamatuod, ginapasalamatan sang katawhan ni Jehova ang madamo nga mga butang nga ginahimo sang mga gulang para sa ila kag ang paagi nga ginahimo nila ini.

“Madamo Pirme sing Ginahimo”

Madamo nga mga salabton ang ginatugyan sa Cristianong mga gulang. (Lucas 12:48) Nagahanda sila sing mga pamulongpulong para sa kongregasyon kag nagapakigbahin sa dayag nga pagbantala sing maayong balita sang Ginharian sang Dios. Ang ila mga katungdanan nagalakip sang pagduaw sa mga masigkatumuluo. Ginahatagan sing tion sang mga gulang ang mga nagakinahanglan sing pinasahi nga igtalupangod​​—⁠ang mga tigulang kag ang iban pa⁠​—⁠nga wala ginapatumbayaan ang espirituwal kag materyal nga kaayuhan sang ila kaugalingon nga mga pamilya. (Job 29:12-​15; 1 Timoteo 3:​4, 5; 5:⁠8) Ang iban nga mga gulang nagabulig sa pagpatindog sing mga Kingdom Hall. Ang iban pa gid nagapangalagad sa mga Hospital Liaison Committee ukon mga katapo sang mga Patient Visitation Group. Kag madamo sa ila ang nagaboluntaryo sa mga asambleya kag mga kombension. Huo, “madamo sing ginahimo [ang mga gulang] sa hilikuton sang Ginuo.” (1 Corinto 15:58) Indi katingalahan nga ining mapisan nga mga gulang ginaapresyar gid sang mga ginaatipan nila!​​—⁠1 Tesalonica 5:​12, 13.

Makapalig-on ang mga gulang nga regular nga nagaduaw sa mga masigka-Cristiano sa ila puluy-an ukon sa iban nga duog agod pabakuron sila sa espirituwal. “Kon indi bangod sa mahigugmaon nga suporta kag pagpalig-on sang mga gulang,” siling ni Thomas, nga nagdaku nga wala sing amay sa isa ka puluy-an, “sa banta ko wala ako karon nagaalagad kay Jehova subong isa ka bug-os tion nga ministro.” Madamo nga mga pamatan-on nga nagdaku sa solo sing ginikanan nga mga pamilya ang nagabaton nga ang igtalupangod nga ginpakita sa ila sang mga gulang nakabulig sa ila sa pagpalambo sing personal nga kaangtanan sa Dios.

Ginapabaloran man sang mga tigulang sa kongregasyon ang mga pagduaw sang mga gulang. Sa tapos maduaw sang duha ka gulang ang isa ka misyonero nga mag-asawa nga nagapangidaron sing otsentahon, sila nagsulat: “Luyag namon ipabutyag ang amon apresasyon  sa inyo ginaabiabi gid nga pagduaw. Sang makahalin na kamo, ginbasa namon liwat ang mga kasulatan nga ginbinagbinag ninyo upod sa amon. Indi gid namon malipatan ang inyo makapalig-on nga mga pulong.” Ang 70-anyos nga balo nga babayi nagsulat sa mga gulang: “Nagapangamuyo ako kay Jehova nga buligan ako, kag ginpadala niya kamo nga duha sa akon puluy-an. Ang inyo pagduaw isa ka pagpakamaayo gikan kay Jehova!” Nakabenepisyo ka bala sining karon lang gikan sa pagduaw sang mga gulang sa inyo kongregasyon? Sa pagkamatuod, ginaapresyar naton tanan ang ila mga panikasog nga tatapon ang panong nga gintugyan sa ila!

Mga Manugbantay nga Nagailog sa Dios kag kay Cristo

Si Jehova isa ka mahigugmaon nga Manugbantay. (Salmo 23:​1-4; Jeremias 31:10; 1 Pedro 2:25) Si Jesucristo isa man ka talalupangdon nga espirituwal nga Manugbantay. Sa katunayan, ginatawag sia nga “maayong manugbantay,” “daku nga manugbantay,” kag “pangulo nga manugbantay.” (Juan 10:11; Hebreo 13:20; 1 Pedro 5:⁠4) Paano si Jesus nakig-angot sa mga maluyag mangin mga disipulo niya? Mahigugmaon nga gin-agda niya sila: “Kari kamo sa akon, kamo tanan nga ginabudlayan kag ginabug-atan, kag paumpawan ko kamo.”​​—⁠Mateo 11:28.

