Magdiretso sa kaundan

Magdiretso sa listahan sang kaundan

Ang mga Kingdom Hall Bukas Para sa Tanan

Ang mga Kingdom Hall Bukas Para sa Tanan

 Report sang mga Manugbantala sang Ginharian

Ang mga Kingdom Hall Bukas Para sa Tanan

SAMTANG ginahanas ang iya mga disipulo para sa dayag nga ministeryo, si Jesucristo nagpalig-on sa ila nga ‘magbantala gikan sa mga atop sang balay.’ (Mateo 10:27) Huo, dapat nila himuon ang ila Cristianong ministeryo sing dayag, nga makita sang publiko. Paagi sa pag-aplikar sini nga laygay, ang hilikuton sang mga Saksi ni Jehova ginahimo man sing dayag. Bangod sini nga pagkanadayag, nalandas sang mga Saksi ang mga pagpamatok kag natigayon nila ang kalahamut-an nga igtalupangod.

Walay sapayan nga ang mga miting sa kongregasyon sang mga Saksi ni Jehova bukas sa publiko, ang iban nga mga tawo nagapangalag-ag sa pagsulod sa Kingdom Hall bangod sang diskriminasyon. Matuod ini sa Finland. Ang iban nagapangalag-ag gid sa pagkadto sa bag-o nga mga lugar. Kon ang isa ka Kingdom Hall ginapatindog ukon ang isa ka tilipunan ginapakay-⁠o, masami nga ginahimo ang open house ukon ang isa ka kahimusan diin ang mga kaingod ukon ang bisan sin-o nga interesado ginaagda sa pagduaw sa sini. Mahimo himuon ang isa ka pinasahi nga panikasog agod agdahon ang mga kaingod nga magduaw sa Kingdom Hall kag mangin pamilyar sa hilikuton sang mga Saksi ni Jehova.

Sa isa ka lugar, ang mga Saksi naghimos sing isa ka kampanya sa magasin sa adlaw man nga ginhimo nila ang open house sa ila bag-o nga Kingdom Hall. Nasugilanon sang duha ka Saksi ang isa ka tigulang nga lalaki nga nagsiling nga nanamian sia sa pagbasa sing Lalantawan kag Magmata! nga mga magasin. Ginsugiran sia sang mga utod tuhoy sa open house kag nagsiling nga handa sila nga paupdon sia sa Kingdom Hall. Ang lalaki nagsiling nga nalipay gid sia sa pag-upod sa ila. Ang iya asawa, nga nagapamati sa paghambalanay, nagsinggit, “Maupod man ako!”

Sang makasulod sa Kingdom Hall, ang lalaki nanghulonghulong kag nagsiling: “Indi gali ini madulom. Matahom gid ini kag masanag. May nagsiling sa akon nga ang Kingdom Hall madulom kuno!” Ang mag-asawa nagtener sing madugaydugay kag nagpangabay sing pila ka literatura nga nadispley.

Luyag sang isa ka kongregasyon nga ipaanunsio sa lokal nga pamantalaan ang open house sa okasyon sang dedikasyon sang ila Kingdom Hall. Sang mabaton ang anunsio tuhoy sa okasyon, ang editor in chief nagpanugda nga isa ka artikulo ang dapat isulat tuhoy sini. Nagpasugot ang mga utod, kag pagligad sang pila ka tion, isa ka paborable nga tunga-sa-pahina nga artikulo ang nagguwa sa pamantalaan, nga nagasugid tuhoy sa okasyon kag nagalaragway sang mga hilikuton sang lokal nga kongregasyon sang mga Saksi ni Jehova.

Sang mabalhag ang artikulo, nasugilanon sang isa ka tigulang nga Saksi nga babayi ang iya kaingod nga nagsiling sa iya: “May matahom nga artikulo tuhoy sa mga Saksi ni Jehova sa pamantalaan karon nga adlaw!” Ang sister nagpanaksi sa iya kag sang ulihi napahamtangan sia sing brosyur nga Jehovah’s Witnesses in the Twentieth Century.

Wala labot nga ginaklaro sini ang sayop nga mga ideya tuhoy sa mga Saksi ni Jehova, ang subong sini nga mga kahimusan may kaangtanan sa mga open house kag mga programa sa dedikasyon sa bag-o nga mga Kingdom Hall nagpahulag sa mga manugbantala paagi sa pagpalig-on sa ila nga agdahon ang madamo pa nga tawo sa pagtambong sa mga miting. Huo, sa madamo nga kadutaan, pati na sa Finland, nahibaluan sang mga tawo nga ang mga Kingdom Hall sang mga Saksi ni Jehova bukas para sa tanan.