Nagapanikasog man karon ang mga gulang nga hatagan ang panong sing kaumpawan kag proteksion. Ini nga mga lalaki nangin “subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga lamgod.” (Isaias 32:⁠2) Ining mainayuhon nga mga manug-amlig nagadala sing kaumpawan, ginatahod sang panong, kag ginakahamut-an sang Dios.​​—⁠Filipos 2:​29; 1 Timoteo 5:⁠17.

Mapuslanon nga Suporta Gikan sa Ila Asawa

Ginapasalamatan sang katawhan sang Dios ang Cristianong mga gulang kag ang mahigugmaon nga suporta nga ginabaton sini nga mga lalaki gikan sa ila asawa. Ang pagkamasuportahon masami nga nagakinahanglan sing mga pagsakripisyo sa bahin sini nga mga babayi. May mga tion nga yara sila sa puluy-an samtang ang ila bana nagaatipan sa kongregasyon ukon nagaduaw sa mga utod. Kon kaisa, ang personal nga mga butang nga ginplano sing maayo ginapaisol anay bangod sang hilingagawon nga problema nga nag-utwas sa kongregasyon. “Walay sapayan sini,” siling ni Michelle, “kon makita ko ang akon bana nga masako gid sa paghanda para sa mga miting ukon sa pagduaw sa mga utod, ginatandaan ko gid nga ginahimo niya ang hilikuton ni Jehova, kag ginatinguhaan ko nga suportahan sia sa masarangan ko.”

Si Cheryl, nga asawa man sang isa ka gulang, nagsiling: “Nahibaluan ko nga luyag mahambal sang mga utod sa kongregasyon ang mga gulang, kag luyag ko nga batyagon nila nga makapalapit sila sa akon bana sa bisan anong tion nga kinahanglan nila sia.” Ang masuportahon nga mga babayi, subong nanday Michelle kag Cheryl, kinabubut-on nga nagasakripisyo agod nga maatipan sang ila bana ang mga karnero sang Dios. Ginaapresyar gid ang mga asawa sang mga gulang bangod sang ila pagkamasuportahon.

Apang, indi dapat pagkalimtan sang isa ka masako nga gulang ang espirituwal kag iban pa nga mga kinahanglanon sang iya asawa kag mga kabataan. Ang isa ka may asawa nga gulang dapat “hilway sa panumbungon, bana sang isa ka asawa, nga may tumuluo nga mga kabataan nga wala mapaidalom sa sumbong nga mapinatuyangon ukon magamo.” (Tito 1:⁠6) Dapat niya atipanon ang iya pamilya sa diosnon nga paagi nga ginapatuman sang Biblia sa Cristianong mga manugtatap.​​—⁠1 Timoteo 3:​1-7.

Para sa isa ka masako nga gulang, bilidhon gid ang isa ka masuportahon nga asawa! Amo sini ang ginabatyag sang madinumdumon nga mga gulang nga may asawa. Subong gid ini sang ginasiling sang Biblia: “Nakasapo bala ang isa sing maayo nga asawa? Nakasapo sia sing isa ka maayong butang.” (Hulubaton 18:22) Sa pulong kag sa buhat, ginapakita sini nga mga gulang ang tinagipusuon nga apresasyon sa ila asawa. Wala labot sa hanuot nga pagpangamuyo kag makalilipay nga pagtuon sing tingob, ining Cristiano nga mga mag-asawa nagapain sing tion sa paghimo sing makalilipay nga mga butang subong sang paglakatlakat sa higad sang baybay, pagpanglakaton sa kakahuyan, ukon pagdayandayan sa isa ka parke. Huo, nalipay ang mga gulang nga atipanon sing mahigugmaon ang ila asawa.​​—⁠1 Pedro 3:7.

Ang mga gulang nga di-makagod nga nagabantay sa panong sang Dios nagahatag sing espirituwal nga paumpaw sa katawhan ni Jehova. Matuod gid nga sila “dulot nga mga lalaki,” isa ka pagpakamaayo sa kongregasyon!​​—⁠Efeso 4:​8, 11-​13.